Kev Ua Dawb Huv uas Zoo Nkauj Kawg
Peb Leej Txiv Nyob Saum Ntuj Ceeb Tsheej muab txhua yam rau peb uas peb yuav tsum muaj kom ua neeg dawb huv zoo li Nws.
Thaum kuv npaj rau kev sib ntsib no, kuv xav txog cov viv ncaus rau siab ntseeg uas kuv ntsib, txawm nyob ze los nyob deb los yog. Kuv xav tias lawv zoo li tus Vaj Ntxwv Daviv hais nyob hauv ib zaj nkauj ua Vajtswv tsaug hais tias, “Cia li qhuas tus Tswv lub npe uas muaj koob muaj meej; cia li nqa khoom tuaj fij rau hauv nws lub tuam tsev: cia li teev tiam tus Tswv raws li kev ua dawb huv uas zoo nkauj kawg.”1
Kuv pom kev ua dawb huv uas zoo nkauj kawg nyob ntawm cov viv ncaus uas muab siab npuab txhua yam zoo, uas xav ua neeg zoo li tus Cawm Seej. Lawv muab tag nrho lawv lub siab, lub ntsws, lub dag lub zog rau tus Tswv los ntawm lawv txoj kev ua neej txhua hnub.2 Kev ua dawb huv yog kev siv zog ua raws li cov lus txib thiab coj raws li tej kev khi lus uas peb tau khi nrog Vajtswv. Kev ua dawb huv yog kev xaiv tej yam uas cia tus Vaj Ntsuj Plig Dawb Huv coj peb txoj hau kev.3 Kev ua dawb huv yog kev tso tej yam ntawm ntiaj teb no tseg thiab hloov los ua ib tug neeg ntseeg dhau los ntawm Khetos tus Tswv txoj Kev Theej Txhoj.4 “Txhua lub sij hawm ntawm [peb lub neej] yuav tsum ua dawb huv rau tus Tswv.”5
Vajtswv saum ntuj ceeb tsheej txib tsev neeg Ixayees hais tias, “Kuv yog tus Tswv uas yog nej tus Vajtswv, nej yuav tsum ua neeg dawb huv, rau qhov kuv yog tus uas dawb huv. Nej tsis txhob ua rau nej tsis huv.”6
Txwj Laug D. Todd Christofferson qhia hais tias: “Peb Leej Txiv Saum Ntuj Ceeb Tsheej xav tau ntau yam los ntawm peb. … Nws xav muab peb hloov ua neeg dawb huv kom peb thiaj yuav muaj cuab kav ‘nyob hauv lub yeeb koob xilethi-aus’ (Q&K 88:22) thiab nrog Nws nyob ua ke (Mauxes 6:57).”7 Tej Zaj Lus Hais txog Kev Ntseeg piav hais tias, “Tsis muaj leej twg uas tiv tau nws lub yeeb koob yog tsis zoo tag nrho thiab dawb huv zoo li nws.”8 Peb Leej Txiv Saum Ntuj Ceeb Tsheej paub peb. Nws hlub peb, thiab Nws muab txhua yam rau peb uas peb yuav tsum muaj kom ua neeg dawb huv zoo li Nws.
Peb yog Leej Txiv Saum Ntuj Ceeb Tsheej cov ntxhais, thiab peb txhua tus muaj caj ceg dawb huv. Peb Leej Txiv Saum Ntuj Ceeb Tsheej hais tias, Neeg Dawb Huv yog Nws lub npe.9 Nyob hauv lub neej ua ntej lub neej no, peb hlub peb Leej Txiv thiab teev tiam Nws. Peb xav hloov los ua neeg zoo li Nws. Vim Nws hlub peb kawg li, Nws txib Nws Leej Tub, Yexus Khetos, los ua peb tus Cawm Seej thiab tus Txhiv Dim. Nws yog Neeg Leej Tub uas Dawb Huv.10 Nws “lub npe hu ua Dawb Huv,”11 “Ixayees tus Dawb Huv.”12
Qhov uas peb cia siab rau kev ua dawb huv yog dhau los ntawm Yexus Khetos, Nws txoj kev hlub tshua thiab Nws txoj kev tshav ntuj. Yog peb muaj kev ntseeg Yexus Khetos thiab Nws txoj Kev Theej Txhoj, peb yuav ua neeg huv, tsis muaj qhov ceb, thaum peb xyeej txhua yam uas tsis los ntawm Vajtswv13 thiab hloov siab lees txim tiag tiag. Peb ua kev cai raus dej kom txais kev zam txim rau peb tej kev txhaum. Thaum peb qhib peb lub siab txais tus Vaj Ntsuj Plig Dawb Huv, peb hloov los ua neeg huv. Txhua lub lim tiam, peb txais lub cim nco txog. Thaum peb hloov siab lees txim, thiab xav ua ncaj ncees tiag tiag, peb khi lus tias peb txaus siab ris Khetos lub npe, nco ntsoov txog Nws, thiab ua raws li Nws tej lus txib kom peb yuav muaj Nws tus Ntsuj Plig nrog peb nyob tas mus li. Thaum peb sim koom siab koom ntsws nrog Leej Txiv, Leej Tub, thiab tus Vaj Ntsuj Plig Dawb Huv, peb lub neej yuav zoo ib yam li Lawv.14
Kev Ua Dawb Huv Yog Kev Ua Raws Li Peb tej Kev Khi Lus
Peb to taub tias muaj ntau yam kev sim siab, kev ntxias, thiab kev txom nyem uas rub peb kom nyob deb ntawm txhua yam uas Vajtswv pom tias yog tej yam dawb huv. Tiam sis peb lub neej hauv lub ntiaj teb no yog lub cib fim rau peb xaiv kev ua dawb huv. Feem ntau yog tej yam uas peb yuav tsum muab tso tseg kom ua raws li peb tej kev khi lus uas ua rau peb hloov ua neeg dawb huv.
Kuv twb pom kev dawb huv nyob hauv ib tug ntxhais uas muaj 13 xyoos nyob hauv Ghana hu ua Evangeline. Ib yam uas nws ua kom ua raws li nws tej kev khi lus yog thaum nws rau siab ua qhov uas Vajtswv hu nws ua pawg Beehive tus thawj tswj hwm. Nws txo hwj chim piav hais tias nws mus rau nws cov phooj ywg tsev, cov ntxhais hluas uas tsis tshua muaj siab ntseeg, es nws thov lawv niam lawv txiv kom cia lawv mus koom lub koom txoos. Lawv niam lawv txiv qhia nws tias nyuaj heev vim thaum Hnub Sunday cov me nyuam yuav tsum ua hauj lwm hauv tsev. Yog li ntawd Evangeline mus thiab pab lawv ua lawv tej dej num, ces vim nws ua li ntawd lawv cia nws cov phooj ywg mus koom lub koom txoos.
Yog peb yuav ua raws li tej kev khi lus no, ces cov kab ke pov thawj hwj dawb cev yuav hloov peb lub siab, ua rau peb hloov ua neeg dawb huv, thiab npaj peb mus cuag tus Tswv.15 Yog li ntawd peb ib leeg yuav ris ib leeg tej nra; peb ib leeg yuav txhawb nqa ib leeg. Peb txais kev zam txim thaum peb pub kev pab ntawm sab ntsuj plig thiab sab cev nqaij daim tawv rau cov pluag, cov tshaib plab, cov liab qab, thiab cov mob.16 Peb ceev peb tus kheej kom tej yam ntawm lub ntiaj teb txhob ua rau peb ceb thaum peb hwm Hnub Caiv kom dawb huv thiab txais lub cim nco txog.17
Peb foom koob hmoov rau peb tsev neeg thiab ua kom peb lub tsev dawb huv. Peb tswj peb tus kheej kom peb yuav muaj kev dawb huv thiab kev hlub puv npo.18 Peb ua siab dawb siab zoo ncav tes pab lwm tus thiab ua tim khawv txog Vajtswv. Peb hloov los ua ib co neeg Xi-oos, uas koom siab koom ntsws, ib co neeg dawb huv ua nyob ua ke raws li kev ncaj ncees.19 Vim Xi-oos yuav tsum zoo nkauj thiab dawb huv zuj zus tuaj.20
Cov viv ncaus, cia li los rau hauv lub tuam tsev. Yog peb yuav ua ib co neeg dawb huv uas twb npaj siab txais tus Cawm Seej thaum Nws los, peb yuav tsum sawv thiab hnav tej tsoos tsho zoo nkauj.21 Nrog dag zog thiab koob meej, peb tso tej yam ntawm lub ntiaj teb tseg thiab ua raws li peb tej kev khi lus xwv kom peb yuav “hnav qhov dawb huv, muaj tseeb tiag, yuav hnav lub tsho tshaj sab ntawm kev ncaj ncees.”22
Kev Ua Dawb Huv Yog Thaum Cia tus Vaj Ntsuj Plig Dawb Huv Coj Peb Kev
Kev ua dawb huv yog ib lub txiaj ntsim ntawm tus Ntsuj Plig. Peb txais lub txiaj ntsim no thaum peb xaiv ua tej yam kom tus Vaj Ntsuj Plig Dawb Huv lub hwj chim hauv peb lub neej loj tuaj.
Thaum Mathas txais Yexus Khetos los rau hauv nws lub tsev, nws xav xav ua hauj lwm rau tus Tswv zoo npaum li nws ua tau. Nws tus viv ncaus, Maivliag, zaum “ntawm Yexus ko taw” thiab mloog Yexus qhia. Thaum Mathas ntxhov siab txog tej hauj lwm ntau es tsis muaj leej twg pab, nws yws yws hais tias, “Tus Tswv, koj tsis paub hais tias kuv tus niam hluas cia kuv tib leeg ua hauj lwm xwb los?”
Kuv nyiam cov lus siab mos siab muag uas nws hais kom cem Mathas. Tus Cawm Seej uas muaj siab hlub zoo tag nrho, Nws ntuas hais tias:
“Mathas, Mathas! Koj txhawj thiab ntxhov siab rau ntau yam hauj lwm kawg li:
“Tiam sis tsuas muaj ib yam zoo xwb. Maivliag twb xaiv yam zoo ntawd lawm, tsis muaj leej twg yuav txeeb tau yam uas nws muaj ntawd mus li.”23
Cov viv ncaus, yog peb yuav ua neeg dawb huv, peb yuav tsum kawm kom zaum ntawm Ixayees tus Dawb Huv ko taw thiab siv sij hawm ua dawb huv. Peb puas muab tus xov tooj, txhua yam peb yuav tsum ua, thiab tej yam ntawm lub ntiaj teb no tso tseg me ntsis? Kev thov Vajtswv, kev kawm ntawv, thiab kev mloog Vajtswv txoj lus yeej caw Nws txoj kev hlub nkag rau hauv peb lub siab kom ntxuav peb huv. Cia peb siv sij hawm ua neeg dawb huv, kom peb yuav muaj Nws tus Ntsuj Plig dawb ceev puv npo. Thaum peb muaj tus Vaj Ntsuj Plig Dawb Huv coj peb txoj hau kev, peb yuav npaj txais tus Cawm Seej raws li kev ua dawb huv uas zoo nkauj kawg.24
Kev Ua Dawb Huv Yog Kev Hloov Los Ua Ib tug Neeg Ntseeg Dhau Los ntawm Yexus Khetos txoj Kev Theej Txhoj
Raws li Vaj Ntxwv Npeyamis tej lus, cov uas hloov los ua neeg ntseeg dhau los ntawm Yexus Khetos txoj Kev Theej Txhoj yog cov uas mloog lus, siab mos siab muag, txo hwj chim, ua siab ntev, thiab muaj kev hlub, ib yam li tus Cawm Seej.25 Nws qhia tej uas yuav muaj los yav tom ntej hais tias Yexus Khetos, “tus Tswv uas Muaj Hwj Chim Loj Tshaj Plaws uas kav, tus uas tau nyob, thiab nyob ib txhiab ib txhis mus rau ib txhiab ib txhis, yuav nqis saum ntuj ceeb tsheej los nrog noob neej nyob, thiab yuav los nyob hauv ib lub tsev av.” Nws los foom koob hmoov rau cov neeg mob, cov neeg lag ntseg, cov dig muag, thiab tsa neeg sawv hauv qhov tuag rov qab los. Tiam sis Nws raug tej yam “ntau tshaj li neeg nyiaj taus, tsuas yog raug kev tuag xwb.”26 Thiab txawm Nws yog tib tug uas ua rau peb txais tau kev cawm seej, Nws raug thuam, nplawm, thiab raug ntsia saum ntoo khaub lig. Tiam sis Vajtswv Leej Tub sawv los tawm ntawm lub ntxa kom peb txhua tus yuav kov yeej kev tuag. Nws yog tus uas yuav sawv txiav txim neeg ntiaj teb raws li kev ncaj ncees. Nws yog tus uas yuav txhiv peb txhua tus dim. Nws yog Ixayees tus Dawb Huv. Yexus Khetos yeej yog kev ua dawb huv uas zoo nkauj kawg.
Thaum Vaj Ntxwv Npeyamis cov neeg mloog nws cov lus lawm, lawv vau rau hauv av, lawv txo hwj chim thiab hwm Vajtswv txoj kev tshav ntuj thiab lub yeeb koob. Lawv paub tias lawv muaj lub siab nyiam sab cev nqaij daim tawv. Peb puas paub hais tias peb yuav tsum muaj Khetos, peb tus Tswv, txoj kev tshav ntuj thiab kev hlub tshua? Peb puas paub hais tias peb txhua lub txiaj ntsim yog los ntawm Khetos, tsis hais ntawm sab cev nqaij daim tawv los sab ntsuj plig los yog? Peb puas nco ntsoov tias raws li Leej Txiv txoj hau kev uas nyob mus ib txhis, peb yuav nyob kaj siab lug hauv lub neej no thiab muaj yeeb koob nyob mus ib txhis dhau los ntawm Nws Leej Tub dawb huv xwb?
Thov kom peb koom nrog tus Vaj Ntxwv Npeyamis cov neeg thaum lawv ua ib suab qw hais tias, “Au thov muaj kev hlub tshua lauj, thiab muab Khetos cov ntshav theej txhoj xwv kom peb yuav tau txais txoj kev zam txim ntawm peb tej kev txhaum, thiab kom peb tej siab yuav dawb huv; vim peb ntseeg Yexus Khetos, Vajtswv Leej Tub, tus uas tau tsim lub ntuj thiab lub ntiaj teb, thiab tag nrho ib puas yam tsav.”27
Kuv ua tim khawv tias thaum peb los cuag Ixayees tus Dawb Huv, Nws tus Nstuj Plig yuav los rau peb kom peb muaj kev xyiv fab, txais kev zam txim rau peb tej kev txhaum thiab nyob kaj siab lug.
Leej Txiv Saum Ntuj Ceeb Tsheej tau muab hwj chim rau peb los ua neeg dawb huv. Thov kom peb yuav ua raws li peb tej kev khi lus thiab cia tus Vaj Ntsuj Plig Dawb Huv coj peb kev. Nrog kev ntseeg Yexus Khetos, peb hloov los ua haiv neeg ntseeg dhau los ntawm nws txoj Kev Theej Txhoj, xwv kom peb txais tau txoj kev tsis txawj tuag thiab txoj sia nyob mus ib txhis thiab qhuas Vajtswv peb Leej Txiv lub npe. Thov kom peb yuav muab peb lub neej rau Nws, xwv kom peb yuav sawv ntawm tus Tswv lub xub ntiag raws li kev ua dawb huv uas zoo nkauj kawg. Los ntawm Yexus Khetos lub npe dawb ceev, amees.