Peb Leej Txiv txoj Hau Kev Zoo Kawg

Thaum kuv kawm ua ib tug kws kho mob, kuv twb pab ib tug niam tsev hluas yug nws thawj tus me nyuam. Nws siab tus, tsom ntsoov, thiab zoo siab. Thaum yug tus me nyuam lawm, kuv muab tus me nyuam mos liab rau nws. Nws kua muag ntws los rau nws sab plhu vim zoo siab heev, es nws puag tus me nyuam mos liab thiab ntsia nws txij ntawm taub hau txog ntua ntiv taw. Tus niam tsev puag nws thiab hlub nws ib yam li leej niam txawj ua xwb. Yeej yog ib lub sam xeeb uas kuv nyob hauv hoob ntawd nrog nws.

Peb txhua tus pib lub neej zoo li no. Tiam sis lub sij hawm peb yug los puas yog qhov chiv keeb tiag tiag? Neeg ntiaj teb xav tias kev yug los thiab kev tuag yog qhov chiv keeb thiab qhov kawg. Tiam sis vim muaj Vajtswv txoj hau kev dawb huv, peb paub tias kev yug los thiab kev tuag tsuas yog ob lub sij hawm ntawm peb txoj kev txais tau txoj sia nyob mus ib txhis nrog peb Leej Txiv Saum Ntuj Ceeb Tsheej.¹ Ob lub sij hawm no yeej tseem ceeb nyob hauv Leej Txiv txoj hau kev—yog lub sij hawm dawb ceev thaum lub neej hauv ntiaj teb no thiab lub neej nyob saum ntuj sib tshuam. Hnub no, thaum kuv xav txog tej yam uas kuv tau kawm los ntawm kev saib tej kev yug los thiab kev tuag thaum kuv yog ib tug kws kho mob thiab ua hauj lwm hauv lub Koom Txoos, kuv xav ua tim khawv txog peb Leej Txiv txoj hau kev zoo kawg nkaus.

“Ua ntej peb yug los, peb nyob nrog Vajtswv, Leej Txiv ntawm peb sab ntsuj plig. Peb txhua tus nyob hauv lub ntiaj teb no yog kwv tij nus muag nyob hauv Nws tsev neeg,² thiab peb txhua tus muaj nqis rau Nws. Peb nrog Nws nyob tau ntev lawm ua ntej peb yug los hauv lub ntiaj teb no—peb tau kawm, xaiv ua zoo, thiab npaj siab.

Vim Leej Txiv Saum Ntuj Ceeb Tsheej hlub peb, Nws xav kom peb txais tau lub txiaj ntsim zoo tshaj plaws Nws pub tau rau peb, yog lub txiaj ntsim txoj sia nyob mus ib txhis.³ Nws muab tsis tau lub txiaj ntsim kiag rau peb; peb yuav tsum txais tau thaum peb xaiv ua raws li Nws txoj kev. Yog li ntawd peb yuav tsum tawm ntawm Nws lub xub ntiag mus thiab pib ib txoj kev zoo kawg nkaus uas nyuaj heev kom muaj kev ntseeg, loj hlob tuaj, thiab hloov los ua neeg zoo li Vajtswv. Txoj kev uas peb Leej Txiv npaj rau peb hu ua txoj kev cawm seej los yog txoj hau kev zoo siab.⁴

Nyob hauv kev sab laj saum ntuj ua ntej yug los peb Leej Txiv qhia peb txog Nws txoj hau kev.⁵ Thaum peb to taub, peb zoo siab kawg peb thiaj li qw xyiv fab thiab cov uas ci ntsa iab li hnub qub koom ua ke hu nkauj.⁶

Txoj hau kev ntawd muaj peb lub ncej zeb ua nws lub hauv paus: ncej zeb uas nyob mus ib txhis.⁷

Ncej zeb thib ib yog Kev Tsim lub ntiaj teb, qhov chaw rau peb txoj kev ua neej.⁸

Ncej zeb thib ob yog txoj Kev Poob ntawm peb thawj leej niam leej txiv hauv lub ntiaj teb, Adas thiab Evas. Vim muaj txoj Kev Poob, peb tau txais tej yam zoo kawg. Peb yuav yug los thiab txais ib lub cev nqaij daim tawv.⁹ Kuv yeej zoo siab uas kuv niam tsaug vim nws yug kuv thiab kuv cov kwv tij thiab qhia peb txog Vajtswv.

Vajtswv kuj muab kev ywj siab xaiv rau peb—yog lub cib fim thiab kev muaj peev xwm xaiv thiab ua tej yam peb tus kheej.¹⁰ Xwv kom pab peb xaiv qhov zoo, Leej Txiv Saum Ntuj Ceeb Tsheej muab tej lus txib rau peb. Txhua hnub thaum peb ua raws li Nws cov lus txib, peb qhia rau Vajtswv hais tias peb hlub Nws thiab Nws foom koob hmoov rau peb.¹¹

Vim Nws paub tias peb yuav tsis xaiv qhov zoo txhua lub sij hawm—los yog hais tias—peb yuav ua txhaum, Leej Txiv muab tus ncej zeb thib peb rau peb: tus Cawm Seej Yexus Khetos thiab Nws txoj Kev Theej Txhoj. Los ntawm Nws txoj kev raug txom nyem, Khetos them tus nqi ntawm kev tuag ntawm sab cev qaij daim tawv thiab kev txhaum.¹² Nws qhia hais tias: “Rau qhov Vajtswv hlub neeg ntiaj teb kawg li, nws thiaj txib nws tib Leeg Tub los rau hauv ntiaj teb. Tus uas ntseeg nws Leej Tub, tus ntawd yuav tsis tuag, tiam sis yuav tau txoj sia ntev dhawv mus ib txhis.”¹³

Yexus Khetos ua neej zoo tag nrho, Nws yeej ua raws li Nws Leej Txiv cov lus txib. Nws tau taug tej kev hauv lub teb chaws Filitees, qhia qhov tseeb uas nyob mus ib txhis, kho cov neeg mob, ua rau cov dig muag pom kev, thiab tsa cov neeg uas tuag lawm sawv rov los.¹⁴ Nws “mus thoob plaws qhov txhia chaw ua tej hauj lwm zoo”¹⁵ thiab thov kom txhua tus ua raws li Nws tus yam ntxwv.¹⁶

Thaum yuav luag tas Nws sim neej hauv lub ntiaj teb no, Nws txhos caug thiab thov Vajtswv, hais tias:

“Txiv, yog koj pom zoo, thov koj muab lub khob no tshem ntawm kuv mus. Txawm yog li cas los koj tsis txhob ua raws li kuv lub siab nyiam, tiam sis ua raws li koj lub siab nyiam xwb. …

“Yexus nyuaj siab kawg nkaus, nws haj yam siv zog thov Vajtswv heev; nws tawm hws zoo li ntshav nrog rau hauv av.”¹⁷

Khetos pab peb to taub Nws raug txom nyem npaum li cas thaum Nws qhia tus Yaj Saub Yauxej Xamiv hais tias:

“Vim saib seb, kuv, Vajtswv, tau raug tej yam no rau tag nrho sawv daws, xwv kom lawv yuav tsis raug yog hais tias lawv hloov siab lees txim;

“Tiam sis yog hais tias lawv tsis hloov siab lees txim ces lawv yeej yuav raug txom nyem ib yam li kuv;

“Txoj kev raug txom nyem uas tau ua rau kuv, uas twb yog Vajtswv, tus zoo tshaj plaws ntawm tag nrho sawv daws, kom tshee hnyo vim yog txoj kev mob, thiab los ntshav ntawm txhua lub qhov hws, thiab raug txom nyem tag nrho sab cev nqaij daim tawv thiab sab ntsuj plig.”¹⁸

Nyob hauv lub Vaj Khexemanes, Nws pib them tus nqi rau peb tej kev txhaum thiab peb tej kev mob, peb tej kev nyuaj siab thiab kev raug txom nyem.¹⁹ Vim Nws ua li ntawd, peb yeej yuav tsis nyob peb ib leeg thaum peb raug txom nyem yog tias peb taug kev nrog Nws. “Nws raug ntes thiab muaj neeg dag liam txim rau nws, nws raug txim kom ib pawg neeg phem txaus siab, thiab Nws raug muab ntsia saum tus ntoo khaub lig nyob pem Khaulakhauthas.” Nyob saum tus ntoo khaub lig “Nws txo Nws txoj sia kom theej txhua leej txhua tus lub txhoj uas yog ib lub txiaj ntsim nws pub rau txhua leej txhua tus uas yuav nyob hauv lub ntiaj teb tag nrho.”²⁰

Nws tshaj hais tias:

“Saib seb, kuv yog Yexus Khetos, tus uas tej yaj saub tau ua tim khawv tias yuav los rau hauv lub ntiaj teb.

Thiab saib seb, kuv yog qhov kaj thiab txoj sia ntawm lub ntiaj teb; thiab kuv tau haus tawm ntawm lub khob dej iab uas Leej Txiv tau muab rau kuv, thiab tau ua rau Leej Txiv tau yeeb koob nyob rau hauv txoj kev kuv ris tej kev txhaum ntawm lub ntiaj teb.”²¹

Ces, thaum hnub ib ntawm lub lim tiam,²² Nws sawv los tawm lub ntxa muaj ib lub cev uas zoo tag nrho uas tsis txawj tuag ntxiv. Thiab vim Nws ua li ntawd, peb yuav ua li ntawd thiab.

Kuv ua tim khawv tias Khetos twb sawv hauv lub ntxa los. Tiam sis ua ntej Nws sawv hauv lub ntxa los, Nws xub yuav tsum tuag ua ntej. Thiab peb yuav tsum ua thiab.

Ib txoj koob hmoov ntawm kuv lub neej yog qhov uas kuv hnov tau ntuj ceeb tsheej nyob ze thaum tej lub sij hawm kuv zaum ntawm neeg lub txaj ib sab thaum lawv tso lub ntiaj teb no tseg. Ob peb xyoos tas los thaum sawv ntxov, kuv nkag mus rau hauv ib chav ntawm ib tug poj ntsuam uas yog ib tug Neeg Ntseeg hauv Hnub Nyoog Kawg uas mob cancer nyob hauv lub tsev kho mob. Nws ob tug ntxhais zaum nrog nws. Thaum kuv mus ze nws lub txaj, kuv pom hais tias nws tsis raug mob ntxiv, vim nws nyuam qhuav tas sim neej.

Thaum lub sij hawm ntawd, kev kaj siab lug twb puv chav ntawd. Nws ob tug ntxhais tu siab, tiam sis nkawd muaj kev ntseeg puv nkawd lub siab. Nkawd paub tias nkawd niam tsis tau ploj mus tiam sis nws tsuas rov qab mus tsev xwb.²³ Txawm peb tu siab heev los, thaum tej lub sij hawm uas zoo li lub neej no tsis ncaj, peb yuav txais kev nplij siab los ntawm peb tus Cawm Seej vim Nws twb raug txom nyem ib yam thiab.²⁴ Yeej yog ib lub sam xeeb rau kuv nyob hauv chav ntawd.

Thaum peb tuag, peb tus ntsuj plig ncaim peb lub cev mus thiab peb mus rau theem tom ntej ntawm peb txoj kev mus, uas yog lub ntuj ntsuj plig. Yog ib qho chaw rau peb kawm, hloov siab lees txim, zam txim thiab hloov los ua neeg zoo li Vajtswv²⁵—qhov chaw rau peb tos txoj Kev Rov Los.²⁶

Ib hnub thaum yav tom ntej, txhua leej txhua tus uas yug los hauv lub ntiaj teb no yuav sawv hauv lub ntxa los. Peb sab ntsuj plig thiab sab cev nqaij daim tawv yuav rov qab los koom ua ke raws li tus yam ntxwv zoo tag nrho. Txhua tus yuav sawv rov los, tsis hais cov laus cov hluas, cov txiv neej thiab cov poj niam, cov phem thiab cov ncaj ncees, thiab txhua yam rov qab los ua lub cev uas zoo tag nrho.²⁷

Tom qab txoj Kev Sawv Rov Los peb yuav txais txoj koob hmoov zoo kawg uas yog tus Cawm Seej txoj kev txiav txim, uas hais tias:

“Kuv yuav coj tau tag nrho tej tib neeg los cuag kuv, xwv kom lawv yuav raug txiav txim raws li lawv tej hauj lwm.

“Thiab … yuav muaj tias, tus uas hloov siab lees txim thiab ua kev cai raus dej nyob ntawm kuv lub npe yuav raug muaj puv npo; thiab yog nws yuav tiv kom mus txog thaum kawg, saib seb, tus ntawd kuv yuav tsis suav muaj txim ntawm kuv txiv xub ntiag nyob rau hnub ntawd thaum kuv yuav sawv txiav txim rau lub ntiaj teb.”²⁸

Ces, dhau los ntawm Khetos thiab Nws txoj Kev Theej Txhoj, txhua tus uas xaiv kom coj raws li Nws los ntawm kev ntseeg, kev hloov siab lees txim, kev cai raus dej, kev txais tus Vaj Ntsuj Plig Dawb Huv, thiab kev nyiaj kom mus txog thaum kawg,²⁹ lawv yuav pom tias thaum kawg lawv yuav txais txoj sia nyob mus ib txhis ua lawv qub txeeg qub teg.²⁰ Lawv yuav rov qab mus cuag lawv Leej Txiv kom nrog Nws nyob mus ib txhis. Thov kom peb xaiv zoo.

Yeej muaj ntau tshaj tej uas muaj nruab nrab ntawm txoj kev yug los thiab kev tuag. Kuv caw nej los coj raws li Khetos.³¹

Kuv caw nej cov mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg txhua leej txhua tus, kom txhua hnub, los cuag Khetos, thiab cia li los ua neeg zoo tag nrho dhau los ntawm nws, thiab xyeej txhua yam uas tsis los ntawm Vajtswv tawm ntawm nej tus kheej mus, xwv kom dhau ntawm qhov uas Khetos cov ntshav nrog, nej yuav dawb huv, tsis muaj qhov ceb.³²

Kuv caw nej cov uas tseem tsis yog cov mej zeej ntawm lub Koom Txoos no kom los thiab nyeem Phau Ntawv Maumoos thiab mloog cov tub txib lus. Cia li los thiab muaj kev ntseeg thiab hloov siab lees txim rau nej tej kev txahum. Cia li los thiab ua kev cai raus dej thiab txais tus Vaj Ntsuj Plig Dawb Huv. Cia li los thiab ua neej zoo siab zoo li Yexus Khetos. Thaum nej los cuag Nws thiab ua raws li nws cov lus txib, kuv cog lus rau nej tias nej yuav nrhiav tau kev kaj siab lug thiab lub ntsiab txog lub neej hauv lub ntiaj teb no uas ntxhov hnyo thiab txoj sia nyob mus ib txhis hauv lub neej tom ntej.³³

Hais rau nej cov uas twb kawm tej yam tseeb no thiab tau tawm ntawm peb mus, kuv caw nej rov qab los. Cia li rov qab los hnub no. Peb Leej Txiv thiab tus Cawm Seej hlub nej. Kuv ua tim khawv tias Khetos muaj hwj chim teb nej tej lus nug, kho nej tej kev mob thiab tu siab, thiab zam txim rau nej tej kev txhaum. Kuv paub qhov no muaj tseeb. Kuv paub tag nrho tej no muaj tseeb. Yexus Khetos muaj txoj sia nyob! Nov yog Nws lub Koom Txoos. Los ntawm Yexus Khetos lub npe, amees.