Txais Tau Yexus Khetos lub Hwj Chim rau Hauv Peb lub Neej

Kuv cov kwv tij thiab cov muam, peb nyob hauv ib lub caij nyoog nyuaj heev. Tej teeb meem, kev ntxhov siab, thiab tej yam nyuaj los muaj ib puag ncig peb. Tus Cawm Seej twb paub ua ntej yuav muaj tej kev kub ntxhov no. Nws ceeb toom hais tias nyob hauv peb lub caij nyoog tus yeeb ncuab yuav txhaub tib neeg lub siab kom coj lawv mus ua yuam kev.¹ Tiam sis peb Leej Txiv Saum Ntuj Ceeb Tsheej tsis xav kom peb raug tej teeb meem thiab tej xem txheej hauv peb lub sawm fem peb tus kheej xwb.

Vajtswv hlub neeg ntiaj teb kawg li Nws thiaj li txib Nws Tib Leeg Tub² los pab peb.³ Thiab Nws Leej Tub, Yexus Khetos, txo Nws txoj sia rau peb. Nws ua li ntawd kom peb yuav txais tau Vajtswv lub hwj chim—lub hwj chim txaus kov yeej tej lub nra, tej teeb meem, thiab tej kev ntxias ntawm peb lub caij nyoog.⁴ Hnub no kuv xav hais lus txog qhov uas peb yuav tsum ua li cas kom txais tau tus Tswv thiab peb tus Xib Hwb, Yexus Khetos, lub hwj chim rau hauv peb lub neej.

Peb yuav tsum pib kawm txog Nws.⁵ Ib tug neeg uas tsis paub txais tsis taus kev cawm dim.⁶ Peb yim paub txog tus Cawm Seej txoj hauj lwm qhuab qhia thiab ntiag tug hauj lwm⁷—peb yim to taub Nws txoj lus qhuab qhia⁸ thiab tej yam uas Nws ua rau peb—ces ua rau peb yim paub tias nws muaj hwj chim pab tau peb lub neej.

Xyoo no, kuv thov kom cov tub hluas ntxhais hluas ntawm lub Koom Txoos muab ib feem ntawm lawv lub sij hawm txhua lub lim tiam fij tseg kom kawm txhua yam uas Yexus hais thiab ua raws li tau sau rau hauv cov txhooj vaj lug kub.⁹ Kuv caw lawv siv tej nqe vaj lug kub uas hais nyob hauv phau Topical Guide txog Yexus Khetos los ua lawv tus txheej txheem kawm txog Nws.¹⁰

Kuv twb hais kom lawv ua li ntawd vim kuv twb pib ua kuv tus kheej. Kuv tau nyeem thiab sau kab lus hauv qab txhua nqe uas hais txog Yexus Khetos, raws li tau hais nyob hauv 57 zaj lus piav thiab lub ntsiab lus hauv phau Topical Guide.¹¹ Thaum kuv nyeem tas lawm, kuv tus poj niam nug seb qhov kuv ua li no tau pab kuv li cas. Kuv qhia nws tias, “Kuv tsis yog neeg zoo li qub!”

Ua rau kuv muab siab npuab Nws ntxiv thaum kuv rov qab nyeem tus Cawm Seej tej lus hauv Phau Ntawv Maumoos txog Nws ntiag tug hauj lwm hauv lub ntiaj teb no. Nws tshaj hais tias:

“Kuv tau los rau hauv lub ntiaj teb los ua li Leej Txiv lub siab nyiam, vim kuv Txiv tau xa kuv los.

“Kuv Txiv tau xa kuv los xwv kom kuv yuav raug dai rau saum tus ntoo khaub lig.”¹²

Vim peb yog ib Tsoom Haiv Neeg Ntseeg hauv Hnub Nyoog Kawg, peb hais tias Nws ntiag tug hauj lwm yog Yexus Khetos txoj Kev Theej Txhoj, uas ua rau txhua tus yuav sawv rov los thiab txais tau txoj sia nyob mus ib txhis yog lawv hloov siab lees txim thiab ua raws li cov kab ke thiab tej kev khi lus.

Thaum peb hais txog tus Tswv txoj kev txi theej txhoj li no hais tias, “txoj Kev Theej Txhoj” los yog “txoj Kev Theej Txhoj lub hwj chim” los yog “siv txoj Kev Theej Txhoj” los yog “txoj Kev Theej Txhoj txhawb yus dag zog” ces peb tsis hais txog txoj lus qhuab qhia tag nrho. Tej yam uas peb hais li no ntshe ua rau peb muaj kev ntseeg tsis yog lawm thaum peb xav tias lub sij hawm uas Nws theej peb lub txhoj yog ib qho uas muaj sia thiab muaj peev xwm tsis yog los ntawm peb Leej Txiv Saum Ntuj Ceeb Tsheej thiab Nws Leej Tub, Yexus Khetos.

Raws li Leej Txiv txoj hau kev, tus Cawm Seej yog tus uas raug txom nyem. Tus Cawm Seej yog tus uas ua rau kev tuag tej hlua tu. Tus Cawm Seej yog tus uas them nqi rau peb tej kev txhaum thiab muab tej ntawd tshem mus yog tias peb hloov siab lees txim. Tus Cawm Seej yog tus uas cawm peb dim kev tuag ntawm sab cev nqaij daim tawv thiab sab ntsuj plig.

Tsis muaj ib yam hu ua “txoj Kev Theej Txhoj” uas tsom kwm peb, kho peb, zam txim pub rau peb, los yog muab hwj chim rau peb. Yexus Khetos yog lub hauv paus ntawm tej ntawd. Tej lus dawb ceev xwv li txoj Kev Theej Txhoj thiab txoj Kev Sawv Rov Los piav txog tej yam uas tus Cawm Seej ua, raws li Leej Txiv txoj hau kev, peb thiaj yuav muaj kev cia siab thaum ua neej hauv lub ntiaj teb no thiab txais tau txoj sia nyob mus ib txhis thaum yav tom ntej. Tus Cawm Seej txoj kev txi theej txhoj—qhov tseem ceeb tshaj plaws ntawm tag nrho tib neeg zaj keeb kwm—yog ib qho uas peb to taub zoo tshaj thaum peb hais thiab qhia meej tias yog los ntawm Nws.

Tus Yaj Saub Yauxej Xamiv hais tias tus Cawm Seej ntiag tug hauj lwm tseem ceeb npaum li cas thaum nws hais tias “cov hauv paus ntsiab cai ntawm peb txoj kev ntseeg yog zaj lus tim khawv ntawm cov Thwj Tim thiab cov Yaj Saub, txog Yexus Khetos, hais tias Nws tau tuag, tau raug muab faus, thiab tau sawv rov los hnub thib peb, thiab tau nce mus dua saum ntuj ceeb tsheej lawm; thiab tag nrho lwm yam uas hais txog peb txoj kev ntseeg ces yog kev txuas ntxiv rau qhov no xwb.”¹³

Tus Yaj Saub zaj lus no yog qhov uas ua rau 15 tug yaj saub, cov pom tau, thiab cov txais kev tshwm sim xav sau thiab sau npe rau lawv zaj lus tim khawv kom nco txog tus Tswv txoj kev yug los 2000 xyoo dhau los. Zaj lus tim khawv tseem ceeb ntawd hu ua “Tus Khetos uas Muaj txoj Sia Nyob.”¹⁴ Ntau tus mej zeej tau cim ntsoov tej lus tseeb uas nyob haud. Lwm tus tsis tshua paub tias muaj zaj lus ntawd. Thaum nej xav kawm ntxiv txog Yexus Khetos, kuv yaum kom nej kawm “Tus Khetos uas Muaj txoj Sia Nyob.”

Thaum peb siv sij hawm kawm txog tus Cawm Seej thiab Nws txoj kev txi theej txhoj, ua rau peb xav ua ib qho tseem ceeb ntxiv kom txais tau Nws lub hwj chim: peb xaiv kom ntseeg Nws thiab coj raws li Nws.

Yexus Khetos cov thwj tim tseeb yeej txaus siab sawv, hais lus, thiab ua txawv ntawm lwm tus tib neeg hauv lub ntiaj teb. Lawv tsis ntshai, rau siab, thiab ua siab loj. Kuv tau kawm txog cov thwj tim zoo li no thaum kuv mus ua hauj lwm hauv Mev Teb, nyob ntawd kuv ntsib cov nom tsoom fwv thiab cov thawj coj ntawm lwm txoj kev teev ntuj. Lawv txhua tus tau ua kuv tsaug rau peb cov mej zeej tej hauj lwm zoo kom muab kev sib yuav thiab tsev neeg nyob hauv lub teb chaws pov hwm thiab tshwj tseg.

Kev ua ib tug thwj tim uas muaj hwj chim zoo li lawv los tsis yog ib qho yooj yim los sis tsis yog ib qho yus lam ua xwb. Peb yuav tsum tsom ntsoov rau tus Cawm Seej thiab Nws txoj moo zoo. Yog ib qho nyuaj kom ntsia ntsoov Nws nrog txhua txoj kev xav.¹⁵ Tiam sis thaum peb ua li ntawd, peb tej kev ua xyem xyav thiab kev ntshai yuav ploj mus.¹⁶

Tsis ntev tas los kuv kawm txog ib tug Laurel uas tsis ntshai. Muaj neeg caw nws koom kev sib tw thoob lub xeev rau nws lub tsev kawm ntawv tib hmo thaum nws twb cog lus tias nws yuav koom ib txoj kev sib ntsib ntawm ceg txheem ntseeg lub Koom Haum Niam Tsev. Thaum nws kawm hais tias yog tib lub sij hawm thiab piav rau cov nom ntawm kev sib tw hais tias nws yuav tsum tawm kev sib tw ntxov me ntsis kom koom kev sib ntsib tseem ceeb, lawv qhia nws tias nws yuav raug tso tawm yog nws ua li ntawd.

Tus ntxhais hluas Laurel hauv hnub nyoog kawg no tau ua li cas? Nws twb ua raws li nws tau cog lus hais tias nws yuav koom lub Koom Haum Niam Tsev kev sib ntsib. Raws li lawv hais lawm, nws raug ntiab tawm ntawm kev sib tw thoob lub xeev ntawd. Thaum muaj neeg nug nws txog nws txoj kev txiav txim siab, nws teb hais tias, “Ces, lub Koom Txoos tseem ceeb dua, puas yog?”

Kev ntseeg Yexus Khetos ua rau peb xav ua tej yam uas ntshe peb ib txwm yuav tsis ua. Kev ntseeg ua rau peb xav ua tej yam uas ua rau peb txais tau Nws lub hwj chim ntxiv.

Peb kuj txais tau tus Cawm Seej lub hwj chim ntxiv nyob hauv peb lub neej thaum peb ua kev khi lus thiab ua raws nraim li tej kev khi lus ntawd. Peb tej kev khi lus khi peb rau Nws thiab muab Vajtswv lub hwj chim rau peb. Vim peb yog cov thwj tim uas rau siab ntseeg, peb hloov siab lees txim thiab coj raws li Nws ua kev cai raus dej. Peb taug txoj kev ua raws li peb tej kev khi lus kom txais tau lwm yam kab ke tseem ceeb ntxiv.¹⁷ Thiab zoo siab uas Vajtswv txoj hau kev twb npaj lawm kom muab cov koob hmoov ntawd rau cov poj koob yawm txwv uas tuag es tsis muaj cib fim txais tau hauv lub neej no.¹⁸

Cov txiv neej thiab cov poj niam uas ua raws li lawv tej kev khi lus yeej nrhiav kev kom tej yam ntawm lub ntiaj teb txhob ua rau lawv ceb thiaj li tsis muaj dab tsi tav lawv kev txais tau tus Cawm Seej lub hwj chim. Ib tug niam tsev rau siab ntseeg sau li no hais tias: “Lub sij hawm no muaj kev kub ntxhov thiab kev plhom sij. Peb tau koob hmoov vim peb paub txog txoj kev cawm seej ntxiv thiab cov yaj saub, cov thwj tim, thiab cov thawj coj txais kev tshoov siab kom pab coj peb txoj kev thiaj li pab tau peb paub ua li cas thaum raug tej kev kub ntxhov li no. Peb twb tsum tsis qhib xov tooj cua thaum sawv ntxov lawm. Tiam sis, peb mloog ib zaj lus los ntawm lub tuam rooj sab laj nyob hauv peb tus xov tooj txhua hnub thaum peb npaj rau ib hnub ntxiv.”

Ib yam ntxiv uas pab peb txais tau tus Cawm Seej lub hwj chim rau hauv peb lub neej yog kev ntseeg kom ncav tes rau Nws. Yog tias yuav ncav tes li no yus yuav tsum rau siab siv zog thiab tsom ntsoov.

Daim Duab

Tus poj niam uas kov tus Cawm Seej lub tw tsho

Nej puas nco qab zaj dab neeg hais txog tus poj niam uas raug txom nyem tau 12 xyoos uas muaj ib txoj kev mob heev?¹⁹ Nws muab siab rau ntseeg tus Cawm Seej, hais tias, “Yog kuv kov Yexus lub tw tsho, kuv tus mob yuav zoo.”²⁰

Tus poj niam uas rau siab ntseeg thiab tsom ntsoov yuav tsum ncav tes cuag nws ncav tau kom txais tau Nws lub hwj chim. Qhov uas nws ncav tes yog ib lub cim txog nws txoj kev ncav nws sab ntsuj plig.

Peb feem coob twb thov kawg siab kawg ntsws zoo li tus poj niam no hais tias: “Yog tias kuv ncav tau kom txais tau tus Cawm Seej lub hwj chim rau hauv lub neej, kuv yuav paub ua li cas rau kuv qhov teeb meem. Kuv yuav paub ua dab tsi. Thiab kuv yuav muaj lub hwj chim ua.”

Thaum nej ncav tes kom txais tau tus Tswv lub hwj chim hauv nej lub neej zoo ib yam li ib tug neeg uas poob deg muab nws txhais tes yoj mus los thiab nws huas pa, ces nej yuav txais tau Yexus Khetos lub hwj chim. Thaum tus Cawm Seej paub tias nej xav ncav cuag Nws tiag tiag—thaum Nws paub tias qhov uas nej lub siab xav tshaj txhua yam yog kom txais tau Nws lub hwj chim rau hauv nej lub neej—ces tus Vaj Ntsuj Plig Dawb Huv yuav coj nej kom nej paub tias nej yuav tsum ua li cas.²¹

Thaum nej ncav nej sab ntsuj plig kom tshaj qhov nej ib txwm ua, ces Nws lub hwj chim yuav los rau hauv nej.²² Ces nej yuav to taub lub ntsiab ntawm tej lus uas peb hu thaum peb hu zaj nkauj “Vajtswv tus Ntsuj Plig”:

Yexus Khetos txoj moo zoo yeej muaj Nws lub hwj chim puv npo, uas Vajtswv txhua tus tub thiab ntxhais txais tau yog lawv rau siab nrhiav. Kuv ua tim khawv tias thaum peb txais Nws lub hwj chim nyob hauv peb lub neej, Nws thiab peb yuav xyiv fab heev.²⁴

Vim kuv yog Nws ib tug tim khawv tshwj xeeb, kuv tshaj tawm tias Vajtswv muaj txoj sia nyob! Yexus yog tus Khetos! Yexus muab Nws lub Koom Txoos txum tim rov qab los rau lub ntiaj teb. Vajtswv tus yaj saub hauv lub ntiaj teb niaj hnub no yog Thawj Tswj Hwm Thomas S. Monson, tus uas kuv txhawb nqa kawg siab kawg ntsws. Kuv ua tim khawv, nrog kuv txoj kev hlub thiab foom koob hmoov rau nej txhua tus li no, los ntawm Yexus Khetos lub npe dawb ceev, amees.