Kōn Karōk eo Ekwojarjar
Pein Irooj ej tōl eok. Kōn “karōk eo ekwojarjar,” E jeļā kōn aolep men ilo mour ko ad barāinwōt apan̄ ko ad reļļap.
Ro jeiū im jatū, ilo aō jutak ijin ilo iien in eim̧we an kweilo̧k eo eļap ipeļaakin laļ in im en̄jake kajoor eo ami im ami jetōb, ijjab maron̄ dāpij aō ļōmņaki naan ko an Rijilōk Piter: “[Irooj], em̧m̧an ad pād ijin.”1
Ejjab lukkuun jejjet in naan eo an Alma me eaar ba ālkin an kar kwaļo̧k n̄an armej in Ammōnaia. Alma eaar etal jān jikin eo kōn wōt jerawiwi ko an armej ro. Ejjab to juon enjeļ eaar waļo̧k n̄an Alma im kūr i bwe en “ro̧o̧l n̄an jikin kweilo̧k Ammōnaia, im bar kwaļo̧k naan n̄an armej ro ilo jikin en.”2
Alma eaar kajju “kakaiururļo̧k” delo̧n̄e “jikin kweilo̧k eo ilo bar juon iaļ.”3
“Im ke eaar deļo̧n̄e jikin kweilo̧k eo eaar juon rikwōle, im eba n̄an juon em̧m̧aan: Kwōn leļo̧k ke n̄an juon rittā karejeran Anij kijen n̄an m̧ōn̄ā?
“Im ļeo eaar ba n̄an e: n̄aij juon riNipai, im i jeļā bwe kwōj rikanaan ekwōjarjar an Anij, bwe kwe loe enjeļ eo eaar ba ilo visōn eo: Kwōnaaj bōk e.”4
Em̧m̧aan in kar etan Amulek.
Kiiō, Alma ekar ke jide bwe en ioon Amulek? Ejjab, ekar jab jide bwe en etal n̄an jikin kweilo̧k eo me enaaj tōl e n̄an juon em̧m̧aan eo eniknik eo me enaaj erom eo mōttan ilo mijen eo an.
Elder Neal A. Maxwell eaar kōmeļeļeik: “Ejjeļo̧k iaad ej kawōrtokjen jipan̄ anro mōttad me rej pād ilo doulul in jem̧jerā in ad. Kwe im n̄a jemaron̄ likūt jem̧jerā kein bwe rej ‘jide.’ Naan in jemeļeļe n̄e armej rej kōjerbale, ak jide ejjab juon naan ejjejet n̄an kōmeļeļeik jerbal ko an Anij eo ekajoor potata. Ejjab kōm̧m̧ani men ko ilo ‘jide’ ak …ej kōn ‘karōk eo ekwojarjar.’”5
Mour ko ad rej āinwōt juon jōkab, im Irooj ej kōm̧akūt kōj jān juon jikin n̄an bar juon jikin—eļan̄n̄e jej ron̄jake unoojdikdik ko an jetōb. Reilikļo̧k, jemaron̄ loe An jipan̄ ilo mour ko ad.
Jemaron̄ loe kain jipan̄ rōt in jān lan̄ ke Nipai ej jepļaak ļo̧k in bōk pileej ko jān Leban. “Im Jetōb eaar tōl eō, jab jeļā m̧okta men ko [me En] kar kōm̧m̧ani.”6 Ekar jab to Leban eaar pād im̧aan mejān im eaar lukkuun kadek im Nipai eaar m̧an e, bōki pileij ko, im ko n̄an ippān ļōmaro jein. Ekar ke jide bwe en loe an Leban rot eo? Ak ekar ke jān “karōk eo ekwojarjar”?
Makūtkūt ko raorōk repād ilo gospel in im ilo Kabun̄ in me ej kōlapļo̧k aelōn̄ in kiin̄ eo an Anij ioon laļ in. Rejjab jide ak rej jān karōk eo an Anij. Eo eaar kōm̧anm̧an laļ in emaron̄ kōm̧m̧an bwe lo̧jet en lur kōn naan ko An, im emaron̄ tōl jim̧or Alma im Amulek, im Nipai im Leban bwe ren pād ilo iien eo ejjejet.
Āinwōt ļo̧k, makūtkūt im iiaio ko rej bōk jikier ilo mour ko ad kajjojo me ej kōļapļo̧k jerbal eo an Anij ioon laļ in.
Elder Joseph B. Wirthlin ejitōn bōro eaar kōnono ilo juon iien eaorōk ke Būreejtōn Thomas S. Monson eaar ba n̄an e: “Ewōr juon pein tōl eo an ilōn̄inļo̧k aolep men otemjej. Ekkā n̄e men ko rej bōk jikier, ejjab kōn jide. Juon raan, n̄e jej reilikļo̧k ta ko jej watōke bwe rej jide ilo mour ko ad, jenaaj kile bwe bolen rejjab jide men ko.”7
Ekkā, jerbal ko ad rem̧m̧an jet wōt rejeļā kake. Jerbal ko rem̧m̧an rej, ijoke, emōj rekooti ilo lan̄. Juon raan, jenaaj jutak āinwōt rikam̧ool kōn mour in wūjlepļok ko ad n̄an jebal ko an ro riweppāņ. Ejjeļo̧k mālijjon̄ ak jorrāān remaron̄ kakkure karōk in m̧ōņōņō eo. Ilo m̧ool, kōn “karōk eo ekwojarjar,” “lan̄lōn̄ ej itok n̄e e jibbon̄.”8 “Iaar itok n̄an laļ in n̄an kōm̧m̧an ankilaan Jema,”9 Jisōs eaar katakin. Ro jeiū im jatū rejitōn bōro, jej barāinwōt kōm̧m̧an ankilaan Jemān.
Jān en̄jake ko iaar iooni ilo mour eo aō make, ijeļā bwe Irooj enaaj kamakūt kōj eiten āinwōt jōkab n̄an kōm̧m̧ane jerbal eo An. Ta eo jej watōke bwe ej jide, ilo m̧ool, rej itok jān Jemedwōj Ilan̄, eo emaron̄ bwini kooļan bōrami otemjeļo̧k.10 Juon sparrow ejāmin wōtļo̧k ioon bwidej im Jemami e jab lale.11 Im̧we an Irooj ej pād ilo aolep mour ko ad, im iien ko rej waļo̧k ilo jab kōtmāni rej n̄an kōpooj kōj n̄an ļōn̄aj baam̧le ko ad im ro jet ilo ad kalōk aelōn̄ in kiin̄ eo an Anij ioon laļ in. Keememej, ke Irooj ej ba n̄an Ebream, “I jeļā jem̧ļo̧kin eo jān jinoin; kōn menin Peiū enaaj pād ioom.”12
Irooj eaar likūt eō ilo juon baam̧le ippān ro jinō im jema ro rej iakwe. Ekkar n̄an jon̄ak ko an laļ in, raar jet armej ro rem̧m̧an, jema eo, eaar juon eo em̧m̧aan ewūjļepļo̧k, ekar juon ri kattōr wa killep, jinō eo ejouj, eaar pād wōt ilo m̧weo im kōm̧m̧ani eddo ko an. Irooj eaar jipan̄ eō bwe in lo kōrā in pāleō ejitōn bōro, Melanie; E eaar im̧we juon pejnejmāān, eo ekar erom eo mōttan ejitōn bōro, n̄an letok aō iaļan jerbal. Irooj eaar kūr eō bwe in etal im mijen, jim̧or āinwōt juon ļaddik em̧m̧an dettan im āinwōt juon mijen būreejtōn; Eaar kūr eō n̄an Doulul eo an Jiljilimjuonn̄oul; im kiiō Eaar kūr eō āinwōt juon Rijilōk. Ilo aō reiliļo̧k, ij kile ke iaar jab karōki men kein aolep; Irooj eaar karōki, āinwōt An karōki aolep men ko raorōk n̄an kwe im n̄an ro kwoj iakwe er.
Ta eo kwoj aikuj reim̧aanļo̧k kake ilo mour eo am? Ta menin bwilōn̄ ko an Anij me ej kakeememej kwe bwe Epaake eok, im ej ba, “N̄a e ije”? Ļōmņak kōn tōre ko, jet iien aolep raan, me Irooj eaar jipan̄ eok ilo mour eo am—innām bar jipan̄ eok juon alen. Karōki iien kaņe āinwōt jet tōre ko Irooj eaar kwaļo̧k an lōke ilo kwe im ilo kālet ko am. Ak kōtļo̧k bwe En kōm̧m̧an eļapļo̧k jān am maron̄ kōm̧m̧ani ippam make. Kaorōki jipan̄ ko An. Jet iien jej ļōmņak kōn okoktak in karōk ko ad āinwōt likjab in karōk ilo mour ko ad. Ļōmņak kaki āinwōt jet bun̄tōn̄ ko jinoin n̄an pād “ilo ijjilōk an Irooj.”13
Jet allōn̄ ko remootļo̧k leddik ro jibūm ro raar kobaļo̧k ilo juon doulul an jodikdik n̄an alooji jet jikin ko me repād bwebwenatoon Kabun̄ in ie. Iaļ in em̧m̧akūtkūt eo an eaar kwaļo̧k bwe enaaj ellā jān juon bukwōn jidikdik ijo ļaddik eo jein, ļaddik eo jibum, ej jerbal in mijenede ie. Leddik eo jibūm eaar ejjeļo̧k an kōņaan lo ļaddik eo jein ilo mijen eo an. Ijoke, ke baj eo eaar delo̧n̄e ļo̧k bukwōn eo ijo ļaddik eo ej jerbal ie, raar lo ruo mijenede rej etetal laļļo̧k ilo iaļ eo. Juon iaer eaar ļaddik eo jein.
Aolep ro ilo baj eo raar errā ke jodikdik ro raar kajjitōk ippān ri kattōr eo bwe en jeer bwe leddik eo en iakweiki ļaddik eo jein. Ejjab to jān juon minit, ālkin dān in kōmjaļaaļ im naan ko rejouj, ļaddik eo jein eaar bar jepļaak ilo iaļ eo an n̄an kadedeikļo̧k eddo ko an āinwōt juon mijenede. Tokālik jaar ekkatak bwe ļaddik eo jein eaar pād ilo iaļ eo epaak ļalem minit, in an etetal ļo̧k jān jikin an katak n̄an wa eo waan.
Jemedwōj Ilan̄ emaron̄ likūt kōj ilo jekjek ko kōn jet un ko raorōk. Emōj an kōm̧m̧ane ilo mour eo aō, im Enaaj kōm̧m̧ane ilo mour ko ami, āinwōt An kar kōm̧m̧ane ilo mour ko an ajri ro jibūm̧ rejitōn bōro.
Kajjojo iaad jaorōk im jejitōn bōro ippān Irooj, eo ej kea, eo ej unoojdikdik, im ej lale kōj ilo wāween ko rej make wōt n̄an kōj kajjojo. E eo ejjeļo̧k jem̧ļo̧kin an mālōtlōt im lukkuun kajoor jān em̧m̧an im kōrā ro ilo mour in. Ejeļā kōn apan̄ ko ad, ad kajoor, im ikdelel ko ad reerreo ilo buruōd.
Juon jimma iiō emootļo̧k, ke ij etetal laļļo̧k ilo Temple Square, juon iaan sister ro ej itok ippa im kajjitōk, “Kwokemeemej ke n̄a? N̄a ij itok jān Florida.” Eaar kwaļo̧k etan, Sister Aida Chilan. Aaet, iaar keememej aō kar ioon e im baam̧le eo an. Stake būreejtōn eo an eaar kajjitōk bwe kōm en loļo̧k baam̧le eo an. Eaar alikkar ke kōm kar loļo̧k er kōn leddik eo nejier Aida, eo ejjan̄in kar peptaij. Ālkin loļo̧k eo am, im elōn̄ļo̧k jān juon iiō in kar katakin e im mōttāiki, Aida eaar peptaij.
Ālkin am kar bwebwenato ilo Temple Square, ekar je juon leta. Eaar ba: “Ijeļā kōn aolepān buruō bwe Jemedwōj Ilan̄ ejeļā kōj kajjojo im Enaaj wōnm̧aanļo̧k wōt im likūt kōj ilo iaļ ko ad kajjojo kōn juon un. Kom̧m̧ool kōn am̧ kar juon iaan mijenede ro aō, pukot eō im lotok eō ļalem iiō rem̧ootļo̧k.”14 Aida eaar barāinwōt jilkintok bwebwenato in an kar oktaktok im kwaļo̧k kōn “jide ko rekwojarjar” ko me emōj bōk jikier ilo mour eo an me eaar tōl e n̄an peptaij im kapen, mijen ilo Temple Square, im mare eo kiiō ilo tampeļ.15
Eaar ke jide bwe stake būreejtōn eo en tōl kōj n̄an m̧weo imōn Chilan ak bwe e im n̄a komro en kar ioon doon ilo Temple Square? Naan in kam̧ool eo an Aida ej kwaļo̧k bwe men in eaar mōttan “karōk eo ekwojarjar” an Anij.
Irooj em̧ōņōņō in pād ippād. Ejjab jide bwe n̄e kwoj en̄jake Jetōb eo An im kōm̧m̧ani ekkar n̄an im̧we ko am jinoin am en̄jake ilo An kallim̧ur: “Inaaj etal im̧aanļo̧k in mājāmi. Inaaj pād ianbwijmaron̄imi im ianmiin̄imi, im Aō jetōb enaaj pād ibūruōmi, im enjeļ ro Aō ipeļaakimi, n̄an kotak kom̧.”16
Kōj aolep elōn̄ men ko reāinļo̧k juon rej waļo̧k ilo mour ko ad. Jemaron̄ ioon jet armej ro me emōj ad kar lo er, kōkāāl jem̧jerā ko ad, ak lo ad juon wōt ippān ruwamājet. N̄e men kein rej bōk jikier, bolen Irooj ej kakeememej kōj bwe kōj jej lukkuun jemjen jemjetā ro. Jej bōk koņaad ilo juon wōt jerbal—eo Josep Smith eaar ņa etan “jerbal eo an Kraist.”17
Kiiō, Ia eo ejjejet n̄an anem̧kwoj in kālet ilo “karōk eo ekwojarjar”? Ewōr ad kālet n̄an ļoor ak n̄an jab ļoor Rilo̧mo̧o̧r im Ritōl ro An emōj an kālet er. Jekjek in ealikkar ilo Bok in Mormon ke RiNipai ro raar oktakļo̧k jān Irooj. Mormon eaar būrom̧ōj:
“Im raar lo … bwe Jetōb eo an Irooj eaar jab oņaakeļo̧k wōt er; aaet, eaar jenlikļo̧k jān er kōnke Jetōb eo an Irooj ej jab jokwe ilo tampeļ ko rejjab kwōjarjar—
“Kōn menin, Irooj eaar bōjrak n̄an oņaake er kōn an kajoor ekabwilōn̄lōn̄ im ejeņoļo̧k, bwe raar wōtļo̧k ilo juon jekjek in jab tōmak im jero̧wiwi enana.”18
Ejjab aolep men ko Irooj ej kajjitōk ippād ej juon tōprak in bwe jekajoor, ewi jon̄an ad niknik, ak ta eo me jemaron̄ jeļā. Ļōmņak kōn Saul, eo Irooj eaar kōbōjrake ilo iaļ eo an n̄an Damascus. Eaar etetal ilo iaļ eo ebōd ilo mour eo an, im ejjeļo̧k an jabdewōt jeļā kōn ean̄ im rak. Saul kar bar tōl e kōn tōl eo ekwojarjar. Ke kar jeļā kajjien tokālik āinwōt Paul, iien kwaļo̧k eo an āinwōt juon rijilōk eaar kwaļo̧k ta eo Irooj eaar jeļā kadede bwe eaar maron̄ kōm̧m̧ane im erom, ejjab ta eo eaar karōke bwe en kōm̧m̧ane āinwōt kar Saul. Ilo ejja wāween in wōt, Irooj ejeļā ta eo kōj kajjojo jemaron̄ kōm̧m̧ane im erom. Ta eo Rijilōk Paul eaar katakin kōj kake? “Im jej jeļā bwe men otemjej rej jim̧or jerbale em̧m̧an n̄an ro rej yokwe Anij, n̄an ro Ear kūr ekkar n̄an An pepe.”19
N̄e jej erreo, ikdelel, im maron̄, n̄e jej kajjieon̄ bwe jen wānōk im karbōb, jej wōnm̧aanļo̧k n̄an jikin ko me jaar jab kōtmāne im erom mōttan “karōk eo ekwojarjar” an Jemedwōj Ilan̄. Kōj kajjojo ewōr kwojarjar ilo kōj. N̄e jej loe jerbal an Anij ilo kōj, jen peran, barāinwōt kam̧oolol kōn tōl eo an. Ke Jemād Ilan̄ eaar ba, “En̄in ej jerbal eo Aō im aiboojoj eo Aō—n̄an kakūrm̧o̧ol jab wabanban im mour indeeo an armej,”20 Ej kōnnaan kōn aolep kōj ajri ro Nejin—ej kom̧.
Pein Irooj ej tōl eok. Kōn “karōk eo ekwojarjar,” E jeļā kōn aolep men ilo mour ko ad barāinwōt apan̄ ko ad reļļap. Āinwōt an ba ilo Jabōn Kōnnaan, “Lōke Irooj kōn aolepen buruōm; … innām Enaaj ba kajjjien iaļ ko am̧.”21 Ij kam̧ool bwe Enaaj kōjeram̧m̧an eok, rejtake eok, im bōktok aeņōm̧m̧an n̄an eok. Ilo etan Jisōs Kraist, amen.