Hiling Pomad blong Fasin blong Fogiv

Evri samting we i blong God i gat lav, laet mo trutok. Be yet olsem ol man, yumi stap laef long wan wol we i foldaon, samtaem i fulap wetem tudak mo fasin blong stap konfius. Hem i no wan sapraes se bae yumi mekem ol mistek, ol samting agensem ol nara man, mo mekem ol sin. From hemia, i nogat wan sol we i laef naoia we bae i no harem nogud from ol nogud aksen blong wan narafala man. Hemia i wan samting we bae yumi evriwan i fesem.

Tangkyu we, God, long lav mo sore we Hem i gat from ol pikinini blong hem, i bin rere long wan rod blong helpem yumi fesem ol rafraf eksperiens long laef ia. Hem i bin givim wan rod we evriwan we oli foldaon long ol rabis fasin blong ol narafala man, bae oli save fri. Hem i bin tijim se yumi save fogiv! I nomata se yumi bin harem nogud finis wan taem, yumi no nid blong harem nogud nambatu taem bakegen taem yumi stap hevi wetem ol fasin blong no laekem man, o kros long man. !Yumi save fogiv, mo afta bae yumi fri!

Plante yia i pas, taem mi bin stap fiksim fanis, wan smol pis wud i go insaed long fingga blong mi. Mi bin traem smol taem blong karem aot smol pis wud ia mo mi ting se i bin kamaot, be no. Taem i pas, mo skin i gru ova long smol pis wud ia, i mekem se fingga blong mi i solap smol. Mi no laekem mo samtaem i so tumas.

Sam yia i pas, mi disaed blong mekem wan samting long hem. Mi bin rabem wan pomad nomo i go long ples we i solap smol ia afta kavremap wetem bandej. Mi ripitim olsem plante taem. Bae yu no bilivim sapraes blong mi wan dei, taem mi tekemaot bandej ia, smol pis wud ia i kamaot long fingga blong mi.

Pomad ia i mekem skin i sopsop mo i mekem wan rod blong samting ia we mi stap harem i so tumas blong plante yia, i save kamaot. Taem smol pis wud ia i kamaot, fingga blong mi i hil kwiktaem nomo, mo kasem tedei, bae yu no luksave se mi bin kasem wan kil.

Long semak fasin ia, wan hat we i no save fogiv i stap holemtaet plante harem nogud we i no nid. Taem yumi yusum pomad blong Atonmen blong Sevya we i save givim hilling, bae Hem i mekem hat blong yumi i sopsop mo helpem yumi blong jenis. Hem i save hilim ol sol we i gat soa, i kam oraet bakegen (luk long Jekob 2:8).

Mi mi biliv se plante long yumi i wantem fogiv, be yumi luk se i had tumas blong mekem. Taem yumi pas tru long wan taem we wan man i mekem nogud long yumi, yumi kwik nomo blong talem se, “Mania i no stret. Hem i mas kasem panis. ?Wea nao jastis?” Yumi tingting rong se sapos yumi fogivim hem, bae hem i no save kasem panis we hem i sud kasem.

Hemia i no tru. Bae God i givim panis we i stret long evriwan, from sore i no save stilim jastis (luk long Alma 42:25). God i promesem yumi wetem lav se: “Livim jajmen long mi, from se hem i blong mi mo bae mi mi pem bak. [be letem] pis i stap wetem yu” (D&K 82:23). Buk blong Momon profet Jekob hem i promesem tu se God “bae i leftemap tingting blong yufala long ol hadtaem blong yufala, mo bae hem i toktok from ol stamba tingting blong yufala, mo sendem daon jastis long olgeta we oli lukaotem blong smasem gud yufala” (Jekob 3:1).

Olsem ol viktim, sapos yumi stap fetful, bae yumi harem gud blong save se God bae i pemaot evri nogud fasin ia we yumi stap harem nogud from. Elda Josef B. Wetlin i bin talem se: “Lod i pem bak evri samting we olgeta we oli fetful oli lusum… Evri wota blong ae we i ron, bae i kam bak handred taem wetem glad mo tangkyu.”¹

Taem yumi traehad blong fogivim ol narafala man, letem yumi tingbaot se yumi evriwan i stap wantem gro long saed blong spirit, be long ol defdefren level. Hem i isi blong luk ol jenis we i stap hapen long saed blong bodi, be i had blong luk sapos spirit blong yumi i stap gro.

Wan fasin blong stap fogivim narafala man, hem i blong traem blong luk olgeta olsem we God i luk olgeta. Samtaem bae God i karemaot keten mo blesem yumi wetem presen blong save lukluk insaed long hat, sol, mo spirit blong wan narafala man we i mekem yumi harem nogud. Taem yumi gat lukluk olsem, i save mekem yumi gat wan bigfala lav long man ia.

Skripja i tijim yumi se lav we God i gat blong ol pikinini blong Hem i stret mo gud. Hem i save ol gud samting we oli save mekem, i nomata long wanem we oli bin mekem bifo. Aot long evri stori, i nogat wan enemi we i no laekem ol man blong Jisas Kraes bitim Sol blong Tasus. Be yet taem we God i soem laet mo trutok long Sol, i neva gat wan disaepol blong Sevya we i moa fetful, i givim ful hat blong hem, o i nogat fraet olsem Sol. Sol i kam Aposol Pol. Laef blong hem i givim wan gudfala eksampol olsem wanem God i no stap lukluk long yu olsem we yu stap naoia, be hem i luk yu olsem we yu save kam. Yumi evri wan i gat, long ol laef blong yumi wanwan, ol fasin olsem Sol blong kam ol man olsem Pol. ?Yu save tingbaot olsem wanem ol famli, ol komuniti mo wol i save jenis sapos yumi evri wan i traem blong luk long ol narafala man olsem we God i luk long yumi?

Plante taem yumi stap lukluk long man we i mekem yumi harem nogud olsem we yumi stap luk wan pis aes we i brok aot i stap flot blong solwota—yumi stap luk antap nomo, be yumi no save luk andanit. Yumi no save evri samting we i stap happen long laef blong wan man. Yumi no save wanem oli bin go tru, yumi no save ol hadtaem blong olgeta; yumi no save ol harem nogud we oli gat. Ol brata mo sista, plis no tingting rong. Blong fogiv i no minim se yu agri wetem hem. Yumi no save letem ol nara man i mekem nogud long yumi from ol traehad, ol harem nogud, o ol wiknes blong olgeta. Be yumi savekasem moa save mo pis, taem lukluk blong yumi i go long wan moa.

I tru se olgeta we oli no gro long saed blong spirit bae oli mekem sam rabis mistek—be yet, yumi no mas lukluk man long rabis saed nomo. God nomo hem i jaj we i stret mo gud. Hem i save lukluk i go andanit moa. Hem i save evri samting mo i luk evri samting (luk long 2 Nifae 2:24). Hem i talem, “Mi, Lod, bae mi fogivim huia we bae mi fogivim, be yu yu nid blong fogivim evri man” (D&K 64:10).

Kraes Hemwan, taem we oli jajem nogud Hem, afta oli kilim nogud Hem, mo oli livim Hem i stap safa long kros, long taem ia hem i talem “Papa, plis yu fogivim olgeta ya, from se oli no save wanem samting ya we oli stap mekem” (Luk 23:34).

Long ol sotfala lukluk blong yumi, samtaem bae yumi faenem se i isi blong tanem bak long olgeta we oli no mekem samting semak o no tingting semak olsem yumi. Yumi save gat ol fasin agensem olgeta from ol krangke tingting olsem; from se oli stap sapotem ol defren tim blong spot, oli gat ol defren tingting long saed blong politik o oli joenem ol defren jos.

Presiden Rasel M. Nelson i bin givim wan waes kaonsel taem hem i talem se, “Ol janis blong stap lesen long ol defren relijin o ol tingting blong politik i save openem maen mo givim moa janis blong lanem samting.”²

Buk blong Momon i tokbaot wan taem we “ol man blong jos oli bin stat blong ting hae long olgeta … mo oli bin stat blong gat tingting ia se ol man oli no mas hae moa long olgeta mo oli bin stat blong givim hadtaem long olgeta we oli no biliv long ol semak wantem o glad olsem blong olgeta” (Alma 4:8). Letem yumi tingbaot se God i no lukluk long kala blong yunifom o pati blong politik o wanem jos yu joenem naoia. Be, olsem we Amon i talemaot, “[God] i lukluk daon long ol pikinini blong man; mo hem i save evri tingting mo evri samting we i stap insaed long hat” (Alma 18:32). Ol brata mo sista, long ol kompetisen blong laef, sapos yumi win, letem yumi win wetem gladhat. Sapos yumi lus, letem yumi lus wetem gladhat. From se sapos yumi laef wetem lav mo sore long ol narafala man, bae yumi kasem gladhat long las dei.

Semmak olsem we yumi ol viktim blong ol rong blong ol narafala man, samtaem yumi tu yumi mekem ol nara man oli harem nogud. Yumi evri wan i no stret mo yumi nidim gladhat, sore, mo fogivnes. Yumi mas tingbaot se fogivnes from ol sin mo ol samting we yumi mekem i no stret i dipen long hao yumi stap jus blong fogivim ol narafala man. Sevya i talem se:

“Sapos yufala i stap fogivim ol man we oli stap mekem nogud long yufala, bae Papa blong yufala long heven bae i fogivim yufala tu:

“Be sapos yufala i no fogivim ol man we oli stap mekem nogud long yufala, bambae Papa blong yufala i no save fogivim yufala form ol sin blong yufala” (Matiu 6: 14–15).

Aot long evri samting we Sevya i save talem long stret fasin blong prea, we i sot wan nomo, hem i gud blong luk se Hem i jus blong ingkludum “Yu fogivim mifala from ol sin blong mifala olsem we mifala i stap fogivim ol man we oli mekem nogud long mifala” (Matiu 6:12; 3 Nifae 13:11).

Fogivnes hem i stamba risen from wanem God i sendem Pikinini Boe blong Hem i kam, from hemia, letem yumi glad long ofa blong Hem blong hilim yumi evriwan. Atonmen blong Sevya hem i no blong olgeta nomo we oli nid blong sakemaot sin; hem i blong olgeta tu we oli nid blong fogiv. Sapos yu stap fesem wan had taem blong fogivim wan nara man, askem God blong helpem yu. Fogivnes hem i wan gudfala prinsipol we i gat hiling. Yumi no nid blong stap wan viktim tu taem. Yumi save fogiv.

Mi talemaot witnes blong mi long lav blong God mo fasin blong Hem blong save wet long taem we hem i gat long evri pikinini blong Hem mo Hem i wantem yumi blong lavem ol narafala man olsem we Hem i lavem yumi (luk long Jon 15:9,12). Taem yumi mekem olsem bambae yumi kamaot long tudak blong wol ia i go long glori mo naesfala kingdom blong Hem long heven. Bae yumi fri. Long nem blong Jisas Kraes, amen.