Bōk Lōke eo an Irooj im Baam̧le eo Am
Em̧m̧aan ro rej “m̧ool ilo bōro” rej em̧m̧aan ro jej lōke er—kōnke lōke ej pedped ioon m̧ool.
Em̧m̧aan raņ, bolen ejjeļo̧k naan em̧m̧anļo̧k jemaron̄ bōke jān Irooj ijjeļo̧kin n̄an jeļā E ej lōke kōj bwe jej rikabwijer ro rōwāppen an priesthood im ļōmaro pālele im baba ro rem̧m̧an.
Juon men elukkuun alikkar: bōk lōke eo an Irooj ej juon kōjeram̧m̧aān eo ej itok jān kijejeto ko kōn ijoko koņaad. Lōke ej juon kōjeraam̧m̧an eo ej pedped ioon pokake kien ko an Anij. Bōk lōke eo an Irooj ej itok āinwōt juon tōprak in ad m̧ool n̄an bujen ko me jaar kōm̧m̧ani ilo iien peptaij im ilo tampōļ ko rekwojarjar. N̄e jej kōjparok kalim̧ur ko ad n̄an Irooj, An lōke ej ļapļo̧k ilo kōj.
Ij iakwe jimor jeje ko rekwojarjar an raan ko etto im raan kein ilo an kōjerbal naan in “m̧ool ilo bōro” n̄e ej kōmeļeļeik m̧wil in juon armej.1 Mool ak Riab ej juon kadkad in m̧wil an juon armej. Em̧m̧aan ro rej “m̧ool ilo bōro” rej em̧m̧aan ro jej lōke er—kōnke lōke ej pedped ioon m̧ool.
Erom juon em̧m̧aan in m̧ool ej meļeļein ikdelel ko am, ej barāinwōt kōm̧m̧an ko am, reerreo im jim̧we ilo aolepān mour eo am, jimor ilo loblej im ijoko rettino. Kōn kajjojo kālet ko jej kōm̧m̧ani, jemaron̄ bōk eļapļo̧k lōke an Anij ak kadikļo̧k An lōke. Katak in bolen elukkuun alikkar an waļo̧k ilo eddo ko rekwojarjar an ļōmaro ro pālele im baba ro.
Āinwōt ļōmaro pālele im baba ro, emōj ad bōk juon eddo ekwojarjar jān rikanaan ro raan kein, rilolo ro, im ribōk revelesōn ro ilo pepa in emōj je “Baam̧le eo: Juon Kean̄ n̄an Laļ in.” Peba in ej katakin kōj bwe (1) “baba ro rej tōl ioon baam̧le ko aer ilo io̧kwe im jim̧we,” (2) baba “rej bōk eddo in kabwe aikuj ko,” im (3) baba ro rej bōk eddo in kōjparok baam̧le ko aer.2
Bwe jen bōk lōke eo an Anij, jenaaj aikuj kadedeikļo̧k eddo kein rekwojarjar n̄an baam̧le ko ad ilo wāween eo Irooj ekōņaan. Āinwōt an waļo̧k ilo kean̄ eo an baam̧le, wāween eo Irooj ekōņaan ej n̄an kakūrm̧ool eddo kein ippān kōrā ro pāleed “āinwōt m̧ōttā ro rej juon wōt.”3 Ippa, menin ej meļeļein jeban wōnm̧aanļo̧k wōt kōn jabdewōt kālet ko reaorōk ikkijeen eddo kein jilu n̄e jejjab juon wōt ippān kōrā ro pāleed.
Bun̄tōn eo kein kajuon ilo ad kappukōt n̄an bōk lōke eo an Irooj ej n̄an likūt ad lōke ilo E. Rikanaan Nipai eaar kwaļo̧k kain kalim̧ur rōt in ke eaar jar: “O Irooj, iaar likūt aō lōke ilo Kwe, im inaaj lōke Kwe indeeo. Ij jamin likūt aō lōke ioon pein kanniōk.”4 Nipai eaar lukkuun wūjlepļo̧k n̄an kōm̧m̧an ankilaan Irooj. N̄an kakobaba ilo an ba enaaj “kōm̧m̧ani men ko Irooj eaar kean̄,” Nipai eaar jab ebbweer ilo kalim̧ur eo an n̄an kadedeikļo̧k eddo ko an, āinwōt an waļo̧k ilo enaan in: “Āinwōt Irooj emour im āinwōt ad mour, jejamin naaj wanlaļļo̧k n̄an jemād ilo āne jem̧aden m̧ae iien jej kōtōprak men eo Irooj eaar jiron̄ kōj.”5
Kōnke Nipai eaar jinoin lōke Anij, Anij eaar likūt eļap lōke ilo Nipai. Irooj eaar kōjeram̧m̧an e im lutōkleplep eļap Jetōb eo me eaar kōjeram̧m̧an mour eo an, mour eo an baam̧le eo an, im mour eo an armej ro an. Kōnke Nipai eaar tōl ilo iakwe im jim̧we im kar kakke im oņaake baam̧le eo an im armej ro, eaar je āinwōt in, “Kōm ar mour ilo juon wāween elem̧ōņōņō.”6
N̄a kwaļo̧k ļōmņak ko an kōrā kōn katak in, Iaar kajjitōk ippān leddik ro ruo nejū me emōj aer m̧are n̄an jipan̄ eō. Iaar kajjitōk eļan̄n̄e remaron̄ letok juon ak ruo jeņtōj kōn wāween aer pijaikļo̧k jon̄an an aorōk lōke ilo an jelōt m̧are ko aer im mour an baam̧le ko aer. Erkein rej ļōmņak ko an Lara Harris im Christina Hansen.
Kein kajuon, Lara: “Juon iaan men ko reaorōktata ippa ilo aō jeļā bwe ļeo ippa ilo an jerbal ilo kajjojo raan, ej kōm̧m̧ani kālet ko me rej kwaļo̧k an kautiej im iakwe n̄an eō. N̄e jemaron̄ lōke doon ilo wāween in, ej bōktok aeņōm̧m̧an n̄an kapijuknen ko ad, ijoko jemaron̄ lo m̧ōņōņō ilo ad kōkajiririk baam̧le ko ad ippān doon.
Kiiō ļōmņak eo an Christina: “Lōke juon armej ej āinwōt tōmak ilo juon armej. N̄e ejjeļo̧k lōke im tōmak, ewōr mijak im pere. Ippa, juon iaan kōjeram̧m̧an ko reļļaptata me ej itok jān aō lukkun lōke ļeo ippa ej aeņōm̧m̧an—aeņōm̧m̧ān in ļōmņak ilo aō jeļā ke ej kōm̧m̧ane ta eo ej ba enaaj kōm̧m̧ane. Lōke ej bōktok aeņōm̧m̧an, iakwe, im juon jukjukin pād eo ijo eļapļo̧k iakwe ie.”
Lara im Christina raar jab lo ta ko ro jet raar je. Ekabwilōn̄lōn̄ ippa ke erro jimor raar kile kōjeram̧m̧an eo kōn aeņōm̧m̧an ilo kapijuknen eo ej ejaak jān ļeo pālele eo me kwoj lōke. Āinwōt an waļo̧k ilo waanjon̄ak ko an leddik ro nejū, katak eo kōn lōke ej juon eddo eaorōk n̄an ejaake juon kapijuknen eo ej pedped ioon Kraist.
Iaar barāinwōt m̧ōņōņō bwe ejja manit ko wōt rej pedped ioon Kraist eļapļo̧k ilo juon em̧ eo ijo jema eaar kautiej priesthood eo an im kar lōke aolepān baam̧le eo an kōn wōt “m̧ool ilo būruōn.”7 Ikōņaan kwaļo̧k juon aō en̄jake ke iaar juon jodikdik me ej kwaļo̧k kōn tōprak eo em̧m̧an ejjeļo̧k jem̧ļo̧kin n̄an baam̧le eo an kōn juon baba eo eļap an meļeļe im ej mour kōn katak in lōke eo eaar ejaake kōn m̧ool.
Ke iaar juon laddik jidikdik, jema eaar kajutak juon kambani in kōm̧m̧an kein jerbal ko me rej aotomātik. Pejnej in ej kōmadmōd, kōm̧m̧an, im ejaak kein jerbal ko me rej aotomātik ilo peļaakin laļ in.
Ke iaar middle school, jema eaar kōņaan bwe in ekkatak kilen jerbal. Eaar barāinwōt kōņaan bwe in ekkatak kōn aolep men ko ilo pejnej eo. Jerbal eo aō jinoin ekar kitbuuj aō kōm̧m̧ani meļan ko im unoiki jikin eo ilo mōko bwe ren jab waļo̧k n̄an aolep armej.
Ke iaar delo̧n̄e high school, kar kawanlōn̄ļo̧k eō bwe in jerbal ilowaan bāāktōri eo. Iaar ekkatak kilen riit blueprints im kōm̧m̧ani mijjiin killep in kōm̧m̧an aaen.Ālkin aō kadiwōjļo̧k jān high school, iaar delo̧n̄e university innem etal im mijen. Ke iaar jepļaaktok jān mijen eo aō, iaar kajju bar jerbal. Iaar aikuj kōm̧m̧an jāān n̄an wōneen jikuul n̄an iiō eo tok juon.
Juon raan ejjab to ālkin mijen eo aō, iaar jerbal ilo juon bāāktōri ke jema ej kūri eō n̄an office eo an im ekar kajjitōk eļan̄n̄e ikōņaan etal ippān ilo juon pejnej tūrāāp n̄an Los Angeles. Ejkab juon kōttan an jema kūr eō n̄an etal ippānļo̧k ilo juon pejnej tūrāāp. Eaar kōtļo̧k bwe in etal n̄an looblej n̄an ņa jikin kambani eo.
Mokta jen am̧ro kar etal, eaar kōpooj eō kōn jet meļeļe ko kōn kambani in ekāāl. Kein kajuon, kambani in ej bar pād ilo elōn̄ laļ ko. Kein Karuo, rekar kōkm̧anm̧anļo̧k kein wia ko aer ipeļaakin laļ in kōn kein jerbal aotomātik eo ekāāl tata. Kein kajilu, kambani eo am̧ ejjan̄in kar kōm̧m̧an pepe ippāier kōn jerbal in injineriin̄ ak tekkeņalōji. Im āliktata, rijerbal eo aer eutiej eo ej riwia m̧weik ekar kōm̧m̧ane kweilo̧k in n̄an etale bet ko am ikkijeen būrajāāk in ekāāl. Kweilo̧k in eaar kōm̧m̧an juon iien em̧m̧an im aorōk n̄an kambani eo am̧.
Ālkin am̧ kar tōprakļo̧k ilo Los Angeles, jema im n̄a kom̧ro kar etal n̄an hotel an riutiej eo n̄an kweilo̧k. Kōmeļeļe eo jinoin ej n̄an kōņoņo im etale injineriin̄ tijjain in būrajāāk eo. Unin kōņoņo̧ eo tokālik kōn kilen kōm̧m̧ane, ekitbuuj meļeļe ko rewājepdik im jejjetin raan eo renaaj bōke.Unin kōnono eo āliktata ej pedped wōt ioon wōņeen, ruuļ ko, im jekjek ko repād ie. Ijo eo in ekabwilōn̄lōn̄.
Rijerbal eo eutiej an kambami in eaar kōmeļeļeik kōm bwe wōņeen in emōj watōke edik ilubwiljin ro me emōj kwaļo̧k wōņe ko aer ikkijeen būrajāāk in. Innem kōm eaar bwilōn̄ ke ej ba n̄an kōm kōn wōneen eo kein karuo me edik. Innem eaar kajjitōk ippād eļan̄n̄e jekōņaan bar kōkm̧anm̧anļo̧k wōneen eo im bar leļo̧k. Ekar ba bwe wōņeen eo am̧ ekāāl ej aikuj epaake ļo̧k wōņeen eo kein karuo eo me eļap. Innem eaar kōmeļeļeik bwe kōm naaj kōjjemooje jimattan in jāān eo. Eaar kōmeļeļeik menin ke aolep renaaj wiin. Kambani eo am̧ enaaj wiin kōnke enaaj lōn̄ am tōprak jān kar wōneen eo jinoin kōm kar leļo̧k. Kambani eo an enaaj wiin kōnke rej wia wōt kōn wōņeen ko reddik. Im, aeet, e wiin ilo an bōk wōņeen kōn an kar kōm̧m̧an pepe in em̧m̧an.
Innām eaar letok nōm̧ba in bo̧o̧k in post office eo an ijo kōm maron̄ jilkinļo̧k jāān eo ekar kajjitōke. Ālkin aolep men kein, eaar kalimjōk jema im kajjitōk, “Kōn menin, em̧m̧an ke pepe in?” Eļap aō bwilōn̄, ke jema ej jutak, idik pein, im ba n̄an e ke kōm naaj bar jepļaak tok.
Ālkin am̧ kar etal jān kweilo̧k eo, kōm kar pād ilowaan wa eo, im jema eaar reitok im kajjitōkin eō, “Ekwe, ta eo jej aikuj kōm̧m̧ane?”
Iaar uwaak im ba jejjab aikuj errā ippān kajjitōk in.
Jema eaar kajjitōk, “kwoj ke ļōmņak ke ewōr juon ad eddo n̄an kōm̧m̧an bwe rijerbal ro ad ren dāpij wōt aer m̧ool ilo jerbal?”
Ke iaar kajeon̄ in meļeļe kajjitōk eo an im mokta jān aō kar uwaak, eaar uwaake make kajjitōk eo an. Eaar ba, “Ron̄jake, Rick, n̄e ko po ilo ko̧o̧t ak kajekdoon m̧ool eo ippam, elukuun pen bwe kwon bar karool tok. Jab kōm̧m̧ane, jab n̄an jidik.”
Unin aō kwaļo̧k en̄jake in ej meļeļein bwe iaar jab meļo̧kļo̧k ta eo jema eaar katakin eō ilo pejnej tūrāāp eo aō jinoin ippān. Ij kwaļo̧k en̄jake in n̄an kwaļo̧k im̧we in ejjeļo̧k jem̧ļo̧kin me ewōr ippād āinwōt jet baba ro. Komaron̄ pijaikļo̧k lōke eo ippa kōn jema kōn wōt an m̧ool ilo būruōn. Eaar mour kōn ejja katak kein wōt ilo ittino ippān eo jinō, ajri ro nejin, im aolep ro me rej iiaio ippān.
Em̧m̧aan raņ, ej aō jar ilo jotenin bwe jen aolep moktata likūt ad lōke ilo Irooj, āinwōt an Nipai kar kwaļo̧k, innem kōn m̧ool ilo bōro ko ej bōk lōke eo an Irooj, barāinwōt lōke an kōrā ro pāleed im ajri ro. Ilo ad meļeļe im mour kōn katak in ekwojarjar eo ej ejaak kōn m̧ool, jenaaj m̧ool n̄an bujen ko ad rekwojarjar. Jenaaj jeram̧m̧an ilo ad tōl baam̧le ko ad kōn iakwe im jim̧we, kakke aikuj ko, im oņaake baam̧le ko ad jān nana ko an laļ in. Kōn m̧ool kein ij lukkun kam̧ool ilo etan Jisōs Kraist, amen.