Mooļ ko Raorōk—Emenin Aikuj n̄an Mour Kaki
Visōn eo Kein Kajuon im Rikanaan Josep Smith raar bōktok jeļāļo̧kjeņ im m̧ool ko me raorōk n̄an m̧ōņōņō eo ad ilo mour in im n̄an ad mour ijo ilōn̄tata ilo aiboojoj an Anij.
Ke ej jiljilimjuon aō iiō, iaar kajjitōkin jinō, “N̄e kwe im n̄a kōjro mej im etal n̄an lan̄, enaaj ke jinō wōt kwe?” Eaar jab kōtmāne juon kajjitōk rōt in. Ak uwaak eo n̄an jon̄an jeļā eo an, eaar ba, “Jaab, ilo lan̄ jenaaj jeim jen jeim jati. Eban jinōm n̄a.” Ekar jab juon uwaak eo iaar kōjatdikdik kake.
Jet iien jān iien eo kōmro kar kōņoņo, ruo likao rej tōpar tok oror in m̧weo imōm. Ekar juon menin kabwilōn̄lōn̄, ke jema ej kadelo̧n̄ tok er. Raar ba bwe rej jet mijinede jān Kabun̄ eo an Jisōs Kraist im Armej ro Rekwojarjar ilo Raan-ko Āliktata.
Ilo am̧ kar ekkatak n̄an kūr etan elder rein, rekar jino katakin baam̧le eo am̧. Ilukkuun keememej en̄jake ko aō kōn m̧ōņōņō im itok limo eo aolep iien n̄e rej itok n̄an m̧weo. Raar ba n̄an kōm bwe juon ļaddik jidikdik eo ekar etal n̄an bulōn wōjke ko n̄an kajjitōk ippān Anij ewi wōt kabun̄ eo em̧ool im eaar lo Anij im Jisōs Kraist.1 Elder rein raar kwaļo̧k pijaan visōn eo, im ke ij loe, iaar jeļā bwe Josep Smith ilo m̧ool eaar lo Anij Jemen im Jisōs Kraist. Mijinede ro raar ba bwe kōn vison in, Kabun̄ eo an Jisōs Kraist eo em̧ool emōj bar kōjepļaaktok n̄an laļ in.2
Mijinede ro raar barāinwōt katakin kōm kōn karōk eo ekam̧ōņōņō an Anij im eaar uwaake kajjitōk ko an baam̧le eo aō ikkijeen kabun̄. Raar katakin kōm bwe baam̧le ilo m̧ool renaaj bar mour ippān doon ālkin mour in āinwōt jet baba, mama, im ro nejier kōrā im m̧aan jimor.
Baam̧le eo am̧ eaar peptaij. Iaļ eo n̄an ukōt iminene ko am̧, kōjekdoon manit ko, im erom juon eo uwaan Kabun̄ in me ekajoor raar jet iien ko reppen. Ak kōn tiriam̧o̧ im iakwe eo an Anij im kōn jipan̄ eo an elōn̄ ritōl im membōr ro, kōm kar ellā jān iiō ko jinoin me reppen.
Milien armej ro me emōj aer delo̧n̄e tok Kabun̄ in, barāinwōt elōn̄ ro me rej oktak im peptaij kajjojo wiik, ewōr aer naan in kam̧ool kōn Visōn eo Kein Kajuon. Jetōb Kwojarjar emaron̄ ālij kam̧ool in elōn̄ kōttan n̄an juon iaad kajjojo ilo ad kajjieon̄ mour kōn m̧ool eo an gospel eo an Jisōs Kraist.
Visōn eo Kein Kajuon im Rikanaan Josep Smith raar bōktok eļapļo̧k jeļāļo̧kjeņ im m̧ool ko me raorōk n̄an m̧ōņōņō eo ad ilo mour in im ilo mour indeeo ippān Anij. Inaaj kwaļo̧k jilu iaan m̧ool ko me emōj ad jeļā im jej aikuj mour kaki kōnke juon ļaddik jidikdik eo eaar bukwelōlō im jar kōn m̧ool ilo buruōn.
Anij ej Kūr Rikanaan ro n̄an Tōl Kōj
Mooļ eo juon eaorōk jej ekkatak jān Visōn eo Kein Kajuon im Rikanaan Josep Smith ej bwe Anij ej kūr rikanaan ro,3 rilolo ro, im ribōk madenļo̧k n̄an katakin, tōl, im kakkōl kōj.4 Em̧m̧aan rein rekwojarjar rej rikōnnaan an Anij ioon laļ in,5 kōn mālim n̄an kōnono im kōm̧m̧an jerbal ilo et eo etan Irooj.6 Ilo ad tiljek im ļoor kapilōk ko aer, naaj oņaake kōj im bōk kōjeraam̧m̧an ko jej kālet i ilo ad mour ioon laļ in.
Ke iaar jikuuļ ilo Brigham Young University ke ij likao eo ejjeļo̧k pāleen im ej kab rool tok jān mijen, Iaar pād ilo m̧wen̄an eo an priesthood ilo juon kweilo̧k eļap ilo Tabernacle ilo Temple Square. Būreejtōn Ezra Taft Benson, ilo tōre eo ekar Būreejtōn eo an Kabun̄ in, eaar kipel aolep ro raar rool tok jān mijen bwe ren ļōmņak kōn m̧are im likūt bwe en kōtōpar eo aer im̧aan tata.7 Ālkin m̧wen̄an in, iaar jeļā ke emōj jiron̄ eō bwe in ukwelo̧k im iaar aikuj ļoor naan in kapilōk eo an rikanaan eo.
Kōn menin, iaar kōm̧m̧an kālet n̄an etal n̄an aelōn̄ eo aō, Brazil, bwe in kappok ippa. Mokta jān aō kar etal n̄an Brazil n̄an joļo̧k ruo allōn̄ in kaminene ilo jerbal, Iaar ko̧o̧l e jinō im jet m̧ōtta ilo taļboon im iaar kōm̧m̧an juon laajrak in etan 10 jiron̄—kajjojo iaer emaron̄ erom kōrā eo pālele.
Ke ij pād ilo Brazil, ālkin elōn̄ iien ko n̄an kejokļo̧kjeņ kake im jar, iaar ioon, bwebwenato ippān, im kālet e, im karōk juon iien m̧areik juon iaan leddik ro ilo laajrak in et ko. Eaar jab juon menin kabwilōn̄lōn̄ ilo tōre ko n̄an rijikuuļ ro ilo Provo, Utah, n̄an bwebwenato im kālet eo m̧ōttad, ak eaar kabwilōn̄lōn̄ im mōkaj kitien n̄an ri Brazil.
Jejjo allōn̄ tokālik, iaar m̧areik Elaine. Ej ri iakwe eo aō im ej juon kōjeraam̧m̧an eo iaar kālet e.
Iaar jab ba bwe aolep rej aikuj kōm̧m̧an ejja laajrak in wōt, ak ij ba bwe—bolen eļapļo̧k jān aō ba—bwe jej aolep kōm̧m̧ane n̄e rikanaan eo ad emour ej kapilōk kōj.
Rikanaan eo an Anij rainin ej Būreejtōn Thomas S. Monson, im jenaaj jeraam̧m̧an ilo ad ron̄jake kapilōk ko an ilo jejjet.
Jeļā eo im Kadkad eo Em̧ool an Anij
Bar juon m̧ool jej ekkatak kōn wōt Visōn eo Kein Kajuon im Rikanaan Josep Smith ej juon kadkad eo em̧ool an Anij. Baj ļōmņak mōk jon̄an ad jeraam̧m̧an ilo ad jeļā bwe Anij ewōr ānbwinnin kanniōk im di ko āinwōt ānbwinnin armej,8 bwe jemaron̄ kabun̄ jar n̄an juon Anij eo em̧ool, eo jemaron̄ meļeļe kake, im eo emōj an kwaļo̧k E make im Eo Nejin n̄an Rikanaan ro An—jimor rikanaan ro m̧okta im rikanaan ro ilo raan kein āliktata.9 E ej juon Anij eo ej ron̄ kūr ko im uwaak jar ko ad;10 juon Anij eo ej lale kōj jān ijo etoļo̧k11 im iien otemjej ej lōmņak kōn aikuj ko ad ilo jetōb im ilo kanniōk; juon Anij eo ej letok anemkwoj in kālet n̄an kōj make n̄an ļoor E im pokake kien ko An ilo ejjeļo̧k kabbōjrak;12 juon Anij eo ej letok kōjeram̧m̧an ko n̄an kōj im kōtļo̧k bwe jen jelm̧ae kapo bwe jen maron̄ eddōkļo̧k im erom āinwōt E.
Ej juon Anij eo eļap iakwe ippān eo eaar kōpooj juon karōk eo me jemaron̄ lo m̧ōņōņō ilo mour in im ilo mour indeeo.
Jisōs Kraist ej Ad Rilo̧mo̧o̧r
Jān Visōn eo Kein Kajuon im Rikanaan Josep Smith, jaar bōk juon jeļāļo̧kjeņ kōn lukkuun m̧ool im kwojarjar in mijen eo an Jisōs Kraist, eo ej dōkā in jabōn em̧ an kabun̄ in ad.
Kōnke mej eaar bōk jikin ilo laļ in, im ilo ad mour rainin, jenaaj aolep mej juon raan. Juon iaan men ko jenaaj luuji ilo iien mej ej ānbwin ko ad; jejjab maron̄ kōm̧m̧an jabdewōt men n̄an bar bōke. N̄an kakobaba, kōnke jej aolep jerawiwi ilo mour ko ad ioon laļ in, jejjab maron̄ jepļaak n̄an imaan mejān Jemedwōj Ilan̄.
Komaron̄ ke ļōmņak kōn ta ko renaaj waļo̧k n̄e kwojjab maron̄ pād imaan mejān Anij im kwojjamin bar bōk juon ānbwin?
Emenin aikuj bwe en wōr Rilo̧mo̧o̧r im Ripinmuur n̄an kōroļo̧k kōj jān mej im jerawiwi. Ium̧win tōl eo an Jemedwōj Ilan̄, Jisōs Kraist eaar itok n̄an laļin, en̄taan, mej ioon debwāāl, im ekar jerkakbeje bwe jen maron̄ bar jerkakbeje im, kōn ukwelo̧k em̧ool im kōm̧m̧an im kōjparok bujen ko rekwojarjar, jenaaj bar juon alen pād imaan mejen Anij.
Jekab eaar kōmeļeļeiki, “O ewi jon̄an em̧m̧an eo an ad Anij, eo Eaar Kōpooj juon iaļ n̄an ad rōļo̧k jān lokjak eo an eakeak naan in; aeet, eakeak in, “mej im hell, eo ij ņa etan mej in ānbwin, im barāinwōt mej in jetōb.”13
Jisōs ej Messaia eo kar kallim̧ur kake, rileļo̧k kien, Eo Ekwōjarjar in Israel, ad Irooj, ad Rilo̧mo̧o̧r, ad Ripinmuur, ad Kiin̄.
Jen aolep wōnm̧aanļo̧k wōt n̄an kōm̧m̧ani im mour kōn m̧ool im jeļā kein raorōk, kwaļo̧k ad pokake n̄an Anij im Eo Nejin Jitenbōro. Ilo etan Jisōs Kraist, amen.