Kev Hlub Tiag Tiag Ntiab Tau Kev Ntshai Tawm
Cia peb tso peb tej kev ntshai tseg thiab ua neej nrog kev xyiv fab, kev cia siab, thiab kev ntseeg tias tus Tswv nrog peb nyob.
Kuv cov kwv tij thiab cov muam, cov phooj ywg zoo, yeej yog ib lub cib fim thiab kev zoo siab uas peb koom ua ke ua ib lub Koom Txoos nyob thoob plaws lub ntiaj teb uas muaj kev ntseeg thiab kev hlub Vajtswv thiab Nws cov me nyuam.
Kuv zoo siab uas peb tus yaj saub uas peb hlub, Thomas S. Monson, nyob no. Thawj Tswj Hwm, peb yeej yuav ua raws li koj tej lus qhia, tej lus ntuas, thiab laj lim tswv yim. Peb hlub koj, Thawj Tswj Hwm Monson, thiab peb yeej thov Vajtswv pab koj.
Ntau xyoo tas los, thaum kuv ua hauj lwm ua ib ceg txheem ntseeg tus thawj tswj hwm nyob hauv Frankfurt, Germany, ib tug poj niam uas tsis zoo siab los nrog kuv tham tom qab peb ceg txheem ntseeg kev sib ntsib.
Nws hais tias, “Ua cas tib neeg tsis txaj muag. Ntshe muaj plaub tsib tug neeg uas ua dab ntub heev thaum koj hais lus!”
Kuv xav ib me pliag thiab teb hais tias, “Nyaj thaum yus tsaug zog hauv lub tsev koom txoos ces yog kev tsaug zog zoo tshaj plaws.”
Kuv tus poj niam zoo kawg, Harriet, hnov wb sib tham, es tom qab ntawd nws hais tias yog tej lus teb siab zoo tshaj plaws uas kuv ib txwm tau hais.
Lub Caij Nyoog Tsim Los
Ob peb puas xyoo tas los nyob hauv Amelikas Sab Qaum Teb, muaj ib lub “Caij Nyoog Tsim Los” uas nthuav mus rau txhua qhov chaw. Lub hom phiaj ntawm qhov no yog kom cov neeg uas tsaug zog ntawm sab ntsuj plig tsim los.
Thaum nws tseem hluas Yauxej Xamiv txais kev tshoov siab los ntawm tej yam uas cov xib hwb qhia txog txoj kev tsim los ntawm kev teev ntuj. Yog ib qho uas pab nws txiav txim siab thov Vajtswv nws tus kheej kom paub tus Tswv lub siab nyiam.
Cov xib hwb no siv zog hais lus kom chob yus lub siab, thaum lawv hais tej lus cob qhia lawv hais txog tej kev ua lim hiam uas tus neeg ua txhaum yuav raug nyob hauv ntuj txiag teb tsaus.1 Lawv tej lus cob qhia yeej tsis ua rau tib neeg tsaug zog hlo li—tiam sis tej zaum ua rau lawv ua npau suav phem. Tus yam ntxwv thiab lub hom phiaj ntawm kev cob qhia no yog ua rau neeg ntshai lawv thiaj yuav tuaj rau lawv lub koom txoos.
Siv Kev Ntshai Kom Tswj Neeg
Txij puag thaum ub los, tib neeg pheej siv kev ntshai kom lwm tus ua tej yam. Cov niam cov txiv siv rau lawv cov me nyuam, cov tswv siv rau cov neeg uas lawv ntiav ua hauj lwm, thiab cov nom tswv siv rau cov uas pov ntawv.
Cov kws txawj muag khoom to taub kev ntshai muaj hwj chim npaum li cas thiab siv qhov no. Yog li ntawd peb thiaj pom tau tej kev qhau xab nas uas qhia tias yog peb tsis noj cov cereal yog lawm los sis peb tsis yuav qhov video game los yog lub xov tooj tshiab, ces ntshe peb yuav ua neej tu siab heev thiab peb yuav nyob peb ib leeg thaum peb tas sim neej.
Tej no ua rau peb luag thiab peb xav tias tej no yeej ntxias tsis tau peb, tiam sis tej lub sij hawm peb ntseeg tej no. Los yog, tej lub sij hawm peb siv tus txheej txheem no kom lwm tus ua li peb xav.
Kuv zaj lus hnub no muaj ob lub hom phiaj: Qhov thib ib yog kom peb xav txog qhov uas peb siv kev ntshai li cas kom ntxias lwm tus ua raws li peb xav—tsis hais ntxias peb tus kheej los yog. Qhov thib ob yog hais txog ib txoj kev zoo dua ntais.
Kev Ntshai Muaj Teeb Meem Li Cas
Ua ntej, cia peb xav txog qhov teeb meem ntawm kev ntshai. Puas muaj leej twg ntawm peb uas yeej tsis tau ntshai lawv thiaj tau noj zoo dua ntxiv, sia siv hauv tsheb, qoj ib ce exercise, ceev nyiaj cia, los yog hloov siab lees txim?
Qhov uas kev ntshai muaj hwj huam ntau kom peb coj zoo yeej muaj tseeb. Tiam sis lub hwj huam ntawd feem ntau nyob ib me pliag thiab tsis muaj zog ntau. Kev ntshai tsis muaj hwj chim ua rau peb hloov siab, thiab yeej yuav tsis ua rau peb hloov los ua tib neeg uas nyiam qhov yog thiab xav mloog Leej Txiv Saum Ntuj Ceeb Tsheej lus.
Cov neeg uas ntshai tej zaum lawv yuav hais thiab ua tej yam uas yog, tiam sis lawv tsis xav ua qhov yog hauv lub siab. Tej lub sij hawm ua rau lawv tsis paub pab lawv tus kheej thiab lawv tu siab, los yog chim siab. Sij hawm dhau mus ces ua rau lawv tsis ntseeg, tawm tsam lwm tus, thiab ntxeev siab.
Tu siab uas kev ua ib tug thawj coj zoo li no tsis yog ib yam uas muaj nyob hauv tej lub koom haum ntawm lub ntiaj teb xwb. Ua rau kuv nyuaj siab hnov txog cov mej zeej ntawm lub Koom Txoos uas siv txoj cai los kav yam tsis ncaj ncees—tsis hais nyob hauv tsev, thaum ua hauj lwm hauv lub Koom Txoos, ua hauj lwm, los yog thaum lawv sib tham nrog lwm tus.
Feem ntau cov neeg yuav rau txim rau cov uas thab lwm tus, tiam sis lawv tsis pom lawv tus kheej ua li ntawd thiab. Lawv yuam lwm tus ua raws li tej kev cai uas lawv lam tsim kiag, tiam sis thaum lwm tus tsis ua raws li tej kev cai no, cov neeg no qhuab ntuas lawv ntawm kev hais lus, kev tswj lawv lub siab, los yog tej lub sij hawm ntaus lawv thiab.
Tus Tswv tau hais tias, thaum peb tswj los yog kav los yog yuam noob neej tus ntsuj plig, ntawm kev ua tsis ncaj ncees npaum li cas los, ceeb tsheej tso peb tseg, thiab tus Tswv tus Ntsuj Plig tu siab.2
Yuav muaj tej lub sij hawm thaum peb raug ntxias kom xav tias peb tsis muaj txim vim peb ntseeg tias peb ua li cas los pab lwm tus rau yav tom ntej xwb. Tej zaum peb xav tias peb txoj kev yuam thiab kev tswj lwm tus thiab kev ua nyaum yuav zoo rau lwm tus. Tsis yog li ntawd, vim tus Tswv tau hais meej hais tias “tus Ntsuj Plig ua rau neeg muaj lub siab hlub, kev xyiv fab, kev kaj siab lug, ua siab ntev, muaj siab dawb siab zoo, kev ntseeg, lub siab mos muag thiab lub siab ncaj.”3
Ib txoj Kev Zoo Dua Ntais
Kuv yim paub kuv Leej Txiv Saum Ntuj Ceeb Tsheej los kuv yim pom tias Nws tshoov Nws cov me nyuam lub siab thiab coj lawv kev. Nws tsis yog ib tug uas chim siab thiab nyiam ua pauj.4 Nws lub hom phiaj—Nws txoj hauj lwm thiab Nws lub yeeb koob—yog kom qhia peb, muab peb tsa nto, thiab coj peb mus txais tag nrho Nws muaj.5
Vajtswv piav txog Nws tus Kheej rau Mauxes hais tias Nws “muaj lub siab puv nkaus kev hlub thiab tshua, yog tus uas tsis chim sai thiab yog tus uas muaj kev hlub thiab ncaj ncees.”6
Peb Leej Txiv Saum Ntuj Ceeb Tsheej hlub peb, Nws cov me nyuam, tshaj qhov peb txawj to taub.7
Qhov no puas txhais hais tias Vajtswv pom zoo los yog tsis xav li cas txog tej yam uas peb ua tsis raws li Nws cov lus txib? Tsis yog li ntawd!
Tiam sis Nws xav kom peb hloov ntau tshaj peb tus yeeb yam xwb. Nws xav kom peb hloov tag nrho peb tus kheej. Nws xav kom peb hloov peb lub siab.
Nws xav kom peb ncav tes thiab tuav rawv tus nqaj hlau, tawm tsam tej yam uas peb ntshai, thiab ua siab loj mus tom ntej taug txoj kev ti thiab nqaim. Nws xav kom peb ua li no vim Nws hlub peb thiab vim nov yog txoj kev mus rau kev zoo siab.
Yog li ntawd, Vajtswv ua li cas kom pab Nws cov me nyuam coj raws li Nws niaj hnub nim no?
Nws txib Nws Leej Tub los!
Vajtswv txib Nws Tib Leeg Tub, Yexus Khetos, kom qhia txoj kev yog rau peb.
Vajtswv txhawb nqa peb los ntawm kev yaum, kev ua siab ntev, kev siab mos siab muag, thiab kev hlub tiag tiag.8 Vajtswv tuaj peb tog. Nws hlub peb, thiab thaum peb dawm taw, Nws xav kom peb sawv, rov qab sim ua dua, thiab muaj zog ntxiv.
Nws yog peb tus xib hwb.
Nws yog peb txoj kev cia siab uas hlub tshua peb.
Nws xav kom peb muaj kev ntseeg.
Nws tso siab rau peb kom kawm los ntawm tej yam peb ua yuam kev thiab xaiv qhov yog.
Muaj ib txoj kev zoo dua ntais.9
Tej Kev Phem Hauv Ntiaj Teb Nev?
Ib yam uas Dab Ntxwg Nyoog siv kom ntxias lwm tus ua li nws xav yog kev hais txog kev phem hauv lub ntiaj teb thiab kev hais ntau tshaj li qhov muaj.
Peb lub ntiaj teb yeej ib txwm tsis yog ib lub zoo tag nrho. Muaj ntau tus neeg uas tsis muaj txim uas raug txom nyem los ntawm tej xwm txheej ntawm lub ntiaj teb no thiab los ntawm tib neeg txoj kev ua phem. Tej kev tsis ncaj ncees thiab kev ua phem niaj hnub nim no ua rau peb txhawj heev.
Txawm li ntawd los, kuv yeej tsis xav ua neej nyob hauv ib lub caij nyoog ntawm lub ntiaj teb zaj keeb kwm tsuas yog lub sij hawm no xwb. Peb tau koob hmoov ntau nplua mias ua neej nyob hauv ib lub caij nyoog uas vam meej, muaj kev txawj ntse, thiab muaj noj muaj haus. Qhov tseem ceeb tshaj plaws peb tau koob hmoov vim peb muaj qhov txhij txhua ntawm Yexus Khetos txoj moo zoo, uas ua rau peb paub zoo txog lub ntiaj teb no tej xwm txheej thiab pab peb paub kom tsis raug los yog paub ua li cas thaum peb raug tej xwm txheej ntawd.
Thaum kuv xav txog cov koob hmoov no, ua rau kuv xav txhos caug thiab qhuas peb Leej Txiv Saum Ntuj Ceeb Tsheej rau Nws txoj kev hlub uas kav ib txhis rau tag nrho Nws cov me nyuam.
Kuv tsis xav tias Vajtswv xav kom Nws cov me nyuam ntshai los yog xav txog tej kev phem ntawm lub ntiaj teb tas li. “Vim Vajtswv tsis pub lub siab ntshai rau peb tiam sis pub lub siab muaj hwj chim thiab kev hlub thiab kev tswj yus tus kheej rau peb.”10
Nws twb muab ntau yam rau peb kom peb xyiv fab. Peb yuav tsum nrhiav thiab paub tej ntawd xwb. Ntau zaus tus Tswv hais kom peb “tsis txhob ntshai,”11 thiab “cia li zoo siab.”12
Tus Tswv Yuav Tuaj Peb Tog
Cov kwv tij thiab cov muam, peb yog tus Tswv “me pab yaj.” Peb yog Haiv Neeg Ntseeg hauv hnub nyoog kawg. Nyob hauv lub npe no yog ib txoj kev cog lus tias peb yuav tos tus Cawm Seej txoj kev rov qab los thiab npaj peb tus kheej thiab lub ntiaj teb kom txais Nws. Yog li ntawd, cia peb ua hauj lwm rau Vajtswv thiab hlub peb cov kwv tij zej zog. Thov kom peb ua siab loj ua li no, txo hwj chim, thiab tsis txhob saib tsis taus ib pawg teev ntuj twg los yog lwm pawg neeg. Cov kwv tij thiab cov muam, tus Tswv txib peb kom kawm Vajtswv txoj lus thiab ua raws li tus Ntsuj Plig lub suab, kom peb thiaj paub tau tej cim ntawm lub caij nyoog, thiab tej cim ntawm Neeg Leej Tub txoj kev los.13
Yog li ntawd, tsis yog peb tsis paub txog tej teeb meem ntawm lub ntiaj teb, thiab tsis yog peb tsis paub txog tej kev nyuaj siab ntawm peb lub caij nyoog. Tiam sis qhov no tsis txhais hais tias peb yuav tsum muab lub nra ntawm kev ntshai rau peb los yog lwm tus ris. Puas tsim nyog uas peb tsis tas xav txog qhov uas peb tej teeb meem loj heev thiab tsuas xav txog Vajtswv txoj kev zoo thiab lub hwj chim zoo tag nrho, tso siab rau Nws, thiab npaj nrog kev zoo siab rau lub sij hawm uas Yexus Khetos rov qab los?
Vim peb yog Nws cov neeg uas tau khi lus tseg, peb tsis tas ua twj ywm ntshai txog tej yam uas tej zaum yuav muaj los. Tiam sis, peb muaj peev xwm mus tom ntej nrog kev ntseeg, kev ua siab loj, kev rau siab thiab kev tso siab rau Vajtswv thaum peb raug teeb meem thiab muaj cib fim thaum yav tom ntej.14
Peb tsis taug kev ua ib tug thwj tim peb tus kheej xwb. “Tus Tswv uas yog nej tus Vajtswv yuav nrog nraim nej, nws yuav tsis ncaim nej los sis tso nej tseg li.”15
“Tus Tswv yuav pab nej tawm tsam, nej cia li ua twj ywm.”16
Txawm peb ntshai los, cia peb ua siab loj, rau siab ntseeg, thiab ntseeg tus Tswv txoj kev cog lus tias tsis muaj ib yam cuab yeej twg uas yuav tawm tsam tau nej li.17
Puas yog peb nyob hauv ib lub caij nyoog uas muaj kev kub ntxhov? Yog mas.
Vajtswv twb hais tias, “Neeg ntiaj teb yuav tsim txom nej: tiam sis cia li zoo siab, rau qhov kuv twb kov yeej lub ntiaj teb no lawm.”18
Peb puas muaj peev xwm muab siab rau ntseeg thiab ua raws li peb txoj kev ntseeg? Peb puas txawj ua raws li peb tej kev cog lus thiab tej kev khi lus dawb ceev? Peb puas ua raws li Vajtswv cov lus txib txawm yog peb raug tej teeb meem? Peb yeej muaj peev xwm ua li ntawd!
Peb muaj peev xwm ua li ntawd vim Vajtswv cog lus tias, txhua yam yuav ua hauj lwm ua ke kom zoo rau nej, yog hais tias nej taug kev ncaj.19 Yog li ntawd, cia peb tso peb tej kev ntshai tseg thiab ua neej nrog kev xyiv fab, kev txo hwj chim, kev cia siab, thiab kev ntseeg tias tus Tswv nrog peb nyob.
Kev Hlub Tiag Tiag Ntiab Tau Kev Ntshai Tawm
Kuv cov phooj ywg, kuv cov kwv tij thiab cov muam uas koom siab ntseeg Khetos, yog tias peb ntshai los yog txhawj heev, los yog peb pom tias peb tej lus, tej cwj pwm, los yog peb ua tej yam ua rau lwm tus ntshai, ces kuv thov kawg siab kawg ntsws hais tias peb yuav tshem tau txoj kev ntshai no los ntawm qhov uas Vajtswv pom zoo kom ua rau peb tsis ntshai: yog Khetos txoj kev hlub dawb paug vim “kev hlub uas zoo tag nrho yeej ntiab tau txhua txoj kev ntshai tawm.”20
Khetos txoj kev hlub dawb paug kov yeej tej kev ntxias kom ua phem, tawm tsam, thiab, los yog hem lwm tus.
Khetos txoj kev hlub dawb paug cia peb txo hwj chim thiab ntseeg peb tus kheej thaum peb taug kev li cov uas coj raws li peb tus Cawm Seej uas peb hlub. Khetos txoj kev hlub dawb paug ua rau peb ua siab loj tiv tau tej yam uas peb ntshai thiab tso siab plhuav rau peb Leej Txiv Saum Ntuj Ceeb Tsheej thiab Nws Leej Tub, Yexus Khetos lub hwj chim thiab txoj kev zoo.
Nyob hauv peb tsev, qhov chaw ua hauj lwm, thaum peb ua hauj lwm hauv lub Koom Txoos, thiab nyob hauv peb lub siab, thov kom peb tus Khetos txoj kev hlub dawb paug pauv peb txoj kev ntshai. Khetos txoj kev hlub yuav muab kev ntseeg pauv kev ntshai!
Nws txoj kev hlub yuav pab peb pom tau, tso siab rau, thiab ntseeg peb Leej Txiv Saum Ntuj Ceeb Tsheej txoj kev zoo, Nws txoj hau kev, Nws txoj moo zoo, thiab Nws cov lus txib.21 Yog peb hlub Vajtswv thiab peb cov kwv tij zej zog ces qhov uas peb mloog Vajtswv cov lus txib tsis yog ib lub nra rau peb ris tiam sis yog ib txoj koob hmoov. Khetos txoj kev hlub yuav pab peb ua siab zoo ntxiv, zam txim ntxiv, hlub ntxiv, thiab rau siab ua Nws txoj hauj lwm ntxiv.
Thaum peb muaj lub siab puv npo hlub Khetos, peb yuav tsim los rov muaj dag zog ntawm sab ntsuj plig thiab taug kev yam li zoo siab, thiab muaj sia los ntawm txoj kev kaj thiab lub yeeb koob ntawm peb tus Cawm Seej, Yexus Khetos.
Kuv ua tim khawv, nrog tus Thwj Tim Yauhas, “Tus uas muaj [Khetos txoj] kev hlub lawm tsis tas nws yuav ntshai.”22 Cov kwv tij thiab cov muam, cov phooj ywg zoo, Vajtswv paub nej zoo tag nrho. Nws hlub nej zoo tag nrho. Nws paub yuav muaj li cas rau nej thaum yav tom ntej. Nws xav kom nej “tsis txhob ntshai, cia li ntseeg xwb”23 thiab “muaj lub siab hlub [zoo tag nrho] ib yam li nws.”24 Kuv thov Vajtswv thiab foom koob hmoov rau nej li no, los ntawm Yexus Khetos lub npe, Amees.