Tus Vaj Ntsuj Plig Dawb Huv Pab Nej Li Cas?
Tus Vaj Ntsuj Plig Dawb Huv ceeb toom, tus Vaj Ntsuj Plig Dawb Huv nplij neeg lub siab, thiab tus Vaj Ntsuj Plig Dawb Huv ua tim khawv.
Ib hmo Monday tsis ntev tas los, kuv tus poj niam, Lesa, thiab kuv wb mus xyuas ib tsev neeg hluas nyob hauv wb zej zog. Thaum wb nyob ntawd, tsev neeg no caw wb nrog lawv muaj tsev neeg hmo ua ke, lawv qhia hais tias tus tub uas muaj cuaj xyoos twb npaj ib zaj lus qhia. Wb cia li nyob xwb!
Tom qab peb hu nkauj qhib, thov Vajtswv, thiab hais tsev neeg zaj xov xwm, tus uas muaj cuaj xyoos pib nyeem ib lo lus nug los ntawm nws zaj lus qhia: “Tus Vaj Ntsuj Plig Dawb Huv pab nej li cas?” Lo lus no ua rau lawv tsev neeg pib sib tham ua ke thaum txhua tus qhia txog lawv tej kev xav thiab tej tswv yim. Kuv yeej xav tias peb tus xib hwb npaj nws zaj lus zoo thiab ua rau kuv pheej xav txog nws lo lus nug.
Txij thaum ntawd los, kuv pheej nug kuv tus kheej hais tias, “Tus Vaj Ntsuj Plig Dawb Huv pab nej li cas?”—ib lo lus nug tseem ceeb rau cov me nyuam hauv lub Koom Haum Me Nyuam Yaus uas yuav muaj yim xyoos thiab npaj ua kev cai raus dej thiab rau cov me nyuam uas nyuam qhuav ua kev cai raus dej thiab txais lub txiaj ntsim Vaj Ntsuj Plig Dawb Huv. Yeej yog ib lo lus tseem ceeb rau ntau txhiab tus neeg uas hloov siab los ntseeg tsis ntev tas los.
Kuv caw nej, qhov tseem ceeb yog cov me nyuam hauv lub lub Koom Haum Me Nyuam Yaus, xav txog qhov uas “Tus Vaj Ntsuj Plig Dawb Huv pab nej li cas?” Thaum kuv xav txog lo lus nug no, ua rau kuv xav txog ib lub sij hawm thaum kuv yog ib tug tub hluas. Nov yog ib zaj uas kuv hais rau Txwj Laug Robert D. Hales tsis ntev tom qab lawv hu kuv ua ib tug hauv Pawg Kaum Ob tug Thwj Tim thiab nws muab sau hauv ib zaj txog kuv lub neej nyob hauv ib phau xov xwm ntawm lub Koom Txoos.1 Tej zaum nej ib txhia twb hnov zaj no, tiam sis ib txhia tsis tau hnov.
Thaum kuv muaj 11 xyoos, muaj ib hnub sov sov es kuv txiv nrog kuv taug mus pem roob ze wb lub tsev. Thaum kuv Txiv taug ib txoj lw ntxhab, kuv dhia ntawm ib lub pob zeb loj loj rau ib lub nyob ntug txoj lw. Kuv yuav tsum nce saum ib lub pob zeb uas loj zog, ces kuv thiaj li pib nce saud. Thaum kuv ua li ntawd, kuv ceeb tas thaum kuv txiv tuav kiag kuv txoj siv thiab rub kuv nqis los, hais tias, “Tsis txhob nce saum lub pob zeb ntawd. Cia wb taug txoj lw xwb.”
Ob peb feeb tom qab ntawd thaum wb tau mus pem roob me ntsis ntxiv, wb xav tsis thoob pom ib tug nab loj uas tus tw nrov nrov pw saum lub pob zeb uas kuv twb yuav nce.
Tom qab ntawd, thaum wb tsav tsheb mus tsev, kuv paub kuv Txiv tos kuv nug nws hais tias, “Ua cas koj ho paub tus nab nyob ntawd?” Kuv thiaj li nug nws, thiab kuv lo lus nug ua rau wb sib tham txog tus Vaj Ntsuj Plig Dawb Huv thiab uas tus Vaj Ntsuj Plig Dawb Huv pab peb li cas. Kuv yeej nco ntsoov tej yam uas kuv tau kawm hnub ntawd.
Nej puas pom tias tus Vaj Ntsuj Plig Dawb Huv pab kuv li cas? Kuv yeej zoo siab uas kuv txiv mloog tus Vaj Ntsuj Plig Dawb Huv lub suab yau yau, vim ntshe nws twb cawm kuv txoj sia.
Tej Yam Peb Paub txog tus Vaj Ntsuj Plig Dawb Huv
Ua ntej peb xav txog lo lus nug hais tias “Tus Vaj Ntsuj Plig Dawb Huv pab nej li cas?” cia peb rov xyuas tej yam uas tus Tswv tau muab tshwm sim txog tus Vaj Ntsuj Plig Dawb Huv. Muaj ntau yam tseeb nyob mus ib txhis uas peb kawm tau, tiam sis hnub no kuv yuav hais txog peb qho xwb.
Qhov thib ib, tus Vaj Ntsuj Plig Dawb Huv yog tus thib peb hauv Pawg Vajtswv. Peb kawm qhov tseeb no nyob hauv tej nqe kev ntseeg thib ib: “Peb ntseeg Vajtswv, Leej Txiv tus uas Nyob Mus Ib Txhis, thiab Nws tus Tub Yexus Khetos, thiab tus Vaj Ntsuj Plig Dawb Huv.”2
Qhov thib ob, tus Vaj Ntsuj Plig Dawb Huv yog ib tug ntsuj plig, raws li piav nyob hauv vaj lug kub: Leej Txiv muaj ib lub cev muaj nqaij thiab muaj txha uas kov tau ib yam li tib neeg; Leej Tub los muaj thiab; tiam sis tus Vaj Ntsuj Plig Dawb Huv tsis muaj ib lub cev muaj nqaij thiab muaj txha, tiam sis yog ib tug Ntsuj Plig xwb. Yog tsis zoo li ntawd, tus Vaj Ntsuj Plig Dawb Huv yuav nyob tsis tau hauv peb.3 Qhov no txhais hais tias tus Vaj Ntsuj Plig Dawb Huv muaj ib lub cev ntsuj plig xwb, Nws tsis zoo li Vajtswv Leej Txiv thiab Yexus Khetos, uas muaj lub cev nqaij daim tawv. Qhov tseeb no piav meej vim li cas peb hu tus Vaj Ntsuj Plig Dawb Huv tej npe xws li tus Ntsuj Plig Dawb Huv, Vajtswv tus Ntsuj Plig, tus Tswv tus Ntsuj Plig, tus Ntsuj Plig Dawb Huv ntawm Kev Cog lus, thiab tus Nplij Siab.4
Qhov thib peb, lub txiaj ntsim Vaj Ntsuj Plig Dawb Huv yog los ntawm kev tso tes saum taub hau. Txoj kab ke no, uas ua tom qab ua kev cai raus dej, ua rau peb muaj tau tus Vaj Ntsuj Plig Dawb Huv nrog peb nyob txhua lub sij hawm.5 Xwv kom ua txoj kab ke no, cov tuav lub Pov Thawj Hwj Mekixedes uas tsim nyog tso lawv tes saum ib tug neeg lub taub hau,6 hais nws lub npe, qhia tias lawv muaj txoj cai pov thawj hwj dab tsi, thiab los ntawm Yexus Khetos lub npe, pom zoo rau nws ua ib tug mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, thiab hais tej lus tseem ceeb no “Cia li txais tus Vaj Ntsuj Plig Dawb Huv.”
Tus Vaj Ntsuj Plig Dawb Huv Pab Nej Li Cas?
Tom qab peb tau rov qab kawm txog peb yam tseeb tseem ceeb txog tus Vaj Ntsuj Plig Dawb Huv, peb yuav rov qab xav txog lo lus nug: “Tus Vaj Ntsuj Plig Dawb Huv pab nej li cas?”
Tus Vaj Ntsuj Plig Dawb Huv Ceeb Toom
Ib yam li kuv piav hauv kuv zaj txog thaum kuv yog ib tug tub hluas, tus Vaj Ntsuj Plig Dawb Huv yuav pab nej ceeb toom nej ua ntej txog tej xwm txheej ntawm sab cev nqaij daim tawv thiab sab ntsuj plig. Kuv twb rov qab kawm txog lub luag hauj lwm tseem ceeb ntawm tus Vaj Ntsuj Plig Dawb Huv kom ceeb toom peb thaum kuv ua hauj lwm hauv Cheeb Tsam Pawg Thawj Tswj Hwm nyob hauv Japan.
Thaum lub sij hawm no, kuv ua hauj lwm nrog Thawj Tswj Hwm Reid Tateoka ntawm Qhov Chaw Tshaj Tawm txoj Moo Zoo Japan Sendai. Raws li nws ib txwm ua, Thawj Tswj Hwm Tateoka npaj ib txoj kev sib ntsib rau cov tub txib cov thawj coj nyob hauv nws qhov chaw tshaj tawm txoj moo zoo sab qab teb. Ob peb hnub ua ntej kev sib ntsib no, Thawj Tswj Hwm Tateoka txais kev tshoov siab kom caw tag nrho cov tub txib nyob hauv thaj tsam ntawd rau cov thawj coj kev sib ntsib, tsis yog ib pawg me me ntawm cov tub txib thiab ntxhais txib uas yog thawj coj.
Thaum nws hais tias nws xav ua li no, lwm tus qhia nws tias kev sib ntsib no tsis yog rau tag nrho cov tub txib ntxhais txib tiam sis yog rau cov thawj coj xwb. Txawm li ntawd los, nws tsis ua raws li lawv ib txwm ua thiab ua raws li kev tshoov siab uas nws twb tau txais, nws thiaj li caw tag nrho cov tub txib ntxhais txib uas nyob hauv tej lub nroog ze ntug dej hiav txwv, tsis hais lub nroog Fukushima, rau kev sib ntsib ntawd. Hnub ntawd, Peb Hlis Ntuj 11, 2011, cov tub txib ntxhais txib koom ua ke rau kev sib ntsib nyob hauv lub nroog Koriyama uas nyob rau hauv teb chaws sab haud.
Thaum lawv muaj kev sib ntsib no muaj av qeeg ua zog koog npaum li 9.0 thiab nthwv dej loj loj raug thaj tsam Japan uas yog Qhov Chaw Tshaj Tawm txoj Moo Zoo Japan Sendai. Tu siab uas ntau lub nroog nyob ze ntug dej hiav txwv—tsis hais tej lub nroog uas cov tub txib ntxhais txib twb tuaj txog—raug puas tsuaj puas ntsoog ntau thiab ntau tus neeg xiam thiab. Thiab tom qab ntawd lub nroog Fukushima raug mob nuclear kis lawm.
Txawm yog ua rau lub tsev sib ntsib uas cov tub txib ntxhais txib nyob raug puas hnub ntawd vim muaj qhov av qeeg, vim nws ua raws li tus Vaj Ntsuj Plig Dawb Huv tej kev tshoov siab, Thawj Tswj Hwm thiab Muam Tateoka thiab tag nrho cov tub txib ntxhais txib nyob ua ke. Lawv tsis nyob hauv tej qhov chaw uas raug puas tsuaj los ntawm nthwv dej loj loj thiab qhov chaw uas qhov mob nuclear kis lawm.
Yog tias nej ua raws li tus Vaj Ntsuj Plig Dawb Huv tej kev tshoov siab—tej kev tshoov siab uas yau yau—tej zaum nej yuav tsis paub hais tias nej twb tawm ntawm tej xwm txheej ntawm sab ntsuj plig thiab sab cev nqaij daim tawv.
Cov kwv tij thiab cov muam, tus Vaj Ntsuj Plig Dawb Huv yuav pab nej thaum Nws ceeb toom nej, xws li Nws ceeb toom kuv txiv thiab Thawj Tswj Hwm Tateoka.
Tus Vaj Ntsuj Plig Dawb Huv Nplij Peb lub Siab
Xwv kom teb lo lus nug “Tus Vaj Ntsuj Plig Dawb Huv pab nej li cas?” Cia peb xav txog Nws lub luag hauj lwm ua tus Nplij Siab. Tej xwm txheej uas tsis tau npaj siab txog hauv peb lub neej ua rau peb tu siab, raug mob, thiab poob siab. Tiam sis, txawm muaj tej kev sim siab li no, tus Vaj Ntsuj Plig Dawb Huv pab peb thaum Nws ua Nws lub luag hauj lwm tseem ceeb—tus Nplij Siab, uas yeej yog Nws ib lub npe. Cov lus kaj siab lug los ntawm Yexus Khetos piav txog txoj luag hauj lwm dawb ceev no, “Kuv yuav thov Leej Txiv, thiab nws yuav txib dua ib tug Nplij Siab los, tus ntawd yuav nrog nej nyob mus ib txhis.”7
Xwv kom piav txog qhov no ntxiv, kuv hais ib zaj dab neeg tseeb txog ib tsev neeg uas muaj tsib tug tub uas tsiv tsev ntawm Los Angeles, California, Teb Chaws Amelikas mus rau ib lub zos me me ntau xyoo tas los. Ob tug tub hlob pib ntaus pob ncaws pob thiab koom nrog phooj ywg, cov thawj coj, thiab cov xib hwb ncaws pob—feem ntau yog cov meej zeej ntawm lub Koom Txoos. Tej kev sib raug zoo no pab kom Fernando, tus tub hlob, thiab nws tus kwv xaiv ua kev cai raus dej.
Tom qab ntawd Fernando mus kawm ntawv thiab ncaws pob football hauv lub tsev kawm ntawv college. Nws yuav nws tus uas nws hlub txij thaum kawm high school, Bayley, nyob hauv lub tuam tsev. Thaum Fernando thiab Bayley kawm ntawv tas, nkawd tos ntsoov thaum nkawd thawj tus me nyuam yuav yug los—yog ib tug me ntxhais. Tiam sis thaum uas nkawd tsev neeg pab Fernando thiab Bayley tsiv tsev rov qab los, Bayley thiab nws tus viv ncaus tsav tsheb rau ntawm txoj kev loj thiab ntau lub tsheb raug sib tsoo loj heev. Bayley thiab nws tus ntxhais uas tseem tsis tau yug los tau tas sim neej.
Tiam sis Fernando thiab Bayley niam thiab txiv thiab tsev neeg nyuaj siab npaum li cas los, kev kaj siab lug thiab kev nplij siab uas los rau lawv tam sim ntawd yeej loj npaum li ntawd. Tus Vaj Ntsuj Plig Dawb Huv ua Nws lub luag hauj lwm ua tus Nplij Siab txhawb nqa Fernando kom dhau kev txom nyem uas loj tshaj qhov xav no. Tus Ntsuj Plig ua rau Fernando nyob kaj siab lug nws thiaj li zam txim thiab hlub txhua tus uas ua tsheb sib tsoo loj loj ntawd.
Bayley niam thiab txiv hu nws tus nus uas ua tub txib thaum lub sij hawm ntawd. Nyob hauv ib tsab ntawv nws piav txog nws tej kev xav thaum nws hnov xov xwm nyuaj heev no txog nws tus muam: “Qhov uas kuv hnov nej lub suab hais lus kom siab tus thaum txhua yam ntxhov hnyo ua rau kuv xav tsis thoob. Kuv tsis paub hais li cas. … Kuv tsuas xav txog qhov uas kuv tus muam yuav tsis nyob thaum kuv los tsev xwb. … Kuv txais kev nplij siab los ntawm nej tej zaj lus tim khawv txog tus Cawm Seej thiab Nws txoj hau kev. Tus ntsuj plig uas ua rau kuv xav los kua muag thaum kuv kawm thiab qhia tau nkag los rau hauv kuv lub siab. Ua rau kuv txais kev nplij siab thiab nco txog tej yam uas kuv paub lawm.”8
Tus Vaj Ntsuj Plig Dawb Huv yuav pab nej thaum Nws nplij nej lub siab, zoo ib yam li Nws ua rau Fernando thiab Bayley tsev neeg.
Tus Vaj Ntsuj Plig Dawb Huv Ua Tim Khawv
Tus Vaj Ntsuj Plig Dawb Huv kuj ua tim khawv thiab ua pov thawj txog Leej Txiv thiab Leej Tub thiab tag nrho tej yam tseeb.9 Tus Tswv uas hais lus rau Nws cov thwj tim, hais tias, “Tus Pab yog Vaj Ntsuj Plig, nws los qhia Vajtswv zaj uas yog qhov tseeb thiab yog Leej Txiv txib nws los, … nws yuav qhia kuv zaj rau nej.”10
Xwv kom piav txog tus Vaj Ntsuj Plig Dawb Huv lub luag hauj lwm ua ib tug tim khawv, kuv yuav hais txog Fernando thiab Bayley zaj ntxiv. Nyaj nej nco qab tias, kuv qhia tias Fernando thiab nws tus kwv twb ua kev cai raus dej, tiam sis nws niam nws txiv thiab nws peb tus kwv tsis tau. Thiab txawm yog twb muaj neeg caw lawv nrog cov tub txib tham ntau zaus, txhua zaus lawv tsis xav ua.
Thaum Bayley thiab nws tus ntxhais uas tseem tsis tau yug los tas sim neej, yeej nplij tsis tau Fernando tsev neeg lub siab. Tsis zoo li Fernando thiab tsis zoo li Bayley tsev neeg, lawv nrhiav tsis tau kev kaj siab los yog kev nplij siab. Nkawd tsis to taub vim li cas nkawd tus tub, nrog Bayley tsev neeg, yuav ris tau ib lub nra hnyav npaum li no.
Thaum kawg nkawd xav tias qhov uas nkawd tus tub muaj thiab nkawd tsis muaj yog Yexus Khetos txoj moo zoo, thiab qhov ntawd yog lub hauv paus ntawm nws txoj kev nyob kaj siab lug thiab kev nplij siab. Tom qab nkawd paub li no, nkawd caw cov tub txib qhia nkawd tsev neeg txog txoj moo zoo. Yog li ntawd, lawv twb txais ib zaj lus tim khawv txog txoj hau kev zoo siab, uas ua rau lawv nyob kaj siab lug thiab siab tus uas nplij lawv lub siab li lawv xav tau.
Ob lub hlis tom qab Bayley thiab nkawd tus ntxhais xeeb ntxwv uas tseem tsis tau yug los tas sim neej, Fernando niam thiab txiv thiab nws ob tug kwv twb ua kev cai raus dej, txais kev pom zoo, thiab txais lub txiaj ntsim Vaj Ntsuj Plig Dawb Huv. Fernando tus kwv uas yog tus tub ntxawg tos txog hnub thaum nws yuav muaj yim xyoo es nws yuav ua kev cai raus dej. Lawv puav leej ua tim khawv tias tus Ntsuj Plig, tus Vaj Ntsuj Plig Dawb Huv, ua tim khawv txog qhov uas txoj moo zoo muaj tseeb, uas ua rau lawv xav ua kev cai raus dej thiab txais lub txiaj ntsim Vaj Ntsuj Plig Dawb Huv.
Cov kwv tij thiab cov muam, tus Vaj Ntsuj Plig Dawb Huv yuav pab nej thaum Nws ua tim khawv rau nej zoo li Nws ua tim khawv rau Fernando tsev neeg.
Zaj Ntsiab Lus
Nim no cia kuv hais lub ntsiab. Peb twb hais txog peb yam tseeb uas ua rau peb paub txog tus Vaj Ntsuj Plig Dawb Huv. Tej yam tseeb no yog qhov uas tus Vaj Ntsuj Plig Dawb Huv yog tus thib peb hauv Pawg Vajtswv, tus Vaj Ntsuj Plig Dawb Huv yog ib tug ntsuj plig, thiab lub txiaj ntsim Vaj Ntsuj Plig Dawb Huv yog los ntawm kev tso tes saum taub hau. Peb twb hais txog peb lo lus teb lus nug “Tus Vaj Ntsuj Plig Dawb Huv pab nej li cas?” Tus Vaj Ntsuj Plig Dawb Huv ceeb toom, tus Vaj Ntsuj Plig Dawb Huv nplij neeg lub siab, thiab tus Vaj Ntsuj Plig Dawb Huv ua tim khawv.
Kev Tsim Nyog Ceev Tau lub Txiaj Ntsim Cia
Rau nej cov uas npaj siab ua kev cai raus dej thiab txais kev pom zoo los yog cov uas tsis ntev tas los ua los yog twb ua ntev los lawm yeej yog ib qho tseem ceeb rau peb txoj kev nyab xeeb ntawm sab cev nqaij daim tawv thiab sab ntsuj plig uas peb ceev lub txiaj ntsim Vaj Ntsuj Plig Dawb Huv cia. Peb ua tau li no thaum peb siv zog ua raws li cov lus txib, thov Vajtswv peb tus kheej thiab hauv peb tsev neeg, nyeem vaj lug kub, thiab xav sib raug zoo nrog tsev neeg thiab cov uas peb hlub. Peb yuav tsum xav, ua, thiab hais lus raws li kev tsim txiaj. Peb yuav tsum teev tiam peb Leej Txiv Saum Ntuj Ceeb Tsheej nyob hauv tsev, nyob hauv lub koom txoos, thiab thaum twg ua tau, nyob hauv lub tuam tsev dawb huv. Nyob ze tus Ntsuj Plig, thiab tus Ntsuj Plig yuav los nyob ze nej.
Ua Tim Khawv
Nim no kuv xaus lus nrog ib lo lus caw nej thiab kuv zaj lus tim khawv. Kuv caw nej ua raws li cov lus nyob hauv ib zaj nkauj uas cov me nyuam hauv lub Koom Haum Me Nyuam Yaus hu nkauj, cov lus uas kuv paub tias lawv nco ntsoov: “Mloog zoo, mloog zoo. Tus Ntsuj Plig Dawb Huv ntxhi lus. Mloog zoo, mloog zoo rau lub suab yau yau.”11
Kuv cov kwv tij thiab cov muam, tsis hais cov hluas cov laus los yog, kuv ua tim khawv txog qhov uas peb leeg uas yog Pawg Vajtswv muaj txoj sia nyob: Vajtswv Leej Txiv, Yexus Khetos, thiab tus Vaj Ntsuj Plig Dawb Huv. Kuv ua tim khawv tias ib lub cib fim uas peb Tsoom Haiv Neeg Ntseeg hauv Hnub Nyoog Kawg nyob hauv lub caij nyoog uas muaj txhij txhua yog lub txiaj ntsim Vaj Ntsuj Plig Dawb Huv. Kuv paub tias tus Vaj Ntsuj Plig Dawb Huv yeej pab thiab yeej yuav pab nej. Kuv kuj ua tim khawv tshwj xeeb txog Yexus Khetos thiab Nws lub luag hauj lwm ua peb tus Cawm Seej thiab tus Txhiv Dim thiab txog Vajtswv peb Leej Txiv Saum Ntuj Ceeb Tsheej. Los ntawm Yexus Khetos lub npe, amees.