Būruwōn Leļo̧k an Kōrā eo Emej Pāleen

Ej juon kōjeraam̧m̧an eļap bwe in jerbal ilubwiljin Ro Rekwojarjar ilo Pacific ilo aolepān mour eo aō. Ilo tōmak, iakwe, im wūjlepļo̧k ko rekabwilōn̄lōn̄ an rein Rekwojarjar rekobrak eō kōn im̧we, kam̧m̧oolol, im m̧ōņōņō. Bwebwenato ko aer rej āinwōt ko ami make.

Iaar ļōmņak bwe rein Rekwojarjar rej āinwōt kōrā eo emej pāleen eo me Rilo̧mo̧o̧r eo eaar lale ke Ej “jijet ikijjien nien m̧ani im lale kōjkan an armej ro āti m̧ani ṇa ilowaan nien m̧ani; im elōn̄ ri m̧weiie rej āti elōn̄.

“Im juon kōrā, e jeram̧ōl, ej itok im āti ruo m̧ani. …

“Im Ej ān̄in̄intok ro rū kaļoran n̄an Ippān im ba n̄an er, E m̧ool Ij ba n̄an kom̧, kōrā in e jeram̧ōl im ejako pāleen ear āti eļap jān er otemjej raar āti ņa ilo waan nien m̧ani:

“Bwe … er otemjej raar āti wōt jet jān elōn̄ m̧weier; a lio kōn an jeram̧ōl ear āti men ko an otemjej, aet aolep men in mour an.”¹

Men̄e jāān ko ruo an ejabwe n̄an leļo̧k, Rilo̧mo̧o̧r eaar ba menin leļo̧k eo an eļap, kōnke eaar leļo̧k aolep men. Ilo iien eo, Rilo̧mo̧o̧r eaar lukkuun jeļā kajien kōrā eo ejako pāleen, bwe menin leļo̧k eo an eaar kwaļo̧k n̄an E aolepān būruwōn. Karbab im iakwe eo an eļap im tōmak eaar men eo eaar leļo̧k jeļā bwe an “aikuj” naaj bar bōk.

Em̧ōj aō bar lo ejja kain bōro rōt in ippān ro Rekwojarjar ilo Pacific. Ilo juon pukwon edik ilo juon iaan āne kein, juon em̧m̧aan im kōrā eo ippān raar bōk kūr eo jān mijinede ro n̄an lukkuun kajjitōk ippān Irooj eļan̄n̄e katak ko raar katakin erro rej m̧ool. Ilo jekjek in, raar bar kejokļo̧kjeņ kōn tōprak ko an kien ko me renaaj aikuji n̄an ļoori eļan̄n̄e ej uwaak eo raar bōke ej n̄an tōmak ilo gospel eo me em̧ōj an kar jepļaaktok. Raar jitlo̧k im kar jar n̄an jeļā m̧ool eo an Kabun̄ in im kōn Bok in Mormon. Uwaak in jar ko aer eaar itok ilo wāween eo em̧m̧an: “Aaet! Menin em̧ool!”

N̄an bōk kam̧ool in, raar kālet bwe ren peptaij. Eaar jab juon kālet eo ejjeļo̧k kijejeto ie. Kālet eo aer n̄an peptaij eaar bōk juon wōnāān eo eļap. Raar luuji jerbal ko aer, raar juļo̧k aolep men ko aer ilik m̧okta jen aer peptaij, jem̧jerā ko aer reaorōk raar jako, im jipan̄, iakwe, im kea jān baam̧le ko raar bōjrak. Kiiō rej etal n̄an m̧ōn jar eo kajjojo Jabōt, jirōk m̧aanļo̧k ippān ro jeraer im ro rituruier me rej etetal ilo iaļ eo juon.

Ilo jekjek kein reppen, em̧m̧aan in em̧m̧an eaar kajjitōk elmen an en̄jake kōn kālet eo aer n̄an kobatok ilo Kabun̄ in. Uwaak eo an ejjeļo̧k an pere ej “em̧ool, ejim̧we ke? Kālet eo am̧ eaar alikar.”

Rikwojarjar rein ruo rekāāl tok n̄an Kabun̄ in eaar wōr ippāerro būruwōn leļo̧k an kōrā eo emej pāleen. Raar, āinwōt kōrā eo emej pāleen, “leļo̧k aolep” men ko remaron̄ leļo̧k, jeļā bwe renaaj bōk aer “aikuj.” Āinwōt juon tōprak in aer tōmak ilo bōro ko im niknik ilo tōmak ilo iien ko reppen, eddodo ko aer raar mera. Raar bōk jipan̄ im kar jepooļ jen membōr ro an Kabun̄ in, im raar kajoorļo̧k itok jān kūr ko aer ilo Kabun̄ in.

Ālkin aer leļo̧k “aolep,” lan̄lōn̄ eļap eaar waļo̧k ke raar liāp ilo tampeļ āinwōt juon baam̧le indeeo. Āinwōt Eaar kōm̧m̧an n̄an rioktak ro rekāāl ium̧win tōl eo an Alma, “Irooj Eaar kōkajoorļo̧k er bwe ren maron̄ kotak eddo ko aer ilo ejjeļo̧k pen, im raar ajeļo̧k er ilo itok-limo im kōn ineem̧m̧an n̄an aolep ankilaan Irooj.”² Wāween in ej juon waanjon̄ak in būruwōn leļo̧k jān ippān ripālele rein rem̧m̧an.

Kōtļo̧k bwe in bar kōnono kōn bar juon en̄jake ijo būruwōn leļo̧k eaar waļo̧k ilo wāween in. Ilo Samoa, kōm ar jerbal ippān ko̧o̧njeļ ro an bukwōn eo bwe mijinede ro ren kwaļo̧k gospel eo ie. Jet iiō rem̧ootļo̧k, iaar bwebwenato ippān juon irooj jān juon weto ijo emōj kamo̧ an mijinede ro ad pād ie elōn̄ iiō ko. Bwebwenato eo aō eaar bōk jikin ejjabto tokālkin an irooj ļapļap eo kar kōppeļļo̧k weto eo n̄an Kabun̄ in, kōtļo̧k an mijinede ro katakin ro rej itok limoier n̄an ekkatak kōn gospel in im katak ko ie.

Ālkin elōn̄ iiō ko, bwe kabwilōn̄lōn̄ in en bōk jikin, iaar ilbōk kōn ta eo eaar waļo̧k bwe irooj ļapļap eo en bōk em̧akūt in. Iaar kajjitōk kōn menin, innām irooj eo ij kennaan ippān eaar uwaak, “Juon em̧m̧aan emaron̄ mour ilo marok jidik iien, ak enaaj wōr juon iien n̄e enaaj kōņaan itok n̄an meram eo.”

Irooj ļapļap in, n̄an kōppeļļo̧k weto in, eaar kwaļo̧k būruwōn leļo̧k—juon bōro eaar peļļo̧k ke okmenāān im meram in m̧ool eo raar waļo̧k. Ritōl in eaar kōņaan juļo̧ki m̧anit ko, jelm̧ae eļap jum̧ae, im jutak pen bwe ro jet ren jeraam̧m̧an. En̄in ej juon ritōl eo būruwōn eaar pedped ioon menin jipan̄ im m̧ōņōņō eo an armej ro an ijello̧kin mije iminene, m̧anit, im kajoor an juon make. Eaar kōm̧m̧ani aolep men ko eaar kōm̧m̧ani ekkar n̄an ta eo Būreejtōn Thomas S. Monson eaar katakin kōj: “Ilo ad ļoor waanjon̄ok eo an ad Rilo̧mo̧o̧r, enaaj ad iien em̧m̧an n̄an bōk meram ilo mour ko an ro jet.”³

Āliktata, kōtļo̧k bwe in kwaļo̧k bar juon en̄jake ippāmi ilubwiljin ro Rekwojarjar ilo Pacific ro me rej pād wōt im rej aorōk ippa. Jet iiō rem̧ootļo̧k iaar juon rikakpilōklōk eo edik n̄an bisop eo ilo ward eo ekāāl ilo American Samoa. Ewōr 99 membōr ro, ekoba rikallib ro, rijerbal in kōm̧m̧an kuwat ro, rijerbal in kien ro, im baam̧le ko aer. Ke Būreejtōnji eo Kein Kajuon eaar kwaļo̧k ilo 1977 bwe juon tampeļ enaaj jutak ilo Samoa, eaar wōr m̧ōņōņō im kam̧m̧oolol jān kōm wōj aolep. Etal n̄an tampeļ jān American Samoa ilo tōre ko eaar menin aikuj bwe kōm en ekkāke n̄an, n̄e ejjab Hawaii ak New Zealand. Menin eaar kanooj ļap wōnāān im elōn̄ membōr ro retiljek raar jab maron̄ tōpar kōttōpar in.

Ilo tōre in kar rōjan̄ membōr ro n̄an likūt menin tiriam̧o ko aer n̄an kajjeneen n̄an jipan̄ kalōk tampeļ ko. Kōn jetōb in, bisoprik ro am̧ raar kajjitōk ippān membōr ro ilo ward bwe ren lukkuun jar im lale ta remaron̄ leļo̧k. Raan eo me emōj kar karōke bwe baam̧le ko ren kuk ippān doon n̄an leļo̧k menin tiriam̧o ko aer. Tokālik, ke rekar kōppeļļo̧ki menin tiriam̧o ko ilo ittino, bisoprik ro am̧ raar ettā im kar im̧we kōn tōmak im tiljek eo an membōr ro ilo ward eo.

Jeļā kajjojo baam̧le im jekjek ko aer, ij en̄jake juon jeļā eo em̧wilaļ, kautiej, im ettā. Men kein, ilo kajjojo wāween, jāān ko raan kein rej itok jān “kōņaan” eo aer kōn juon m̧ōņōņō kōn kallim̧ur in kōjeram̧m̧an eo n̄an kalōk juon tampeļ ekwojarjar an Irooj ilo Samoa. Baam̧le kein raar leļo̧k aolep men remaron̄e n̄an Irooj, kōn tōmak bwe ren jab kōņaan im aikuj. Menin leļo̧k eo aer kōn būruwōn leļo̧k an kōrā eo emej pāleen eaar waļo̧k. Aolep ro raar leļo̧k raar bōk m̧ōņōņō kōnke būruwōn leļok eo ilo er maron̄ kar loe ilo mejān tōmak eļap kōn kōjeraam̧m̧an ko ilo m̧ōn kakkonkon ko n̄an baam̧le ko aer im n̄an aolep armej in Samoa im American Samoa, jen epepen ko n̄an kiiō. Ij jeļā bwe aer jortak ko rekwojarjar, jāān ko aer, eaar ļap tokjāer im kilaer ippān Irooj.

Būruwōn leļo̧k eo an kōrā eo emej pāleen eaar leļo̧k ruo jāān ej juon bōro eo me enaaj leļo̧k aolep jen kijejeto; jen nikniki men ko reppen, kōjdāt, im jum̧ae; im n̄an ineek eddo ko an aolep men otemjej. Būruwōn leļo̧k ej juon bōro in meļeļe, en̄jake, im jeļā kōn meram in m̧ool im naaj kōjekdoon jabdewōt men n̄an dāpij wōt m̧ool eo. Ej barāinwōt jipan̄ ro jet n̄an lo ejja meram in im itok n̄an ejja jon̄ok in m̧ōņōņō im lan̄lōn̄ eo indeeo. Āliktata, būruwōn leļo̧k ej meļeļein m̧ōņōņō in leļo̧k aolep men otemjej n̄an kalōk aelōn̄ in kiin̄ eo an Anij ioon laļ in.

Jen koba āinwōt ro Rekwojarjar ilo aolepān peļaakin laļ in n̄an kōm̧m̧ane ta eo ekkar n̄an bōk būruwōn leļo̧k, m̧ōņōņō em̧ool ilo kōjeraam̧m̧an ko me naaj kakke “aikuj” me rej waļo̧k. Aō jar n̄an kajjojo iaad ej juon akweļap n̄an bōk bōro n̄an ineek eddodo ko ad, kijejeto ko remenin aikuj, im bōk kōņaan eo n̄an kōm̧m̧an im leļo̧k. Ij kallim̧ur bwe Irooj eban kōtļo̧k bwe kwon aikuj. Būruwōn leļo̧k en obrak kōn kam̧m̧oolol bwe Rilo̧mo̧o̧r ekar “juon em̧m̧aan in būrom̧ōj, im en̄taan kōn būrom̧ōj”⁴ bwe jen jab aikuj in bōk “kab eo emeo̧.”⁵ Ilo m̧ōjņo̧ im likjab ko ad, im kōn er, Ej letok wōt Pein, eo kar dilaki kōn wōt kōj. Enaaj kotak kōj eļan̄n̄e jej kōņaan itok n̄an meram in gospel in An, bōk E, im kōtļo̧k E bwe En kakke ad “aikuj.”

Ij kwaļo̧k aō kam̧ool kōn iakwe eo eļap me jej maron̄ kwaļo̧k āinwōt rijilōk im rikaļoor ro an Irooj Jisōs Kraist. Ij iakwe im rejtak Būreejtōn Thomas S. Monson āinwōt rikanaan eo an Anij ilo laļ in. Bok in Mormon ej bar juon kallim̧ur in Jisōs Kraist n̄an laļ in, im ij kūr aolep n̄an riiti im pukot ennaan ko an n̄an mour eo am make. Aolep ro rej bōk kūr eo an Irooj n̄an itok n̄an E naaj lo aenōm̧m̧an, iakwe, im meram. Jisōs Kraist ej ad Riwaanjon̄ok eļap im ad Ripinmuur. Kōn wōt Jisōs Kraist, im kōn Pinmuur eo An ekabwilōn̄ōn̄, jej maron̄ bōk mour indeeo. Kōn men kein Ij kwaļo̧k aō naan in kam̧ool ilo Etan ekwojarjar, em̧ool Jisōs Kraist, amen.