Jeno̧lo̧k, bōtaab Juon Wōt

Ilo Juun in 1994 eo, iaar laudin̄din̄ in ettōrļo̧k n̄an m̧weo jān jerbal n̄an alooj ilo TV kumi in ikkure soccer eo an laļ eo am ikkure ilo World Cup eo. Ejjab to ālkin aō kar em̧m̧akūt, iaar lo jān ettoļo̧k ilo sidewalk eo juon em̧m̧aan eaar m̧ōkaj an ilo̧k ilo juon wiiljea, me iaar kūle eaar inōknōk kōn būļāāk eo an armej in Brazil. Innām iaar jeļā eaar barāinwōt ro̧o̧l n̄an m̧weo im̧ōn n̄an alooje ikkur eo!

Ke kōm kar epaak doon im kōm kar kalimjōk doon, ium̧win jidik wōt iien, ekar kajoor aō en̄jake koba ippān em̧m̧aan jab in. Iaļ ko am raar etal jeļmen doon, kar jab jeļā kajien doon, im kar kanooj oktak jekjek in iaio im paotokim, bōtaab itok limo eo am n̄an soccer eaar juon wōt im iakwe eo am n̄an laļ eo am eaar kōm̧m̧an bwe kōmin en̄jake juon wōt ilo iien eo wōt! Ijjan̄in kar lo em̧m̧aan jab in jān tōre eo, bōtaab rainin, n̄oul iiō ko tok ālik, imaron̄ in wōt lo māj ko im en̄jake ekkejel eo ekajoor ippān em̧m̧aan jab eo. Ālkin men otemjej, kōm kar wiini ikkur eo im World Cup eo ilo iiō jab eo!

Ilo Kabun̄ in, ilo kōjekdo̧o̧n oktak ko ad, Irooj ej kōtmene kōj bwe jān juon wōt! Eaar ba ilo Katak im Bujen ko, “Kom̧in juon; im eļan̄n̄e kom̧ij jab juon kom̧ij jab Aō.”¹

Ilo ad aolep deļo̧n̄e juon im̧ōn jar n̄an kabun̄jar āinwōt juon kumi, jej aikuj door itulik oktak ko ad, ekoba armej in ia, piktok in iaio, ta bade ko ad, im tōprak ko ad ilo jikin jeļāļo̧kjeņ im jerbal, im ijello̧kin kalimjōk wōt jibadbad ko ad reier wōt juon ilo jetōb. Ippān doon jej al al ko, kejekļo̧kjeņ kōn ejja bujen ko wōt ilo iien kwojkwoj eo, im ba ippān doon ilo juon ainikien “amen” ālkin kōnono ko, katak ko, im jar ko—meļeļe in bwe jej koba ippān doon ilo errā kōn ta eo kar kwaļo̧ke.

Men kein me jej kōm̧m̧an ippān doon ej jipan̄ ejaake juon piktok in juon wōt ekajoor ilowaan jarlepju eo.

Mekarta, ta eo ekanooj in kije, dim, ak kakkure ippān doon eo ad ej ekōjkan ad m̧akūtkūt n̄e jej jeno̧lo̧k jān membōr ro m̧ōttad ilo Kabun̄ in. Āinwōt ad aolep jeļā, ej kōtmene im ekkā bwe āliktata jenaaj kōnono kōn doon.

Pedped ioon ta eo jej kālet n̄an ba kōn ro jet, naan ko ad renaaj jim̧or kōm̧m̧an bwe “burueer ren kuk ippān doon ilo bōrokuk,”² āinwōt an Alma kar katakin ro eaar peptaiji er ilo Dān in Mormon, ak renaaj makunļo̧k ilo kakkure iakwe, lōke, im jouj eo me aikuj in kar waļo̧k ibwilijid.

Ewōr ekōnono ko me rej kakkure ippān doon, āinwōt “Aaet, e ej juon bisop em̧m̧an; oh, bōtaab kwoj aikuj kar loe ke eaar juon likao!”

Jekjek eo eļapļo̧k an jipan̄ an menin emaron̄ in kar āindein “Bisop eo ekanooj em̧m̧an, im em̧ōj an lukkuun eddōkļo̧k ilo kekemo̧o̧j im māletlet ium̧win iiō ko.”

Jet iien emakijkij ad likūt jon̄ak ko ioon armej ilo ba āinwōt in “Būreejtōn eo ad ilo Doulul eo an Kōrā ro eban oktak, kōnke ekanooj in kididep!” Ilo keidi, jemaron̄ ba, “Būreejtōn eo an Doulul eo an Kōrā ro edikļo̧k an wōr an iien, bōlen ej dibuk jet iien ko reppen. Jen jipan̄ e im rejtake e!”

Ro jeiū im jatū, ejjeļo̧k ad jim̧we n̄an kwaļo̧k jekjek in juon armej, ekoba jān membōr in Kabun̄ ro m̧ōttad, āinwōt juon eo ejjab maron̄ eddōkļo̧k im em̧m̧anļo̧k! Ijello̧kin, naan ko ad kōn armej ro m̧ōttad rej aikuj kwaļo̧k tōmak eo ad ilo Jisōs Kraist, im Pinmuur eo An im bwe, ilo E im kōn E, jemaron̄ iien otemjej oktak n̄an em̧m̧anļo̧k!

Jet rej jino kōrraat im jino jepeļļo̧k jān ritōl ro im membōr ro an Kabun̄ in kōn men ko me rekanooj likjab.

Āinwōt kar ilo jekjek eo an juon em̧m̧aan ņa etan Simonds Ryder, eo eaar erom juon membōr in Kabun̄ in ilo 1831 eo. Ālkin riiti juon revelesōn me kar iookļo̧k e, eaar tarpok n̄an lo bwe etan eaar bōd jipeeļe Rider, kōn leta eo i ijjelo̧kin leta eo y. Piktok eo an n̄an iien eo ekar kōjbar kajjitōkin rikanaan eo im āliktata kar tōlļo̧k n̄an liakeļo̧k Joseph im eļļo̧k jān Kabun̄ in.³

Emaron̄ in barāinwōt bwe jenaaj aolep ioon jet kajim̧we jān ritōl ro ad ilo kabun̄, eo enaaj juon idajon̄jon̄ eo kōn ewi jon̄an ippān doon eo ad ippāer.

Iaar 11 wōt iiō detta, bōtaab ij keememej bwe 44 iiō ko remootļo̧k, im̧ōnjar eo ijo baam̧le eo aō eaar etal n̄an jar eaar kanooj ļap ijo kar kōkāāle. M̧okta jān kar an jerbal in kōkāāl eo kar ijjino, eaar wōr juon kweilo̧k me ritōl ro ijo kar jokwe ie im eria eo kar ekōnono kōn ekōjkan an membōr ro naaj bōk kuņaer ilo jekjek eo. Jema, eo eaar im̧aanļo̧k kar tōl iunit eo ium̧win iiō ko, kar kwaļo̧k ļōmņak eo an ekajoor bwe jerbal in aikuj in kōm̧m̧an jān juon koontōraak im ejjab jān armej bajjōk.

Ļōmņak eo an eaar jab wōt bōke, bōtaab kōm kar ron̄ bwe eaar kanooj im ilo lo̧bwilej kowaane ilo iien jab eo. Kiiō, kar em̧m̧aan eo me eaar wujlepļo̧k n̄an Kabun̄ in im eaar juon kar ritariņae in Pata eo an Laļ in II ilo Europe, kijon̄ jum̧ae im tariņae kōn ta eo eaar tōmak ie! Juon eaar ļōmņak ta enaaj kar uwaak eo an ālkin jekjek in. Enaaj ke wōt dim kōn ļōmņak eo an im wōnm̧aanļo̧k n̄an jum̧ae jokālet eo em̧ōj kadede kar kōm̧m̧ane?

Em̧ōj am kar lo baam̧le ko ilo ward eo am me raar m̧ōjņo̧ļo̧k ilo gospel eo im kar bōjrak aer itok n̄an kweilo̧k ko kōnke raar jab maron̄ erom juon wōt ippān ro me raar tōl. N̄a make kar barāinwōt kam̧ool elōn̄ iaan ro m̧ōtta jān Būraimere eo kar jab pād wōt ilo tiljek ilo tōre in jodikdik eo aer kōnke ro jinier im jemeer raar iien otemjej kappukōt bōd ippān membōr ro an Kabun̄ in.

Jema, mekarta, kar jokālet n̄an pād ilo juon wōt ippān Rikwojarjar ro m̧ōttam̧. Jet raan tokālik, ke ward membōr ro raar aiin doon n̄an jipan̄ ilo ekkal eo, eaar “karuwaineneik” baam̧le eo am n̄an ļoor e n̄an im̧ōnjar eo ijo kōm kar wujlepļo̧k kōm make n̄an jipan̄ ilo jabdewōt wāween.

Iaar kanooj illu. Imaron̄ in kar en̄jake aō kōņaan kajjitōk ippān, “Baba, etke ilo jabdewōt jekjek jej etal n̄an jipan̄ ilo ekkal eo eļan̄n̄e kwar jum̧ae an membōr ro kōm̧m̧ane men eo?” Bōtaab paotok in turin mejān eaar kabbwer eō jān kōm̧m̧an men jab in. Iaar kōņaan ineem̧m̧an n̄an iien bar aje eo. Kōn menin, ejeram̧m̧an, iaar jokālet n̄an ikōn̄ wōt im ilo̧k im jipan̄ ilo ekkal eo!

Jema eaar jab maron̄ lo an kar dedeļo̧k im̧ōn jar eo ekāāl, ke eaar mej m̧okta jān jem̧ļo̧k eo an jerbal in. Bōtaab kōm ilo baam̧le eo, tōl jān jinō, kar etal wōt ilo kōm̧m̧ane ijo kuņaam̧ m̧ae iien eaar dedeļo̧k, im ekar dāpij kōm ippān doon ippān baba, ippān membōr ro ilo Kabun̄ in, ippān ritōl ro am, im, eo aorōk tata, ippān Irooj!

M̧okta wōt jān iien eo im en̄jake ko An rekōmmetak ilo Gethsemane, ke Jisōs eaar jar n̄an Jemen kōn Rijilōk ro An im aolepād wōj Armej ro Rekwojarjar, Eaa ba, “Bwe er otemjej ren juon , āinwōt Kwe, Jema ilo N̄a, im N̄a ilo Kwe.”⁴

Ro jeiū im jatū, Ij kam̧ool bwe ilo ad jokālet n̄an erom juon wōt ippān membōr ro im ritōl ro an Kabun̄ in—jim̧or n̄e jej kuk ippān doon im eļapļo̧k n̄e jej jeno̧lo̧k—jenaaj barāinwōt en̄jake eļapļo̧k ippān doon eo eweppān ippān Jemedwōj Ilan̄ im Rilo̧mo̧o̧r eo. Ilo etan Jisōs Kraist, amen.