M̧ool eo an Aolep Men ko

Jej itok joteen in kōn kōjatdikdik im tōmak bwe ilo jet wāween, jenaaj ro̧o̧l kōn kajoorļo̧k im jeraam̧m̧an jān Jetōb Kwojarjar, eo ej katakin m̧ool eo.¹ Menin ej kōn ad kajjojo pukōt m̧ool eo me ikōņaan kōnono kake.

Ke iaar juon likao, eaar lōn̄ aō kajjitōk ko kōn Kabun̄ in. Jet iaan kajjitōk ko aō rekar jān m̧wilaļ in būruwō. Jet raar jab im raar jarjar jān pere ko an ro jet.

Ekōn emakijkij aō ekōnono kōn kajjitōk ko aō ippān jinō. Ijeļā bwe eaar maron̄ arromeļo̧k bwe elōn̄ iaan kajjitōk ko aō rekar ļap im jān m̧wilaļ in būruwō. Ij ļōmņak liin eaar inepata jidik ilo kajjitōk ko me eaar jab lukkuun jān būruwō im eļapļo̧k aer kajjitōk in kōbauwe. Mekerata, eaar jab kōm̧m̧an bwe in inepata kōn an wōr aō kajjitōk ko. Ekōn ron̄jake im kajjieon̄ uwaaki. Ke eaar arromeļo̧k bwe eaar ba aolep men ko me emaron̄ in kar im bwe eaar wōr wōt aō kajjitōk, ekōn ba āinwōt in: “David, ej juon kajjitōk em̧m̧an. Ilo iien eo kwoj kappukōt im riit im jar kōn uwaak eo, etke kwojjab kōm̧m̧ani men ko kwojeļā kwoj aikuj kōm̧m̧ani im jab kōm̧m̧ani men ko kwojeļā kwojjab aikuj in kōm̧m̧ani?” Menin eaar erom̧ jon̄ak eo ilo aō kappukōt m̧ool eo. Jān ekkatak, jar im kōjparok kien ko, iaar lo bwe ewōr uwaak ko n̄an aolep kajjitōk ko aō raorōk. Iaar barāinwōt lo bwe n̄an jet kajjitōk, jab jokod ilo tōmak, kijenmej, im revelesōn rej menin aikuj.²

Jinō eaar letok eddo eo an kōļapļo̧k tōmak im kappukōt uwaak ko ilo n̄a. Eaar jeļā bwe uwaak ko raorōk renaaj kar itok jān aō pukōt m̧ool ilo wāween eo me Jemedwōj Ilan̄ eaar kōmeļeļeik. Eaar jeļā bwe iaar aikuj in pukōt m̧ool eo. Eaar jeļā bwe iaar aikuj in m̧ool ilo kajjitōk ko aō im m̧ōņōņō in jerbale ta eo em̧ōj aō kar jeļā kadede bwe em̧ool. Eaar jeļā bwe iaar aikuj in ekkatak im jar im bwe iaar aikuj in kalōk eļapļo̧k kijenmej ilo aō kar kappukōt uwaak ko jān Irooj. M̧ōņōņō in kijenmej ej m̧ōttan kappukōt m̧ool eo ad im m̧ōttan jon̄ak eo an Irooj ilo kwaļo̧k m̧ool eo.³

Āliktata iaar itok n̄an jeļā bwe jinō eaar katakin eō jon̄ak eo an Jemedwōj Ilan̄ ilo pukōt m̧ool eo. Tōmak eaar eddōk, uwaak ko raar jino itok, im iaar bōk juon kūr n̄an mijen.

Eaar wōr juon iien, im̧aan tata ilo mijen eo aō, ke iaar jeļā bwe iaar aikuj in jeļā eļan̄n̄e Kabun̄ in eaar m̧ool im Josep Smith eaar juon rikanaan an Anij. Iaar en̄jake ilo alikkar ta eo Būreejtōn Thomas S. Monson eaar kwaļo̧k ilo kweilo̧k eo eļapļo̧k ad: “N̄e ejjeļo̧k juon am̧ naan in kam̧ool epen kōn men kein, kōm̧m̧ane men eo emennin aikuj n̄an bōke. Eaorōk n̄an kwe bwe en wōr juon am̧ make naan in kam̧ool ilo iien kein reppen, bwe naan in kam̧ool an ro jet renaaj ļōn̄aj eok ium̧win jidik wōt iien.”⁴ Iaar jeļā ta eo eaar menin aikuj. Iaar aikuj in riiti Bok in Mormon kōn juon bōro em̧ool, kōn lukkuun kōttōpar, im kajjitok ippān Anij eļan̄n̄e em̧ool.

Ron̄jake kallim̧ur eo ekabwilōn̄lōn̄ an Jemedwōj Ilan̄ kar letok kōn rikanaan Moronai: “Im n̄e kom̧ naaj būki men kein, ikōņaan kōketak kom̧ bwe kom̧in kajjitōk ippān Anij, Jemān Indeeo, ilo etan Jisōs Kraist, eļan̄n̄e men kein rej jab m̧ool; im eļan̄n̄e kom̧ naaj kajjitōk kōn juon bōro em̧ool, kōn lukkuun kōttōpar, im ewōr tōmak ilo Kraist, Enaaj kwaļo̧k m̧ool in n̄an kom̧, jān kajoor eo an Jetōb Kwōjarjar.”⁵

N̄an bōk ta eo ekar pād ilo Bok in Mormon, iaar aikuj in riiti. Iaar jino jān jinoin bok eo im riiti aolep raan. Jet ekanooj m̧ōkaj aer bōk juon kam̧ool. N̄an jet, enaaj bōk eļapļo̧k iien im elōn̄ļo̧k jar im maron̄ koba riiti bok eo jet alen. Iaar aikuj in riiti aolepān bok eo m̧okta jān aō kar bōk kam̧ool eo kar kallim̧ur kake. Mekarta, Anij eaar kwaļo̧k m̧ool eo an n̄an eō kōn kajoor eo an Jetōb Kwojarjar.

Ilo jōnōļ in mijinede eo aō, iaar kōmeļeļeik lan̄lōn̄ eo aō ilo jeļā m̧ool eo barāinwōt ilo paotok eo aō make kōn kallim̧ur eo im lukkuun kōttōpar eo n̄an jerbale m̧ool eo Iaar bōke. Iaar je: “Iaar akweļap ippān Jema ilo Lan̄ im ippa make n̄an kōm̧m̧ane ijo em̧m̧an tata ippa, n̄an leļo̧k 100 bōkjāān to̧o̧n wōt aō mour, jekdo̧o̧n ta kar kajjitōk ippa, inaaj kōm̧m̧ane, ak n̄an kiiō epād Ippa aolepān mijen eo aō im inaaj kōm̧m̧ane juon mijen em̧m̧an, juon eo me eban nana aō mour kake, ak ejjab n̄an n̄a, n̄an Irooj. Ij iakwe Irooj, im ij iakwe jerbal eo, im ij jar bwe en̄jake eo ejjamin n̄an jidik ilo̧k jān eō.”

Iaar itok n̄an jelā bwe jab kūjeļo̧k ilo lin̄ūr im kijejto ejjab bōjrak n̄an ukweļo̧k im kōjparok kien ko rej aikuji n̄an kōm̧m̧an bwe en̄jake eo en jab ilo̧k. Būreejtōn Monson eaar ba, “Naan in kam̧ool eo ej aikuj dim im kajoorļo̧k itok jān pokake kien ko an Anij im jān jar aolep iien im ekkatak jān jeje ko Rekwojarjar.”⁶

Ium̧win iiō ko iaar kajjitōk ippān mijenede ro im jodikdik ro ipeļaakin laļ in ekōjkan aer kar jino kijejeto eo aer make n̄an pukōt m̧ool eo im bōk juon naan in kam̧ool. Enan̄in kōn ejjeļo̧k kōtmene, rej uwaak bwe kijejeto eo aer make n̄an bōk juon naan in kam̧ool an juon make eaar ijjino kōn jokālet an juon make n̄an riiti Bok in Mormon jān jinoin im kajjitōk ippān Anij eļan̄n̄e ej m̧ool. Ilo kōm̧m̧ane menin, raar kālet n̄an “kōm̧m̧an” ijello̧kin “n̄an erom kipel n̄an kōm̧m̧an”⁷ jān pere ko an ro jet.

N̄an jeļā m̧ool eo, jej aikuj in mour kōn gospel eo im “mālejjon̄” ioon naan eo.⁸ im “mālejjon̄”⁹ ioon naan eo.” Kar kakkōl kōj n̄an jab jum̧ae Jetōb eo an Irooj.¹⁰ Ukweļo̧k, koba ippān juon kijejeto n̄an kōjparok kien ko, ej juon m̧ōttan aorōk ilo an juon armej kappukōt m̧ool eo.¹¹ Ilo m̧ool, jemaron̄ aikuj in kōņaan “julo̧k aolep” jerawiwi ko ad n̄an maron̄ jeļā m̧ool eo.¹²

Kar kakien kōj n̄an “kappukot jeļā, em̧ool jān katak im barāinwōt jān tōmak” im n̄an “kappukot … jān bok ko rem̧m̧antata naan ko in mālōtlōt.”¹³ Ad pukōt m̧ool eo aikuj in pedped ioon “bok ko rem̧m̧antata” im kein jipan̄ ko rem̧m̧antata. Ilubwilijin ko rem̧m̧antata rej jeje ko rekwojarjar im naan ko an rikanaan ro remour.

Būreejtōn Monson eaar kajjitōk ippād kajjojo n̄an “kōm̧m̧ane [ta] men eo emennin aikuj” n̄an bōke im dāpij naan in kam̧ool eo ekajoor.¹⁴ Ta menin aikuj eo n̄an kam̧wilaļļo̧k im kōkajoorļo̧k naan in kam̧ool eo am̧? Kajjojo ewōr ad eddo make n̄an kōm̧m̧ane ta eo emenin aikuj n̄an bōk im dāpij juon naan in kam̧ool ekajoor.

Kijenmej ilo kōjparok bujen ko ad ilo ad “kōm̧m̧ane [ta] eo emennin aikuj” n̄an bōk uwaak ko jān Irooj ej m̧ōttan jon̄ak eo an Anij n̄an katak m̧ool eo. Eļaptata n̄e men ko rej pen, emaron̄ menin aikuj n̄an ad “ajeļo̧k er ilo itok-limo im kōn ineem̧m̧an n̄an aolep ankilaan Irooj.”¹⁵ Ineem̧m̧an ilo kōjparok bujen ekōļapļo̧k ettā eo ad, kam̧wilaļļo̧k ikdeelel eo ad n̄an jeļā m̧ool eo, im kōtļo̧k an Jetōb Kwojarjar “n̄an tōl [kōj] ilo iaļ ko an jeļāļo̧kjeņ bwe [jān] maron̄ jeraam̧m̧an, jeban im lo oņaake.”¹⁶

Lio ippa, Mary, im n̄a ewōr juon eo kōm kanooj iakwe me eaar kakkōt eļap wōt ilo mour eo an kōn jet men ko an Kabun̄ in. Liin ej iakwe gospel eo, im ej iakwe Kabun̄ in bōtaab ej wōr wōt an kajjitōk ko. Liin eaar liāp ilo tampeļ, ej niknik ilo Kabun̄ in, kakūrm̧ool kūr ko an, im ej juon jinen im lio pālele eo em̧m̧an. Ium̧win iiō ko liin eaar kajjieon̄ kōm̧m̧ane men ko me eaar jeļā rejimwe im jab kōm̧m̧ani men ko me eaar jeļā rebōd. Liin eaar kōjparok bujen ko an im wōnm̧aanļo̧k wōt ilo kappukōt. Jet iien liin eaar kam̧m̧oolol kōn an bōk kajoor jān tōmak an ro jet.

Ejjab to bisop eo an eaar kajjitōk n̄an ioon e im ļeo pāleen. Eaar kajjitōk ippāer n̄an bōk juon ijjitōn̄ an tampeļ n̄an jerbal āinwōt ribōk jikin n̄an ro rej aikuj kain̄i ko an tampeļ. Kūr in eaar kailbōk erro, bōtaab raar bōke im jino jerbal eo aer ilo im̧weo im̧ōn Irooj. Ļaddik jodikdik eo nejierro eaar bōk kuņaan ilo menmenbwij an baam̧le kapok ko im lo juon etan baam̧ļe eo me kain̄i ko an tampeļ raar jab dedeļo̧k. Āliktata raar jerbal āinwōt ribōk jikin eo im kar kōm̧m̧ane kain̄i ko n̄an armej in im baam̧ļe eo an. Ke raar bukwelōlō ilo lokatok eo im liāpe kain̄i eo kar kōm̧m̧ane, kōrā in em̧m̧an, ekijenmej me eaar kappukōt ium̧win juon iien aitok eaar wōr an iien em̧m̧an ilo jetōb eo me eaar itok n̄an jeļā bwe tampeļ im kain̄i ko kōm̧m̧ani ilowaan rej m̧ool im lukkuun. Liin eaar kūrļo̧k jinen im jiron̄ e kōn en̄jake eo an im ba bwe ilo an wōr wōt an kar kajjitōk ko, liin eaar jeļā bwe tampeļ ej m̧ool, bwe kain̄i ko an tampeļ rej m̧ool, im bwe Kabun̄ in ej m̧ool. Jinen eaar jan̄ kōn kam̧m̧oolol Jemedwōj Ilan̄ eo ej iakwe, kijenmej im n̄an juon nejin leddik eo me ej kijenmej wōt ilo an kappukōt.

Kijenmej kōjparok bujen ej bōktok kōjeraam̧m̧an ko an lan̄ n̄an mour ko ad.¹⁷

Em̧ōj aō lo kaenōm̧m̧an eo eļap ilo kallim̧ur eo an Irooj bwe “Jān kajoor eo an Jetōb Kwōjarjar kom̧ maron̄ jeļā m̧ool eo an men ko otemjeļo̧k.”¹⁸ Ilo jab jeļā aolep men, jemaron̄ jeļā m̧ool eo. Jemaron̄ jeļā bwe Bok in Momrom ej m̧ool. Ilo m̧ool, āinwōt an Būreejtōn Russell M. Nelson kar katakin kiiō eraelep, jemaron̄ “en̄jake itum̧wilaļ in ‘m̧ōttan eo itulowa tata’ an būruwōd [lale Alma 13:27], bwe Bok in Mormon eo ej alikkar naan an Anij.” Im jej maron̄ “en̄jake lukkuun m̧wilaļ in bwe jejjamin kōņaan mour em̧ool juon raan ilo an ejjeļo̧k.”¹⁹

Jemaron̄ jeļā bwe Anij ej Jemed, eo ej iakwe kōj, im bwe Nejin, Jisōs Kraist, ej ad Rilo̧mo̧o̧r im Ripinmuur. Jemaron̄ jeļā bwe membōr ilo Kabun̄ eo An rej aiku m̧ōņōņō im bwe bōk kwojkwoj eo wiik otemjej enaaj jipan̄ kōj im baam̧le ko ad ineem̧m̧an. Jemaron̄ jeļā bwe kōn kain̄i ko an tampeļ , baam̧le ko relukkuun maron̄ ippān doon indeeo. Jemaron̄ jeļā bwe Pinmuur eo an Jisōs Kraist im kōjeraam̧m̧an ko kōn ukweļo̧k im jeorļo̧k bōd rej m̧ool im lukkuun. Jemaron̄ jeļā bwe rikanaan eo ad jitōn bōro, Būreejtōn Thomas S. Monson, ej rikanaan eo an Irooj im bwe rikakpilōlōk ro an im ro uwaan Doulul eo an Jon̄oulruo Rijilōk ro rej rikanaan ro, rilolo ro, im ribōk revelsōn ro.

Aolepān menin ijeļā bwe rem̧ool im kwaļo̧k kam̧ool eo aō ilo etan Jisōs Kraist, amen.