Jilu Kōrā Jemjānjemjati
Jej bōk eddo in kōj make āinwōt ad ļoor e, im in edik—eļan̄n̄e jabdewōt—ej n̄an kōm̧m̧an ilo wāween eo ro jet rej kōm̧m̧an n̄an kōj.
Kōrā ro rejitōn bōro, ro m̧ōtta, n̄an jino kweilo̧k in eļap kōn juon m̧wein̄an an kōrā ro ipeļaakin laļ in eiaboojoj im kabwilōn̄lōn̄. Baj pijaiki ilo ļōmņak eo am̧, aolep leddik im kōrā ro jān aolep iiō ko, jekjek ko, laļ ko, im kajin ko rej kuk ippān doon ilo tōmak im iakwe n̄an Irooj Jisōs Kraist.
Ilo am kar ioon rikanaan eo ad ejitōn bōro, Būreejtōn Thomas S. Monson, ekar kwaļo̧k n̄an kōm̧ ewi jon̄an an iakwe Irooj. Im ijeļā bwe Būreejtōn Monson ej kam̧m̧oolol kōn iakwe eo am, jar eo am, im am kijejeto n̄an Irooj.
Etto im etto ilo juon āne ettoļo̧k ekar jokwe juon baam̧le ewōr jilu kōrā ro jeid im jatid.
Kōrā eo kein kajuon ekar būrom̧ōj. Aolepān ānbwinnin jān bo̧tin n̄an jibūn n̄iin im jān ānbwinnin n̄an lo̧o̧bden jim̧ūn neen rekar jab lukkuun jejjet n̄an e. N̄e ej kōnono, naan ko an jet iien reidaabtōk, im armej rej kajirere. N̄e juon armej ej kōnanaiki ak “meļo̧kļo̧k” in karuwaineneik e n̄an juon men, enej kil būrōrō, etal jān ijo, im pukōt juon jikin ettiņo̧ me enaaj joļo̧k an illu ie im kōļmenļo̧kjeņ etke mour ej oktak im lukkuun nana im jab kam̧ōņōņō.
Kōrā eo kein karuo ekar llu. Ekar ļōmņak kōn e make āinwōt emāletlet, ak aolep iien ebar wōr juon eutiej jikoor ko an ilo teej ko ilo jikuuļ. Ej ļōmņak e ekōjakjak, elikatu, ettōrejabjab, im kalimomo. Ak aolep iien, ak ebar wōr juon eļapļo̧k an ekōjakjak, likatuļo̧k, etōrjabjabļo̧k, ak kalimomoļo̧k.
Ej jan̄in kar bōk kein kajuon ilo jabdewōt men, im menin ekar jab kijenmej kake. Mour en kar jab āindein!
Jet iien ej kadiwōjļo̧k n̄an ro jet, im āinwōt bwe aolep iien epojak kadede in inepata kōn juon men ak ippān juon armej.
Aaet em̧ool, menin ekar jab kōm̧m̧an an armej kōņaan e ak bun̄bun̄. Jet iien ej kij dōkā in n̄iin, nukwij adiin pein, im ļōmņak, “Mour in eļap an ālikinjepjep eō!”
Innām kōrā eo kein kajilu. Ejjab āinwōt kōrā eo ebūrom̧ōj im illu, liin eaar—jo̧kne, m̧ōņōņō Im ekar jab kōnke ekar māletletļo̧k ak deeoļo̧k ak kōrā maron̄ jān kōrā ro jemjān jatin. Jaab, armej jet iien rej kōjekdo̧o̧n e ak dike e barāinwōt. Jet iien rej kōm̧m̧an kōjak kōn nuknuk ko ej kōņaki ak men ko ekar ba. Er jet iien rekar ba men ko rejjab em̧m̧an kōn e. Ak ekar jab kōtļo̧k an men kein aolep kaenepataiki.
Kōrā in em̧m̧an al ippān. Ekar jab em̧m̧an ainikien an al, im armej rej kajirere kake, ak ekar jab bōjrak. E kijon̄ ba, “Iban kōtļo̧k an armej ro jet im meļeļe ko aer kabōjrak aō al?” Ekijon̄ ba menin.
Lukkuun m̧ool eo bwe n̄e ej wōnm̧aanļo̧k im al ekōm̧m̧an an lio jein kein kajuon būrom̧ōj im lio jein kein karuo illu.
Elōn̄ iiō rekar m̧ootļo̧k, im kajjojo jemjati rein rekar tōpar jem̧ļo̧kin iien mour ko aer ioon laļ in.
Jemjāti eo kein kajuon, eo ekar loe im bar loe bwe elōn̄ ellotaan ko ilo mour in, wōnm̧aanļo̧k wōt im mej ilo an būrom̧ōj.
Jemjāti eo kein karuo, eo aolep raan ej loe juon men ekāāl n̄an dike, ekar mej ilo an illu.
Im jemjāti eo kein kajilu, eo ekar joļo̧k mour eo an al al ko an kōn aolepān an maron̄ im juon ettōn̄dikdik iturin mejān, mej ilo an m̧ōņōņō
Aaet, mour ej jāmin lukkuun pidodo, im armej rej jāmin ļam̧ waan im ukoktak āinwōt jemjāti rein jilu ilo bwebwenato in. Ak bōlen kain waanjon̄ak kein reļļap remaron̄ katakin kōj juon men ippād make. N̄e kwōj āinwōt kōj aolep, komaron̄ kile jimettan in kwe ilo juon, ruo ak bōlen ilo aolep jemjāti rein jilu. Jen lale kajjojo iaer.
Eo Ko̧kkure
Jemjāti eo kein kajuon ekar loe e make āinwōt juon eo kar ko̧kkure—āinwōt armej ej kipel n̄an kōm̧m̧ane.1 Ej āinwōt juon men ej itok ālikin bar juon men ejjab bōjrak an waļo̧k n̄an e me ekōm̧m̧an an ajimakeke. Kōn loļo̧kjeņ in kōn mour, jemjāti in ekar leļo̧k ioon ro jet kajoor ioon wāween an en̄jake im m̧akūtkūt. N̄e jej kōm̧m̧ane menin, jej m̧akūtkūt kōn jadewōt kōto in katak—im ilo rainin epād social media, meļeļe kein remaron̄ lukkuun bun̄bun̄ im kajoor aer dābdāp.
Sister ro rejitōn bōro, etke kom̧ij aikuj in wijlepļo̧k m̧ōņōņō eo ami n̄an juon, ak juon kurub in armej, eo ejjab lukkuun kea kōn kom̧—ak ami m̧ōņōņō?
N̄e kwōj loe eok make ilo am̧ inepata kōn ta eo ro jet rej ba kōn eok, imaron̄ ke kwaļo̧k waj men in: keememej wōn kwe. Keememej bwe kwe kwōj irooj in m̧weo ilo aelōn̄ in kiin̄ eo an Anij, leddik ro Jined im Jemedwōj Ilan̄, ro rej irooj in aolepān lan̄ ko.
Ewōr ippam̧ jetōb in DNA eo an Anij. Ewōr ippem mennin letok ko rāinjuon me rekar ijjino ilo an kar jetōb eo am̧ kōm̧anm̧an im rekar ejaak ilo tōre eļap im aitok an mour eo am̧ m̧okta. Kwe juon ajri nejin Jemād ilo Lan̄ eo ad etiriam̧o̧ im ejjeļo̧k jem̧ļo̧kin, Irooj in Wōj, Eo ekar kōm̧anm̧an lan̄ ko, ej kajedeede iju ko rej erolool ipeļaakin mejatoto eo ekilep, im ej likūt laļ ko ilo iaļ in ito itak eo aer.
Kom̧ij pād ilo Pein.
Pā ko relukkuun em̧m̧an.
Pā ko eļap iakwe ie.
Pā ko eļap aer kea.
Im ejjeļo̧k juon men jabdewōt emaron̄ ba kōn eok emaron̄ ukōt menin. Naan kein ejjeļo̧k meļeļeier keidi n̄an ta eo Anij ekar ba kōn eok.
Kom̧ij ajri ro Nejin raorōk.
Ej iakwe kom̧.
Mekarta kwōj wōtlo̧k, mekarta kwōj oktakļo̧k jān E, Anij ej iakwe eok. Eļan̄n̄e kwōj en̄jake am̧ jōbwābwe, jojoļāār, ak meļo̧kļo̧k—jab mijak. Serperd eo Em̧m̧an enaaj loe eok. Enaaj likūt eok ioon Aeran. Enaaj bōk eok n̄an kapjuknen.2
Sister ro aō rejitōn bōro, jouj kōm̧m̧an bwe m̧ool kein rekwojarjar ren tūm̧laļļo̧k ilo būruwōm̧. Im kom̧ naaj loe bwe elōn̄ un ko bwe jen jab būrom̧ōj, bwe ewōr ippem̧ mejān kajjik eo ejjeļo̧k jem̧ļo̧kin n̄an kakūrm̧ool.
Rilo̧mo̧o̧r eo ejitōn bōro an laļ ekar letok mour eo An bwe kom̧in maron̄ kālet mejān kajjik in juon men em̧ool. Kom̧ij bōk ioomi Etan; kom̧ij rikaļoor ro An. Im kōn E, kom̧ maron̄ kanuknuk kom̧ make kōn to ko an aiboojoj indeeo.
Rikōjdat Eo
Jemjāti eo kein karuo ekar illu ippān laļ in. Āinwōt leddik eo jein, ekar en̄jake bwe jorrāān ko ilo mour eo an rekar waļo̧k jān bar juon armej. Ekar jekpen ņae baam̧le eo an, ro m̧ōttan, boss eo im rijerbal ro an, police, ro riturin, ritōl ro an Kabun̄ in, ukoktak in an tōrejab, aaet kōļļabļab, im baj jerata. Im kōnono tariņae aolepāer.
Ekar jab kile e make āinwōt juon armej elāj. Oktak eo, ekar en̄jake bwe e baj jojom̧are e make. Aolep armej ro jet, ilo tōmak eo an, rekar im̧we kōn arōk, rekar waan kōlmenļo̧kjeņ ko aer, im kōjdat. Liin, ilo bar juon wāween, ekar im̧we kōn kōņaan ko rem̧m̧an—jim̧we, m̧ool, im iakwe.
Ilo m̧ool, jemjāti eo ekar illu wāween an ļōmņak ejjab āinjuon. Menin kar jeiki jān juon ekkatak me ekar etale apilon̄lon̄ ko kōtaan kūrub ko rej jum̧ae doon. Āinwōt m̧ōttan wōt katak in, rikkatak ro rekar intōrpiuiki Ripalestinian ro im Riisrael ro ilo Middle East, im Ripublican ro im Ridemocrat ro ilo United States. Rekar loe bwe “kajjojo jait ko rekar en̄jake kūrub eo aer make ke [ekar] im̧we kōn iakwe eļapļo̧k jān dike, ak ke armej rekar kajjitikin etke kūrub eo ej jum̧ae er [ekar] kobaļo̧k ilo apilon̄lon̄ in, [er] rekar jitōn̄ļo̧k dike āinwōt [kūrub eo] juon ej uwaak in kareel eo.”3
Ilo bar juon wāween, kajjojo kūrub ekar ļōmņak kōn er make āinwōt “armej ro rem̧m̧an”—jejjet, jouj, im m̧ool. Ilo keidi, rekar loe rijum̧ae eo aer āinwōt “armej ro renana”—rejjab karon̄, rejjab m̧ool aaet nana.
Ilo iiō eo ikar ļo̧tak, laļ in ekar rūm̧ļo̧k ilowaan juon tariņae enana me ekar kōm̧m̧an jan̄ im n̄ii ļaļļaļ im kōm̧m̧an eļap būrom̧ōj n̄an laļ. Tariņae in ekar jerjer jān laļ eo aō make—jān juon armej in armej ro rekar kalikkar jet bar kūrub in armej āinwōt armej nana im rej rōjan̄ armej bwe ren dike er.
Rekar kiil lo̧n̄iin ro rekar dike er. Rekar keidi im kareel ro jet ke renana. Rekar kile er ro renanaļo̧k jān ro renana—aaet ettāļo̧k jān armej. N̄e kwoban kautiej juon kūrub in armej, kwōj āinwōt kwaļo̧k naan im m̧akūtkūt ko renana ņae er.
Ij kajiboluul bōra n̄e ij ļōmņak kōn ta eo ekar waļo̧k ilo 20th epepen in Rijapne ro.
N̄e juon armej ej jum̧ae ak jab errā ippād, ej kōm̧m̧an bwe jen ļōmņak bwe ewōr juon men ebōd ippān. Im jān ijin ej juon bun̄tōn edik n̄an kobaiktok ikdeleel ko renana n̄an naan ko aer im m̧akūtkūt ko.
Aaet, jej aikuj aolep iien jutak kōn ta eo ejim̧we, im ewōr iien jej aikuj kotak ainikied kōn un in. Ijoke, n̄e jenej kōm̧m̧ane ilo illu ak dike ilo būruwōd—n̄e jenej kadiwōjļo̧k bwe ro jet n̄an kōmetak, kajook, ak kaikōn̄ er—kajjieon̄ ko ad rejjab kōm̧m̧an ilo wāppen.
Ta eo Rilo̧mo̧o̧r eo ekar katakin?
“A lo Ij ba n̄an kom̧, kom̧in iakwe ro rikōjdāte kom̧, jouj n̄an ro rej kanejnej e kom̧, im jar kōn ro rej ikkure kake kom̧ im matōrtōre kom̧;
“Bwe kom̧in maron̄ erom ro nejin Jemāmi eo ej pād ilan̄.”4
En̄in ej wāween eo an Rilo̧mo̧o̧r eo. En̄in ej bun̄tōn eo kein kajuon n̄an rube bōbrae ko me rej kōm̧m̧an eļap kōjdat, dike, jepel, im kōmetak ilo laļ in.
“Aaet,” komaron̄ ba, “Inaaj m̧ōņōņō in iakwe rikōjdat ro aō—eļan̄n̄e renej m̧ōņōņō in kōm̧m̧ane ejja wāween in.
Ak ejjab lukkuun wōrtokjān, ej ke? Jej bōk eddo in rikaļoor eo ad make, im in edik—eļan̄n̄e jabdewōt—ej n̄an kōm̧m̧an ilo wāween eo ro jet kōm̧m̧an n̄an kōj. Kōm̧ij kōjatdikdik bwe renaaj meļeļe im jouj im bar kōro̧o̧leļo̧k, ak ad iakwe n̄an er ejeno̧lo̧k jān en̄jake ko aer n̄an kōj.
Bōlen kijejeto eo n̄an iakwe ro rej kōjdate kōj enaaj kōmeraikļo̧k būruweer im kareel er n̄an em̧m̧an. Bōlen rej jāmin naaj. Ak menin ejjab ukōt kallim̧ur eo ad n̄an ļoor Jisōs Kraist.
Kōn menin, āinwōt ro uwaan Kabun̄ eo an Jisōs Kraist, jenaaj iakwe ro rej kōjdate kōj.
Jenaaj anjo ioon illu ak kōjdat.
Jenaaj kobrak būruwōd kōn iakwe n̄an aolep ajri ro nejin Anij.
Jenaaj pukōtļo̧k ro jet im jerbal n̄an er—aaet ro remaron̄ “kōjdat [kōj] im matōrtōr [kōj].”5
Rikaļoor Eo Jej Ba Jej
Jemjāti eo kein kajilu ej bōk jikin rikaļoor eo jej ba ej an Jisōs Kraist. Ekar kōm̧m̧ane juon men eo emaron̄ lukkuun pen n̄an kōm̧m̧ane—ekar lōke Anij men̄e ilo iien an jelm̧ae kōm̧m̧an ko renana im pen. Ilo juon wāween ekar kōjparok tōmak eo an im kōjatdikdik, mekarta kajirere im an armej ņaruwōn. Ekar m̧ōņōņō an mour ejjab kōnke jekjek ko ippān rekar lan̄lōn̄ ak kōnke liin eaar lan̄lōn̄.
Ejjeļo̧k iaad ej tōprak iaļen mour eo an ilo an ejjeļo̧k jum̧ae. Kōn elōn̄ kareel ko rej kajjieon̄ kattoļo̧k kōj, ewi wāween ad dāpij jibadbad eo ad ioon lem̧ōņōņō eo eaiboojoj kar kallim̧ur kake n̄an ro retiljek?
Ij tōmak bwe uwaak eo maron̄ loe ilo juon ettōņak an juon rikanaan taujin iiō ko remootļo̧k. Rikanaan eo etan in Liai, im ettōņak eo ekar jeje ilo Bok in Mormon eo eaiboojoj im kabwilōn̄lōn̄.
Ilo ettōņak eo an, Liai ekar loe melaaj ekilep, im ilo meļaaj in ekar juon wōjke ekabwilōn̄lōn̄, ekar aiboojoj ilōn̄in jabdewōt men. Ekar barāinwōt loe juon kūrub in armej rej etal jibadōkļo̧k wōjke in. Rekar kōņaan in edjon̄e nemān leen wōjke in eaiboojoj. Rekar en̄jake im lōke bwe enaaj leļo̧k n̄an er m̧ōņōņō eo eļap im aenōm̧m̧an.
Ewōr juon iaļ eaidik eo ej tōlļo̧k n̄an wōjke eo, im iturin wōjke eo ekar wōr juon aen in dāpdeb me ekar jipan̄ er pād wōt ioon iaļ eo. Ak ekar barāinwōt wōr juon maroklep eo me ekar kōtab mejāer jim̧or ilo iaļ eo im wōjke eo. Im bōlen kauwōtata eo eļap ekar itok jān juon ainikien kajirere eļļaaj im kajook ej itok jān juon jarlepju eļap im em̧ kileplep ebaake. Kabwilōn̄lōn̄ eo, kajirere eo ekar kareel jet iaan armej ro rekar tōpar wōjke eo im kar m̧ōn̄ā jān leen wōjke eo eaiboojoj im jino kar en̄jake aer jook im jōbwābwe.6
Bōlen rekar jino pere bwe wōjke eo ekar lukkuun aiboojoj āinwōt aer kar ļōmņak e. Bōlen rekar jino kajjitōk m̧ool eo kōn ta eo rekar en̄jake.
Bōlen rekar ļōmņak bwe n̄e renej oktak jān wōjke eo, mour enej pidodoļo̧k. Bōlen armej reban bar kakkure ak kajirere kake er.
Im em̧ool, armej ro rekar kōnono kōn er āinwōt armej ro rekar m̧ōņōņō im em̧m̧an aer pād. Kōn menin bōlen eļan̄n̄e em̧m̧akūt jān wōjke eo, renaaj ruwainene n̄an jarlepju eo ilowaan m̧weo eļap im kajōjō im maron̄ kapokpok kōn ekajet eo aer, jeļāļo̧kjeņ, im en̄jake.
Pād wōt ioon Iaļ eo
Ro jeiū im jatū, ro m̧ōtta rejitōn bōro, eļan̄n̄e kwōj lo an pen am̧ dāpdep ilo aen in dāpdep eo im etetal dim n̄an lo̧mo̧o̧r; eļan̄n̄e kajirere im kakkure jān ro jet ro rekōm̧m̧an am̧ pere; eļan̄n̄e kwōj inepata kōn kajjitōk ko rejjan̄in uwaak ak katak ko kwōj jan̄in meļeļe; eļan̄n̄e kwōj būrom̧ōj kōnke inepata ko, ij rōjan̄ eo n̄an keememej ettōņak eo an Liai.
Pād wōt ioon Iaļ eo!
Jab kōtļo̧k aen in dāpdep eo—naan eo an Anij!
Im n̄e jabdewōt ej kajjieon̄ kōm̧m̧an am̧ jook in bōk m̧ōttan iakwe eo an Anij, jab elļo̧k n̄an er.
Jab meļo̧kļo̧k kwōj juon ajri nejin Anij; kōjeraam̧m̧an ko reļļap rej kōttar; eļan̄n̄e komaron̄ ekkatak kōm̧m̧ane Ankilaan, kwonaaj mour Ippān bar juon alen!7
Kallim̧ur ko kōn nōbar im errā jān laļ in rejjab lōki, jab m̧ool, im jab kaju buruwōd. Kallim̧ur ko an Anij repen, m̧ool, im lan̄lōn̄—kiiō im n̄an indeeo.
Ij kajjitōk ippam̧ n̄an ļōmņak kōn kabun̄ im tōmak jān juon jibadbad eutiejļo̧k. Ejjeļo̧k juon men jej bōk ilo m̧weo eļap im kajōjō maron̄ keidi n̄an leen ko an mour kōn gospel eo an Jisōs Kraist.
Em̧ool, “men ko mej ear jab loi, im lo̧jilin̄ ear jab ron̄jake, im re jan̄in deļo̧n̄ ilo buruon armej, men ko jabdewōt Anij e ar kapojak n̄an ro rej yokwe E.”8
Ikar katakin ippa make bwe iaļ in rikaļoor ilo gospel eo an Jisōs Kraist ej iaļ eo n̄an lan̄lōn̄. Ej iaļ eo n̄an jokne im aenōm̧m̧an. Ej iaļ eo n̄an m̧ool.
Ij kam̧ool bwe jān mennin letok eo im kajoor eo an Jetōb Kwojarjar, kom̧aron̄ ekkatak menin ippem̧ make.
Ilo tōre in, eļan̄n̄e iaļ in ej jino pen n̄an eok, ij kōjatdikdik bwe kwonaaj loe jikin kone im kajoor ilo doulul ko rem̧m̧an an Kabun̄ in: Būraimere, Doulul eo an Jiron̄ ro, im Doulul eo an Kōrā ro. Rej āinwōt jikin kakkije ko ilo iaļ in, ijo me komaron̄ kōkāāl lōke eo am̧ ie im tōmak n̄an iaļ eo im̧aan. Rej juon im̧ōn kone, ijo me komaron̄ en̄jake ke kwōj m̧ōttan wōt im maron̄ bōk rōjan̄ jān kōrā ro jeiū im jatūm̧ im rikaļoor ro jet.
Men ko komaron̄ ekkatak ilo Būraimere rej kōpooj eo n̄an m̧ool ko jet kwōj katak āinwōt juon jiron̄. Iaļ in rikaļoor eo kwōj etetal ilo kūlaaj ko an Doulul eo an Jiron̄ ro rej tōlļo̧k n̄an jem̧jerā im jem̧doon an Doulul eo an Kōrā ro. Kōn kajjojo bun̄tōn ilo iaļ in, komaron̄ bōk bar iien ko rem̧m̧an n̄an am̧ kwaļo̧k am̧ iakwe n̄an ro jet jān m̧akūtkūt in tōmak, tiriam̧o̧ ko, iakwe em̧ool, wānōk, im jerbal in jipan̄.
Kālet iaļ in rikaļoor enaaj tōl ļo̧k eok n̄an m̧ōņōņō eo kwojan̄in kar ron̄ kake im kūrm̧ool eo an mour kwojarjar eo am̧.
Ejjamin pidodo. Enaaj aikuj ijo em̧m̧antata ewōr ippem̧—aolepān jeļāļo̧kjeņ eo am̧, am̧ kōpeļaak, tōmak, m̧ool, kajoor, kijejeto, im iakwe. Ak juon raan kwonaaj reilikļo̧k ioon kijejeto ko am̧, im o, ewi jon̄an am̧ kam̧oolol bwe maron̄ kajoor wōt, bwe kwaar tōmak im bwe kwaar jab em̧m̧akūt jān iaļ eo.
Bun̄ M̧aanļo̧k Wōt
Emaron̄ lōn̄ men ko kōn mour me rejjab pād ilo kajoor eo am̧. Ak ilo jem̧ļo̧kin, enaaj wōr am̧ kajoor n̄an kālet jim̧or mejān kajjik eo im elōn̄ iaan en̄jake ko ilo kar iaļ in. Ejjab ļap jon̄an maron̄ ko am̧ bōtaab kālet ko am̧ renej kōm̧m̧an oktak ilo mour.9
Kwōjjab maron̄ kōtļo̧k jekjek ko bwe ren kaburom̧ōj eok.
Kwōjjab maron̄ kōtļo̧k jekjek ko am̧ bwe ren kalluiki eok.
Komaron̄ lan̄lōn̄ bwe kwōj juon leddik nejin Anij. Komaron̄ loe lan̄lōn̄ im m̧ōņōņō ilo tiriam̧o̧ eo an Anij im ilo iakwe eo an Jisōs Kraist.
Komaron̄ m̧ōņōņō.
Ij rōjan̄ eok n̄an kobrak būruwōm̧ kōn kam̧oolol kōn m̧weiūk ko reļļap im em̧m̧an eo an Anij ejjab likjab. Ro jeiū im jatū, kom̧ maron̄ kōm̧m̧ane menin! Ij jar kōn aolepān aō jetōb bwe kom̧ naaj kōm̧m̧an kālet eo n̄an wōnm̧aanļo̧k n̄an wōjke in mour eo. Ij jar bwe kom̧ naaj kālet n̄an kotak ainikiem̧i im kōm̧m̧an bwe mour eo ami en m̧ōņōņō im aiboojoj, lan̄lōn̄ ilo ta iakwe eo an Anij, ilo kabwilōn̄lōn̄ ko an Kabun̄ in An, im gospel eo an Jisōs Kraist emaron̄ bōktok n̄an laļ in.
Al eo an juon rikaļoor em̧ool emaron̄ jab jejjet ainikien ak aaet jidik utiej n̄an ro jet. Jān kar jinoin in iien, menin ekar āindein wōt.
Ak Jemedwōj Ilan̄ im n̄an ro rej iakwe im kautiej E, enan̄in wōt juon al em̧m̧an im aiboojoj—al eo eļap an em̧m̧an im erreo an pinmuur in iakwe im jerbal in jipan̄ n̄an Anij im ro riturin.10
Ij likūt aō kōjeraam̧m̧an āinwōt juon Rijilōk an Irooj bwe kom̧ naaj loe kajoor eo im rōjan̄ n̄an eddōkļo̧k āinwōt leddik eo nejin Anij em̧ōņōņō ilo am̧ etetal kajjojo raan ioon iaļ in eaiboojoj an rikaļoor. Ilo āt eo ekwojarjar etan Jisōs Kraist, amen.