Sawv Ntsug Nyob Sab Haud thiab Ua Kom Tag Nrho
Thov kom peb yuav rov qab nrhiav kev thiab cia siab thiab muaj kev ntseeg saib rau yav tom ntej. Thov kom peb yuav rau siab “sawv ntsug nyob sab haud” thiab “ua kom tag nrho.”
Ob peb xyoos tas los peb tus ntxhais xeeb ntxwv khiav los cuag kuv thiab tshaj tawm hais tias, “Yawg, yawg, kuv ncaws pob ncaws kom nkag peb zaug hnub no!”
Kuv zoo siab teb hais tias, “Zoo kawg ’os, Sarah!”
Ces nws niam ntsia kuv thiab luag hais tias, “Qhab nias yog ob thiab ib.”
Kuv tsis muaj cuab kav nug seb leej twg yeej!
Rooj sab laj yog ib lub sij hawm rau peb xav txog peb lub neej, txais kev tshwm sim, thiab tej lub sij hawm hloov txoj kev uas peb taug.
Muaj ib lub koom haum xauj tsheb uas muaj tus txheej txheem GPS hu ua NeverLost. Yog tias yus mus ua yuam kev tom qab yus twb qhia tias yus xav mus qhov twg los, lub suab uas coj yus kev tsis hais tias, “Niag ruam ua luaj li!” Tiam sis lub suab hais zoo zoo hais tias, “Tab tom rov qab nrhiav kev—thaum twg ua tau cia li tig rov qab mus.”
Nyob hauv phau Exekees peb nyeem txog cov lus cog tseg no:
“Tus neeg uas tso nws tej kev txhaum tseg tag nrho thiab ua raws li kuv tej kev cai tag nrho, nws xyaum coj ncaj thiab ua zoo, nws yuav tsis tuag; tiam sis nws yuav muaj sia nyob.
“Kuv yuav zam tag nrho nws tej kev txhaum huv tib si, thiab yuav tsis hais txog tej ntawd rau nws hlo li.”1
Nov yog ib lo lus cog tseg zoo heev, tiam sis yuav tsum ua ob yam kom tag nrho thiaj txais tau qhov tag nrho thib peb. Cia li tso tag nrho; ua raws li tag nrho; ces yuav zam tag nrho. Ua li no peb yuav tsum “ua kom tag nrho”!
Peb yuav tsum tsis txhob ua zoo li tus txiv neej uas ua raws li ntawv xov xwm Wall Street Journal qhia hais tias, nws xa ib hnab ntawv rau Internal Revenue Service uas muaj cov nyiaj ntsuab nyob haud thiab ib tsab ntawv uas tsis tau sau npe hais tias, “Nyob zoo IRS: Thov saib cov nyiaj uas kuv tshuav nqi them se nyob haud. Tom qab no yog kuv tseem tsis txaus siab, kuv yuav xa cov nyiaj uas tshuav ntxiv tuaj rau nej.”2
Peb yeej yuav tsum tsis txhob ua li no! Peb tsis khaws ib txhia kom saib seb ua puas tau qhov me ntsis xwb. Tus Tswv xav kom peb muaj ib lub siab uas kheev ua.3 Tag nrho peb lub siab! Thaum peb ua kev cai raus dej, luag muab peb raus rau hauv dej ua ib lub cim txog peb txoj kev cog lus tias peb yuav ua txhua yam kom coj raws li tus Cawm Seej, tsis yog peb lam ua xwb. Thaum peb rau siab ua txhua yam thiab “ua kom tag nrho,” lub ntuj co nto kom zoo rau peb.4 Thaum peb lam ua xwb los yog tsis txaus siab tag nrho, peb yuav poob ib txhia ntawm Vajtswv cov koob hmoov zoo tshaj plaws.5
Ntau xyoo tas los, kuv coj cov tub hluas Scout mus pw hauv tiaj suab puam. Cov tub hluas pw ze hluav taws loj uas lawv tau ua, thiab zoo li txhua tus thawj coj Scout, kuv pw hauv kuv lub tsheb. Thaum sawv ntxov, kuv sawv thiab saib qhov chaw pw nraum zoov, es kuv pom ib tug Scout, hu ua Paul, uas zoo li nws tsis tau pw tsaug zog zoo. Kuv nug nws seb nws pw li cas, thiab nws teb tias, “Kuv pw tsis tshua tsaug zog.”
Thaum kuv nug nws seb yog vim li cas, nws hais tias, “No no kuv heev; thiab hluav taws tuag lawm.”
Kuv teb hais tias, “Hluav taws yeej ua li ntawd nev. Koj lub hnab pw sov tsis txaus koj los?”
Nws tsis teb kuv hlo li.
Ces ib tug Scout ntxiv hais nrov nrov hais tias, “Nws tsis tau siv nws lub hnab pw los sav.”
Kuv ntseeg tsis tau thiab nug hais tias, “Paul, yog vim li cas?”
Nws nyob twj ywm—ces maj mam teb hais tias: “Nim no, kuv xav tias yog kuv tsis muab kuv lub hnab pw nthuav, ces kuv tsis tas rov qab muab kauv.”
Zaj no muaj tseeb tiag: no no nws heev tau ntev vim nws tsis xav siv sij hawm li tsib feeb xwb. Tej zaum peb yuav xav tias: “Niag ruam ua luaj li! Leej twg yuav ua li ntawd?” Tiam sis peb txhua tus ua tej yam li no ntau heev. Peb txhua leej txhua tus tsis kam muab peb tej hnab pw ntawm sab ntsuj plig nthuav thaum peb tsis siv sij hawm thov Vajtswv, kawm ntawv, thiab rau siab kawm txog txoj moo zoo txhua hnub; cov hluav taws yuav tuag, thiab tsis muaj dab tsi pov hwm peb thiab peb sab ntsuj plig yuav no no heev.
Thaum peb tsis quav ntsej txog peb tej kev khi lus, peb yeej txhob txwm xav raug xwm txheej. Tus Tswv tau ntuas peb hais kom peb ceev faj txog peb tus kheej, kom rau siab mloog cov lus ntawm txoj sia nyob mus ib txhis.6 Thiab Nws hais ntxiv hais tias Nws cov ntshav yuav tsis ntxuav peb yog hais tias peb tsis mloog Nws.7
Muaj tseeb tiag, qhov uas yus “ua kom tag nrho” yeej yooj yim dua yus ua ib feem xwb. Thaum peb ua ib feem xwb los yog tsis ua hlo li, ces zoo li lawv hais nyob hauv Star Wars, “muaj dab tsi tsis yog lawm.” Thaum peb tsis ua raws li Vajtswv lub siab nyiam peb thiaj li tsis ua tej yam uas ua rau peb zoo siab.8 Yaxayas hais tias:
“Tus neeg uas ua phem ua qias zoo li dej hiav txwv ntas mus ntas los tsis paub tus li, thiab ua rau tej yam qias tawm tuaj.
“Cov neeg ua txhaum tsis muaj kev kaj siab hlo li. Tus Tswv yog tus hais tej lus no.”9
Zoo siab uas txawm yog peb nyob qhov twg los, peb tsis nyob deb dhau rau tus Cawm Seej, tus uas hais tias: “Tus uas hloov siab lees txim thiab los cuag kuv ib yam li ib tug me nyuam yaus, kuv txais yuav tus ntawd, vim Vajtswv lub nceeg vaj yog rau cov uas zoo li no.” Saib seb, kuv tau tso kuv txoj sia tseg thiab tau kuv txoj sia rov qab los, rau cov uas zoo li no.”10
Thaum peb hloov siab lees txim thiab tso siab rau tus Tswv, peb muaj zog ntxiv thiab peb txo hwj chim thiab muaj kev ntseeg zoo li ib tug me nyuam yaus,11 nrog laj lim tswv yim uas los ntawm qhov uas peb tau ua neej. Yauj tshaj tawm hais tias, “Tus ncaj ncees tseem tuav rawv nws txoj kev, thiab tus uas txhais tes huv muaj zog zuj zus tuaj.”12 Tennyson sau hais tias, “Kuv muaj zog cuag kaum tus neeg, vim kuv lub siab dawb huv.”13 Tus Tswv ntuas hais tias, “Sawv hauv tej qhov chaw dawb huv, thiab tsis txav li.”14
Kuv tus tub Justin tas sim neej thaum nws muaj 19 xyoos vim nws muaj ib kab mob txij thaum nws yug los. Thaum nws hais lus nyob hauv kev sib ntsib txais lub cim nco txog ua ntej nws tso lub ntiaj teb no tseg, nws hais ib zaj dab neeg uas nws nyiam txog ib leej txiv thiab nws tus tub uas mus rau hauv ib lub taj laj yuav khoom ua si es muaj ib hnab rau yus ntaus uas pheej sawv rov qab los uas muaj yam ntxwv zoo li ib tug txiv neej. Tus tub ntaus lub hnab no uas vau thiab sawv rov qab los kiag tom qab txhua zaus nws xuas nrig ntaus. Leej txiv nug nws tus tub vim li cas tus txiv neej no pheej sawv rov qab los. Tus me nyuam tub no xav ib me pliag ces hais tias, “Xyov. Nyaj yog vim nws sawv ntsug nyob sab haud.” Yog peb yuav “ua kom tag nrho,” peb yuav tsum “sawv ntsug nyob sab haud,” “txawm tias muaj li cas los.”15
Peb sawv ntsug nyob sab haud thaum peb cia siab tos ntsoov tus Tswv kom tshem los yog muab zog rau peb tiv tau tej pos uas chob peb daim tawv.16 Tej pos uas chob peb yog tej kab mob, kev mob hlwb, qhov uas ib tug peb hlub xiam, thiab ntau yam teeb meem zoo li no.
Peb sawv ntsug nyob sab haud thaum peb txhawb nqa tej tes uas qaug zog lawm. Peb sawv ntsug nyob sab haud thaum peb tiv thaiv qhov tseeb kom tsis raug tib neeg tej kev ua phem uas haj yam tsis nyiam qhov kaj, hu qhov phem ua qhov zoo thiab hu qhov zoo ua qhov phem17 thiab “rau txim rau cov neeg ncaj vim lawv tej kev ncaj ncees.”18
Peb muaj peev xwm sawv ntsug nyob sab haud txawm muaj tej teeb meem los vim hais tias tus Vaj Ntsuj Plig Dawb Huv txhawb nqa thiab nplij peb lub siab thiab Nws pom tom ntej mus ib txhis li tshaj qhov neeg to taub.19 Nyob hauv lub neej ua ntej lub neej no peb zoo siab qw nrov vim peb muaj cib fim nyob hauv lub ntiaj teb no.20 Peb txhua tus “ua kom tag nrho” thaum peb txiav txim siab tias peb yuav tiv thaiv peb Leej Txiv Saum Ntuj Ceeb Tsheej txoj hau kev. Twb txog lub sij hawm lawm kom rov qab sawv ntsug thiab tiv thaiv Nws txoj hau kev!
Tsis ntev tas los kuv txiv uas muaj 97 xyoo tas sim neej. Thaum ib tug nug nws seb nws nyob li cas, nws pheej teb hais tias “Ntsuas li 1 txog 10 mas, kuv nyob zoo li 25!” Txawm yog tus txiv neej zoo no sawv tsis taus, zaum tsis taus, thiab ua nyuaj rau nws hais lus, nws pheej teb zoo ib yam. Nws yeej sawv ntsug nyob sab haud.
Thaum kuv txiv muaj 90 xyoo, wb nyob hauv tshav nyab hoom thiab kuv nug nws seb nws puas xav tau ib lub rooj uas muaj log. Nws hais tias, “Tsis xav ’os Gary—tos txog thaum kuv laus lawm tso.” Ces nws hais tias, “Es yog kuv nkees mus ko taw, ces kuv khiav tau.” Yog tias peb tsis “ua kom tag nrho” thaum peb taug kev tam sim no, ces tej zaum peb yuav tsum khiav; tej zaum peb yuav tsum rov qab nrhiav kev. Tej zaum peb yuav tsum tig rov qab mus. Tej zaum peb yuav tsum haj yam kawm ntxiv, rau siab thov Vajtswv, los yog tso tej yam tseg kom peb thiaj yuav khaws tej yam tseem ceeb tiag tiag cia. Tej zaum peb yuav tsum tso tej yam ntawm lub ntiaj teb tseg kom peb tuav tau tej yam ntawm kev nyob mus ib txhis. Kuv txiv to taub qhov no.
Thaum nws ua tub rog hauv lub nkoj nyob hauv Kev Tsov Rog Thoob Ntiaj Teb thib Ob, muaj ib txhia nyob hauv lub tsev loj thiab dav21 uas thuam nws vim nws coj ncaj nees; muaj ob tug tub rog, Dale Maddox thiab Don Davidson, uas pom qhov no thiab tsis thuam nws. Nkawd nug hais tias, “Sabin, vim li cas koj txawv ntawm txhua leej txhua tus? Koj coj ncaj ncees thiab tsis haus cawv, tsis haus luam yeeb, tsis hais lus phem, tiam sis zoo li koj nyob kaj siab thiab zoo siab.”
Qhov uas kuv txiv zoo li no yeej tsis zoo li nkawd ib txwm xav txog cov Neeg Maumoos, thiab kuv txiv muaj cib fim qhia nkawd thiab muab nkawd ua kev cai raus dej. Dale niam thiab txiv chim siab heev thiab ceeb toom nws hais tias yog nws koom lub Koom Txoos ces nws tus hlub, Mary Olive, yuav tso nws tseg, tiam sis Mary Olive ntsib cov tub txib thiab nws ua kev cai raus dej ib yam thiab.
Tom qab kev tsov rog tas lawm, Thawj Tswj Hwm Heber J. Grant hais kom muaj tub txib ntxiv, tsis hais cov uas twb yuav poj niam lawm. Dale thiab nws tus poj niam, Mary Olive, txiav txim siab tias Dale yuav tsum mus ua tub txib txawm yog nws tus poj niam muaj me nyuam. Thaum kawg nkawd muaj cuaj tus me nyuam—peb tug tub thiab rau tus ntxhais. Lawv puav leej mus ua tub txib ntxhais txib, ces Dale thiab Mary Olive mus ua tub txib peb zaug thiab. Muaj ntau tus xeeb leej xeeb ntxwv uas twb mus ua tub txib thiab. Nkawd ob tug tub, John thiab Matthew Maddox, nyob hauv lub Tsev Kheej Pawg Hu Nkauj, thiab Matthew tus ntxhais tus txiv, Ryan. Tam sim no tsev neeg Maddox muaj 144 tus neeg thiab lawv coj yam ntxwv txog cov neeg uas “ua kom tag nrho.”
Thaum kuv saib kuv txiv cov ntawv, kuv pom ib tsab ntawv los ntawm Jennifer Richards, ib tug ntawm Don Davidson tsib tug ntxhais. Nws sau hais tias: “Koj txoj kev ncaj ncees twb hloov peb lub neej. Yeej nyuaj rau kuv xav txog qhov uas peb lub neej yuav zoo li cas yog tsis muaj lub Koom Txoos. Thaum kuv txiv tas sim neej nws yeej sim ua raws li txoj moo zoo kom txog thaum kawg.”22
Yeej yog ib qho nyuaj ntsuas seb ib tug neeg yuav pab ntau npaum li cas thaum nws sawv ntsug nyob sab haud. Kuv txiv thiab nws ob tug phooj ywg tsis kam mloog cov uas nyob hauv lub tsev loj thiab dav uas taw tes thuam lawv.23 Lawv paub tias yeej zoo dua yog yus mloog tus uas Tsim peb thiab tsis mloog tib neeg coob.
Tej zaum tus Thwj Tim Povlauj hais txog peb lub caij nyoog thaum nws qhia Timautes hais tias, “Muaj qee leej … yuam kev mus hais tej zaj uas tsis muaj hauv paus hauv ntsis lawm.”24 Muaj “tej zaj uas tsis muaj hauv paus hauv ntsis lawm” nyob hauv lub ntiaj teb no. Yog tej lus uas cov nyob hauv lub tsev loj thiab dav hais.25 Tej zaum lawv tej lus no yog hais kom qhia tias tsim nyog uas lawv ua phem los yog lawv hais thaum tib neeg ua yuam kev thiab cia li taug txoj kev ntawd mus ntxiv. Tej zaum yog los ntawm cov uas tsis tau them tus nqi “ua kom tag nrho” thiab xav coj raws li neeg ntiaj teb thiab tsis xav coj raws li tus yaj saub.
Zoo siab ua peb paub tias thaum kawg yuav zoo li cas rau cov uas rau siab ntseeg. Thaum peb “ua kom tag nrho” peb paub tseeb tias txhua yam tsav yuav pab sawv daws tau qhov zoo yog tias lawv muaj lub siab hlub Vajtswv.”26 Txwj Laug Neal A. Maxwell hais tias, “Tsis txhob ntshai, cia li ua neej zoo xwb.”27
Kuv tus poj niam leej txiv qhia tom BYU thiab nyiam BYU football tiam sis nws tsis kheev saib lawv txawb pob vim nws txhawj dhau ntshai tias lawv yuav tsis yeej. Ces muaj ib yam tshiab; tib neeg tau tsim lub VCR—nws thiaj kaw tau ib daim video txog lawv txoj kev ua football. Yog tias BYU yeej, ces nws yuav saib lub VCR, vim nws paub tseeb qhov kawg yuav zoo li cas! Yog tias lawv raug nplua, raug mob, los yog tseem tsis muaj qhab nias siab thaum yuav luag kawg, nws tsis txhawj vim nws paub tias lawv yuav yeej. Tej zaum yus hais tias nws “muaj ib txoj kev cia siab uas ci kawg nkaus”!28
Peb yeej zoo li no thiab. Thaum peb rau siab ntseeg, peb yuav paub tseeb hais tias thaum kawg txhua yam yuav zoo. Yeej yuav muaj raws li tus Tswv cov lus cog tseg. Qhov no tsis txhais hais tias txhua yam yuav yooj yim ua los yog peb yuav tsis quaj, tiam sis raws li Povlauj sau hais tias, “Tej uas qhov muag tsis tau pom los sis qhov ntsej tsis tau hnov, thiab tej uas neeg lub siab xav tsis txog hais tias yuav muaj los. Vajtswv npaj tej ntawd tseg rau cov neeg uas hlub Vajtswv lawm.”29
Cov kwv tij thiab cov muam, tseem tsis muaj leej twg uas twb ua txhaum tag kis lawm. Thov kom peb yuav rov qab nrhiav kev thiab cia siab thiab muaj kev ntseeg saib rau yav tom ntej. Thov kom peb yuav rau siab “sawv ntsug nyob sab haud” thiab “ua kom tag nrho.” Thov kom peb yuav ua neeg huv thiab ua siab loj tiv thaiv Leej Txiv Saum Ntuj Ceeb Tsheej txoj hau kev thiab Nws Leej Tub, peb tus Cawm Seej ntiag tug hauj lwm. Kuv ua tim khawv rau nej tias peb Leej Txiv muaj txoj sia nyob, Yexus yog tus Khetos, thiab ua tim khawv txog txoj hau kev zoo siab. Kuv thov kom tus Tswv foom koob hmoov zoo kawg rau nej, thiab kuv ua li no los ntawm Yexus Khetos lub npe, amees.