Txhob Saib Mus ntawm Ib Ncig, Saib Mus rau Saud!
Peb lub hom phiaj yog kev caw lwm tus los cuag Khetos, thiab peb yuav ua raws li lub hom phiaj no thaum peb saib mus rau saud saib Yexus Khetos.
Kuv lub hom phiaj yog “caw lwm tus los cuag Khetos.”1 Nov yog nej lub hom phiaj thiab. Peb yuav ua kom muaj raws li lub hom phiaj no thaum peb saib mus rau saud saib Yexus Khetos.
Kuv tau ua kev cai raus dej nrog kuv niam kuv txiv thaum kuv muaj 16 xyoos. Kuv tus kwv, Kyung-Hwan, uas muaj 14 xyoos, twb koom lub koom txoos vim yog los ntawm kuv tus dab laug, Young Jik Lee, thiab caw peb mus rau nws lub koom txoos. Muaj 10 tus neeg nyob hauv peb tsev neeg es nyias mus nyias lub koom txoos, yog li ntawd peb zoo siab nrhiav tau qhov tseeb thiab xav qhia lwm tus txog kev zoo siab uas peb nrhiav tau nyob hauv Yexus Khetos txoj moo zoo tom qab peb ua kev cai raus dej.
Kuv txiv yeej yog tus zoo siab tshaj plaws uas xav kawm thiab qhia qhov tseeb rau lwm tus. Nws pheej sawv ntxov kawm vaj lug kub tau ob xuab moos txhua hnub. Tom qab nws ua hauj lwm nws nrog cov tub txib mus xyuas peb tsev neeg, phooj ywg, thiab cov neeg zej zog yuav luag txhua hnub. Xya lub hlis tom qab peb ua kev cai raus dej, muaj 23 tus neeg hauv kuv tsev neeg thiab cov txheeb ze uas yog mej zeej ntawm lub Koom Txoos. Ces xyoo tom qab ntawd muaj 130 tus neeg uas tau ua kev cai raus dej los ntawm kuv txiv txoj kev ua cov tub txib txoj hauj lwm.
Nws yeej xav tias tsev neeg zaj keeb kwm tseem ceeb heev, thiab nws nrhiav tau yim tiam neeg ntawm peb cov poj koob yawm txwv. Txij thaum ntawd los, tej yam uas muaj los ntawm kuv tsev neeg txoj kev hloov siab los ntseeg, uas pib ntawm kuv tus kwv uas muaj 14 xyoos, twb muaj ntau nplua mias rau cov ciaj thiab cov tuag huv tib si. Los ntawm kuv txiv thiab lwm tus tej hauj lwm, peb twb nrhiav peb tsev neeg caj ceg mus txog 32 tiam neeg dhau los, thiab tam sim no peb tseem ua hauj lwm hauv lub tuam tsev kom ua kab ke tiav. Hnub no kuv zoo siab kawg thiab muaj kev xyiv fab thaum kuv muab peb cov poj koob yawm txwv thiab cov xeeb leej xeeb ntxwv txuas ua ke.
Thawj Tswj Hwm Gordon B. Hinckley tau sau ntawv txog ib zaj zoo li no nyob hauv lub Tuam Tsev Columbus Ohio:
“Thaum kuv tseem xav txog [kuv tus yawg suab, yawg, thiab txiv] lub neej thaum kuv zaum hauv lub tuam tsev, kuv ntsia haud thiab pom kuv tus ntxhais, nws tus ntxhais, … thiab nws cov me nyuam, uas yog kuv xeeb leej xeeb ntxwv. Ua rau kuv paub tias kuv yeej nyob nruab nrab ntawm xya tiam neeg no—muaj peb tiam neeg ua ntej kuv thiab peb tiam neeg tom qab.
“Nyob hauv lub tsev dawb huv thiab dawb ceev no ua rau kuv xav tias kuv lav ris ib yam tseem ceeb heev uas yog kev muab tej yam uas kuv tau txais ua qub txeeg qub teg los ntawm kuv cov poj koob yawm txwv mus rau tej tiam neeg uas ua neej tom qab kuv.”2
Peb txhua tus yeej nyob nruab nrab ntawm ib tsev neeg uas nyob mus ib txhis. Tej yam uas peb ua yeej hloov tau yav tom ntej ntau heev tsis hais hloov ua zoo los yog hloov ua phem los yog. Thawj Tswj Hwm Hinckley hais ntxiv hais tias, “Nyob hauv txoj saw hlau ntawm nej tsev neeg los tsis txhob cia nej tus kheej los ua qhov txuas uas tsis muaj zog.”3 Nej txoj kev rau siab ntseeg txoj moo zoo yuav txhawb nej tsev neeg lub zog. Peb yuav tsum ua li cas kom ua qhov txuas uas muaj zog nyob hauv peb tsev neeg uas nyob mus ib txhis?
Muaj ib hnub, ob peb hlis tom qab kuv ua kev cai raus dej, kuv hnov ib txhia mej zeej thuam lwm tus nyob hauv lub koom txoos. Ua rau kuv poob siab heev. Kuv mus tsev thiab qhia kuv txiv tias tej zaum kuv yuav tsum tsis txhob mus koom lub koom txoos ntxiv. Nyuaj rau kuv pom cov mej zeej thuam lwm tus zoo li ntawd. Tom qab nws mloog kuv hais, kuv txiv qhia kuv tias tus Tswv twb tau muab txoj moo zoo txum tim rov qab los lawm thiab txoj moo zoo yeej zoo tag nrho tiam sis cov mej zeej tseem tsis yog neeg zoo tag nrho, tsis hais nws los yog kuv los yog. Nws hais tias, “Tsis txhob tso koj txoj kev ntseeg tseg vim yog cov neeg nyob ib ncig ntawm koj, tiam sis cia li sib raug zoo nrog Yexus Khetos. Txhob saib mus ntawm ib ncig, saib mus rau saud!”
Saib mus rau saud ntsia Yexus Khetos—yog tej lus tswv yim ntawm kuv txiv—uas txhawb nqa kuv txoj kev ntseeg thaum kuv raug teeb meem hauv lub neej no. Nws tau qhia kuv ua raws li Khetos tej lus qhia, raws li tej lus no hais kom peb ntsia ntsoov Nws nrog txhua txoj kev xav; tsis txhob xyem xyav, tsis txhob ntshai.4
Thaum kuv yog tus thawj tswj hwm ntawm qhov chaw tshaj tawm txoj moo zoo Washington Seattle, ntuj los nag ntau hnub. Tiam sis, kuv tseem qhia cov tub txib mus thiab tshaj tawm txoj moo zoo thaum ntuj los nag. Kuv tau qhia lawv hais tias, “Cia li mus nraud thaum ntuj los nag, cia li saib mus rau saum ntuj, qhib nej lub qhov ncauj, thiab haus dej nag! Thaum nej saib mus rau saud, nej yuav muaj zog qhib nej lub qhov ncauj qhia txhua tus yam tsis muaj kev ntshai.” Yog ib lub cim uas qhia kom lawv nco ntsoov saib mus rau saud thaum lawv muaj teeb meem tsis hais tom qab lawv ua tub txib los yog. Tsis txhob ua li ntawd yog tias nyob hauv ib qho chaw uas muaj pa phem.
Thaum kuv tseem ua hauj lwm hauv qhov chaw tshaj tawm txoj moo zoo Seattle, kuv tus tub hlob, Sunbeam, uas yog ib tug kws ntaus piano, hu xov tooj tuaj rau kuv. Nws hais tias nws muaj cib fim ntaus piano nyob hauv Carnegie Hall nyob hauv New York vim nws yeej kev sib tw ntaus piano. Wb pab nws zoo siab heev. Tiam sis, hmo ntawd, thaum wb thov Vajtswv thiab ua Nws tsaug, kuv tus poj niam nco tias wb mus tsis tau mus saib nws ntaus piano thiab nws hais rau Leej Txiv Saum Ntuj Ceeb Tsheej ib yam zoo li no hais tias, “Leej Txiv Saum Ntuj Ceeb Tsheej, kuv zoo siab ua Koj tsaug rau txoj koob hmoov uas Koj foom pub rau Sunbeam no. Tiam sis, khuv xim uas kuv mus tsis tau. Yog tias Koj tau foom koob hmoov rau nws li no tom qab los yog ua ntej wb ua ntiag tug hauj lwm no, ces kuv yeej mus tau. Kuv tsis yws yws, tiam sis kuv khuv xim me ntsis.”
Tom qab nws thov Vajtswv tas, nws hnov ib lub suab meej meej heev: “Vim koj mus tsis tau, kuv twb muab lub cib fim no rau koj tus tub. Koj puas xav pauv txoj koob hmoov no?”
Ua rau kuv tus poj niam xav tsis thoob. Nws twb paub lawm hais tias cov me nyuam yuav txais koob hmoov los ntawm lawv niam lawv txiv tej hauj lwm nyob hauv tus Tswv lub nceeg vaj, tiam sis yog thawj zaug uas nws to taub nws lub luag hauj lwm zoo li ntawd. Nws teb Vajtswv tam sim ntawd: “Tsis ua li cas yog kuv mus tsis tau. Cia nws muaj lub sam xeeb ntawd.”
Cov kwv tij thiab cov muam, yeej tsis yooj yim rau peb pom tau Leej Txiv Saum Ntuj Ceeb Tsheej txoj kev hlub thaum peb siv peb qhov muag ntawm sab cev nqaij daim tawv ntsia vim peb pom kev tab kaum, kev ploj, tej nra hnyav, los yog kev kho siab thaum xub thawj. Tiam sis, peb yeej pom tau cov koob hmoov thaum peb saib mus rau saud. Tus Tswv qhia hais tias, peb txais koob hmoov thaum peb mloog lus, thiab thaum peb txais koob hmoov los ntawm Vajtswv, yog vim peb ua raws li txoj kev cai uas peb yuav tsum coj xwv kom peb yuav tau.5 Rau nej cov uas ua hauj lwm rau Vajtswv los xij, cia li nco ntsoov hais tias nej ua rau cov neeg uas ua neej ua ntej thiab ntau tiam neeg tom qab tau koob hmoov zoo kawg.
Hnub no kuv zoo siab pom ntau tus hauv peb tsev neeg uas rau siab ua raws li lawv tej kev khi lus thiab thaum kuv xav tias tej zaum ntshe yuav muaj ib lub rooj zaum qhuav tsis muaj tus ntawd ces ua rau kuv tu siab. Txwj Laug M. Russell Ballard hais tias: “Yog tias nej xaiv kom tsis tshua muaj siab ntseeg los sis tawm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, nej yuav mus cuag leej twg? Nej yuav ua dab tsi? Kev txiav txim siab kom ‘tsis nrog’ cov mej zeej ntawm lub Koom Txoos thiab tus Tswv cov thawj coj yuav ua rau nej raug xwm txheej thaum yav tom ntej uas nej tsis pom tam sim no.”6 Thawj Tswj Hwm Thomas S. Monson txhawb nqa peb hais tias, “Thov kom peb yuav xaiv ua qhov zoo uas nyuaj dua tsis txhob xaiv qhov yooj yim uas yog qhov phem.”7
Yeej tsis lig dhau kom saib mus rau saud ntsia ntsoov Yexus Khetos. Nws yeej ncav tes xav pab nej. Muaj ntau tiam neeg uas ua neej ua ntej peb thiab yuav ua neej tom qab uas tso siab rau peb kom peb coj raws li Khetos peb thiaj yuav ua ib tsev neeg los ntawm Vajtswv uas nyob mus ib txhis
Thaum lawv tso kuv tawm kuv txoj hauj lwm ua ceg txheem ntseeg tus thawj tswj hwm, kuv cov tub zoo siab heev vim xav tias kuv yuav siv sij hawm ntxiv nrog lawv. Peb lub lim tiam tom qab ntawd lawv hu kuv ua ib tug Xya Caum. Thaum xub thawj kuv xav tias lawv yuav poob siab, tiam sis kuv tus tub ntxawg txo hwj chim teb hais tias, “Txiv es, txhob txhawj. Peb yog ib tsev neeg nyob mus ib txhis ’os.” Yeej yog qhov tseeb uas yooj yim thiab meej heev! Kuv txhawj me ntsis thaum kuv saib ntawm ib ncig pom lub neej hauv lub ntiaj teb no thaum xub thawj, tiam sis kuv tus tub zoo siab vim nws tsis saib ntawm ib ncig, tiam sis nws saib mus rau saud ntsia txoj kev nyob mus ib txhis thiab tus Tswv tej lub hom phiaj.
Yeej tsis yooj yim saib mus rau saud thaum yus niam yus txiv tawm tsam txoj moo zoo, thaum yus yog ib tug mej zeej hauv ib ceg ntseeg ntawm lub Koom Txoos me me, thaum yus tus khub tsis yog ib tug mej zeej, thaum yus tseem tsis tau yuav poj niam los yuav txiv txawm yog yus twb siv zog nrhiav ib tug yuav yus, thaum ib tug me nyuam ua loj leeb, thaum yus yog leej niam los yog leej txiv uas tsis muaj ib tug khub, thaum yus muaj teeb meem ntawm sab cev nqaij daim tawv los yog kev siab xav li cas, thaum yus raug xwm txheej dab tsi, thiab li ntawd. Cia li rau siab ntseeg thaum raug tej yam nyuaj li ntawd. Cia li ntsia ntsoov Khetos kom muaj zog, thiab txais kev kho mob. Dhau los ntawm lub hwj chim ntawm Yexus Khetos txoj Kev Theej Txhoj, txhua yam yuav ua hauj lwm ua ke kom zoo rau nej.8
Kuv ua tim khawv txog Yexus Khetos, hais tias Nws yog peb tus Cawm Seej thiab tus Txhiv Dim. Thaum peb coj raws li peb tus yaj saub, Thawj Tswj Hwm Thomas S. Monson, peb saib mus rau saud saib Yexus Khetos. Thaum peb thov Vajtswv thiab kawm vaj lug kub txhua hnub, thiab mob siab txais lub cim nco txog txhua lub lim tiam, peb yeej yuav muaj zog saib mus rau saud saib Nws txhua lub sij hawm. Kuv zoo siab ua ib tug mej zeej ntawm lub Koom Txoos no thiab ib tug hauv ib tsev neeg uas nyob mus ib txhis. Kuv nyiam qhia txoj moo zoo no rau lwm tus. Peb lub hom phiaj yog kev caw lwm tus los cuag Khetos, thiab peb yuav ua raws li lub hom phiaj no thaum peb saib mus rau saud saib Yexus Khetos. Kuv txo hwj chim ua tim khawv txog tej no los ntawm Yexus Khetos lub npe dawb ceev, amees.