Kom Peb lub Teeb Yuav Ua Ib tug Chij rau tej Haiv Neeg

Ntau xyoo tas los, thaum kuv yog ib tug kws qhia seminary, kuv hnov ib tug uas nrog kuv ua hauj lwm hais kom nws cov tub ntxhais kawm ntawv xav txog lo lus nug no: Yog nej ua neej hauv tus Cawm Seej lub caij nyoog, vim li cas nej xav hais tias nej yuav coj raws li Nws ua Nws ib tug pab coj? Thaum kawg lawv xav tias cov uas coj raws li tus Cawm Seej niaj hnub nim no thiab siv zog ua Nws cov pab coj yog tib co uas yuav ua li ntawd thaum lub sij hawm ntawd thiab.

Txij thaum ntawd los, kuv twb xav txog lo lus nug ntawd thiab qhov uas lawv hais lawm. Ntau zaus kuv xav tias kuv yuav xav li cas thaum kuv hnov tus Cawm Seej lub suab thaum Nws hais tej lus no nyob hauv Zaj Lus Qhia Hais Pem Roob:

“Nej yog lub teeb uas ci rau neeg ntiaj teb pom kev. Lub nroog uas nyob saum roob yeej tsis muaj ib yam dab tsi yuav thaiv tau lub nroog ntawd.

“Tsis muaj leej twg taws teeb thiab muab phiab khwb rau; tiam sis tsuas muaj yuav muab txawb rau qhov chaw siab kom txhua tus uas nyob hauv lub tsev pom kev.

“Ib yam li ntawd, nej yuav tsum ci rau sawv daws pom tej hauj lwm zoo uas nej ua, lawv thiaj yuav qhuas nej Leej Txiv tus uas nyob saum ntuj ceeb tsheej” (Mathais 5:14–16).

Nej yuav xav li cas thaum nej hnov tus Cawm Seej lub suab? Muaj tseeb tiag, peb tsis tas xav txog qhov ntawd. Peb pheej hnov tus Tswv lub suab vim thaum peb hnov Nws cov tub qhe lub suab, yeej zoo ib yam.

Thaum xyoo 1838, zoo ib yam li Zaj Lus Qhia Hais Pem Roob, tus Tswv tshaj tawm qhov no dhau los ntawm tus Yaj Saub Yauxej Xamiv:

“Vim yuav tsum hu kuv lub koom txoos li no nyob hauv hnub nyoog kawg, uas twb yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

Kuv hais tseeb rau nej sawv daws tias: Cia li sawv thiab ci mus, kom nej lub teeb yuav ua ib tug chij rau tej haiv neeg” (Q&K 115:4–5).

Peb lub caij nyoog yeej tshwj xeeb heev, Yaxayas twb ua yog toog pom; nws kuj pom thiab qhia tej uas yuav muaj los yav tom ntej txog kev muab Yexus Khetos lub Koom Txoos Txum Tim Rov Qab Los thiab lub koom txoos no lub hom phiaj hais tias, “Thiab nws yuav tsa ib tug chij rau tej haiv neeg, thiab yuav sau Ixayees tej neeg uas raug ncaws tawm los ua ke, thiab sau cov neeg Yudas uas raug faib mus nyob thoob plaws plaub ceg kaum ntuj lawm los ua ke” (Yaxayas 11:12).

Nyob hauv cov vaj lug kub, ib tug chij yog ib lub cim rau cov neeg kom lawv paub tias lawv yuav tsum koom ua ke nyob qhov twg los yog koom siab koom ntsws. Nyob puag thaum ub ib tug chij nyob qhov twg los cov tub rog koom ua ke nyob qhov ntawd. Phau Ntawv Maumoos thiab Yexus Khetos lub Koom Txoos uas txum tim rov qab los yeej yog lub cim txog ib tug chij rau txhua haiv neeg. (Saib Guide to the Scriptures, “Ensign,” scriptures.lds.org.)

Ib tug chij tseem ceeb nyob rau hauv hnub nyoog kawg no yeej yog lub tuam rooj sab laj no, yog qhov chaw uas lawv tshaj tawm txog peb Leej Txiv Saum Ntuj Ceeb Tsheej tej hauj lwm tseem ceeb thiab txoj hau kev kom tib neeg tsis txawj tuag thiab tau txoj sia nyob mus ib txhis (Mauxes 1:39).

Qhov uas peb pheej muaj lub tuam rooj sab laj yog ib zaj lus tim khawv uas qhia hais tias peb Tsoom Haiv Neeg Ntseeg hauv Hnub Nyoog Kawg “ntseeg txhua yam uas Vajtswv tau qhia los lawm, txhua yam uas Nws tab tom qhia tawm, thiab peb ntseeg tias Nws tseem yuav qhia tawm tej yam loj thiab tseem ceeb ntxiv uas hais txog Vajtswv lub Nceeg Vaj” (Tej Nqe Kev Ntseeg 1:9).

Yog li ntawd, tus Tswv tau qhia kom peb ua dab tsi dhau los ntawm Thawj Tswj Hwm Thomas S. Monson peb lub teeb thiaj li yuav ua ib tug chij rau tej haiv neeg? Tej yam twg yog tej yam tseem ceeb ua hauv lub caij nyoog zoo kawg no kom txhim tsa Xi-oos thiab muab Ixayees sib sau ua ke.

Tus Tswv yeej ib txwm qhia Nws lub siab nyiam rau peb ib nqe lus ntxiv rau ib nqe lus, ib ntsiab cai ntxiv rau ib ntsiab cai, muab me ntsis nim no thiab muab me ntsis lwm hnub (2 Nifais 28:30). Yog li ntawd peb yuav tsum nco ntsoov tej yam uas peb xav tias yog tej yam me me vim tej ntawd yooj yim thiab pheej ua, vim tus Tswv twb ntuas peb, qhia peb tias lawv cov uas mloog Nws tej lus ntsiab cai, thiab cuab pob ntseg rau Nws tej lus ntuas, yuav tau koob hmoov, vim lawv yuav kawm laj lim tswv yim; rau tus uas txais Nws yuav muab ntau ntxiv (2 Nifais 28:30).

Kuv ua tim khawv tias thaum peb kawm ib nqe lus ntxiv rau ib nqe lus, ib ntsiab cai ntxiv rau ib ntsiab cai, muab me ntsis nim no thiab muab me ntsis lwm hnub thiab thaum peb mloog peb cov thawj coj tej lus ntuas, peb yuav muaj roj txaus rau peb cov teeb uas yuav cia peb muab qhov kaj rau lwm tus raws li tus Tswv txib peb.

Txawm muaj ntau yam uas peb ua tau kom ua ib lub teeb thiab ib tug chij rau lwm tus, muaj peb qho uas kuv xav hais: kev hwm Hnub Caiv, khiav tej hauj lwm ntawm kev cawm seej nyob ntawm ob sab daim ntaub thaiv huv tib si, thiab qhia raws li tus Cawm Seej txoj kev.

Txoj kev kaj uas peb hais txog yeej los ntawm kev teev tiam Vajtswv thaum peb hwm Hnub Caiv, nyob hauv lub Koom Txoos thiab nyob hauv tsev huv tib si; yog txoj kev kaj uas loj tuaj thaum peb ua kom peb tus kheej tsis muaj qhov ceb; yog txoj kev kaj uas los ntawm kev txais lub cim nco txog thaum Nws hnub dawb huv thiab teev tiam tus uas Siab Tshaj Plaws—vim tag nrho tej yam no ua rau peb tsim nyog muaj Nws tus Ntsuj Plig nrog peb nyob txhua lub sij hawm. Yog ib txoj kev kaj uas loj tuaj thiab ua rau peb pom tau thaum peb rov qab mus tsev nrog kev xav zam txim zoo li Thawj Tswj Hwm Henry B. Eyring hais nyob hauv lub tuam rooj sab laj lub Kaum Hli Ntuj tas los thaum nws hais tias: “Hais txog cov koob hmoov uas peb suav tau, txoj koob hmoov zoo tshaj plaws yog kev zam txim uas los rau peb thaum peb txais lub cim nco txog. Peb yuav hlub thiab ris tus Cawm Seej txiaj ntxiv, tus uas theej peb lub txhoj kom peb thiaj yuav tsis muaj kev txhaum” (“Kev Ris Txiaj Thaum Hnub Caiv,” Liahona, Kaum Ib Hlis Ntuj 2016, 100).

Thaum peb hwm Hnub Caiv kom dawb huv thiab txais lub cim nco txog, peb raug ntxuav kom huv, thiab peb txoj kev kaj ci ntsa iab zuj zus tuaj.

Peb txoj kev kaj kuj loj zuj zus tuaj thaum peb siv sij hawm nrhiav tej npe ntawm peb cov poj koob yawm txwv, nqa lawv tej npe rau lub tuam tsev, thiab qhia peb tsev neeg thiab lwm tus ua ib yam li ntawd.

Tej hauj lwm hauv lub tuam tsev thiab tej hauj lwm nrhiav tsev neeg zaj keeb kwm uas peb koom Tsoom Haiv Neeg Ntseeg nyob ntawm daim ntaub thaiv ob sab huv tib si ua yeej yog ib txoj hauj lwm uas mus tom ntej thaum peb ua tus Tswv cov tuam tsev ntxiv. Vim rau qhov cov tuam tsev teem sij hawm tshwj xeeb rau tej tsev neeg uas nqa lawv tus kheej tej npe tuaj ua, kuv tus poj niam thiab kuv wb zoo siab ua hauj lwm ua ke hauv lub tuam tsev nrog wb cov me nyuam thiab cov me nyuam xeeb ntxwv.

Thaum peb nrhiav tau thiab nqa tej npe mus rau lub tuam tsev thiab qhia lwm tus paub ua li ntawd, ces peb ci ntsa iab ua ib tug chij rau lawv.

Ib txoj kev ntxiv rau peb sawv thiab ci ntsa iab yog kev kawm qhia zoo li tus Cawm Seej qhia. Kuv zoo siab kawg nrog txhua tus uas kawm kom paub qhia raws li tus Cawm Seej txoj kev. Cia kuv nyeem los ntawm phau ntawv txog kev qhia tshiab: “Lub hom phiaj ntawm txhua tus kws qhia txog txoj moo zoo—txhua tus niam tsev txiv tsev, txhua tus uas twb hu ua ib tug xib hwb, txhua tus neeg qhia tom tsev thiab tus saib xyuas tom tsev, thiab txhua tus uas coj raws li Khetos—yuav tsum qhia txoj lus qhuab qhia tseeb tseeb ntawm txoj moo zoo, los ntawm tus Ntsuj Plig, … kom pab Vajtswv cov me nyuam txhawb nqa lawv txoj kev ntseeg tus Cawm Seej thiab hloov los ua neeg zoo li Nws ntxiv” (Teaching in the Savior’s Way [2016]).

Tam sim no, ntau txhiab tus xib hwb zoo nqa ib lub teeb siab thaum lawv kawm kom paub qhia raws li tus Cawm Seej txoj kev. Vim yog li ntawd, cov xib hwb kev sab laj tshiab yog ib txoj kev rau peb sawv thiab ci ntsa iab kom cov uas kawm koom ua ke nyob ib puag ncig tus chij ntawm Khetos txoj lus qhuab qhia, vim “txoj kev kom qhia raws li tus Cawm Seej qhia kev ua neej raws li tus Cawm Seej ua neej” (Teaching in the Savior’s Way, 4).

Thaum peb txhua tus qhia thiab kawm raws li Nws txoj kev thiab hloov los ua neeg zoo li Nws ntxiv, peb lub teeb ci ntsa iab loj dua thiab tsis muaj dab tsi thaiv tau thiab yog ib tug chij rau cov uas nrhiav tus Cawm Seej txoj kev kaj.

Kuv cov kwv tij thiab cov muam, peb yuav tsum tsis txhob muab peb lub teeb zais cia. Peb tus Cawm Seej txib peb kom ua peb lub teeb ci zoo li ib lub nroog nyob saum lub roob los yog ib tug tswm ciab uas muab txawb rau saum lub chaw txawb teeb. Thaum peb ua li ntawd, peb yuav qhuas peb Leej Txiv Saum Ntuj Ceeb Tsheej. Tus Cawm Seej txoj moo zoo thiab Nws lub Koom Txoos uas tau muab txum tim rov qab los ua rau peb muaj cib fim ntau kom peb lub teeb ua ib tug chij rau tej haiv neeg.

Kuv ua tim khawv tias Yexus Khetos yog lub teeb uas peb yuav tsum siv kom peb ci ntsa iab, los ntawm Yexus Khetos lub npe, amees.