Nws Txhais Tes uas Coj Peb Txhua Hnub

Cov neeg uas peb Leej Txiv Saum Ntuj Ceeb Tsheej nyiam siv kom coj Nws cov me nyuam kev yog cov pog yawg thiab niam tais yawm txiv ncaj ncees. Kuv pog yeej yog ib tug poj niam zoo li ntawd. Muaj ib zaug ntev tas los kuv thiaj tsis nco qab, thaum kuv yog ib tug me nyuam yaus, kuv txiv qhuab ntuas kuv. Kuv pog pom nws qhuab ntuas li no, es kuv pog hais tias, “Monte, kuv xav tias koj qhuab nws heev dhau.”

Kuv txiv teb hais tias, “Niam, kuv yeej yuav qhuab ntuas kuv cov me nyuam raws li kuv lub siab xav los sav.”

Kuv pog muaj tswv yim hais tias, “Kuv ib yam thiab.”

Kuv yeej xav tias kuv txiv mloog nws niam tej lus zoo hnub ntawd.

Thaum peb xav txog kev coj, tej zaum peb xav txog ib zaj nkauj qhuas Vajtswv uas peb paub zoo thiab nyiam—“Kuv Yog Vajtswv Me Nyuam.” Nyob hauv zaj ntawd muaj cov lus no hais tias “Qhia kuv, pab kuv, nrog kuv mus kev, pab kuv nrhiav qhov yog.”¹

Tsis ntev tas los, kuv twb xav tias cov lus no yog Vajtswv txoj lus txib cov niam tsev txiv tsev. Thaum kuv xav txog tej lus no, kuv kawm hais tias txawm yog zaj no kuj qhia li ntawd, muaj ib lub ntsiab uas tseem ceeb tshaj plaws. Txhua hnub, peb txhua tus thov Leej Txiv Saum Ntuj Ceeb Tsheej kom qhia peb, coj peb, thiab nrog peb mus kev.

Thawj Tswj Hwm Dieter F. Uchtdorf piav hais tias: “Peb Leej Txiv Nyob Saum Ntuj Ceeb Tsheej paub zoo dua lwm tus hais tias Nws cov me nyuam xav tau dab tsi. Nws txoj hauj lwm thiab lub yeeb koob yog kev pab peb txhua lub sij hawm, pub tej yam ntawm sab cev nqaij daim tawv thiab sab ntsuj plig kom pab peb rov qab los cuag Nws.”²

Cia li mloog tej lus no: Leej Txiv Saum Ntuj Ceeb Tsheej paub zoo dua lwm tus hais tias nej thiab kuv xav tau dab tsi. Yog li ntawd, zoo li Nws twb npaj tej yam uas pab tau peb txhua tus. Tej yam no muaj ntau yam. Xws li Nws Leej Tub thiab txoj Kev Theej Txhoj, tus Vaj Ntsuj Plig Dawb Huv, cov lus txib, cov vaj lug kub, kev thov Vajtswv, cov yaj saub, cov thwj tim, cov niam tsev txiv tsev, cov pog yawg thiab niam tais yawm txiv, cov thawj coj ntawm lub Koom Txoos hauv zej zog, thiab lwm tus—tag nrho yog cov uas pab peb rov qab mus nrog Nws nyob.

Thov cia kuv hais txog ob peb yam ntawm tej kev pab no uas tau pab kuv paub tias kuv muaj ib Leej Txiv uas hlub kuv, Nws qhia kuv, pab kuv, thiab nrog kuv thiab kuv tsev neeg mus. Kuv thov Vajtswv hais tias nej yuav pom nyob hauv nej lub neej hais tias Leej Txiv Saum Ntuj Ceeb Tsheej qhia, pab, thiab nrog nej mus kev, thiab vim nej paub li ntawd, nej yuav ua siab loj, vim nej paub tias nej tsis nyob nej ib leeg.

Leej Txiv Saum Ntuj Ceeb Tsheej cov lus txib yog tej yam tseem ceeb ntawm Nws txoj kev pab. Amas tshaj tawm hais tias “txoj kev phem yeej ib txwm tsis yog kev zoo siab.”³ Qhov uas yus cia neeg coj yeeb yam tsis zoo thiab tsis qhuab ntuas lawv tsis yog kev hlub thiab txhawb nqa lub tswv yim uas hais tias tej zaum kev phem yog kev zoo siab tiag. Xamuyees tus Neeg Lamas qhia meej txog lub tswv yim no: “Nej tau nrhiav txoj kev zoo siab los ntawm txoj kev ua tsis ncaj, yam uas tsis raws li txoj kev ncaj ib txwm muaj ntawd uas nyob hauv peb tus Thawj uas muaj hwj chim loj thiab Nyob Mus Ib Txhis.”⁴

Dhau los ntawm Nws cov yaj saub, Leej Txiv Saum Ntuj Ceeb Tsheej pheej ua rau peb nco qab tias kev ncaj ncees yog kev zoo siab. Vaj Ntxwv Npeyimas qhia tias Leej Txiv Saum Ntuj Ceeb Tsheej “xav kom nej yuav ua raws li nws tau txib nej; vim yog tias nej ua li ntawd, nws yuav foom koob hmoov kiag rau nej.”⁵ Los ntawm ib zaj nkauj qhuas Vajtswv ntxiv muaj tej lus uas ua rau peb nco ntsoov ib yam li no thiab:

Thaum kuv muaj 14 xyoos, kuv kawm txog ib txhia ntawm cov koob hmoov no. Kuv twb kawm tias kuv niam kuv txiv coj cwj pwm txawv me ntsis. Thaum kuv xav txog tej yam uas kuv pom, kuv nug hais tias, “Peb yuav mus ua tub txib los?” Kuv pom kuv niam lub ntsej muag xav tsis thoob ua rau kuv paub tias kuv twv yog lawm. Tom qab ntawd, nyob hauv tsev neeg kev sab laj, kuv cov kwv tij cov muam thiab kuv kawm tias Vajtswv twb hu peb niam peb txiv mus tswj hwm ib qhov chaw tshaj tawm txoj moo zoo.

Peb twb nyob hauv ib tshav yug tsiaj zoo nkauj nyob hauv Wyoming. Raws li kuv xav mas, kuv lub neej yeej zoo tag nrho. Thaum kuv mus kawm ntawv rov qab los tsev, kuv tau ua kuv tej dej num tas lawm, ces kuv mus plob hav zoov, nuv ntse, los yog nrog kuv tus aub mus ub mus no.

Tsis ntev tom qab kuv kawm txog nkawd txoj hauj lwm no, kuv kawm tias kuv yuav tsum tso kuv tus aub tseg. Nws lub npe hu ua Blue. Kuv cav ncauj rau kuv txiv, kuv nug hais tias kuv yuav ua li cas rau Blue. Kuv xav hais heev kom qhia tias qhov uas Vajtswv xav kom peb ua tsis ncaj ncees rau peb. Kuv yeej yuav nco ntsoov nws tej lus rau kuv. Kuv txiv hais tias, “Tsis paub tseeb. Nyaj nws mus tsis tau nrog peb, yog li ntawd koj yuav tsum nug Leej Txiv Saum Ntuj Ceeb Tsheej.” Kuv tsis tau xav tias nws yuav teb li ntawd.

Kuv txawm pib nyeem Phau Ntawv Maumoos. Kuv tau thov Vajtswv xav paub seb puas yog kuv yuav tsum tso kuv tus aub tseg. Lo lus teb tsis tau los kiag rau kuv; tiam sis, muaj ib txoj kev xav uas pheej tshoov kuv lub siab hais tias: “Tsis txhob ua nra hnyav rau koj niam koj txiv. Tsis txhob ua nra hnyav. Kuv twb hu koj niam koj txiv.”

Kuv paub tias Leej Txiv Saum Ntuj Ceeb Tsheej txib li cas. Qhov uas kuv paub li ntawd tsis tau pab kuv txoj kev tu siab thaum kuv tso kuv tus aub tseg. Tiam sis, los ntawm qhov kev txi me me ntawd, ua rau kuv lub siab mos muag, thiab qhov uas kuv ua raws li Leej Txiv Saum Ntuj Ceeb Tsheej lub siab nyiam ua rau kuv nyob kaj siab lug.

Kuv ua kuv Leej Txiv Saum Ntuj Ceeb Tsheej tsaug rau cov koob hmoov thiab kev zoo siab uas muaj los ntawm cov vaj lug kub, kev thov Vajtswv, tus Vaj Ntsuj Plig Dawb Huv, thiab ib leej txiv hauv lub ntiaj teb uas ua raws li nws lub luag hauj lwm qhia txoj moo zoo rau nws cov me nyuam. Nkawd twb qhia kuv, pab kuv, thiab nrog kuv mus kev kom pab kuv nrhiav txoj kev yog—qhov tseem ceeb yog thaum kuv yuav tsum ua ib yam dab tsi nyuaj heev.

Ntxiv rau tej yam kev pab uas kuv twb hais txog lawm, peb txhua tus muaj ib tug thawj coj pov thawj hwj kom pab peb thiab coj peb kev.

Thawj Tswj Hwm Boyd K. Packer hais tias: “Cov npisov yeej txais kev tshoov siab! Peb txhua tus muaj kev ywj siab xaiv ua raws li los yog xyeej peb cov thawj coj tej lus ntuas, tiam sis tsis txhob tso nej tus npisov tej lus ntuas tseg, txawm yog nws hais saum sam thiaj los yog rau nej ib leeg xwb.”⁷

Cov txiv neej no siv zog sawv tus Tswv cev. Txawm peb hluas los laus, thaum Dab Ntxwg Nyoog xav kom peb xav tias peb twb poob lawm, cov npisov coj tau peb kev. Thaum kuv nrog cov npisov tham, kuv twb kawm txog ib lub ntsiab uas lawv pheej hais txog tus uas lees txhaum los yog tus neeg uas raug txom nyem los ntawm lwm tus tej kev phem. Cov npisov yeej xav qhia tus ntawd txog Leej Txiv Saum Ntuj Ceeb Tsheej txoj kev hlub thiab xav nrog tus ntawd mus kev thaum nws nrhiav nws txoj kev rov qab mus tsev.

Tej zaum tej lus no qhia txog Leej Txiv Saum Ntuj Ceeb Tsheej txoj kev pab tseem ceeb tshaj: “Rau qhov Vajtswv hlub neeg ntiaj teb kawg li, nws thiaj li txib nws tib leeg Tub los rau hauv ntiaj teb.”⁸

Xwv kom qhia peb txhua yam uas peb yuav tsum ua, Yexus Khetos coj peb txoj kev vim Nws coj tus yam ntxwv zoo tag nrho uas peb yuav tsum xyaum. Nws ncav tes rau peb thov peb los coj raws li Nws.⁹ Thiab thaum peb txhua tus poob mus, Nws qhia peb tias, “Vim saib seb, kuv, Vajtswv, tau raug tej no rau sawv daws, xwv kom lawv yuav tsis raug yog hais tias lawv yuav hloov siab lees txim.”¹⁰

Yog ib lub txiaj ntsim zoo kawg! Kev hloov siab lees txim tsis yog kev raug txim; yog ib lub sam xeeb. Yog ib lub sam xeeb uas pab peb thiab coj peb kev. Yog vim li no cov vaj lug kub tshaj tawm tias peb yuav tsum tsis txhob qhia txog ib yam dab tsi tsuas yog kev hloov siab lees txim xwb.¹¹

Leej Txiv Saum Ntuj Ceeb Tsheej muaj ntau yam uas Nws siv tau, tiam sis feem ntau Nws siv ib tug neeg los pab Nws. Txhua hnub Nws muab cib fim rau peb kom pab, qhia, thiab nrog lwm tus neeg mus kev. Peb yuav tsum coj raws li tus Cawm Seej tus yam ntxwv. Peb kuj yuav tsum ua Leej Txiv Saum Ntuj Ceeb Tsheej txoj hauj lwm.

Peb cov nyob hauv Koom Haum Tub Hluas Pawg Tuam Thawj Tswj Hwm, peb paub tias cov tub hluas ntxhais hluas tau koob hmoov thaum lawv muaj niam muaj txiv thiab muaj cov thawj coj uas sawv Leej Txiv Saum Ntuj Ceeb Tsheej cev kom qhia, pab, thiab nrog lawv mus kev. Peb lub ntsiab cai¹² uas yuav pab peb koom tes nrog Leej Txiv Saum Ntuj Ceeb Tsheej txoj kev pab lwm tus yog li no:

Qhov thib ib, ua tej yam nrog cov tub hluas ntxhais hluas. Thawj Tswj Hwm Henry B. Eyring qhia txog qhov no hais tias: “Muaj tej yam uas peb muaj cuab kav ua uas tseem ceeb heev. Qhov uas muaj hwj chim dua txoj kev hais tej lus thaum qhia cov lus qhuab qhia yog qhov uas peb ua yam ntxwv zoo ua raws li cov lus qhuab qhia.”¹³ Kev coj cov tub hluas ntxhais hluas kev txhais hais tias yus nrog lawv. Qhov uas yus siv sij hawm nrog lawv qhia lawv tias yus hlub lawv thiab yus qhia tau lawv los ntawm yus tej lus thiab tus yam ntxwv.

Qhov thib ob, yog peb xav coj cov tub hluas ntxhais hluas kev, peb yuav tsum pab lawv nrog Vajtswv tham. Yeej yuav txog lub sij hawm uas txhua tus yuav tsum sawv ntsug nws tus kheej. Tsuas yog Leej Txiv Saum Ntuj Ceeb Tsheej xwb muaj peev xwm coj lawv kev nyob txhua qhov chaw txhua lub sij hawm. Peb cov tub hluas ntxhais hluas yuav tsum paub nrhiav Leej Txiv Saum Ntuj Ceeb Tsheej txoj kev coj.

Qhov thib peb, peb yuav tsum cia cov tub hluas ntxhais hluas coj. Ib yam li tus niam tsev txiv tsev uas tuav tus me nyuam yaus tes thaum nws kawm mus kev, peb yuav tsum cia tso lawv mus kom cov tub hluas ntxhais hluas vam meej. Yus yuav tsum ua siab ntev thiab muaj kev hlub yog yus cia cov tub hluas ntxhais hluas coj. Yeej nyuaj tshaj thiab siv sij hawm ntxiv yog tias yus ua yus tus kheej. Tej zaum lawv yuav dawm taw thaum lawv taug kev, tiam sis peb nrog lawv mus kev.

Cov kwv tij thiab cov muam, yuav muaj tej lub sij hawm nyob hauv peb lub neej thaum peb xav tias tej koob hmoov ntawm Vajtswv txoj kev coj nyob deb los yog tsis muaj hlo li. Xwv kom pab nej thaum nej txhawj xeeb li no, Txwj Laug D. Todd Christofferson cog lus tias: “Cia li saib nej tej kev khi lus tseem ceeb tshaj plaws thiab ua raws nraim li cov lus txib. Ces nej thov tau nrog kev ntseeg, tsis txhob ua xyem xyav, raws li nej xav tau, thiab Vajtswv yuav teb. Nws yuav txhawb nqa nej thaum nej ua hauj lwm thiab saib xyuas lwm tus. Thaum txog lub sij hawm uas Nws teem tseg thiab raws li Nws txoj kev Nws yuav ncav tes rau nej, thiab hais tias, ‘Kuv nyob ntawm no.’”¹⁴

Muaj ib zaug zoo li ntawd, kuv nrhiav Leej Txiv Saum Ntuj Ceeb Tsheej tej lus ntuas thaum kuv thov Vajtswv kawg siab kawg ntsws tsis tu tsis tseg ntev tshaj li ib xyoos kom nrhiav kev kho teeb meem. Kuv paub tseeb tias Leej Txiv Saum Ntuj Ceeb Tsheej teb txhua tus uas thov tiag tiag. Tiam sis ua rau kuv nyuaj siab heev, muaj ib hnub kuv thiaj li mus rau hauv lub tuam tsev muaj ib lo lus kuv xav nug xwb: “Leej Txiv Saum Ntuj Ceeb Tsheej, Koj puas muaj siab xav pab kuv?”

Kuv zaum nram qab ntawm chav tos hauv lub Tuam Tsev Logan Temple, ces ua ciav, ib tug phooj ywg rau kuv tsev neeg, tus thawj tswj hwm ntawm lub tuam tsev Vaughn J. Featherstone nkag los hauv chav ntawd. Nws sawv ntawm pawg ntseeg tom hauv ntej thiab tos txais peb txhua tus. Thaum nws pom kuv nyob nrog cov uas tuaj rau lub tuam tsev, nws nres hais lus, ntsia kuv, ces nws hais tias, “Tij Laug Brough, yeej zoo siab pom koj nyob hauv lub tuam tsev hnub no.”

Kuv yeej yuav nco ntsoov kuv xav li cas thaum lub sij hawm tseem ceeb ntawd. Zoo nkaus li—thaum nws hais lus—Leej Txiv Saum Ntuj Ceeb Tsheej ncav Nws tes thiab hais tias, “Kuv nyob ntawm no.”

Leej Txiv Saum Ntuj Ceeb Tsheej yeej hlub thiab mloog txhua tus me nyuam zaj lus thov.¹⁵ Vim kuv yog Nws ib tug me nyuam, kuv paub raws li lub sij hawm uas tus Tswv teem tseg, Nws teb kuv tej lus thov. Thiab dhau los ntawm lub sij hawm ntawd, kuv to taub hais tias peb yog Vajtswv cov me nyuam thiab Nws tau xa peb los nyob no peb thiaj yuav hnov tau Nws lub yeeb koob tam sim no thiab xwv kom muaj ib hnub peb yuav rov qab los nrog Nws nyob.

Kuv ua tim khawv tias Leej Txiv Saum Ntuj Ceeb Tsheej qhia peb, pab peb, thiab nrog peb mus kev. Thaum peb coj raws li Nws Leej Tub thiab ua raws li Nws cov tub qhe, cov thwj tim thiab cov yaj saub, peb yuav nrhiav kev kom txais tau txoj sia nyob mus ib txhis. Los ntawm Yexus Khetos lub npe, amees.