Irooj ej Tōl Kabun̄ eo An

M̧aan ro jeiū im jatū jitōn bōro ro rej kabwijer priesthood eo an Anij, joten in ikōņaan kōnono kōn wāween eo eaiboojoj eo Irooj ej tōl aelōn̄ in kiin̄ eo An ioon laļ in. Em̧ōj kadede ami jeļā pedped ko im̧aan tata. Ij jar bwe Jetōb Kwojarjar eo enaaj kapeni n̄an kom̧.

Juon, Jisōs Kraist ej bōran Kabun̄ eo ilo aolepān laļ in.

Ruo, E ej tōl Kabun̄ eo An rainin kōn kōnono n̄an em̧m̧aan ro kūr āinwōt rikanaan ro, im Ej kōm̧m̧ane kōn revelesōn.

Jilu, Ekar leļo̧k revelesōn n̄an rikanaan ro An etto, ej kōm̧m̧ane wōt, im naaj wōnm̧aanļo̧k wōt n̄an kōm̧m̧ane āindein.

Emān, E ej revelesōn in kapene n̄an ro me rej jerbal ium̧win tōl eo an rikanaan ro An.

Jān pedped ko im̧aan tata, jej kile bwe ritōl an Irooj an Kabun̄ eo An aikuj tōmak eļap im dim jān aolep ro rej jerbal n̄an E ioon laļ in.

N̄an waanjon̄ak, ebōk tōmak n̄an tōmak bwe jerkakpeje Irooj ej mije m̧akūtkūt otemjeļo̧k raan otemjej an aelōn̄ in kiin̄ eo An. Ebōk tōmak n̄an tōmak bwe Ej kūr armej ro rejjab weppān n̄an jerbal ilo jerbal ko an lōke. Ebōk tōmak n̄an tōmak bwe E eweppān an jeļā kajien armej ro Ej kūr, jim̧or ilo maron̄ ko aer im kōjatdikdik eo aer, im kōn menin jab kabōd kūr ko An.

Menin emaron̄ bōktok juon medikdik ak juon kōjōboulul n̄an jet ilo jarlepju in—jim̧or ro me rej ļōmņak kūr eo aer make n̄an jerbal emaron̄ in kar bōd barāinwōt n̄an ro me ļōmņak rejeļā jet bwe rejjab tōmak rejejjet n̄an jerbal eo raar kūr er n̄an e ilo aelōn̄ in kiin̄ eo an Irooj. Aō kapilōk n̄an kumi kein jim̧or ej n̄an karum̧ijļo̧k kain ekajet rōt ko m̧ae iien eo em̧m̧anļo̧k am̧ lo ta eo Irooj ej loe. Ekajet eo kwoj aikuj kōm̧m̧ane, ijello̧kin, ej bwe ewōr ippam̧ maron̄ eo n̄an bōk revelesōn im jerbale ilo ejjeļo̧k mijak.

Ebōk tōmak n̄an kōm̧m̧ane āindein. Ebōk em̧ool eļapļo̧k tōmak n̄an tōmak bwe Irooj eaar kūr armej ro rikarejeran rejjab weppān n̄an tōl eok. Jibadbad eo aō joten in ej n̄an kalōk tōmak eo ami bwe Anij ej tōl kom̧ ilo jerbal in jipan̄ eo ami n̄an E. Im em̧ool men eo eaorōkļo̧k, kōjatdikdik eo aō ej n̄an kalōk tōmak eo ami bwe Irooj ej im̧we armej ro rejjab weppān Eaar kūr āinwōt ritōl ro ami.

Kom̧ maron̄ ļōmņak, ilo jino in, bwe kain tōmak in ejjab aorōk n̄an wejepedik ilo Kabun̄ eo an Irooj im aelōn̄ in kiin̄ eo. Ijowōt ke, kom̧ maron̄ leo—jekdo̧o̧n ta kūr rōt eo ami ilo priesthood eo, jān juon rikanaan an Irooj n̄an juon rikabwijer ekāāl an Aaronic Priesthood eo—tōmak jab in ej menin aorōk.

Jān jino kōn ta meļeļe in tōmak n̄an juon būreejtōn an doulul eo an rūkaki ro ak tikōn ro. Ej aorōk n̄an e bwen wōr tōmak bwe Irooj eaar kūr E kōn emake, jeļā kōn m̧ōjņo ko im kajoor ko an rūkaki eo. Ej aikuj wōr an tōmak bwe em̧m̧aan eo me ekar leļo̧k kūr eo kar bōk revlesōn kōn Jetōb eo an Anij. Rikakpilōklōk ro an im ro uwaan doulul eo an raikuji ejja tōmak eo wōt n̄an ļoor e kōn lōke ejjeļo̧k mijak ie.

Iaar lo kain lōke in wōt ke juon ļaddik eaar jijet ippān būreejōnji eo an doulul in tikōn ro an juon jibbon̄ in Jabōt. Eaar rijeje eo aer ekāāl. Būreejtōnji in ekāāl raar kapilōk ippān doon. Raar kōnono kōn jet wāween ko remaron̄ kar kakūrm̧ool kajjitōk eo an bisop eo n̄an bar kōro̧o̧l tok juon ļaddik ejeniknik n̄an jar. Ālkin jar im ekōnono, raar jitōn̄ rijeje eo n̄an etal n̄an m̧weo im̧ōn ļaddik eo me ejjan̄in kar itok n̄an juon kweilo̧k im n̄an karuwaineneik e.

Rijeje eo eaar jaje kajien ļaddik eo, bōtaab eaar jeļā bwe juon iaan ro jinen im jemen eaar jeniknik im eo juon eaar jab juon membōr im ejjaje jem̧jerā. Rijeje eo eaar en̄jake ikūm̧kūm bōtaab jab mijak. Eaar jeļā bwe rikanaan eo an Anij eaar kajjitōk ippān rikabwijer ro an priesthood n̄an kōro̧o̧l tok jiip eo ejebwābwe. Im eaar ron̄ jar eo an būreejtōnji eo an. Eaar ron̄ aer itok n̄an juon koņ kōn etan juon ļaddik aikuj in lo̧mo̧o̧ren im āt eo etan make.

Iaar alooj ke rijeje eo eaar etetalļo̧k n̄an iaļ eo n̄an m̧weo im̧ōn ļaddik eo ejeniknik. Eaar etetal kadikdik āinwōt eļan̄n̄e eaar ilo̧k n̄an kauwōtata eļap. Bōtaab ilowaan juon im jimettan awa eaar bar walaļtak n̄an iaļ eo ippān ļaddik eo, medikdik ilo m̧ōņōņō. Ijjab kanooj jeļā tōre eo, bōtaab eaar ilo̧k kōn tōmak bwe eaar pād ilo jerbal eo an Irooj. Tōmak eo eaar pād wōt ippān im ekar eddōkļo̧k ilo iiō ko āinwōt juon mijenede, juon baba, juon ritōl an likao ro, im juon bisop.

Jān kōnono kōn ta kain tōmak rōt in meļeļe in n̄an juon bisop. Juon bisop jet iien kar kūr n̄an jerbal n̄an armej ro me rekanooj jeļā kajien. Ward membōr ro rejeļā kōn jet men kōn m̧ōjņo̧ in armej ko an im kajoor ko ilo jetōb an, im rejeļā bwe ro jet ilo ward eo maron̄ kar kūr er—ro jet me remeletlet ļo̧k, eļapļo̧k aer jeļā, eļapļo̧k aer jouj, ak em̧ool em̧m̧anļo̧k kōjellier.

Membōr rein rej aikuj jeļā kūr eo n̄an jerbal āinwōt juon bisop ej itok jān Irooj, kōn revelesōn. An ejjeļo̧k aer tōmak, bisop eo, me kar kūr jān Anij, enaaj lo an penļo̧k n̄an bōk revelesōn ej aikuji n̄an jipan̄ er. Ejjamin naaj tōprak ilo ejjeļo̧k tōmak an membōr ro n̄an rejtake.

Ekam̧ōņōņō, jekjek eo juon ebarāinwōt m̧ool. Ļōmņak kōn eo karejeran Irooj Kiin̄ Benjamin, eo eaar tōl armej ro doon n̄an ukweļo̧k. Būruwōn armej ro raar pidodo jān tōmak eo aer bwe eaar kūr jān Anij, kōjekdo̧o̧n m̧ōjņo̧ ko an ilo kanniōk, im bwe naan ko an raar itok jān Anij. Kwoj keememej ke ta eo armej ro raar ba: “Aaet, kōmij tōmak aolep naan ko kwaar kōnono n̄an kōm; … kōm jeļā kōn aer jejjet im m̧ool, kōnke Jetōb eo an Irooj Ekajoor Bōtata, eo Eaar jerbali juon oktak ekajoor ilo kōm, ak ilo būruōm̧, bwe kōmin jab bar itok wōt in kōm̧m̧an nana, ak n̄an kōm̧m̧an em̧m̧an wōt” (Mosaia 5:2).

N̄an juon ritōl n̄an wejepedik ilo jerbal eo an Irooj, lōke an armej ro bwe kar kūr e jān Anij aikuj kajoorļo̧k jān ļōmņak eo aer kōn utamwe ko an im m̧ōjņo̧ ko an ilo mour in. Kwoj keememej ke ekōjkan an Kiin̄ Benjamin kar kōm̧eļeļeik jerbal in tōl eo an make:

“Iaar jab jiron̄ kom̧ n̄an wanlōn̄tak ijin bwe kom̧in mijak eō, ak kom̧in ļōmņak bwe n̄a make ij ļapļo̧k jān juon armej kanniōk.

“A n̄aij āinwōt kom̧, ij dien wōt aolep m̧ōjņo̧ ko otemjeļo̧k an ānbwin im ļōmņak; mekarta n̄a kar kāālete jān armej rein, im kar ekkapit jān jema, im pein Irooj eaar kōtļo̧k eō bwe in ritōl eo im kiin̄ eo ioon armej rein, im kar oņaake im kōjparok eō jān kajoor eo emake wōt An, n̄an jerbal n̄an kom̧ kōn aolepān aō maron̄, ļōmņak im kajoor eo Irooj eaar letok n̄an eō” (Mosaia 2:10–11).

Ritōl eo am̧ ilo Kabun̄ eo an Irooj maron̄ āinwōt n̄an eok m̧ōjņo̧ im armej ak maron̄ āinwōt kajoor im im̧we n̄an eok. M̧ool eo in ej bwe aolep ritōl ej koba in m̧wil ko im elōn̄. Ta eo ej jipan̄ ro rikarejeran Irooj me kar kūr n̄an tōl kōj ej n̄e jej maron̄ watōk er āinwōt an Irooj kar ke Eaar kūr er.

Eweppān an Irooj lo ro Rikarejeran. Ej lo kōjatdikdik eo aer im ilju jekļaj eo aer. Im Ejeļā ekōjkan lukkuun paotok eo aer maron̄ oktak. Ebarāinwōt jeļā ekōjkan aer maron̄ oktak jān en̄jake ko aer ippān armej ro renaaj tōl er.

Emaron̄ kar m̧ōj am̧ kar en̄jake me kar kōm̧m̧an bwe kwon kajoorļo̧k jān armej ro kwar kūr n̄an jerbal n̄an er. Juon iien kar kūr eō āinwōt juon bisop an rūm̧m̧an ded ro ejjeļo̧k rejetaer. Ijjab kanooj jeļā eļan̄n̄e jibadbad ko an Irooj raar ļapļo̧k n̄an ta oktak ko iaar jipan̄ E kōm̧m̧ani ilo er ak oktak ko Eaar jeļā renaaj kar kōm̧m̧an ilo n̄a.

N̄an juon jekjek ijjab meļeļe, elōn̄ wōt iaan rūm̧m̧an ded ro ilo ward eo kar jerbal āinwōt eļan̄n̄e kar kūr eō jān Anij eļaptata n̄an er. Raar lo m̧ōjņo̧ ko aō bōtaab kar jab kōm̧m̧an bwe ren jelet er.

Ij keememej juon likao em̧m̧an ded eaar kajjitōk kōn kapilōk kōn kālet ko an n̄an jikuuļ. Eaar juon freshman ilo juon university ekanooj in em̧m̧an. Juon wiik ālkin aō kar leļo̧k kapilōk eo, eaar jikejuuļi juon iien ippa.

Ke eaar deļo̧n̄ tok ilo opiij eo, eaar kailbōk eō kōn kajjitōk, “Bisop, jemaron̄ ke jar m̧okta jān ad kōnono? Im jemaron̄ ke bukwelōlō? Im imaron̄ ke jar?”

Kajjitōk ko an raar kailbōk n̄a. Bōtaab jar eo an eaar kailbōk n̄a em̧ool eļapļo̧k. Eaar jar āinwōt in: “Jemedwōj Ilan̄, Kwojeļā bwe Bisop Eyring eaar letok n̄an n̄a kōkakpilōklōk wiik eo ļo̧k, im eaar jab jerbal. Jouj im im̧we e n̄an jeļā ta eo in kōm̧m̧ane kiiō.”

Kiiō komaron̄ ettōn̄ kake, bōtaab iaar jab. Eaar jeļā kadede ta eo Irooj eaar kōņaan n̄an an kōm̧m̧ane. Bōtaab eaar kautiej opiij eo an juon bisop ilo Kabun̄ eo an Irooj im bōlen kar kōņaan bwe en wōr aō iien n̄an bōk juon lōke eļapļo̧k n̄an bōk revelesōn ilo kūr jab eo.

Ekar jerbal. Ālkin wōt am kar jutak lōn̄tak innām jijet, revelesōn eo eaar itok n̄an n̄a. Iaar jiron̄ e ta eo iaar en̄jake Irooj ekōņaan bwe en kōm̧m̧ane. Eaar 18 iiō dettan tōre eo, bōtaab eaar kanooj kajoor ilo jetōb.

Eaar jeļā kadede eaar jab aikuj in etal n̄an ippān bisop eo kōn kain inepata rōt in. Bōtaab eaar katak n̄an rejtake eo rikarejeran Irooj em̧ool ilo m̧ōjņo̧ ko an ilo mour in. Āliktata eaar erom juon stake būreejtōn. Eaar bōk ippān katak eo kōm kar katak kake ippān doon: eļan̄n̄e ewōr am̧ tōmak bwe Irooj ej tōl Kabun̄ eo An kōn revelesōn n̄an ro rikarejeran rejjab weppān Ej kūr er, Irooj enaaj kōpeļļo̧k wintō ko an lan̄ n̄an er, āinwōt Enaaj kōm̧m̧an n̄an kom̧.

Jān en̄jake jab in, iaar katak katak eo bwe tōmak an armej ro jej jerbal n̄an er, jet iien eļapļo̧k jān tōamk eo ad make, ej bōktok n̄an kōj revelesōn ilo jerbal eo an Irooj.

Eaar bar wōr juon katak n̄an n̄a. Eļan̄n̄e ļaddik jab in eaar ekajet eō kōn likjab eo aō n̄an leļo̧k n̄an e kōkapilōklōk em̧m̧an ilo iien eo m̧oktata, ebar kar kōņaan bar itok n̄an bar kajjitōk. Im kōn menin, jān jab ekajete eō, eaar bōk kapene eo n̄an ikdeelel eo an.

Ijoke bar juon katak n̄an en̄jake jab in eaar kanooj in ļāp an aorōk n̄an n̄a. To̧o̧n wōt aō jeļā, eaar jab ba n̄an jabdewōt ilo ward eo bwe iaar jab leļo̧k juon kapilōk em̧m̧an ilo jino in. N̄e eaar kōm̧m̧ane, emaron̄ in kar kadikļo̧k tōmak eo an ro jet ilo ward eo n̄an lōke im̧we eo an bisop eo.

Iaar kajjieon̄ jab ekajete ro rikarejeran Irooj ak n̄an kōnono kōn piktok in m̧ōjņo ko aer. Im iaar kajjieon̄ n̄an katakin men jab in kōn waanjon̄ak n̄an ajri ro nejū. Būreetōn James E. Faust eaar kwaļo̧k juon pedped me iaar kajjieon̄ kōm̧m̧ane aō make. Ij kwaļo̧ke ippāmi:

“Jej … aikuj in rie im rejtake ritōl ro ad ijo jokwe ie, kōnke em̧ōj … kar ‘kūr im kālet er.’ Aolep membōr ro an Kabun̄ in maron̄ bōk kapilōk jān juon bisop ak juon branch būreejtōn, juon stake būreejtōn ak juon mijen būreejtōn, im Būreejtōn eo an Kabun̄ in im ro m̧ōttan. Ejjeļo̧k iaan em̧m̧aan ritōl rein kar kajjitōk kōn kūr eo an. Ejjeļo̧k en eweppān. Ijokwe rej ro rikarejeran Irooj, kar kūr jān E kōn ro kōmālim er n̄an im̧we. Ro kar kūr er, rejtak, im kōjeno̧lo̧k rej maron̄ bōk rejtak in rie eo ad.

“… Jab kautiej ritōl ro eaar kōm̧m̧an bwe en lōn̄ ro kar en̄taan ilo m̧ōjņo̧ ilo jetōb im wōtlo̧k. Jej aikuj jab kalimjōk jabdewōt jab wānōk ko n̄e ewōr, bōd ko, ak likjab ko an em̧m̧aan ro kar kūr n̄an tōl iood, im kabwijer opiij eo me rej kabwijere” (“Called and Chosen,” Liahona, Nov. 2005, 54–55).

Kapilōk jab in ej kōjeraam̧m̧an ro rikarejeran Anij ilo aolep jekjek.

Ilo raan ko im̧aan an Kabun̄ eo an Irooj, ritōl ro repaake Rikanaan Josep Smith raar jino kōnono kōn likjab ko an. Jekdo̧o̧n kōn aolep men raar loi im jeļā kōn jekjek eo an ippān Irooj, m̧wil in kōraat eo aer im ebanban eo eaar ajeeded āinwōt juon nan̄inmej. Juon iaan Jon̄oulruo eo eaar kwaļo̧k n̄an kōm aolep jon̄an eo an tōmak im m̧ool aikuj in wōr ippām eļan̄n̄e kōmij kōņaan jerbal ilo aelōn̄ in kiin̄ an Irooj.

En̄in ej riboot eo: “Jet elder ro kar kūr juon kweilo̧k ilo tampeļ eo n̄an ro me raar ļōmņak Josep Smith juon Rikanaan ejab wānōk. Raar kajjieon̄ jitōn̄ David Whitmer āinwōt juon ritōl kāāl an Kabun̄ in. … Ālkin ron̄jake iakwelel ko ņae Rikanaan eo, Brigham[Young] eaar jutak im kam̧ool, ‘Josep eaar juon Rikanaan, im ijeļā, im bwe remaron̄ kōnanaik im jekpen ņae to̧o̧n wōt aer kōņaan; rejjab maron̄ kakkure ijjitōn eo an Rikanaan eo an Anij, remaron̄ in wōt kakkure mālim eo aer make, kabōjrak ekkejel eo me ej lukōj er n̄an Rikanaan eo im n̄an Anij, im jilkinļo̧k er make n̄an hell” (Church History in the Fulness of Times Student Manual [Church Educational System manual, ], 2nd ed., 174; lale bar Teachings of Presidents of the Church: Brigham Young [1997], 79).

Ewōr juon ekkejel me ej lukōj kōj n̄an Irooj ilo jerbal in jipan̄ eo ad. Ej ekkejel jān jabdewōt jikin eo kar kūr kōj n̄an jerbal ilo aelōn̄ in kiin̄ eo, lōn̄ļo̧k ippān ro kar kūr n̄an tōl iood ilo priesthood eo, im n̄an rikanaan eo, eo ej loklok n̄an Irooj. Ebōk tōmak im ettā bōro n̄an jerbal ilo jikin eo me kar kūr n̄an e, n̄an lōke bwe Irooj eaar kūr kōj im ro me rej tōl iood, im n̄an rejtake er kōn tōmak edipio.

Enaaj wōr iien ko, āinwōt eaar wōr ilo raan ko an Kirtland, n̄e jenaaj aikuji tōmak eo im m̧ool eo an Brigham Young n̄an jutak ilo jikin eo Irooj eaar kūr kōj n̄an e, m̧ool n̄an rikanaan eo An im n̄an ritōl ro An eaar kūr er n̄an e.

Ij kwaļo̧k n̄an kom̧ aō kam̧ool ekwojarjar im aaet lem̧ōņōņō bwe Irooj Jisōs Kraist ej pād ilo jeban. Ej tōl Kabun̄ eo An im ro Rikarejeran. Ij kwaļo̧k kam̧ool bwe Thomas S. Monson ej em̧m̧aan eo de eo me ej kabwijer im kōjerbal aolep kii ko an priesthood eo Ekwojarjar ioon laļ ilo iien in. Im ij jar kōn kōjeraam̧m̧an ko ioon aolep ro rikarejeran rettā me rej jerbal ilo eļap kōņaan im pād ilo Kabun̄ eo an Jisōs Kraist kar kōjepļaaktok, eo Ej tōl e make. Ij kam̧ool bwe Josep Smith eaar lo Anij Jemen im Jisōs Kraist. Raar kōnono n̄an e. Kii ko an priesthood eo kar kōjepļaaktok n̄an kōjeraam̧m̧an eo an aolep ajri ro nejin Jemedwōj Ilan̄. Mijen eo ad im ad lōke n̄an jerbal ilo kūr eo ad ilo jerbal eo an Irooj. Ilo etan Jisōs Kraist, Amen.