Kov Yeej lub Ntiaj Teb
Kev kov yeej lub ntiaj teb tsis yog ib lub sij hawm tseem ceeb nyob hauv yus lub neej xwb, tiam sis yog tej lub sij hawm tas yus lub neej uas qhia tias lub neej nyob mus ib txhis yuav zoo li cas.
Ntau xyoo tas los, Thawj Tswj Hwm David O. McKay qhia txog ib lub sij hawm thaum nws caij nkoj mus rau Samoa. Thaum nws tsaug zog, nws “ua yog toog pom ib yam uas zoo kawg. Nws hais tias, “Nyob deb heev kuv pom ib lub nroog dawb uas zoo nkauj heev. … Muaj cov txiv ntoo qab zib … thiab txhua qhov chaw tawg paj zoo nkauj kawg. … Muaj ib cov neeg coob heev [uas] tuaj txog lub nroog no. Txhua tus hnav ib lub tsho tshaj sab uas dawb heev. … Ces ua rau kuv tsom ntsoov … ntsia lawv tus thawj coj, thiab txawm kuv tsuas pom tau nws lub ntsej muag me ntsis xwb … , kuv pom kiag hais tias yog kuv tus Cawm Seej! Nws lub ntsej muag uas ci ntsa iab heev [yeej] zoo kawg. … Kev kaj siab lug los ntawm nws … yeej yog zoo li nyob saum ntuj!”
Thawj Tswj Hwm McKay hais ntxiv hais tias, “Lub nroog no … yog nws li … lub Nroog Nyob Mus Ib Txhis; thiab cov neeg uas nrog nws mus yuav nyob kaj siab lug thiab zoo siab mus ib txhis nyob haud.”
Thawj Tswj Hwm McKay xav hais tias, “Lawv [yog] leej twg? [Cov neeg no yog leej twg?]”
Nws piav hais tias muaj li cas tom qab ntawd:
“Zoo li tus Cawm Seej paub kuv tej kev xav, nws cia li teb thaum nws taw tes rau [cov lus] uas sau ua voj voog nyob saum [cov neeg], … uas yog xim kub sau ntawv … :
“‘Cov No Yog cov uas Tau Kov Yeej lub Ntiaj Teb Lawm—
“Cov uas Tau Yug Dua Tshiab Tiag Tiag!’”1
Tau ntau xyoo, kuv twb nco txog cov lus no: “Cov no yog cov uas tau kov yeej lub ntiaj teb lawm.”
Cov koob hmoov uas tus Tswv tau cog lus rau cov uas kov yeej lub ntiaj teb yeej zoo kawg nkaus. Lawv yuav “tau hnav cev ris tsho dawb … thiab yuav muab [lawv tej npe sau rau hauv] phau ntawv txheeb txoj sia.” Tus Tswv yuav tab meeg qhia rau Nws Txiv thiab rau Nws cov tim tswv hais tias lawv yog Nws li.2 Txhua tus yuav muaj feem hauv thawj txoj kev sawv rov los,3 txais txoj sia nyob mus ib txhis,4 thiab yuav tsis tawm ntawm Vajtswv xub ntiag mus ib zaug ntxiv li lawm.5
Peb puas muaj peev xwm kov yeej lub ntiaj teb thiab txais cov koob hmoov no? Muaj los mas.
Kev Hlub tus Cawm Seej
Cov uas kov yeej lub ntiaj teb yeej hlub peb tus Tswv thiab tus Cawm Seej, Yexus Khetos, kawg siab kawg ntsws.
Nws txoj kev yug los, Nws lub neej zoo tag nrho, Nws txoj Kev Theej Txhoj mus ib txhis nyob hauv Khexemanes thiab Khaulakhauthas qhib kev rau peb txhua tus Sawv Rov Los. Thiab yog peb hloov siab lees txim tiag tiag, Nws ib leeg xwb thiaj ntxuav tau peb tej kev txhaum mus, peb thiaj yuav rov qab mus cuag Vajtswv. “Peb muaj kev hlub rau qhov Vajtswv twb xub hlub peb lawm.”6
Yexus hais tias, “Cia li zoo siab, rau qhov kuv twb kov yeej lub ntiaj teb no lawm.”7
Tom qab ntawd Nws hais tias Nws xav kom peb kov yeej lub ntiaj teb.8
Kev kov yeej lub ntiaj teb tsis yog ib lub sij hawm tseem ceeb nyob hauv yus lub neej xwb, tiam sis yog tej lub sij hawm tas yus lub neej uas qhia tias lub neej nyob mus ib txhis yuav zoo li cas.
Ib tug me nyuam pib kov yeej lub ntiaj teb thaum nws kawm thov Vajtswv thiab hu nkauj, “Kuv xav ua neeg zoo li Yexus.”9 Nws kov yeej ntxiv thaum nws kawm txog tus Cawm Seej lub neej nyob hauv Phau Tshiab thiab xav txog lub hwj chim ntawm tus Cawm Seej txoj Kev Theej Txhoj nyob hauv Phau Ntawv Maumoos.
Kev thov Vajtswv, kev hloov siab lees txim, kev coj raws li tus Cawm Seej, thiab kev txais Nws txoj kev tshav ntuj ua rau peb to taub zoo dua vim li cas peb nyob no thiab peb yuav tsum hloov los ua neeg zoo li cas.
Amas piav li no hais tias: “Ua rau lawv lub siab hloov loj heev, thiab lawv txo lawv lub hwj chim thiab tso lawv lub siab rau Vajtswv tus uas tseeb thiab muaj sia nyob … lawv muab siab rau ntseeg mus txog thaum kawg.”10
Cov uas kov yeej lub ntiaj teb no paub tias lawv lav ris rau lawv Leej Txiv Saum Ntuj Ceeb Tsheej. Qhov uas yus hloov siab lees txim rau yus tej kev txhaum tsis yog kev khuam tes khuam taw tiam sis yog kev ywj siab, thaum “tej kev txhaum [uas] liab cuag ntshav … los ua dawb paug li daus.”11
Kev Lav Ris rau Vajtswv
Nyuaj rau cov neeg ntiaj teb lav ris rau Vajtswv—zoo li ib tug tub hluas ntxhais hluas uas ua si thaum nws niam txiv tsis nyob hauv tsev, ua plees ua yi, thiab tsis kam xav txog tej yam nws yuav raug thaum nws niam nws txiv rov qab los 24 teev tom ntej.
Neeg ntiaj teb xav muaj kom raws li sab cev nqaij daim tawv nyiam thiab tsis xav tswj hwm lawv tus kheej.
Kev kov yeej lub ntiaj teb tsis zoo li kev tsov rog thoob ntiaj teb tiam sis yog ib yam kev tsov rog peb tawm tsam nyob hauv peb tus kheej lub siab lub ntsws.
Kev kov yeej lub ntiaj teb txhais hais tias yus saib lo lus txib tseem ceeb tshaj plaws rau nqi: “Nej yuav tsum hlub tus Tswv uas yog nej tus Vajtswv kawg siab kawg ntsws, kawg plab kawg plawv thiab kawg nej lub dag lub zog.”12
Tus kws sau ntawv txog Khetos C. S. Lewis piav li no hais tias: “Khetos hais tias ‘Muab Tag Nrho rau kuv. Kuv tsis xav tau ib feem ntawm koj lub sij hawm thiab ib feem ntawm koj cov nyiaj thiab ib feem ntawm koj tej hauj lwm: Kuv xav tau Koj xwb.’”13
Kev kov yeej lub ntiaj teb yeej yog kev ua raws li peb tau cog lus rau Vajtswv—ua raws li peb tej kev khi lus thaum ua kev cai raus dej thiab nyob hauv lub tuam tsev thiab ua raws li peb tau lav lus kom muab siab npuab peb tus khub mus ib txhis. Kev kov yeej lub ntiaj teb ua rau peb txo hwj chim txais lub cim nco txog txhua lub lim tiam, thov kev zam txim thiab cog lus tias peb yuav “nco ntsoov txog nws thiab ua raws li nws tej lus txib,” kom peb “yuav muaj nws tus Ntusj Plig nrog [peb] nyob tas mus li.”14
Peb txoj kev hwm Hnub Caiv tsis tiav thaum peb kaw lub tsev koom txoos lub qhov rooj; tiam sis peb qhib qhov rooj rau ib hnub zoo nkauj kom peb tau so, kawm, thov Vajtswv, thiab pab peb tsev neeg thiab lwm tus uas xav tau kev pab. Tsis yog peb zoo siab thaum lub sij hawm mus rau lub koom txoos tas lawm ua rau peb xav nrhiav lub TV ua ntej kev ncaws pob yuav pib, tiam sis thov kom peb tseem xav txog tus Cawm Seej thiab Nws hnub dawb huv.
Neeg ntiaj teb pheej mloog tej lub suab uas hais tej kev haub kev ntxias cuag tsi.15
Kev kov yeej lub ntiaj teb yog kev tso siab rau tib lub suab uas ceeb toom, nplij siab, qhia, thiab ua rau yus nyob kaj siab lug “tsis muab … li neeg ntiaj teb muab.”16
Tsis Cuaj Khaum
Kev kov yeej lub ntiaj teb txhais hais tias peb saib lwm tus rau nqi, vim peb nco txog lo lus txib thib ob17: “Nej cov leej twg xav ua tus hlob, tus ntawd yuav tsum ua sawv daws qhev.”18 Peb tus khub txoj kev zoo siab yeej tseem ceeb dua li tej yam peb nyiam. Kev pab peb cov me nyuam kom hlub Vajtswv thiab ua raws li Nws cov lus txib yog ib qho tseem ceeb. Peb txaus siab muab peb tej khoom los ntawm kev them ib feem kaum, cov nyiaj yoo mov, thiab pub rau cov uas xav tau. Thiab thaum peb nrhiav kev ua raws li Vajtswv lub siab nyiam, tus Tswv coj peb mus rau cov uas peb pab tau.
Neeg ntiaj teb yeej saib lawv tus kheej zoo li lawv nyob nruab nrab, lawv muab hlob tshaj tawm hais tias, “Saib kuv zoo dua li kuv tus neeg zej zog! Saib tej yam uas yog kuv li! Saib kuv tseem ceeb npaum li cas!”
Yooj yim rau neeg ntiaj teb chim siab, tsis txaus siab, cuaj khaum, nyiam lwm tus qhuas, tiam sis cov uas kov yeej lub ntiaj teb txo hwj chim, muaj siab hlub, ua siab ntev, thiab muaj kev khuv leej rau cov uas tsis zoo li nej.
Kev Nyab Xeeb Los ntawm cov Yaj Saub
Kev kov yeej lub ntiaj teb yeej txhais hais tias neeg ntiaj teb yuav thuam tej yam uas peb ntseeg. Tus Cawm Seej hais tias:
“Yog neeg ntiaj teb ntxub nej, nej yuav tsum nco ntsoov hais tias, lawv twb xub ntxub kuv ua ntej lawm.”
“Yog nej nyiam ua raws li neeg ntiaj teb ua, ces neeg ntiaj teb yuav hlub nej.”19
Tag kis no Thawj Tswj Hwm Russell M. Nelson hais tias, “Yexus Khetos cov thwj tim tseeb yeej txaus siab sawv, hais lus, thiab ua txawv ntawm lwm tus tib neeg hauv lub ntiaj teb.”20
Khetos ib tug pab coj tsis txhawj yog tias ib qhov post txog nws txoj kev ntseeg tsis muaj 1,000 tus neeg nyiam los yog tsis txais ob peb lub ntsej muag emoji uas zoo siab.
Kev kov yeej lub ntiaj teb tsis nyob ntawm peb txoj kev sib txuas online tiam sis nyob ntawm peb txoj kev sib txuas lus nrog Vajtswv.
Tus Tswv muab kev nyab xeeb rau peb thaum peb mloog Nws cov yaj saub thiab cov thwj tim tej lus.
Thawj Tswj Hwm Thomas S. Monson hais tias: “Lub ntiaj teb yog ib qho chaw nyuaj ua neej. … [Thaum peb mus rau lub tuam tsev], … peb haj yam yuav txawj tiv mus dhau txhua txoj kev cov nyom uas peb ntsib thiab yuav kov yeej txhua txoj kev haub ntxias uas peb raug. … Peb yuav tau dag tau zog thiab yuav rov qab kho peb lub siab kom zoo.”21
Neeg ntiaj teb siv tej kev ntxias uas loj zuj zus, kev meem txom, thiab kev pauv qhov tseeb, uas ntxias cov neeg rau siab ntseeg kom lawv tso tej yam ntawm sab ntsuj plig tseg, qhia tias tej uas muaj dhau los tsis muaj tseeb.
Kev kov yeej lub ntiaj teb yog kev nco ntsoov, txawm peb poob siab los, txog tej lub sij hawm thaum peb tau hnov tus Cawm Seej txoj kev hlub thiab txoj kev kaj. Txwj Laug Neal A. Maxwell piav txog tej lub sij hawm zoo li no hais tias: “Kuv twb tau koob hmoov, thiab kuv yeej paub tias Vajtswv paub tias kuv paub kuv twb tau koob hmoov lawm.”22 Txawm peb xav tias tsis muaj leej twg nco qab peb, peb tsis hnov qab.
Kev kov yeej lub ntiaj teb tsis txhais hais tias peb ua neej nyob peb tus kheej, tsis raug tej kev tsis ncaj ncees thiab tej yam nyuaj ntawm lub neej no. Tiam sis, peb qhib peb lub siab ntseeg, ua rau peb los nyob ze tus Cawm Seej thiab Nws tej lus cog tseg.
Txawm peb yuav tsis ua neeg zoo tag nrho hauv lub neej no los, kev kov yeej lub ntiaj teb ua rau peb cia siab tias muaj ib hnub peb yuav “sawv ntawm [peb tus Txhiv Dim] xub ntiag; [thiab] yuav pom nws lub ntsej muag nrog kev zoo siab,”23 thiab hnov Nws lub suab: “Nej cov uas tau kuv Txiv txoj koob hmoov, nej cia li los kav lub teb chaws uas twb npaj rau nej.”24
Txwj Laug Bruce D. Porter tus Yam Ntxwv
Thaum lub Kaum Ob Hlis Ntuj hnub tim 28 xyoo no, peb tus phooj ywg thiab tus Tuam Thawj Coj uas peb hlub Txwj Laug Bruce D. Porter tas sim neej no. Nws twb muaj 64 xyoos.
Kuv xub ntsib Bruce thaum wb kawm ntawv tim Brigham Young University. Nws yog ib tug neeg uas zoo tshaj thiab ntse tshaj. Tom qab nws kawm txog tej xwm Russian kawm tau nws doctoral los ntawm Harvard University, Bruce tej kev xav thiab tej kev txawj sau ntawv ua rau nws muaj koob muaj npe uas ntshe yuav ua rau nws khav theeb, tiam sis neeg ntiaj teb cov nyiaj thiab tej lus qhuas yeej tsis tau hloov nws lub siab.25 Nws yeej muab siab npuab nws tus Cawm Seej, Yexus Khetos; thiab nws tus khub mus ib txhis, Susan; thiab rau nws cov me nyuam thiab me nyuam xeeb ntxwv.
Thaum Bruce yug los nws lub raum muaj teeb meem. Nws phais raum, tiam sis sij hawm dhau mus ces nws ob lub raum tsis khiav zoo.
Tsis ntev tom qab tau hu Bruce ua ib tug Tuam Thawj Coj thaum xyoo 1995, wb ua hauj lwm ua ke nyob hauv Frankfurt, Germany, es nws txoj hauj lwm yog tsom ntsoov rau Russia thiab Europe Sab Hnub Tuaj.
Txwj Laug Porter lub neej hloov ntau heev thaum xyoo 1997 thaum nws ob lub raum tsis khiav thiab kev noj qab nyob zoo pib ploj mus. Tsev neeg Porter twb rov qab mus rau Salt Lake City.
Tau 22 xyoos thaum nws ua hauj lwm hauv cov Xya Caum, Bruce twb mus rau hauv lub tsev kho mob ntau zaus, tsis hais 10 zaus phais mob. Cov kws kho mob twb qhia rau Susan ob zaug hais tias Bruce yuav xiam ua ntej txog sawv ntxov, tiam sis nws twb rov zoo.
Tau 12 xyoos thaum nws tseem ua hauj lwm ua ib tug Tuam Thawj Coj, Bruce yuav tsum lim ntshav kom ua rau nws cov ntshav huv. Thaum ntawd, nws yuav tsum lim ntshav tsib hmo thiab plaub xuab moos txhua hmo ntawd kom nws thiaj ua tau nws txoj hauj lwm hauv lub Koom Txoos thaum nruab hnub thiab mus rau tej lub rooj sab laj thaum hnub Saturday thiab Sunday. Tom qab nws txais ob peb txog koob hmoov pov thawj hwj thiab nws tsis tau rov zoo, Bruce tsis paub vim li cas, tiam sis nws paub tias nws tso siab rau leej twg.26
Thaum xyoo 2010, Bruce txais ib lub raum los ntawm nws tus tub David. Zaum no nws lub cev tau txais lub raum ntawd. Yog ib qho txuj ci tseem ceeb, uas pab nws noj qab nyob zoo thiab thaum kawg nws thiab Susan nkawd rov qab mus rau Teb Chaws Russia, nws ua hauj lwm hauv Cheeb Tsam Pawg Thawj Tswj Hwm.
Thaum lub Kaum Ob Hlis Ntuj hnub tim 26 xyoo tas los, tom qab nws tawm tsam tej kab mob uas tsis tu tsis tseg nyob hauv lub tsev kho mob hauv Salt Lake City, nws thov kom cov kws kho mob tawm nws hoob mus. Bruce qhia Susan tias, “nws paub dhau los ntawm tus Ntsuj Plig hais tias cov kws kho mob ua tsis tau dab tsi kom cawm tau nws txoj sia. Nws paub … hais tias Leej Txiv Saum Ntuj Ceeb Tsheej yuav coj nws mus tsev. Nws twb nyob kaj siab lug puv npo.”27
Thaum lub Kaum Ob Hlis Ntuj hnub tim 28, Bruce rov qab mus rau nws lub tsev. Ob peb teev tom qab ntawd, muaj cov uas nws hlub nyob ib puag ncig, nws cia li rov qab mus rau nws lub tsev saum ntuj ceeb tsheej.
Ntau xyoo tas los, Bruce Porter tau sau tej lus no rau nws cov me nyuam:
“Kuv zaj lus tim khawv txog qhov uas muaj Yexus Khetos tiag tiag thiab txog Nws txoj kev hlub yeej tau coj kuv lub neej. … Yog ib zaj lus tim khawv uas tus Ntsuj Plig qhia rau kuv tias nws muaj txoj sia nyob, thiab hais tias nws yog kuv tus Txhiv Dim thiab Phooj Ywg txhua lub sij hawm kuv xav tau.”28
“Qhov peb yuav tsum ua … yog kev paub [tus Cawm Seej] thiab, dhau los ntawm kev ntseeg nws, kov yeej tej kev sim siab thiab tej kev ntxias ntawm lub ntiaj teb no.”29
“Cia peb rau siab ntseeg thiab khov kho, tso siab plhuav rau nws.”30
Bruce Douglas Porter tau kov yeej lub ntiaj teb.
Thov kom peb yuav siv zog me ntsis ntxiv kom kov yeej lub ntiaj teb, tsis txhob zam peb tej kev txhaum loj heev tiam sis ua siab ntev thaum peb ua txhaum me ntsis, khiav hauj lwm sai dua ntxiv, thiab ua siab dawb pab lwm tus. Thaum nej tso siab rau tus Cawm Seej ntxiv, kuv cog lus rau nej tias nej yuav tau koob hmoov uas yog kev kaj siab lug ntxiv hauv lub neej no thiab kev paub tseeb txog nej txoj hmoov nyob mus ib txhis, los ntawm Yexus Khetos lub npe, amees.