Rainin Menin Bwilōn̄ ko Raar Bōjrak Ke?

Juon iiō emootļo̧k, ilo juon jerbal in ijjitōn̄ ilo state eo an California, iaar etal ippān stake būreejtōn eo n̄an loļo̧k Clark im Holly Fales im baam̧le eo aer ilo im̧weeo im̧eer. Kar ba tok n̄an eō ke raar ioon juon menin kabwilōn̄lōn̄. Ke kōmij tōkeakļo̧k, Clark eaar kakkōt n̄an jutak n̄an karuwaineneik kōm kōn an kōņaak juon jimāān ilo likin, juon jimāān ilo kōnwaan, im jimāān ilo pein.

Ruo allōn̄ m̧oktaļo̧k, Clark, ļaddik eo nejin Ty, im bōlen 30 bar ļikao ro im ritōl ro raar ilo̧k n̄an juon an stake m̧akūtkūt, n̄an tallōn̄e Mount Shasta eo utiej in ej 14,180 ne (4,322 m), juon iaan toļ ko reutiejtata ilo California. Ilo raan eo kein karuo in aiik eo, enan̄in aolepen ritallōn̄ ro raar tōbarļo̧k ilōn̄tata—eaar juon tōprak eo em̧m̧an kōnke elōn̄ allōn̄ ko rekar m̧aanjabpopo n̄ane.

Juon iaan armej ro m̧oktata ilo raan eo eaar tōpar lōn̄ eaar Clark. Ālkin jidik iien kakkije epaake m̧aan itoļ eo, eaar jutak im jino etetal. Ke ej etetal, eaar tūbbo̧k im okjak m̧aanļo̧k im wōtļo̧k, im ekōm̧m̧an bwe en wōtļo̧k emaron̄ 40 ne (12 m) innām ekōm̧m̧an bwe en wōtļo̧k ioon kom̧laļ eo eaiij bar 300 ne (91 m). Ejeraam̧m̧an, Clark eaar mour, bōtaab eaar Kanooj jorrāān im eaar jab maron̄ emakūtkūt.

Menin kabwilōn̄lōn̄ ko Clark eaar ioone ilo iien in ekabūrom̧ōjm̧ōj rej kab baj jinoin. Jet iaan ro raar tōpar e “kar jide” bwe ren jet kurup in riaiik ro me ekoba ro retijem̧ļo̧k rilorlorjake ro ilo toļ im ilo idin̄. Raar m̧ōkaj in leļo̧k kein kōm̧adm̧ad n̄an Clark. Kurup in “raar āinwōt”etali kein kōnono ko im kar jilkinļo̧k juon ennaan edin̄ n̄an jipan̄ jān eria eo me ijo cell phone ko rejjab maron̄ in jerbal ie. Juon elikabtōr jidikdik eaar m̧ōkaj in kelak n̄an Mount Shasta juon awa ettoļo̧k. Ālkin ruo alen kajjeion̄ in jok ko rekauwōtata in an elikabtōr in tin jok, kōn wōt an lap kōto, kapen eo eaar bar kajjieon̄ jilu alen. Ke elikapitōr eo ej tōparļo̧k jān bar juon jikin, “kar jide” bwe kōto ko ren oktak bwe elikaptōr eo en jok bwe en m̧ōkaj an kurup eo im Clark uwe itulikin jikin jijet eo an kapen eo.

Ke raar etale Clark ilo aujpitōl eo, kakōlkōl ko raar kwaļo̧k bwe eaar bwilo̧k kenwaan, likin, dii ko ubōn, im pein; tōttal jidik ārrin; im jijidikdik m̧wijm̧wij im kuraar. Juon rim̧wijm̧wij “kar jide” bwe en jerbal ilo raan eo; ej pād ilo aujpitōļ in jet wōt kōttan ilo juon iiō. Taktō in eaar ba ke ejjan̄in kar lo jabdewōt armej kōn jorrāān ļapļap jān dii lep n̄an iaļan bōtōktōk ko im ej mour. Clark eaar jab mour wōt ak eaar ro̧o̧l n̄an jinoin. Kōmeļeļeik e make āinwōt juon eo ejeraam̧m̧an, rim̧wijm̧wij eo eaar ba kōn jekjek eo an Clark an etali aolepān kein ekkatak ko an kōn jorrāān ko im emaron̄ ba ke ej juon menin kabwilōn̄lōn̄.

Ke em̧ōj an Clark im Holley kwaļo̧k bwebwenato in, eaar pen aō kōnono. Eaar jab pidodo n̄an lo menin kabwilōn̄lōn̄ ko, ak kōn wōt juon eo em̧m̧an. Iaar en̄jake juon im̧we—juon kam̧ool—bwe Holly im kajjojo ajri ro nejiero ļalem rem̧m̧an ro raar jijet ilowaan etōņaak eo ippān ro jineer im jemeer eaar ļap tōmak bwe ren maron̄ bōk jabdewōt ta eo enaaj waļo̧k ilo raan eo im raar jeram̧m̧an ilo mour in jetōb. Clark im Holly im ajri ro nejierro rerūtto, Ty im Porter, rej pād ilubwiljid ilo Conference Center in rainin.

N̄an kejokļo̧kjeņ kōn en̄jake in an Fales baam̧le, iaar kanooj kōļmenļo̧kjeņ kōn jekjek ko an ro jet rellōn̄. Ta eo n̄e eļap tōmak, kōjeraam̧m̧an eo an priesthood kar bōke, jar ejjab bōjrak n̄an, kōjparok bujen ko, kōjatdikdik eo eobrak an Armej ro Rekwojarjar ilo Raan-ko āliktata me menin bwilōn̄ rejjan̄in de waļo̧k? Ilo juon wāween eo me remeļeļe kōn kabwilōn̄lōn̄. Ilo juon wāween eo me ro jet raar lo kabwilōn̄lōn̄ ko.

Ak baj jān ro raar en̄taan kōn metak ko an—ānbwin, kōmālij, būrom̧ōj—ilo elōn̄ iiō ak epepen ak ilo aolepen mour eo aer? Ak baj jān ro raar mej ke rej iddik wōt?

Ruo allōn̄ rem̧ootļo̧k, jet ripālele ro rej kabwijer peba in mālim an tampeļ, ippānļo̧k jilu nejieer ajri ro rej jerbal in mijinede aolep raan im bar ļalem ajri kōtaeer, raar kelo̧k kōn juon baļuun jidikdk ilo juon iien ekkeke eo ekadu. Ij jeļā bwe raar jar kōn kōjparok m̧okta jān aer kar kelo̧k im raar bar jar emakijkij bwe baļuun eo waer eaar ioon jorrāān m̧okta jān an kūrāāj. Ejjeļo̧k en eaar mour. Ak er?

Armej ro rem̧m̧an im ro jitōn bōro ippāer ewōr unin aer kajjitōk kajjitōk ko kar je jen mormon ro: “Rainin menin bwilōn̄ ko raar bōjrak ke?”¹

Aō jeļā ejabwe n̄an kōmeļeļeik etke jet iien ewōr limotak im jet iien ejjeļo̧k. Ak bōlen ejabwe meļeļe kōn ta eo ej kōm̧m̧an menin bwilōn̄.

Ekkā ad kōmeļeļeik āinwōt juon kōmour eo ejjeļo̧k meļeļe eo edipio jān taktō ak āinwōt n̄e bōbrae kauwōtata n̄an kile juon im̧we eo ealikar. Ijoke, meļeļein menin bwilōn̄ ej āinwōt juon “jipan̄ eo me kar waļo̧k tok jen kajoor eo ekwojarjar me kanniōk ejjab jeļā”² an letok juon indeeo em̧m̧an ilo mour. Meļeļein ebarāinwōt kōm̧m̧an bwe jen kōļmenļo̧kjeņ kōn jerbal eo eaorōk an tōmak ilo em̧akūt eo an juon menin bwilōn̄.

Moronai eaar katakin, “Im barāinwōt jab ilo jabdewōt iien jabdewōt eaar jerbali mennin bwilōn̄ ko m̧ae ālikin aer tōmak.”³ Ammōn eaar kwaļo̧k, “Āindein Anij eaar kwaļo̧k juon wāween ko kaki armej, kōn tōmak, maron̄ jerbal kabwilōn̄lōn̄ ko reļļap.”⁴ Irooj eaar kwaļo̧k n̄an Josep Smith, “Bwe N̄aij Anij, … im Inaaj kwaļo̧k menin bwilōn̄ ko … n̄an aolep ro rej tōmak ioon Eta.”⁵

Kiin̄ Nebuchadnezzar eaar kipel Shadrach, Meshach, im Abed-nego bwe ren jar n̄an ekjab eo kōm̧m̧an jān gold āinwōt juon anij, “Ak eḷan̄n̄e koṃij jab kabun̄, ilo iien eo wōt renaaj joḷọk … koṃ eoḷapen juon upaaj in kijeek e bwil.” Innām ej kakūtōtōik er im ba “Wōn Anij eo me enaaj lo̧mo̧o̧reņ kom̧ jen peiu?”⁶

Rijilōk rein jilu raar ba: “Eļan̄n̄e enaaj āindein, am Anij Eo kōmij karijer n̄an E, E maron̄ in lo̧mo̧o̧ren kōm jān upaaj in kijeek e bwil. … “Ak eļan̄n̄e jab, kwōn jeļā, O kiin̄ bwe kōm ban karijer n̄an anij ro am̧.”⁷

Raar bōk eļap lōke bwe Anij enaaj lo̧mo̧o̧reņ er, “ak eļan̄n̄e jab,” raar kadedeļo̧k tōmak ilo karōk eo An.

Āinwōt, Elder David A. Bednar eaar kajjitōkin ļaddik eo juon kajjitōk eo meeaar kajjitōk kōjeraam̧m̧an an priesthood, “Eļan̄n̄e ankilaan Jemedwōj Ilan̄ bwe kwon mej ilo am em̧m̧an ded n̄an laļ en an jetōb im wōnm̧aanļo̧k ilo jerbal in kwaļo̧k eo am̧, ewōr ke am̧ tōmak n̄an leļo̧k n̄an Ankilaan im jab mour?”⁸ Ewōr ke ad tōmak “n̄an [jab] mour” jān en̄taan ko jej iooni bwe jen mour indeeo?

Juon kajjitōk epen n̄an kōļmenļo̧kjeņ ej “Ia eo jej likūt ad tōmak?” Ad tōmak ej ke pedped ioon kōņaan eo n̄an joļo̧k metak im en̄taan, ak ej ke dim io̧ļapen karōk eo ekwojajar an Anij Jemed im Nejin Jisōs Kraist im Pinmuur eo An? Tōmak ilo Jemen im Nejin ekōm̧m̧an bwe jen meļeļe im bōk Ankilaer ilo ad m̧aanjabpop n̄an mour indeeo.

Rainin Ij kam̧ool kōn menin bwilōn̄ ko. Āinwōt juon nejin Anij ej juon menin bwilōn̄.⁹ Bōk juon ānbwiin ilo nememein wōt E ej juon menin bwilōn̄.¹⁰ Menin letok kōn juon Rilo̧mo̧o̧r ej juon menin bwilōn̄.¹¹ Pinmuur eo an Jisōs Kraist ej juon menin bwilōn̄.¹² Aorōk eo an mour indeeo ej juon menin bwilōn̄.¹³

Ke ejja em̧m̧an n̄an jar kake im jerbale ājmour an ānbwin im kōmour ilo mour in ad, jibadbad eo ad eaikuj in pedped ioon menin bwilōn̄ ko an jetōb me rejpojak n̄an aolep ro nejin Anij. Jekdo̧o̧n laļ rot, jekdo̧o̧n armej ro, jekdo̧o̧n ta eo jaar kōm̧m̧ane eļan̄n̄e jej ukweļo̧k, jekdo̧o̧n ta eo eaar waļo̧k n̄an kōj—jej maron̄ in aolep būk menin bwilōn̄ kein. Jej mour kōn menin bwilōn̄, im elōn̄ menin bwilōn̄ ko repād im̧aan. Ilo etan Jisōs Kraist, amen.