Iaļ eo Epen Ej Wōnm̧aanļo̧k Wōt!
Juon iaļ epen n̄an Jemedwōj iIlan̄ ej lukkuun iaļ eo epen an mour ko ad.
Jibukwi Jiljilimjuonn̄oul Jiljilimjuon iiō remootļo̧k, Brigham Young ekar to̧o̧re mejān ipeļaakin Salt Lake Valley kein kajuon im ba, “En̄in ej jikin eo ejjejjet!”1 Ekar jeļā jikin eo kōnke Irooj ekar kwaļo̧ke n̄an e.
Jān 1869, elōn̄ļo̧k jān 70,000 Rikwojarjar ro rekar bōk ejja iaļ in epen. Mekarta oktak ko rellōn̄ aer ilo kajin, m̧anit, im ļāmoren, rekar kwaļo̧k juon naan in kam̧ool kōn Jemān, Nejin, im Jetōb Kwojarjar eo, Jepļaaktok eo an gospel eo an Jisōs Kraist, im juon ikdeleel n̄an kalōk Zaion—juon jikin aenōm̧m̧an, lem̧ōņōņō, im aiboojoj ilo kōpopo n̄an Itok eo Kein Karuo an Rilo̧mo̧o̧r eo.
Ilubwilijin Rikwojarjar rein rekar itaaktok ilo Utah Jane Manning James—leddik eo juon rikalbuuj eo aenemkwoj, juon rioktak tok n̄an Kabun̄ eo ekar jepļaaktok, im juon rikaļoor ekabwilōn̄lōn̄ eo ekar jelm̧ae apan̄ ko reppen. Sister James ekar tiljek wōt āinwōt Rikwojarjar in Raan-ko āliktata m̧ae iien ekar mej ilo 1908.
Ekar jeje: “Ikōņaan ba bwe ijin, en̄in tōmak eo aō ilo gospel eo an Jisōs Kraist, āinwōt katakin jān Kabun̄ eo an Jisōs Kraist im Armej ro Rekwojarjar ilo Raan-ko Āliktata, ej kajoor rainin, aaet, ej kajoorļo̧k jān raan eo me ikar jinoin peptaij. Ij kōļļā juon m̧ōttan jon̄oul eo aō im joortak, kōjparok naan in māletlet, ej m̧ōkaj aō kiki im m̧ōkaj aō jerkak, ij kajjieon̄ ilo wāween in em̧ōjņo̧ n̄an kwaļo̧k juon waanjon̄ak n̄an aolep.”2
Sister James, āinļo̧k wōt elōn̄ Rikwojarjar ro jet, ejab wōt kalōk Zaion kōn bōtōktōk, menokadu, im dānin kōmjaļaaļ ak ej barāinwōt pukot kōjeraam̧m̧an ko Irooj jān an mour kōn pedped ko an gospel eo jon̄an wōt an maron̄ ilo an dāpij tōmak eo an n̄an Jisōs Kraist—rikōmour eo eļap an aolep eo ej m̧ool in pukot E.
Rikwojarjar ro jinoin rekar jab wāppen, ak rekar ejaake juon pedped eo me kōj jej kalōk baam̧le ko im juon jukjukin pād eo ej iakwe im kōjparok bujen ko, eo ej waļo̧k ilo elōn̄ bwebwenato ko ipeļaakin laļ in kōnke kalim̧ur ko ad n̄an Jisōs Kraist im kijejeto im jipan̄ n̄an jipan̄ ro riturir im ro rettoļo̧k.3
Būreejtōn Eyring, imaron̄ ke kakkobaba n̄an kam̧oolol n̄an jon̄oul taujin iaļo̧ jōōt enjeļ ro rej jerbal ilo Texas, Mexico, im bar jikin ko jet kautiej eo am̧.
Ewōr juon aō tōmak em̧wilaļ bwe eļan̄n̄e jej luuji korak in iakwe ko ad n̄an ro rekar etal m̧oktaļo̧k jān kōj, ekoba paineer ro jibūd im jim̧aad, jenaaj luuji menin elukkuun in eaiboojoj. Ikar kōnono kōn “Tōmak ilo Aolep Bun̄tōn Nee ko” ilo tōre ko etto im naaj wōnm̧aanļo̧k wōt ilju im jekļaj kōnke ijeļā bwe diktak in epepen ko rej aikuj in bōk ejja kain tōmak in ippān kar Rikwojarjar ro m̧okta ilo Irooj Jisōs Kraist im jepļaaktok eo an gospel eo.4
Paineer ro jibū im jim̧aaō etto rekar pād ilubwilijin paineer ro retiljek rekar kanōk waan bwilbwil ko, waikōn ko, im etetal ļo̧k n̄an Utah. Er, rekar āinwōt Sister Jane Manning James, eo ekar m̧wilaļ an tōmak ilo aolep bun̄tōn nee ko neer āinwōt iaļ eo an make epen.
Jōnōl ko aer rekar obrak kōn meļeļe ko kōn mour ko reppen, kwōle, im nan̄inmej ko im barāinwōt naan in kam̧ool ko kōn tōmak eo aer ilo Anij im jepļaaktok in gospel eo an Jisōs Kraist.
Ekar jet wōt m̧weier ak rekar lan̄lōn̄ kōn eļap kōjeraam̧m̧an ko jān jem̧doon ko rekar loe ilo Kabun̄ eo an Jisōs Kraist. ̄N̄e remaron̄, rekar kotak ro rekar jool im kar kōjeraam̧m̧an rinan̄inmej ro kōn jerbal in jipan̄ n̄an bar juon im jān priesthood eo an Anij.
Kōrā ro jeid im jatid ilo Cache Valley, Utah, rekar jipan̄ļo̧k Rikwojarjar ro ilo jitbōn Doulul eo an Kōrā ro n̄an “jerbal ippān doon n̄an jipan̄ ro rej pād ilo aikuj.”5 Jibū jibū Margaret McNeil Ballard ekar jerbal ikōjaan ļeo pāleen, Henry, ke ļeo pāleen ekar tōl āinwōt juon bisop an Logan Second Ward ium̧win 40 iiō.Margaret ekar būreejtōn eo an Doulul eo an Kōrā ro ium̧win 30 iiō ko. Ekar kadeļo̧n̄ rijeramōļ ro n̄an m̧weo im̧weer, rinan̄inmej ro, im kōrā ro emej pāleen im ajri ro ejjeļo̧k jineer im jemāer, im aaet kanuknuk rimej ro kōn nuknuk in tampeļ ko aer.
Mekarta ekkar im eaorōk n̄an keememej bwebwenato in iaļ eo epen an Kein 19 epepen an Mormon paineer ro, jej aikuj in keememej bwe “iaļ eo epen kōn mour ej wōnm̧aanļo̧k wōt!” bwe kōj kajjojo ilo ad kam̧ool ad make “tōmak ilo aolep bun̄tōn nee.”
Rioktak ro rekāāl ejako aer kuktok n̄an jikin kōppād an paineer ro ilo iturilik in Amedka. Ijjelo̧kin, rioktak ro rej kuktok n̄an jarlepju ko aer ilo laļ ko aer, ijoko me Rikwojarjar ro rej kabun̄jar n̄an Jemedwōj Ilan̄ ilo etan Jisōs Kraist. Ippān elōn̄ļo̧k jān 30,000 jarlepju ko rekar ejaak ipeļaakin laļ in, aolep rej kuktok ippān doon n̄an Zaion ko aer make. Āinwōt an jeje ko rekwojarjar je, “Bwe en̄in ej Zaion—ro erreo burueer.”6
Ilo ad etetal ilo iaļ in mour, jej bōk mālijjon̄ n̄an lale eļan̄n̄e jenaj “kom̧m̧ani aolep men ko jabdewōt [Irooj ekar] jiron̄.”7
Elōn̄ iaad rej pād ilo iaļ in elolo ko rōkabwilōn̄lōn̄—tōl n̄an kūrm̧ool ko aer make im meļeļe ilo jetōb. Jet iaad, ijoke, rej pād ioon juon iaļ eppen me ej tōlļo̧k n̄an būrom̧ōj, jerawiwi, metak, im ebbeer.
Ilo jekjek in, kajjitōk ippem̧ make: Ewi jem̧ļo̧kin iaļ eo am̧? Ia eo bun̄tōn neem̧ ej bōkļo̧k eok n̄an e? Im iaļ eo am̧ ej ke tōlļo̧k eok n̄an “kōjeraam̧m̧an ko rellōn̄” Rilo̧mo̧o̧r eo ekar kallim̧ur kaki?8
Juon iaļ epen n̄an Jemedwōj iIlan̄ ej lukkuun iaļ eo epen an mour ko ad, im ej wōnm̧aanļo̧k wōt kajjojo raan, kajjojo wiik, kajjojo allōn̄, im kajjojo iiō ilo ad kōļapļo̧k tōmak eo ad ilo E im ilo Nejin Jitōn Bōro, Jisōs Kraist.
Jej aikuj mejmejkaruo ia eo bun̄tōn nee ko need ilo mour in rej bōk kōj n̄ane. Jej aikuj lale im eo̧ron kapilōk an Jisōs n̄an rikaļoor ro An ke Ekar uwaake kajjitōk kein: “Kwōn kōnnaanōk kōm n̄āāt men kein re naaj waļo̧k? Im ta eo kakōļļan Am̧ naaj itok im jem̧ļo̧kōn laļ?
“Im Jisōs eaar uwaak im ba n̄an er, Kom̧in kōjparok bwe en ejjeļo̧k armej ej m̧oņe kom̧.”9
Rainin ij āliji kapilōk eo m̧okta jān ritōl ro an Kabun̄ in.
-
Ro jeiū im jatū, kōjparok katak ko an Kraist rerreo im jāmin po ilo moņ jān ro rej ukōt katak ko. Gospel eo an Jemān im Nejin ekar jepļaaktok jān Josep Smith, rikanaan eo an epepen in āliktata.
-
Jab ron̄jake ro rejjan̄in ekkapit/ak kōjonolo̧k er n̄an kūr ko aer ilo Kabun̄ in im rej kile er kōn ekajet eo ejim̧we an membōro uwaan Kabun̄ in.10
-
Kom̧win ekkōl kōn doulul ko, kūrub ko, ak kajjojo armej ro renej bōk uwaak ko rettiņo̧ n̄an kajjitōk ko an katak ko me rej ba rijilōk ro im rikanaan ro rainin rejjab ak meļeļe.
-
Jab ron̄jake ro rej kareel eok kōn n̄an bōk m̧weie. Membōr ro ad em̧ōj aer luuji eļap jāān, kōn menin kōjparok.
Ilo jet jikin ko, elōn̄ armej ro rej kalimjek tulikin kōkkaļļe eo im pukot jeļāļo̧kjeņ eo ettiņo̧ ilo m̧akūtkūt ko eļap wōņāer im rebōd n̄an kōmour im rie.
Juon naan in kōmlet an Kabun̄ in, kar diwōjļo̧k juon iiō em̧ootļo̧k: “Kōmij rōjan̄ membōr ro an Kabun̄ in n̄an ekkōl kōn ami bōk koņaami ilo jabdewōt kūrub ro rej kallim̧ur—ilo ukōt n̄an jāān—kōmour ko rekabwilōn̄lōn̄ ak bwe kōļļā kein ewōr kilen aer bōk kajoor in kōmour itulin in ritōl ro an priesthood em̧ōj kōmālim er.”11
Bok in Bōk Meļeļe eo an eo an Kabun̄ in ej kapilōk: “Ro uwaan rej aikuj in jab kōjerbal ak kaminene ājmour ko im rej katakin ak remo̧ kajjitōk kaki. Ritōl ro an ijo rej aikuj in kapilōke ro uwaan im ro ewōr jorrāān in ājmour ippāer n̄an kōnono ippān ro remaron̄ im ņakņōk ilo iminene im remālim ilo laļ ko reļļap ijo im raar kamminene ie.”12
Ro jeiū im jatū, kom̧win māletlet im ekkōl bwe kain imminene kein remaron̄ kareel ak remaron̄ ļap aer kōmetak n̄an jetōb im ānbwin eo.
N̄an paineer ro etto, make ļo̧k iaer im un̄n̄are peid make rekar lukkuun aorōk, ak maron̄ eo aer jān jukjukin pād eo ekar aorōk. Rekar jerbal ippān doon im jipan̄ doon anjo̧ jān apan̄ ko an ānbwin im en̄jake an iien ko aer. N̄an em̧m̧aan ro, ekar wōr doulul in priesthood, im kōrā ro rekar jerbal jān Doulul eo an Kōrā ro. Waļo̧k kein rej jan̄in oktak ilo raan kein ad.
Doulul eo an Kōrā ro im doulul ko an priesthood rej kake n̄an ājmour eo an membōr ro io jetōb im ānbwin.
Pād wōt ilo iaļ an gospel eo ilo “tōmak aolep bun̄tōn nee ko” bwe kom̧in maron̄ jepļaakļo̧k n̄an im̧aan mejān Jemedwōj Ilan̄ im Irooj Jisōs Kraist. Irooj ej Rilo̧mo̧o̧r eo ad eaiboojoj. E ej Ripinmuur eo an Laļ. Jej aikuj kautiej Etan ekwojarjar im jab bōd in kōjerbale ilo jabdewōt wāween, aolep iien kajieon̄ in kōjparok kien ko An. Eļan̄n̄e jej kōm̧m̧ane menin, Enaaj kōjeraam̧m̧an kōj im tōlļo̧k kōj n̄an m̧weo im̧ōd ilo kōjparok.
Ij karuwaineneik aolep ro rej ron̄jake aō kōnono n̄an karuwaineneik im nōbar jabdewōt eo ej make ejaake iaļ eo epen an rainin, jekdo̧o̧n ia remaron̄ pād ie ilo iaļ in itok itak in aer.
Jouj im keememej ejjeļo̧k kōjeraam̧m̧an jabdewōt emaron̄ kwaļo̧k eļapļo̧k jān ennaan eo an Jepļaaktok eo, eo n̄e rej bōke im mour kake, kallim̧ur ko ejjeļo̧k jem̧ļokin lan̄lōn̄ im aenōm̧m̧an—aaet mour indeeo. Jen kōjerbal maron̄ eo ad, kajoor, im naan in kam̧ool ko n̄an jipan̄ mijenede ro ad kappukot, katakin, im peptaiji ajri ro nejin Anij bwe ren maron̄ bōk kajoor eo an katak ko an gospel ej tōl mour ko aer aolep raan.
Jej aikuj in dāpij ajri ro nejin Anij ilo tūriam̧o̧ im joļo̧k jabdewōt ekajet, ekoba kōjdat, m̧wil nana, im utiej bōro. Jen ba bwe jej m̧ool in tōmak kōjeraam̧m̧an ko an jepļaaktok eo an gospel eo an Jisōs Kraist n̄an aolep ajri ro nejin Anij.
Ij kam̧ool bwe “iaļ eo epen ej wōnm̧aanļo̧k wōt,” im ij kūrtok kom̧ n̄an pād wōt ioon iaļ an gospel eo āinwōt ami bun̄ m̧aanļo̧k pukot ļo̧k aolep ajri ro nejin Anij ilo iakwe im tūriam̧o̧ bwe jen maron̄ ippān doon kōm̧m̧an an būruwōd erreo im peid erreo n̄an bōk “elōn̄ kōjeraam̧m̧an ko” rej kōttar aolep ro rej m̧ool in iakwe Jemedwōj Ilan̄ im Nejin Jitōn Bōro, kōn menin ij ettā im jar ilo etan Jisōs Kraist, amen.