Jan̄nuwaade Kapijuknen eo Aō

Enan̄in juon epepen em̧ootļo̧k, juon baam̧le jān Oregon rekar kakkije ilo Indiana—eļapļo̧k jān 2,000 m̧aeļ ko (3,200 km) ettoļo̧k—ke kidu eo nejier ekar jōbwābwe, Bobbie. Baam̧le in einepata rekar kappukot kidu eo aolep jikin ak ekar ejjeļo̧k tōprak. Rekar jab maron̄ loe Bobbie.

Ekar lukkuun rub būruweer, rekar jepļaakļo̧k n̄an m̧weo im̧weer, kajjojo m̧aeļ rej kijoone ej kattoļo̧k er jān mennin mour in nejier.

Jiljino allōn̄ tokālik, baam̧le eo ekar ļo̧kjenaer ke rej loe Bobbie ilo kōjem̧ in m̧weo im̧weer ilo Oregon. “Ettonoon, aidik, neen ejar im ewaļo̧k dii—[e] ekar kalikkartok ke ekar etetal ippān make … jon̄an ettoļo̧k eo.”¹ Bwebwenato in Bobbie ekar kaitok limo in armej ro ipeļaakin United States, im ekar jino bun̄bun̄ āinwōt Bobbie Kidu eo Ekabwilōn̄lōn̄.

Bobbie ejjab wōt juon mennin mour eo me ekar kaļo̧kjeņ an scientist ro kōn juon kabwilōn̄lōn̄ in an jeļā ia im ijo m̧weo m̧weer ej pād ie. Elōn̄ jet inej in babbūb ko rekar em̧m̧akūt jān 3,000 m̧aeļ ko (4,800 km) kajjojo iiō n̄an laļ ko rem̧m̧an n̄an aer mour. Wōn ko rej etal kijoon Pacific Ocean jān Indonesia n̄an kappe ko ilo California. Raj ko rej aōō jān lo̧jet eo emōļo jān North im South Poles laļļo̧k n̄an equator im bar ro̧o̧lļo̧k. Bōlen eļapļo̧k an em̧m̧an, bao ko remouj rej kelo̧k jān Arctic Circle n̄an Antarctica im bar ro̧o̧lļo̧k kajjojo iiō, jet 60,000 m̧aeļ (97,000 km).

Ilo an scientist ro ekkatak kōn m̧wil in ekabwilōn̄lōn̄, rej kajjitōk kain kajjitōk kein āinwōt “Ewi wāween aer jeļā ia eo rej etal n̄an e?” im “Ewi wāween an kajjojo epepen kein ekkatak m̧wil rot in?”

N̄e ij riit kōn maron̄ in ekajoor ilo mennin mour ko, ijjab dāpij aō bwilōn̄, “Epidodo ke bwe armej ren bōk kain ejja jan̄nuwaade in—juon kain tōl ilowaad, eļan̄n̄e kwonaaj—menin ej kepaakļo̧k er n̄an kapijuknen eo aer ilan̄?”

Ij tōmak bwe aolep em̧m̧aan, kōrā, im ajri rekar en̄jake kūr jān lan̄ ilo jet tōre ilo mour eo an. Ilo kōj ewōr juon jan̄nuwaade eo im ilo jet wāween ej tōparļo̧k rōn̄ōl eo im ej kwaļo̧k iakwe Jemed im Jined Ilan̄ ro jekar jeļā im iakwe er.

Jet remaron̄ kabōjrak kain jan̄nuwaade in im kōm̧m̧an bwe ren jab bar en̄jake kain jan̄nuwaade in. Bōtaab ro me rejjab kabōjrak kain jan̄nuwaade in ilo er make remaron̄ jino kain ito itak in em̧m̧an—juon em̧m̧akūt eo ekabwilōn̄lōn̄ ļo̧k n̄an jikin ko ilan̄.

Ennaan eo em̧m̧an an Kabun̄ eo an Jisōs Kraist im Armej ro Rekwojarjar ilo Raan ko Āliktata ej bwe Anij ej Jemed, bwe Ej kea kōn kōj, im bwe ewōr juon iaļ n̄an jepļaakļo̧k n̄an E.

Anij ej kūr n̄an eok.

Anij ejeļā aolep ļōmņak ko am̧, būrom̧ōj ko am̧, im kōjatdikdik eo am̧ eļap. Anij ejeļā ke elōn̄ iien kwōj pukōt E. Elōn̄ iien kwōj lan̄lōn̄ ejjeļo̧k jon̄an. Elōn̄ iien kwōj jan̄ kōn am̧ ajimakeke. Elōn̄ iien kwaar kile ke ejjeļo̧k jipan̄, kwōj pok, ak illu.

Kiiō, jekdo̧o̧n bwebwenato eo am̧—eļan̄n̄e kwaar wōtlo̧k, likjab, būrom̧ōj, illu, ālkinjepjep, ak m̧ane eok—kwōjeļā bwe kwōjjab make iaam̧. Anij ej kūr n̄an eok wōt.

Rilo̧mo̧o̧r eo ej lewaj Pein n̄an eok. Im, āinwōt an kar kōm̧m̧ane n̄an riān̄wōd ro rekar jutak ioon pārijet in lo̧m̧aļo in Galele, kōn iakwe eļap Ej kōnono n̄an eok: “Itok, Ļoor Eō.”²

Eļan̄n̄e kwonej ron̄jake E, Enaaj kōnono n̄an eok rainin.

N̄e kwōj etetal ilo iaļ in rikaļoor—n̄e kwōj em̧m̧akūtļo̧k n̄an Jemedwōj Ilan̄—ewōr juon men ippem̧ eo me enaaj kapen e n̄an eok bwe kwaar ron̄jake kūr eo an Rilo̧mo̧o̧r eo im likūt būruwōm̧ n̄an meram in. Enaaj ba n̄an eok bwe kwōj pād ilo iaļ eo ejim̧we im bwe kwōj jepļaakļo̧k n̄an kapijuknen eo am̧.

Jān jinoin, rikanaan ro an Anij rekar rōjan̄ armej ro ilo raan ko aer n̄an “pokake ainikien Irooj am̧ Anij, … lale kien ko An im men in jiron̄ ko An, … , [im] oktak n̄an [E] kōn aolepen būruom̧, im kōn aolepen am̧.”³

Jeje ko rekwojarjar rej katakin kōj juon taujin un ko etke jej aikuj kōm̧m̧ane menin.

Rainin, in lewaj n̄an kom̧ ruo un ko etke jej aikuj oktakļo̧k n̄an Irooj.

Juon, mour eo am̧ enaaj em̧m̧anļo̧k.

Ruo, Anij enaaj kōjerbal eok n̄an kōm̧anm̧anļo̧k mour ko an ro jet.

Ij kam̧ool bwe n̄e kwōnej pād ioon ak wōnm̧aanļo̧k ilo iaļ in em̧m̧an me ej tōlļo̧k n̄an Anij, mour ko ad renaaj em̧m̧anļo̧k.

Ejjab meļeļein bwe mour ko ad renaaj anjo jān būrom̧ōj. Kōj aolep jeļā kōn rikaļoor ro retiljek an Kraist ro rekar en̄taan kōn kakkure enana im liakeļo̧k—Jisōs Kraist Make ekar en̄taan eļapļo̧k jān jabdewōt armej. Baj āinwōt an Anij kōm̧m̧ane “ej kotak aļ ioon ro renana im ioon ro rem̧m̧an,” Ej barāinwōt kōtļo̧k an rikapo eo māllijon̄e rūwānōk im jab rūwānōk.⁴ Ilo m̧ool, jet iien mour ko ad eļapļo̧k aer pen kōnke jej kajjieon̄ mour kōn tōmak eo ad

Jaab, ļoor Rilo̧mo̧o̧r eo eban bōkļo̧k kōj jān mālijjon̄ ko. Ijoke, enaaj kōm̧akūt mennin bōbrae ko kōtaam̧ im jipan̄ eo Jemedwōj Ilan̄ ekōņaan lewaj n̄an eok. Anij enaaj pād ippem̧. Enaaj tōl iaļ ko am̧. Enaaj etetal ikōjaam̧ im kotak eo n̄e aikuj eo am̧ eļap.

Kwonaaj en̄jake em̧m̧an eo eļap an leen ko an Jetōb eo: “iakwe, lan̄lōn̄, aenōm̧m̧an, meanwōd, jouj, em̧m̧an, [im] tiljek.”⁵

Leen kein an jetōb rejjab juon tōpran jeraam̧m̧an in kanniōk, tōprak, ak to̧o̧r bata. Rej itok jān ļoor Rilo̧mo̧o̧r eo, im remaron̄ pād ippād iien otemjej men̄e jej pād ibūļōn lan̄ ko remaroktata.

Kijeek ko im ainikien ko reļaaj ilo mour in remaron̄ kaamjak im kako̧r kōj, bōtaab ro rej ukōt būruweer n̄an Anij naaj kabooļ er kōn aenōm̧m̧an eo An. Aer lan̄lōn̄ ej jāmin naaj dikļo̧k. Rej jāmin naaj jojoļāār ak meļo̧kļo̧k.

“Kwōn lōke Irooj kōn aolepān būruom̧,” jeje ko rekwojarjar rej katakin, “im kwōn jab atartar ioon jeļāļo̧kjeņ eo am̧. Kwōn kwaļo̧k E ilo iaļ ko am̧ otemjeļo̧k, innām Enaaj ba kajjien iaļ ko am̧.”⁶

Ro rej eo̧ron̄ kūr in im pukōt Anij, ro rej jar, tōmak, im etetal ilo iaļ in Rilo̧mo̧o̧r eo ekar kōpooje—aaet men̄e renej tūbpok ilo aer etal ilo iaļ in elōn̄ iien—nej bōk rōjan̄ eo em̧ool bwe “aolep men ko naaj jerbal ippān doon n̄an em̧m̧an eo [aer].”⁷

Bwe Anij ej “leļo̧k kajoor n̄an eo ej parōk, im n̄an eo ejjeļo̧k an maron̄.”⁸

“Bwe rū wānōk ej bun̄ jiljilimjuon alen, im ej bar jerkak.”⁹

Im Irooj ilo An em̧m̧an ej kajjitōk:

Kwoj kōņaan ke pād ilo lan̄lōn̄?

Kwōj ke jan̄nuwaade en̄jake in ilo būruwōm̧ aenōm̧m̧an eo eļļā jān jeļā otemjej?¹⁰

Innām kwōn ukōt jetōb eo am̧ n̄an meram eo.

Jino iaļ in am̧ make n̄an kapijuknen eo am̧.

Ilo am̧ kōm̧m̧an āndein, mour eo am̧ enej em̧m̧anļo̧k, m̧ōņōņōļo̧k, im ļapļo̧k tokjeņ.

Iaļ in ad ļo̧k n̄an Jemedwōj Ilan̄ kwonaaj tokālik kile bwe iaļ ejjab kōn am̧ pedped wōt mour eo am̧ make. Jaab, iaļ in ej tōlļo̧k eok bwe kwōn erom̧ juon kōjeraam̧m̧an ilo mour ko an ajri ro jet nejin Anij—ro jeium̧ im jatu. Im men eo ekaitoktok limo kōn iaļ in ej bwe kwōj jerbal n̄an Anij, im ilo am̧ kea kōn im jipan̄ armej ro ipeļaakūm̧, kwonaaj loe eļap eddōkļo̧k ilo mour eo am̧ make, ilo wāween ko me kwōjjab maron̄ pijaki.

Bōlen kwōjjab maron̄ kile eok make bwe ewōr tokjem̧, bōlen kwōjjab maron̄ kile eok make āinwōt juon kōjeraam̧m̧an ilo mour an bar juon armej. Ekkā, n̄e jej kalimjōk kōj make, jej lo likjab ko ad wōt im m̧ōjņo̧ ko. Jemaron̄ ļōmņak bwe jej aikuj in erom̧ men eo “eļapļo̧k” bwe Anij en kōjerbal kōj—eļapļo̧k māletlet, eļap m̧weie, eļapļo̧k kareelel, eļapļo̧k kapāāl, eļap jetōb. Kōjeraam̧m̧an ko renaaj itok jab eļap jān maron̄ ko am̧ ak kōnke kālet ko am̧. Im Anij an lan̄ im laļ enaaj jerbal ilowaan im kōn eok, kōļapļo̧k kijejeto ko am̧ rettā kōn jibadbad ko An.

Jerbal eo an aolep iien ej em̧m̧akūt m̧aanļo̧k kōn pedped in eaorōk: “Im jān men ko reddik ej jebarļo̧k men eo eļap.”¹¹

Ke ekar jeje n̄an Rikwojarjar ro ilo Korint, Rijilōk Paul ekar ekkatak bwe ejjab lōn̄ iaer renaaj ļōmņak remāletlet kōn jon̄ak ko an laļ in. Ak menin ejjab aorōk, kōnke “Anij ear kāālōt men in bwebwe ko an laļ bwe en kajook ro ri mālōtlōt.”¹²

Bwebwenato in jerbal eo an Anij ekar kobrak armej ro me rekar ļōmņak bwe rejjab jejjet. Ak er rej ettā im jerbal, pedped wōt ioon tiriam̧o̧ an Anij im An kallim̧ur: “Peier renaaj Peiū, im Inaaj aer kein tōrak … , renaaj ire āinwōt lukkuun em̧m̧an n̄an Eō, … [Inaaj] kōjo̧o̧r er.¹³

Jōm̧ar eo ļo̧k baam̧le eo aō ekar lōn̄ juon aer iien em̧m̧an n̄an loļo̧k jet jikin ko rebun̄bun̄ an Kabun̄ ilo tūrear in United States. Ilo juon wāween ejenoļo̧k, jej keememej bwebwenato an iien in. Bōlen ikar riiti eļap kōn—armej ro āinwōt Martin Harris, Oliver Cowdery, im Thomas B. Marsh—ekar jino lukkuun m̧ool n̄an n̄a ke ikar etetal ijoko rekar etetal im kejōkļo̧kjeņ kōn kaarmejete ko rekar kōm̧m̧ani n̄an kalōk aelon̄ in Anij.

Ekar lōn̄ kadkad ko reļļap ippāer me rekar kōtļo̧k aer kōm̧m̧an jipan̄ ko rem̧m̧an n̄an Jepļaaktok eo an Kabun̄ eo an Jisōs Kraist. Ak rekar barāinwōt armej, m̧ōjņo̧, pidodo aer wōtlo̧k—āinwōt kwe im n̄a. Jet rekar loe aer make jab errā ippān Rikanaan Josep Smith im etal jān Kabun̄ in. Tokālik, elōn̄ iaan ejja armej rein wōt rekar ukōt būruweer, kōttā er make, im bar juon alen pukot im loe jem̧jerā eo ippān Rikwojarjar ro.

Emaron̄ wōr juon ad kōņaan in ekajet em̧m̧aan rein rejitōn bōro im membōr ro jet āinwōt er. Jemaron̄ ba, “Ij jāmin naaj kattoļo̧k Rikanaan Josep.”

Men̄e emaron̄ m̧ool, jejjab lukkuun jeļā ewi wāween kar mour ilo iien in, kōn kain jekjek kein. Jaab, rekar jab wāppen, ak ewi wāween an kōketak kōj n̄an jeļā bwe jekdo̧o̧n ak Anij ekar maron̄ kōjerbal er. Ekar jeļā kajoor eo aer im m̧ōjņo̧ ko, im Ekar leļo̧k n̄an er eļapļo̧k iien em̧m̧an n̄an aer jipan̄ juon eoon ak juon ton n̄an al aiboojoj eo an Jepļaaktok eo.

Ekōjkan an kōketak kōj n̄an jeļā, bwe kōjjejjab wāppen, n̄e būruwōd rej oktaktok n̄an Anij, Enaaj jouj im tiriam̧o̧ im kōjerbal kōj kōn kōttōbar ko An.

Ro rej iakwe im jerbal n̄an Anij im ro riturin im ettā im niknik bōk koņaer ilo jerbal in An naaj lo men ko rekabwilōn̄lōn̄ ko ilo mour ko aer im ilo mour ko an ro rej iakwe er.

Kōjem̧ ko me rekilōk renaaj peļļo̧k.

Enjeļ ro renaaj etal im̧aer im kōpooj iaļ eo.

Jekdo̧o̧n ta jerbal rot eo am̧ ilo jukjukin pād eo am̧ ak ilo Kabun̄ in, Anij enaaj kōjerbal eok, n̄e kwonaaj m̧ōņōņō. Enaaj kōļapļo̧k ikdeleel ko am̧ rem̧m̧an im ukōt m̧akūtkūt ko retenkwadik am̧ kwaar katōki ilowaan juon jikin kallib em̧m̧an.

Kōj, kōj kajjojo, “Ruwamāejet im ri ito-itak”¹⁴ ilo laļ in. Ilo elōn̄ wāween ko, jelukkuun ettoļo̧k jān kapijuknen. Ak ejjab meļeļe bwe jej aikuj in en̄jake ad jako im make iaad.

Jemed Ilan̄ eo ejitōn bōro ekar letok n̄an kōj Meram in Kraist. Im ijo em̧wilaļ ilo būruwōd, juon men ej rōjan̄ kōj bwe jen ukōt mejād im būruwōd n̄an E ilo ad kōro̧o̧ltok riito itak ro n̄an kapijunen eo ad ilo celestial.

Menin ej aikuji kijejeto. Kom̧ij jab maron̄ tōpar ijeņ ilo ami jab kajjieon̄ in ekkatak kōn E, meļeļe kōmeļeļe ko An kijejeto kōjerbali, im likūt juon nee im̧aan neen bar juon armej.

Jaab, mour ejjab juon wa ej make ettōr. Ejjab juon baļuun juon autopilōt ej kōjebwebweiki.

Kwojjab maron̄ ebbābe ilo dān in mour eo im lōke bwe ņo ko renaaj bōkļo̧k eok n̄an jabdewōt jikin kwōj kōjatdikdik renej bōkļo̧k eok n̄ane juon raan. Kauwe ej aikuj ad m̧ōņōņō in aō n̄an jikin e jibadōke n̄e emenin aikuj.

Ejjeļo̧k juon ej eddoin iaļ in ito itak eo am̧ make. Rilo̧mo̧o̧r eo enaaj jipan̄ eok im m̧aanjabpopoiki iaļ eo im̧aam̧, ak kallim̧ur ko n̄an ļoor E im kōjparok kien ko An rej aikuj itok jān kwe. En̄ņe ej lukkuun eddo eo am̧, lukkuun jeraam̧m̧an eo am̧.

En̄in ej ito itak eo am̧ eļap.

Jouj im eo̧ron̄ kūr eo an Rilo̧mo̧o̧r eo am̧.

Ļoor E.

Irooj ekar ejaake Kabun̄ eo an Jisōs Kraist im Armej ro Rekwojarjar ilo Raan-ko Āliktata n̄an jipan̄ eok ilo kallim̧ur in am̧ n̄an jerbal n̄an Anij im ro riturim̧. Jibadbad eo an ej n̄an rōjan̄, katakin, kotak, im im̧we. Kabun̄ in em̧m̧an ej letok iien ko rem̧m̧an n̄an kwe n̄an am̧ kōjerbal tiriam̧o̧, pukotļo̧k ro jet, im kōkāāl im kōjparok bujen ko am̧ rekwojarjar. Ej kōm̧anm̧an n̄an kōjeraam̧m̧an mour eo am̧ im kōkōm̧anm̧an mour eo am̧, jukjukin pād, im laļ eo am̧.

Itok, kobatok ippem̧ im lōke Irooj. Leļo̧k kapāāl eo am̧ n̄an jerbal in An em̧m̧an. Pukotļo̧k, rōjan̄, kōmour, im rie aolep ro rej kōņaan in en̄jake im eo̧ron̄ jan̄nuwaade eo kapijuknen eo ad ilan̄. Jen koba ippān doon ilo iaļ in ito itak in eaiboojoj n̄an laļ ko ilan̄.

Gospel in ej juon ennaan ejeuwaan an kōjatdikdik, m̧ōņōņō, im lan̄lōn̄. Ej iaļ eo me ej tōlļo̧k kōj n̄an kapijuknen eo ad.

Ilo ad lukkuun bōk gospel in ilo tōmak im kōm̧m̧an, kajjojo raan im awa, jenaaj kepaakļo̧k kōj n̄an ad Anij. Mour ko ad renaaj em̧m̧anļo̧k, im Irooj enaaj kōjerbal kōj ilo wāween ko rekabwilōn̄lōn̄ n̄an kōjeraam̧m̧an ro ipeļaakid im bōktok jibadbad eo An indeeo. Kōn menin ij kam̧ool im likūt aō kōjeraam̧m̧an ippāmi ilo āt eo ekwojarjar an Jisōs Kraist, amen.