Nws Kom Nej Ua Dab Tsi, Nej Cia Li Ua Raws Li Nws Hais

Tus Cawm Seej ua nws thawj qhov txuj ci tseem ceeb uas muab sau ntawv txog nyob hauv ib rooj tshoob hauv lub zos Kanas hauv lub xeev Kalilais. Maivliag, Nws niam, thiab Nws cov thwj tim nyob ntawd. Maivliag xav tias nws muaj kev lav ris kom rooj tshoob Nyob hauv kev ua koob tsheej ntawd, muaj ib qho teeb meem—cawv txiv hmab tas lawm. Miavliag txhawj heev thiab mus cuag Yexus. Nkawd sib tham ib me pliag; ces Maivliag hais rau cov tub qhe thiab hais tias:

“Nws kom nej ua dab tsi, nej cia li ua raws li nws hais.

“Muaj rau lub hub dej nyob ntawd. … [Cov hub dej no tsis yog cov dej rau neeg haus tiam sis yog kom ua kev cai ntxuav raws li Mauxes txoj kev cai.]

“Yexus hais rau cov [tub qhe] hais tias, Nej cia li mus nqa dej los hliv kom puv nkaus cov hub no. Ces lawv txawm mus nqa dej los hliv puv nkaus rau hauv cov hub ntawd.

Thiab Yexus hais rau lawv hais tias, Nej cia li ce me ntsis nqa mus rau tus kav xwm. Lawv txawm ce me ntsis nqa mus rau tus kav xwm.

“[Ces] tus kav xwm saj cov dej uas txia ua cawv txiv hmab ntawd lawm” thiab nws hais tias xyov ua cas lawv ho muab cov cawv ua qab tshaj cia rau tom qab.¹

Peb nco qab txog lub sij hawm no vim kev muab cov dej txia ua cawv txiv hmab yeej yog ib qho uas qhia txog Vajtswv lub hwj chim—yog ib qho txuj ci tseem ceeb. Qhov ntawd yeej tseem ceeb thiab, tiam sis muaj ib zaj lus qhia tseem ceeb nyob hauv Yauhas zaj no. Maivliag yog ib tug ntxhais uas muaj nuj nqis heev thiab Vajtswv xaiv cia lawm² uas Vajtswv hu kom yug thiab tu Vajtswv Leej Tub. Maivliag paub txog Nws ntau tshaj txhua tus hauv lub ntiaj teb no. Maivliag paub qhov tseeb txog Nws txoj kev yug los. Maivliag paub tias Nws tsis muaj kev txhaum thiab Nws “tsis hais lus li lwm tus neeg, thiab tsis muaj neeg muaj peev xwm qhia nws; vim nws tsis tas kom neeg qhia nws.”³ Maivliag paub txog Nws txoj kev txawj kho teeb meem, tsis hais ib qho teeb meem zoo li qhov uas tsis muaj cawv txiv hmab rau ib rooj tshoob. Maivliag twb tso siab plhuav rau Nws thiab Nws lub hwj chim uas los saum ntuj los. Nws hais nws tej lus qhia ncaj qha thiab meej rau cov tub qhe tsis muaj lwm yam sib txuas: “Nws kom nej ua dab tsi, nej cia li ua raws li nws hais.”

Maivliag yog ib tug ntxhais hluas thaum tus tim tswv Khali-ees tshwm sim rau nws pom. Thaum xub thawj nws “nyuaj siab” vim tus tim tswv hais tias nws “yuav tau zoo nyob kaj siab lug” thiab “tus Tswv … foom koob hmoov ntau kawg rau koj lawm … thiab [nws] xyov tus tim tswv hais li ntawd, nws hais txog dab tsi.” Khali-ees nplij nws lub siab hais tias nws tsis tas ntshai—nws zaj xov yeej zoo heev. Nws yuav “xeeb tub … Vajtswv tus uas muaj hwj chim loj kawg nkaus tus Tub” thiab “yug tau ib tug me tub … [uas] yuav ua vaj ntxwv kav Yakhauj cov xeeb ntxwv mus ib txhis.”

Maivliag hais nws tej kev xav hais tias, “Kuv yog ib tug nkauj xwb, yuav ua li cas muaj tau li ntawd?”

Tus tim tswv piav me ntsis, qhia rau nws hais tias “yeej tsis muaj ib yam dab tsi uas Vajtswv yuav ua tsis tau li.”

Maivliag txo hwj chim teb hais tias nws yuav ua txhua yam uas Vajtswv hais, nws tsis yuam kom paub meej txawm yog ntshe nws muaj tej lus nug ntau heev txog nws lub neej tom ntej. Maivliag cog lus txawm yog nws tsis to taub vim li cas Vajtswv hais kom nws ua li ntawd thiab tsis paub yuav zoo li cas thaum yav tom ntej. Maivliag tau lees txais Vajtswv txoj lus ua ntej,⁴ nws tsis tshua paub yav tom ntej yuav zoo li cas. Maivliag tso siab rau Vajtswv hais tias, “Kuv yog Vajtswv tus ntxhais qhev; thov kom muaj raws li koj hais ko rau kuv.”⁵

Thaum peb txiav txim siab tias “[Vajtswv] hais kom peb ua dab tsi” ces peb yuav ua li ntawd xwb, peb cog lus tias peb yuav rau siab coj raws li Vajtswv lub siab nyiam. Tej yam me me los ntawm kev ntseeg xws li kev kawm vaj lug kub, kev yoo mov, thiab thov Vajtswv tiag tiag ua rau peb sab ntsuj plig muaj zog heev peb thiaj kov yeej tau tej teeb meem ntawm lub neej no. Tej yam me me peb ua raws li peb txoj kev ntseeg thaum kawg yuav hloov los ua ib qho txuj ci tseem ceeb. Tej no ua rau peb txoj kev ntseeg uas pib zoo li ib yam uas tuaj yub xwb hloov kom muaj hwj chim ua zoo hauv peb lub neej. Ces thaum twg peb raug teeb meem, qhov uas peb tuaj cag rau hauv lub hauv paus uas yog Khetos ua rau peb sab ntsuj plig nyob ruaj nrees. Vajtswv txhawb nqa peb thaum peb qaug zog, ua rau peb xyiv fab heev, thiab ua kom txhua yam ua hauj lwm ua ke kom zoo rau peb.⁶

Ob peb xyoo tas los, kuv hais lus rau ib tug npisov uas siv sij hawm ntev heev txhua lub lim tiam ntuas cov mej zeej hauv nws pawg ntseeg. Nws hais ib yam tseem ceeb heev. Tej teeb meem nyob hauv nws pawg ntseeg, nws hais tias, yog tej uas cov mej zeej ntawm lub Koom Txoos txhua qhov chaw muaj—tej teeb meem xws li yuav ua li cas kom zoo siab thaum sib yuav; yuav ua neej li cas thaum muaj hauj lwm, tsev neeg, thiab tej dej num hauv lub Koom Txoos; kev coj raws li txoj Lus Txawj Ntse, kev muaj hauj lwm ua, tsis txhob saib duab liab qab; los yog muaj kev kaj siab lug txog ib tsab cai ntawm lub Koom Txoos los sis zaj keeb kwm uas lawv tsis to taub.

Feem ntau nws ntuas cov hauv nws pawg ntseeg kom lawv rov qab ua tej yam me me kom thiaj muaj kev ntseeg xws li kawm Phau Ntawv Maumoos—ib yam li Thawj Tswj Hwm Thomas S. Monson ntuas peb ua—them ib feem kaum, thiab rau siab ua hauj lwm hauv lub Koom Txoos. Tiam sis, lawv ib sij teb nws hais tias lawv tsis tshua ntseeg qhov nws hais: “Kuv tsis pom zoo, Npisov. Peb txhua tus paub tias tej no yeej zoo ua. Peb hais txog tej yam no txhua lub sij hawm nyob hauv lub Koom Txoos. Tiam sis kuv paub tias koj tsis to taub kuv. Tej ntawd yuav ua li cas ho pab kho tej teeb meem uas kuv muaj tam sim no?”

Yog ib lo lus nug zoo. Hauv kuv lub neej, kuv twb pom tias cov uas ua tib zoo ua “tej yam me me thiab yooj yim”⁷—ua raws li tej yam me me xwb—yog cov uas tau koob hmoov kom muaj kev ntseeg thiab kev dag zog uas yeej loj tshaj tej yam lawv tau ua kom mloog Vajtswv lus thiab, muaj tseeb tiag, tej zaum ua rau yus xav tias ob qho ntawd tsis sib txuas. Tej zaum yog ib qho nyuaj rau yus muab tej yam yus ua kom mloog lus txhua hnub txuas rau tej kev kho teeb meem loj uas peb muaj. Tiam sis ob qho no yeej muaj kev sib txuas. Raws li kuv xav, kev ua tej yam me me kom coj li yus ntseeg txhua hnub yog txoj kev zoo tshaj plaws kom peb muaj zog txaus thaum muaj teeb meem hauv lub neej no, txawm raug dab tsi los xij. Tej yam kev ntseeg me me, txawm yog peb xav tias tej ntawd tsis tseem ceeb los yog xav tias yuav tsis pab kho tej teeb meem uas peb muaj, tej ntawd yeej foom koob hmoov rau peb thaum peb ua txhua yam.

Cia li xav txog Na-amas, uas yog “cov Xilias tus thawj tub rog” thiab “siab tawv heev,” thiab ib tug neeg mob ruas. Ib tug ntxhais qhev qhia nws txog ib tug yaj saub hauv Ixayees uas kho tau Na-amas yog li ntawd nws tuaj nrog cov tub qhe, cov tub rog, thiab khoom plig uas yuav pub rau Ixayees, thiab tuaj txog Elisas lub tsev. Elisas tus tub qhe, tsis yog Elisas nws tus kheej, qhia Na-amas hais tias tus Tswv txib kom “cia li mus raus xya zaus hauv tus dej Yauladees.” Yog ib qho yooj yim heev. Tej zaum qhov uas tau hais kom ua li no ua rau tus tub rog no tsis to taub vim li cas yuav tsum ua ib yam yooj yim los yog tsis tsim nyog rau nws ua li ntawd nws thiaj li chim siab heev. Peb yeej paub hais tias Na-amas tsis to taub Elisas tej lus qhia, “nws txawm tig kiag mus ua npau taws vog.”

Tiam sis Na-amas cov tub qhe hais lus rau nws thiab qhia nws tias nws yeej yuav txaus siab ua “tej yam nyuaj” yog tias Elisas tau hais kom nws ua li ntawd. Lawv hais tias vim yog ib yam yooj yim ua, tsim nyog ua li ntawd, txawm yog nws tsis to taub vim li cas los? Na-amas xav txog nws lub siab thiab tej zaum nws tseem tsis ntseeg, tiam sis nws cia li “nqis mus raus hauv tus dej Yauladees xya zaus” thiab nws lub cev mos nyoos.⁸

Muaj tej nqi zog los ntawm kev mloog lus uas los sai sai; ib txhia los muaj tom qab peb raug kev sim siab. Nyob hauv phau Lub Hlaws uas Muaj Nqis Heev, peb nyeem txog Adas txoj kev rau siab ua raws li cov lus txib nws thiaj li ua kev txi. Thaum tus tim tswv nug Adas vim li cas nws ua kev txi, nws teb hais tias, “Kuv tsis paub, tsuas yog tus Tswv txib kuv xwb.” Tus tim tswv piav hais tias nws tej kev txi yog “ib tug yam ntxwv txog txoj kev txi ntawm Leej Txiv Tib Leeg Tub.” Tiam sis tsuas paub li ntawd tom qab Adas qhia tias nws yuav ua raws nraim li tus Tswv hais “tau ntau hnub” es nws tsis paub vim li cas nws yuav tsum ua kev txi li ntawd.⁹

Vajtswv yeej yuav foom koob hmoov rau peb thaum peb ua raws li Nws txoj moo zoo ruaj nrees thiab nyob khov kho hauv Nws lub Koom Txoos, tiam sis Nws tsis tshua qhia tias Nws tau teem sij hawm kom foom koob hmoov thaum twg. Nws tsis qhia tag nrho rau peb thaum xub thawj. Yog li ntawd peb thiaj yuav tsum muaj kev ntseeg, cia siab thiab tso saib rau tus Tswv.

Vajtswv hais kom peb nyiaj mus nrog Nws—tso siab rau Nws thiab coj raws li Nws. Nws thov kom peb “tsis txhob cam vim nej tsis pom.” Nws ceeb toom hais tias peb yuav tsum tsis txhob xav tias peb yuav txais kev pab uas yooj yim ua los sis ua tau sai sai. Yeej yuav zoo yog peb sawv khov kho thaum lub sij hawm uas sim peb txoj kev ntseeg, txawm yog kev sim siab ntawd nyuaj rau peb nyiaj tau los yog peb yuav tsum tos ntev kom txais lus teb.¹⁰ Kuv tsis hais txog “kev lam mloog lus”¹¹ tiam sis yog kev ua tib zoo tso siab rau tus Tswv txoj kev hlub uas zoo tag nrho thiab lub sij hawm uas Nws teem tseg.

Qhov uas yeej yuav sim peb txoj kev ntseeg yog qhov uas peb yuav tsum ua tej yam me me txhua hnub raws nraim li peb txoj kev ntseeg. Ces thaum ntawd, thiab tsis yog ua ntej, Nws thiaj li cog lus tias peb yuav txais cov koob hmoov saum ntuj uas peb xav tau. Tsuas yog thaum peb qhia rau Vajtswv tias peb txaus siab ua tej yam uas Nws hais kom peb ua thiab tsis yuam kom paub thaum twg, ua li cas, thiab vim li cas peb thiaj li yuav “sau tej nqi zog ntawm [peb] txoj kev ntseeg, thiab [peb] txoj kev rau siab ntso, thiab kev siab ntev.”¹² Kev mloog lus tiag tiag yog kev ua raws li Vajtswv cov lus txib ua ntej yus tau koob hmoov.¹³

Txhua hnub, txawm peb xav txog qhov no los sis tsis xav, peb txhua tus xaiv peb “yuav teev tiam leej twg” txhua hnub.¹⁴ Peb qhia tias peb rau siab ua hauj lwm rau tus Tswv thaum peb ua tib zoo rau siab ntseeg ua tej yam kom teev tiam nws txhua hnub. Tus Tswv cog lus tias Nws yuav coj peb txoj hau kev,¹⁵ tiam sis yog peb xav kom Nws ua li ntawd, peb yuav tsum taug kev, tso siab plhuav hais tias Nws paub txoj kev no vim Nws yeej yog “txoj kev.”¹⁶ Peb yuav tsum muab dej los hliv puv nkaus rau hauv peb cov hub. Thaum peb tso siab thiab coj raws li Nws, ib yam li cov dej uas txia ua cawv txiv hmab, peb lub neej yuav hloov. Peb yuav hloov los ua neeg zoo dua li peb ua tau yog tsis muaj Nws. Tso siab rau tus Tswv thiab “nws kom nej ua dab tsi, nej cia li ua raws li nws hais. Los ntawm Yexus Khetos lub npe, amees.