Hais rau cov Phooj Ywg thiab cov uas Kawm txog lub Koom Txoos
Yog tias nej kam them tus nqi rau kev tshwm sim, cia li txo hwj chim, nyeem ntawv, thov Vajtswv, thiab hloov siab lees txim, lub ntuj ceeb tsheej yuav raug qhib plho thiab nej yuav paub hais tias Yexus yog tus Khetos.
Hnub Friday yav tav su, thaum lub Cuaj Hli Ntuj hnub tim 16, 1988, hauv lub tsev sib ntsib rau Pawg Ntseeg Vicente López hauv Buenos Aires, Argentina teb, kuv tau ua kev cai raus dej los ua ib tug mej zeej hauv Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Hnub ntawd, ib tug phooj ywg zoo, Alin Spannaus, muab kuv uas kev cai raus dej, thiab kuv zoo siab, tau kev kaj siab, thiab xav paub ntxiv.
Hnub no, kuv xav qhia nej txog ob peb yam uas kuv kawm thaum kuv los ua kev cai raus dej—tej zaj lus uas kuv cia siab hais tias yuav pab tau nej cov uas tsis yog mej zeej hauv lub Koom Txoos uas tab tom mloog cov lus no. Kuv thov kom nej tej siab yuav hnov tus Ntsuj Plig tej kev tshoov siab, ib yam li kuv tau hnov.
Yam thib Ib, Sib Sab Laj nrog cov Tub Txib
Vim li cas ib tug neeg uas tsis muaj teeb meem, kev xav tau, los sis lus nug ntau ntau thiaj yuav xav nrog cov tub txib tham thiab mloog lawv tej zaj lus qhia? Hais txog kuv mas twb yog kev hlub—kev hlub ib tug ntxhais hluas, ib tug ntxhais hluas hu ua Renee. Kuv nyiam nws heev, thiab yeej xav yuav nws ua poj niam. Nws yeej txawv dua cov thiab coj tej kev cai txawv dua lwm cov ntxhais hluas uas kuv paub. Tiam sis kuv txawm nyiam nws heev thiab tau thov nws yuav kuv ua nws tus txiv—tab sis mas nws tsis kam!
Kuv ntxhov siab heev. Kuv twb xav hais tias kuv haib heev! Kuv zoo nraug, muaj 24 xyoos, thiab twb kawm ntawv qib siab tas thiab muaj ib txoj hauj lwm zoo. Nws tsuas hais txog nws cov hom phiaj—uas yog yuav ib tug txiv uas yuav coj nws mus hauv lub tuam tsev, muaj ib tse neeg uas yuav nyob ua ke tas mus ib txhis—ces nws hais tias nws tsis kam yuav kuv. Kuv tseem xav nrog nws sib raug zoo, ces kuv thiaj hais tias kuv mam li ntsib cov tub txib. Qhov no puas yog ib lub ntsiab zoo kom mus ntsib cov tub txib? Rau kuv mas, yog ib lub ntsiab zoo tiag tiag.
Thaum kuv xub ntsib cov tub txib, kuv tsis to taub lawv tej lus, thiab hais qhov tseeb rau nej, tej zaum kuv tsis tshua mloog lawv tej lus. Kuv twb muab kuv lub siab kaw cia tsis xav tau ib txoj kev teev ntuj tshiab. Kuv tsuas xav qhia hais tias lawv hais yuam kev thiab kom Renee yuav tso siab rau kuv thiab kam yuav kuv.
Nim no kuv cov me nyuam twb mus ua thiab muaj ib co uas tab tom mus ua tub txib, thiab kuv to taub hais tias cov tub thiab ntxhais hluas txi ntau yam tsav thiaj tawm mus qhia Yexus Khetos txoj moo zoo. Nim no kuv tu siab vim thaum ntawd kuv tsis tshua mloog Txwj Laug Richardson, Txwj Laug Farrell, thiab Txwj Laug Hyland, lawv yog cov tub txib zoo kawg uas tau qhia kuv.
Ces los ntawm kuv thawj zaj lus qhia, kuv hais rau nej cov uas ua phooj ywg thiab kawm txog lub Koom Txoos: thaum nej ntsib cov tub txib, thov kom nej yuav ua tib zoo mloog lawv cov lus; lawv tab tom tso tej xyoo tseem ceeb hauv lawv lub neej tseg kom thiaj pab tau nej.
Yam thib Ob, Mus rau lub Koom Txoos
Thawj thawj zaug uas kuv mus koom lub Koom Txoos ib txoj kev sib ntsib, kuv tau hnov ntau lo lus uas kuv tsis to taub. Cov Beehive yog leej twg? Lub Pov Thawj Hwj Aloos yog dab tsi? lub Koom Haum Niam Tsev nev?
Yog hais tias nov yog thawj zaug uas koj mus koom lub Koom Txoos ib txoj kev sib ntsib thiab koj muaj ntsis ntxhov siab txog ib yam uas koj tsis to taub, tsis txhob txhawj! Thaum ntawd kuv tsis paub thiab. Tiam sis kuv tseem nco ntsoov kuv tej kev xav, txoj kev zoo siab thiab kev thaj yeeb nyab xeeb uas kuv tau hnov. Thaum ntawd kuv tsis tau paub, tiam sis tus Vaj Ntsuj Plig Dawb Huv tab tom ntxhi lus hauv kuv ob lub pob ntseg thiab rau kuv lub siab hais tias, “Qhov no muaj tseeb.”
Ces cia kuv muab tej no hais ua ib kab lus hais tias: Yog tias koj ntxhov siab, tsis txhob txhawj—nco qab ntsoov tej kev xav uas koj tau hnov; tej no yeej los ntawm Vajtswv los.
Yam thib Peb, Kev Nyeem Phau Ntawv Maumoos
Tom qab kuv ntsib cov tub txib ob peb zaug lawm, kuv tsis tau kawm pes tsawg. Kuv xav hais tias kuv tsis tau txais lus qhia hais tias txoj moo zoo muaj tseeb.
Muaj ib hnub, Renee nug kuv hais tias, “Koj puas tab tom nyeem Phau Ntawv Maumoos?”
Kuv teb hais tias, “Tsis tau.” Kuv xav tias kuv tab tom mloog cov tub txib cov lus—qhov ntawd tsis txaus los?
Nws kua muag poob los, es Renee qhia kuv tias nws paub tias Phau Ntawv Maumoos muaj tseeb thiab piav yog kuv xav paub seb puas muaj tseeb, kuv yuav tsum ua li cas—yeej yog muab nyeem ntag! Ces mam li nug!
Nyeem, ntsuam xav hauv nruab siab, thiab “thov Vajtswv, Leej Txiv uas Nyob Mus Ib Txhis, hauv Yexus Khetos lub npe, … nrog ib lub siab xav paub tiag tiag thiab muaj kev ntseeg Khetos” (Maulaunais 10:4) seb Phau Ntawv Maumoos puas muaj tseeb, seb lub Koom Txoos no puas muaj tseeb.
Ces zaj lus qhia thib peb, hais ib kab lus yog: Thaum nej txais tej yam no—Phau Ntawv Maumoos—thiab nej raug ntuas kom nyeem thiab nug Vajtswv seb tej no puas muaj tseeb, cia li ua li ntawd nawb!
Qhov Kawg, Kev Hloov Siab Lees Txim
Qhov kawg uas kuv xav piav rau nej yog txog kev hloov siab lees txim. Tom qab kuv twb kawm cov tub txib tej zaj lus qhia tas, kuv tseem tsis paub tseeb hais tias kuv yuav tsum hloov ib yam dab tsi hauv kuv lub neej. Twb yog Txwj Laug Cutler, ib tug tub txib hluas, uas ua siab loj uas tsis tshua txawj hais lus Mev, txawm muaj ib hnub nws los hais tias, “Joaquin, cia peb nyeem ua ke hauv Amas tshooj 42, thiab peb mam li tso koj lub npe rau hauv thaum peb nyeem tej nqe no.”
Kuv xav tias ua li ntawd tsis muaj qab hau, tiam sis kuv tau ua li Txwj Laug Cutler thov thiab tau nyeem nqes 1: “Thiab nim no, kuv tus me tub es [Joaquin], kuv paub tias tseem tshuav tej yam ntau ntxiv uas pheej ua rau koj lub siab txhawj, tej uas koj tsis to taub.” Aib yaub! Auj yauj! Phau ntawv no tab tom hais lus rau kuv.
Thiab peb nyeem hauv nqes 2: “Nim no saib seb, kuv tus me tub [Joaquin], kuv yuav piav tej yam no rau koj,” thiab ces tau piav txog qhov uas Adas Poob Los.
Ces hauv nqes 4: “Thiab peb pom li no, tias tau muab ib lub sij hawm pub rau [Joaquin] hloov siab lees txim.”
Peb maj mam nyeem tauj mus ntxiv, ib nqes dhau ib nqes, txog thaum peb txog peb nqes kawg. Kuv txawm hnov ib lub hwj chim loj kawg nkaus raug kuv. Phau ntawv no hais lus ncaj qha rau kuv, thiab kuv pib los kua muag thaum kuv nyeem hais tias, “Thiab nim no [Joaquin], kuv tus me tub, kuv xav kom koj tsis txhob cia tej yam no xeeb txob koj ntxiv lawm, thiab tsuas cia koj tej kev txhaum xeeb txob koj xwb, kom nrog qhov xeeb txob ntawd es yuav coj tau koj nqis los mus rau … txoj kev hloov siab lees txim” (nqes 29).
Nim no kuv to taub hais tias kuv tau xav txais kev tshwm sim tiam sis tsis tau xav them tus nqi kom thiaj tau kev tshwm sim ntawd. Txog thaum ntawd ces kuv tsis tau nrog Vajtswv tham tiag tiag, kuv twb xav tias txoj kev nrog ib tug neeg uas tsis nyob ntawd tham yog ib qho ruam xwb. Kuv yuav tsum txo hwj chim thiab ua tej yam uas lawv hais kom kuv ua, tab txawm kuv lub siab xav hais tias yog ib qho ruam xwb.
Hnub ntawd kuv thiaj tau qhib kuv lub siab rau tus Ntsuj Plig, tau muaj lub siab xav hloov siab lees txim, thiab tau xav ua kev cai raus dej! Ua ntej ntawd, kuv tau xav hais tias kev hloov siab lees txim yog ib qho phem, yog vim yus tau ua txhaum thiab ua yuam kev xwb, tiam sis kuv txawm pom hais tias yog ib qho txawv—ib qho zoo uas pab tho kev rau yus thiaj tau loj hlob thiab muaj kev zoo siab.
Hnub no Txwj Laug Cutler nyob ntawm no, thiab kuv xav ua nws tsaug vim nws pab qhib kuv ob lub qhov muag. Txhua yam kev txiav txim uas kuv ua hauv kuv lub neej txij thaum lub sij hawm ntawd yeej yog vim thaum ntawd kuv thiaj tau txo hwj chim, tau thov Vajtswv kom zam txim rau kuv, thiab tau cia Yexus Khetos txoj Kev Theej Txhoj los pab kuv lub neej.
Ces zaj lus kawg, hais ua ib kab lus yog: Cia li hloov siab lees txim; vim tsis muaj ib yam twg uas pab koj txav los ze tus Tswv Yexus Khetos ntau npaum li yus lub siab uas xav hloov hlo.
Kuv cov me phooj ywg rau lub Koom Txoos, cov neeg uas tseem tshawb nrhiav txog, yog tias hnub no koj tab tom mloog kuv cov lus, kuv qhia koj hais tias koj tab tom yuav txog qhov kev zoo siab tshaj plaws. Koj yeej nyob ze!
Cia kuv caw koj, tag siab tag ntsws thiab los ntawm kuv nruab siab los hais tias: cia li mus thiab ua kev cai raus dej! Yog qhov zoo tshaj plaws uas koj yuav ua tau. Nws yuav hloov tag nrho koj lub neej thiab kuj yuav hloov koj cov me nyuam thiab cov me nyuam xeeb ntxwv lub neej thiab.
Tus Tswv tau foom koob hmoov rau kuv kom muaj ib tse neeg. Kuv tau yuav Renee ua kuv tus poj niam, thiab wb muaj plaub tug me nyuam. Thiab vim hais tias kuv tau ua kev cai raus dej, kuv muaj cuab kav, ib yam li tus yaj saub Lihais puag thaum ub, caw tau lawv los noj lub txiv ntawm tsob ntoo uas cawm neeg txoj sia, uas yog Vajtswv txoj kev hlub (saib 1 Nifais 8:15; 11:25). Kuv muaj cuab kav pab lawv los cuag Khetos.
Ces kuv thiaj thov kom nej yuav xav txog kuv zaj dab neeg no, thiab (1) ua tib zoo mloog cov tub txib cov lus, (2) mus hauv lub koom txoos thiab nco txog yus tej kev xav, (3) nyeem Phau Ntawv Maumoos thiab nug tus Tswv seb phau no puas muaj tseeb, thiab (4) hloov siab lees txim thiab ua kev cai raus dej.
Kuv hais lus tim khawv tias yog tias nej kam them tus nqi rau kev tshwm sim, txo hwj chim, nyeem ntawv, thov Vajtswv, thiab hloov siab lees txim, lub ntuj ceeb tsheej yuav raug qhib plho thiab nej yuav paub, ib yam li kuv paub, hais tias Yexus yog tus Khetos, tias Nws yog kuv thiab nej tus Cawm Seej ntag. Los ntawm Yexus Khetos lub npe, amees.