Cia tus Ntsuj Plig Dawb Huv Coj Kev

Cov kwv tij thiab cov muam, kuv, ib yam li nej txhua tus, paub tias peb pom txoj kev khiav tus Tswv tej hauj lwm dhau los ntawm Thawj Tswj Hwm Thomas S. Monson thiab nws zaj lus qhia tag kis no. Thawj Tswj Hwm Monson, peb hlub koj, txhawb nqa koj, thiab thov Vajtswv pab koj tsis tu tsis tseg, peb tus yaj saub uas peb hlub.¹

Peb tau hnov tus Ntsuj Plig nplua mias ob hnub no. Txawm nej nyob hauv lub tsev loj no los yog nej nyob hauv tsev los yog nej nyob hauv tej tsev sib ntsib nyob thoob plaws lub ntiaj teb los, nej twb muaj cib fim hnov tau tus Tswv tus Ntsuj Plig. Tus Ntsuj Plig ntawd pom zoo rau nej lub siab lub ntsws txog tej yam tseeb uas tau qhia hauv lub rooj sab laj no.

Cia li xav txog tej lus ntawm zaj nkauj qhuas Vajtswv no:

Los ntawm kev tshwm sim hauv hnub nyoog kawg no peb paub tias Pawg Vajtswv muaj peb tug uas nyias muaj nyias: peb Leej Txiv Saum Ntuj Ceeb Tsheej; Nws Tib Leeg Tub, Yexus Khetos, thiab tus Vaj Ntsuj Plig Dawb Huv. Peb paub tias, Leej Txiv muaj ib lub cev muaj nqaij thiab muaj txha uas kov tau ib yam li tib neeg; Leej Tub los muaj thiab; tiam sis tus Vaj Ntsuj Plig Dawb Huv tsis muaj ib lub cev muaj nqaij thiab muaj txha, tiam sis yog ib tug Ntsuj Plig xwb. Yog tsis zoo li ntawd, tus Vaj Ntsuj Plig Dawb Huv yuav nyob tsis tau hauv peb.³

Lub ntsiab ntawm kuv zaj lus hnub no qhia tias tus Vaj Ntsuj Plig Dawb Huv tseem ceeb hauv peb lub neej. Peb Leej Txiv Saum Ntuj Ceeb Tsheej paub tias hauv lub neej no peb yuav raug tej teeb meem, kev tsim txom, thiab kev kub ntxhov; Nws paub tias tej yam xws li tej lus nug, kev poob siab, kev ntxias thiab kev qaug zog yuav ua nyuaj rau peb. Xwv kom peb muaj dag muaj zog thiab kom pab coj peb txoj hau kev, Nws muab tus Ntsuj Plig Dawb Huv pub rau peb, uas yog tus Vaj Ntsuj Plig Dawb Huv.

Tus Vaj Ntsuj Plig Dawb Huv khi peb rau tus Tswv. Vajtswv txib kom Nws ua tim khawv rau peb, qhia peb, thiab tshoov peb lub siab kom taug kev raws li tus Tswv txoj kev kaj. Peb txoj kev lav ris yog kev kawm kom paub nws lub hwj huam nyob hauv peb lub neej thiab ua raws li Nws qhia.

Cia li nco txog tus Tswv cov lus cog tseg hais tias Nws yuav cia Nws tus Ntsuj Plig los rau peb, tus uas yuav ua kom peb lub siab to taub, tus uas yuav ua kom peb tus ntsuj plig muaj txoj kev xyiv fab puv npo.⁴ Kuv nyiam tej lus tseeb no. Tej uas ua rau peb tus ntsuj plig muaj txoj kev xyiv fab puv npo ua rau peb pom tau lub zeem muag mus ib txhis thaum peb ua neej txhua hnub. Kev xyiv fab no yog kev kaj siab lug txawm raug kev nyuaj siab los yog raug kev txom nyem. Kev xyiv fab no nplij peb lub siab thiab ua rau peb ua siab loj, nthuav tej yam tseeb ntawm txoj moo zoo rau peb kawm, thiab ua rau peb hlub tus Tswv thiab tag nrho Vajtswv cov me nyuam ntxiv. Txawm yog peb xav tau cov koob hmoov zoo li no los, ntshe neeg ntiaj teb twb tsis nco qab lawm thiab tau tso tej yam no tseg.

Txhua lub lim tiam thaum peb txais lub cim nco txog, peb khi lus kom “nco ntsoov txog nws,” tus Tswv Yexus Khetos, thiab Nws txoj kev txi theej txhoj. Thaum peb ua raws li kev khi lus no, Vajtswv cog lus tias peb yuav “muaj nws tus Ntsuj Plig niaj hnub nrog [peb] nyob.”⁵

Peb yuav ua li cas thiaj ua tau li ntawd?

Qhov thib ib, peb siv zog ua neej kom tsim nyog muaj tus Ntsuj Plig.

Tus Vaj Ntsuj Plig Dawb Huv yeej koom nrog cov uas rau siab nco ntsoov tus Tswv lawv tus Vajtswv ib hnub dhau ib hnub.⁶ Raws li tus Tswv ntuas, peb yuav tsum muab tej yam ntawm lub ntiaj teb no tso tseg, thiab nrhiav tej yam ntawm ib qhov chaw uas zoo dua,⁷ vim “tus Tswv tus Ntsuj plig tsis nyob hauv tej tuam tsev uas tsis dawb huv.”⁸ Peb yeej yuav tsum sim ua raws li Vajtswv txoj kev cai, kawm vaj lug kub, thov Vajtswv, mus rau lub tuam tsev, thiab ua neej raws li tej nqe kev ntseeg thib kaum peb kom, “siab ncaj, tseeb, dawb huv, tsim nuj, tsim txiaj, thiab ua zoo rau txhua tus neeg.”

Qhov thib ob, peb yuav tsum txaus siab txais tus Ntsuj Plig.

Tus Tswv tau cog lus tias nws yuav qhia rau peb hauv peb lub cim xeeb thiab hauv peb lub siab, los ntawm tus Vaj Ntsuj Plig Dawb Huv, uas yuav los rau peb thiab yuav nyob rau hauv peb lub siab. ⁹ Kuv twb pib to taub qhov no thaum kuv yog ib tug tub txib nyob hauv Scotch Plains, New Jersey. Muaj ib hnub sov thaum lub Xya Hli Ntuj thaum sawv ntxov es kuv txais kev tshoov siab nrhiav ib tug uas tau xa npe los ntawm Tshav Tuam Tsev. Peb khob qhov rooj ntawm Elwood Schaffer lub tsev. Niam Schaffer hais tias lawv tsis xav mloog.

Thaum nws pib kaw qhov rooj, ua rau kuv xav tias kuv yuav ua ib yam uas kuv yeej ib txwm tsis tau ua thiab txij thaum ntawd tsis tau rov qab ua dua hlo li! Kuv tso kuv txhais ko taw kom qhov rooj kaw tsis tau thiab kuv nug hais tias, “Puas muaj leej twg ntxiv uas xav mloog peb zaj xov?” Nws tus ntxhais uas muaj 16 xyoo, Marti, xav mloog, thiab nws twb thov Vajtswv kom paub ua li cas ib hnub tas los xwb. Marti nrog wb sib ntsib, thiab sij hawm dhau mus ces nws niam koom nrog peb sib tham thiab. Ob tug ntawd twb koom lub Koom Txoos.

Daim Duab

Txwj Laug Rasband thaum nws yog ib tug tub txib

Los ntawm qhov uas Marti ua kev cai raus dej, muaj 136 tus neeg, tsis hais ntau tus los ntawm nws tsev neeg, uas tau ua kev cai raus dej thiab ua tej kev khi lus ntawm txoj moo zoo. Kuv zoo siab heev uas kuv tau mloog tus Ntsuj Plig thiab tso kuv txais ko taw kom qhov rooj kaw tsis tau thaum hnub sov sov hauv lub Xya Hli Ntuj ntawd. Marti thiab ib txhia ntawm nws tsev neeg nyob no hnub no.

Qhov thib peb, peb yuav tsum paub tus Ntsuj Plig thaum nws los.

Raws li tej uas muaj dhau los kuv xav tias feem ntau tus Ntsuj Plig siv tej kev xav hauv yus lub siab kom sib txuas lus. Ua rau yus xav txog tej lus uas yus paub lawm, uas yus to taub, uas tshoov yus lub siab. Cia li xav txog cov Neeg Nifais tej kev xav thaum lawv mloog tus Tswv thov Vajtswv rau lawv: “Thiab cov neeg coob coob tau hnov thiab tau ua tim khawv; thiab lawv tej siab tau qhib thiab lawv to taub nyob hauv lawv tej siab cov lus uas nws tau thov.”¹⁰ Lawv hnov Nws tej lus thov nyob hauv lawv lub siab. Tus Ntsuj Plig Dawb Huv lub suab yog ib lub suab yau yau.

Nyob hauv Phau Qub, Eliyas sib tawm tsam nrog Npa-as cov pov thawj. Cov pov thawj no xav tias Npa-as “lub suab” yuav los nrov cuag li xob quaj thiab ua rau lawv txoj kev txi rauv taws. Tiam sis tsis muaj ib lub suab, thiab tsis muaj hluav taws.¹¹

Tom qab ntawd, Eliyas thov Vajtswv. “Tus Tswv txawm hla los mus thiab ua cua daj cua dub ntsawj tej pov roob tawg pleb zom zaws thiab tej pob zeb tawg dawb vog, tiam sis tus Tswv tsis nyob hauv cov cua ntawd. Tom qab cua tu lawm, txawm muaj av qeeg, tiam sis tus Tswv tsis nyob hauv qhov av qeeg ntawd thiab.”

“Tom qab av qeeg tas txawm muaj hluav taws, tiam sis tus Tswv tsis nyob hauv cov hluav taws ntawd li thiab. Ces thaum cov hluav taws dhau lawm, txawm muaj ib lub suab hais yau yau tuaj.”¹²

Nej puas paub lub suab ntawd?

Thawj Tswj Hwm Monson qhia hais tias, “Thaum peb taug kev hauv lub neej no, cia peb kawm tus Ntsuj Plig yam lus.”¹³ Tus Ntsuj Plig hais tej lus uas peb xav hauv peb lub siab. Tej kev xav hauv lub siab no yeej mos muag, kev yaum uas hais kom yus ua los sis hais ib yam dab tsi, los yog paub teb li cas. Yog tias peb lam teev tiam Vajtswv, los sis nrhiav tej yam ntawm lub ntiaj teb, ces ntshe peb yuav tsis tshua txawj xav hauv peb lub siab lawm. Nifais hais rau Lamas thiab Lemuyees hais tias, “Neb twb tau hnov nws lub suab ib lub sij hawm txog ib lub sij hawm thiab nws twb tau maj mam ua suab yau yau hais lus rau neb, tiam sis neb tej siab tsis xeev li, es neb thiaj hnov tsis tau nws cov lus.”¹⁴

Lub Rau Hli Ntuj tas los, kuv raug txib mus rau Amelikas Sab Qab Teb. Lawv twb teem sij hawm rau peb tau 10 hnub mus xyuas Colombia, Peru, thiab Ecuador. Av qeeg twb ua rau ob peb puas tus neeg raug tuag, neeg coob raug mob, thiab ua rau tej tsev thiab tej zej zog puas tsuaj nyob hauv ob lug nroog Protoviejo thiab Manta uas nyob hauv Ecuador. Kuv txais kev tshoov siab teem sij hawm mus xyuas cov mej zeej nyob hauv ob lub nroog ntawd. Vim tej txoj kev ntawd puas lawm, peb tsis paub tseeb peb yuav mus taus. Muaj tseeb tiag, lwm tus twb qhia peb tias peb mus tsis taus, tiam sis kev tshoov siab ntawd twb tsis ploj mus. Yog li ntawd, peb tau koob hmoov thiab peb twb mus xyuas ob lug nroog ntawd.

Vim tsis tau ceeb toom cov mej zeej ntxov, kuv xav tias tej zaum yuav muaj ob peb tug thawj coj pov thawj hwj hauv zej zog uas yuav tuaj rau peb tej kev sib ntsib. Tiam sis, thaum peb tuaj txog ntawm txhua lub tsev ceg txheem ntseeg ces twb pom chav teev tiam puv nkaus mus txog ntua lub sam thiaj ua yeeb yam. Ib txhia uas tuaj yog cov mej zeej khov kho hauv thaj tsam ntawd, cov pioneer uas twb rau siab ntseeg lub Koom Txoos, uas yaum kom lwm tus tuaj nrog lawv teev tiam Vajtswv thiab hnov tus Ntsuj Plig nyob hauv lawv lub neej. Cov uas zaum ua ntej ntawm ob peb leej rooj yog cov mej zeej uas xiam cov uas lawv hlub thiab cov neeg zej zog thaum av qeeg ua zog koog. Kuv txais kev tshoov siab foom tus thwj tim txoj koob hmoov rau lawv txhua tus uas tuaj, yog thawj ob peb zaug uas kuv tau ua li ntawd. Txawm kuv sawv pem hauv ntej ntawm chav ntawd, zoo nkaus li kuv twb tso kuv ob txhais tes saum lawv txhua tus lub taub hau, thiab kuv hnov tus Tswv tej lus nchuav tawm ntawm kuv lub qhov ncauj los.

Daim Duab

Txwj Laug thiab Muam Rasband nyob hauv Amelikas Sab Qab Teb

Tsis tas li ntawd xwb. Kuv txais kev tshoov siab hais lus rau lawv ib yam li Yexus Khetos tau hais thaum nws tuaj xyuas cov neeg nyob hauv Amelikas. “Nws tau muab lawv tej me nyuam yaus … thiab foom koob hmoov rau lawv, thiab tau thov Leej Txiv rau lawv.”¹⁵ Peb twb nyob hauv Ecuador, peb tab tom ua peb Leej Txiv txoj hauj lwm, thiab cov no yog Nws cov me nyuam.

Qhov thib plaub, peb yuav tsum ua thaum peb txais kev tshoov siab thawj thawj zaug.

Cia li nco txog Nifais cov lus. Nws hais tias, “Thiab tus Ntsuj Plig tau coj kuv kev, paub tsis tau ua ntej rau tej uas kuv yuav tsum ua. Txawm li ntawd los kuv tseem pheej taug kev mus ntxiv.”¹⁶

Thiab peb yuav tsum ua thiab. Peb yuav tsum tso siab rau peb thawj txoj kev tshoov siab. Tej lub sij hawm peb xav mus xav los; peb tsis paub seb peb puas txais kev tshoov siab los ntawm sab ntsuj plig los yog peb xav ntawm peb tus kheej xwb. Thaum peb ua xyem xyav ob zaug, los yog ua xyem xyav peb zaug—thiab peb txhua tus twb ua li ntawd lawm—peb tso tus Ntsuj Plig tseg; peb ua xyem xyav txog Vajtswv tej lus ntuas. Tus Yaj Saub Yauxej Xamiv qhia hais tias, yog nej yuav mloog tej kev tshoov siab thawj zaug uas nej txais tau, ces nej yeej yuav ua qhov yog cuaj feem kaum zaus.¹⁷

Kuv hais lus ceeb toom: tsis txhob xav tias yuav ua ib yam loj heev vim nej ua raws li tus Vaj Ntsuj Plig Dawb Huv qhia. Cia li nco ntsoov tias nej ua hauj lwm raws li lub suab yau yau.

Thaum kuv yog ib qhov chaw tshaj tawm txoj moo zoo tus thawj tswj hwm nyob hauv New York City, kuv nrog ob tug tub txib nyob hauv ib lub tsev noj mov nyob hauv Bronx. Ib tsev neeg hluas nkag rau haud thiab zaum ze peb. Pom lawv zoo li lawv npaj siab kawm txog txoj moo zoo. Kuv saib ob tug tub txib thaum nkawd nrog kuv sib tham, ces pom thaum tsev neeg ntawd noj tas thiab tawm lub tsev noj mov mus lawm. Ces kuv hais tias, “Neb ob tug txwj laug, muaj ib yam dab tsi uas neb kawm tau hnub no. Neb twb pom ib tsev neeg zoo los rau hauv lub tsev noj mov no. Tsim nyog peb tau ua dab tsi?”

Ib tug txwj laug hais kiag: “Kuv xav tias kuv yuav sawv thiab mus nrog lawv tham. Kuv hnov dab tsi thawb kuv, tiam sis kuv tsis tau txav mus.”

Kuv hais tias, “Peb yeej yuav tsum ua thaum peb txais kev tshoov siab thawj thawj zaug. Qhov uas koj hnov qhov thawb ntawd yog tus Vaj Ntsuj Plig Dawb Huv!”

Kev tshoov siab thawj thawj zaug yog tej kev tshoov siab uas los saum ntuj los. Thaum tej ntawd pom zoo los yog ua tim khawv rau peb, peb yuav tsum paub tias tej ntawd yog dab tsi thiab tsis txhob cia ploj mus. Feem ntau, yog tus Ntsuj Plig uas tshoov peb lub siab kom ncav tes rau ib tug uas xav tau kev pab, qhov tseem ceeb yog tsev neeg thiab phooj ywg. Yog li ntawd lub suab yau yau, uas ntxhi dhau thiab tshab txhua yam,¹⁸ qhia peb txog tej cib fim qhia txog txoj moo zoo, ua tim khawv txog txoj Kev Muab txoj Moo Zoo Txum Tim Rov Qab Los thiab Yexus Khetos, txhawb nqa thiab pab lwm tus, thiab cawm ib tug uas yog Vajtswv tus me nyuam muaj nqis dim.

Cia li xav txog qhov no zoo li nej yog ib tug uas xub tuaj. Nyob hauv zej zog feem ntau, cov uas xub tuaj thaum muaj xwm txheej, kev txom nyem, los yog kev puas tsuaj puas ntsoog yog cov neeg tua hluav taws, cov tub ceev xwm, cov kws pab kho mob. Lawv tsom teeb tuaj txog, thiab kuv xav hais rau lawv tias, peb yeej ris lawv txiaj heev. Tus Tswv txoj kev yeej tsis pom zoo ib yam li tiam sis yeej yuav tsum tuaj sai sai npaum li ntawd. Tus Tswv paub tag nrho Nws cov me nyuam tej kev xav tau—thiab Nws paub leej twg npaj siab txais kev pab. Yog tias peb yuav qhia tus Tswv thaum peb thov Vajtswv thaum sawv ntxov hais tias peb npaj siab lawm, Nws yuav hu kom peb mus pab lwm tus. Yog peb yuav mus pab, Nws yuav rov qab hu peb ntau zaus thiab peb yuav ua xws li Thawj Tswj Hwm Monson hais tias yog “tus Tswv tes hauj lwm.”¹⁹ Peb yuav los ua cov neeg uas xub tuaj ntawm sab ntsuj plig coj kev pab los ntawm Vajtswv los rau lawv.

Yog tias peb tsom ntsoov rau tej kev tshoov siab uas los rau peb, ces peb yuav muaj lub txiaj ntsim txais kev tshwm sim thiab txais tus Ntsuj Plig tej lus qhia ntxiv. Tus Tswv hais kom peb tso siab rau tus Ntsuj Plig uas coj mus ua qhov zoo.²⁰

Thov kom peb yuav ua tib zoo ua raws li tus Tswv hu kom peb cia li zoo siab, vim Nws yuav coj peb kev.²¹ Nws coj peb dhau los ntawm tus Vaj Ntsuj Plig Dawb Huv. Thov kom peb yuav nyob ze tus Ntsuj Plig, ua raws li tej kev tshoov siab thaum txais thawj zaug, vim peb paub tias tej ntawd los ntawm Vajtswv los. Kuv ua tim khawv txog tus Vaj Ntsuj Plig Dawb Huv lub hwj chim kom coj peb kev, pov hwm peb, thiab nrog nraim peb nyob, los ntawm Yexus Khetos lub npe, amees.