1 E taku te Uea ae Atuam, ae Iesu Kristo, ae Korakora ae ^aNgai, te Arebwa ao te Omeka, te ^bmoan ao te kabane, are ngaia ae taraa te tai ae akea tokina ae raababa mani mwawawa, ao ni kabane ^ckaaini karawa aika terabim, ^di mwaaini ^ekarikan te aonaba;

2 Are ngaia are e ^aatai bwaai ni kabane, bwa a kaoti bwaai ^bni kabane i matau;

3 Boni Ngai are e taetae, ao e ^akaraoaki te aonaba, ao a roko bwaai ni kabane mai irou.

4 Bon Ngai are I anaa ana ^aTion Enoka nakon bwanibwaniu; ao e koaua, ae I taekinna, bwa ni kabane naake a tia ni ^bkakoaua arau, bwa Ngai Kristo, ao n oin arau, I a tia ni bubuti imatan te Tama ibukiia n raoiroin te ^craraa are I a tia ni kabwaroa.

5 Ma nooria, nikiraia naake a ^abuakaka are I a tia ni kawakiniia n ^btaurekereken te roo ni karokoa te ^cmotikitaeka n te bong ae kakannato, are e na roko n tokin te aonaba;

6 Ao N na tua bwa a na kawakinaki naake a buakaka, ake aki kan ongo bwanaau ma a kamatoai nanoia, ao te reke ni kai, te reke ni kai, te reke ni kai, bon motikan taekaia.

7 Ma nooria, e koaua, e koaua, ae I tuangkami bwa e mena ^amatau i aomi. I mena ^bi buakomi ao kam aki noorai;

8 Ma e a kan roko te bong are kam na ^anoorai iai, ao n ataia bwa I boni maiu; bwa e nang raeuakaki te rabuna ae te roo, ao ane e aki ^bkaitiakaki e na bon aki kona ^cmoan te bong anne.

9 Mangaia are, kabaea nukami ao bwaina te tatauraoi. Nooria, ami bwai te ^aabanuea, ao a na aki tokanikai am kairiribai.

10 E koaua ae I tuangkami, kam a ^aitiaki, ma tiaki ni kabane; ao akea riki ae I rang ^bkukurei irouna;

11 Bwa a bane ni buakaka ^airiko imatau; ao e butanako mwaakan te ^broo i aon te aonaba, i buakoia natiia aomata, imataia kaain karawa ni kabane—

12 Are e karikia bwa e na taonaki n te mabu, ao a bane ae akea tokiia ni ^akarawawataaki, ao ^banera a taningaa te taeka ae korakora bwa a na ^ctaia te aonaba, ni ikotii ^dtitania bwa aonga ni ^ekabuekaki; ao, nooria, a ikotaki ami kairiribai.

13 Ao ngkai N na kaota nakoimi te bwai ae raba, te bwai ae e mena n te ruu ae raba, ni kakaroa bukin ^akamaunaakimii n te tai teuana, ao kam aki ataia;

14 Ma ngkai N na tuangkami, ao kam a kakabwaiaaki, tiaki ibukin ami buakaka, ke nanomi n aki kakoaua; bwa e koaua ae tabeman i buakomi a tia ni karaoa ae bure imatau, ma N na nanoanga ibukin mamaarami.

15 Ngaia are, ^akakorakoraingkami man te tai aei; ^btai maaku, bwa ami bwai te abanuea.

16 Ao ibukin kamaiuakimi N na anganingkami te tua, bwa I a tia n ongo ami tataro, ao a ngurengure naake a ^akainnano nakoiu, ao I ^bkarikiia kaubwai, ao au bwai iriko ni kabane, ao Ngai akea te ^cinanonano irou nakoia aomata.

17 Ao I a tia ni karika te aonaba bwa e na kaubwai, ao nooria bon ^annen waeu, mangaia are, N na manga bon tei i aona.

18 Ao I kaotia ao I kukurei n anga nakoimi kaubwai aika korakora riki, n te aba ni berita naba, te aba ae raanga iai te rannimamma ma ana karewe te manibeeru, are i aona e na bon akea te maraia ngkana e roko te Uea;

19 Ao N na anganingkami bwa abami ni bwaibwai, ngkana kam ukoukoria ma nanomi ni kabane.

20 Ao e na riki aio bwa au berita ae tabu ma ngkami, kam na taua bwa abami ni bwaibwai, ao ibukin ^aabaia ni bwaibwai natimi n aki toki, ngkai e teimatoa te aonaba, ao kam na bwainna naba n te tai ae akea tokina, n aki kona ni manga bua.

21 Ma, e koaua ae I tuangkami bwa n taai aika a na roko a na akea ami uea ke te tia tautaeka bwa N na riki bwa ami ^auea ao n tarataraingkami.

22 Mangaia are, ongo bwanaau ao ^airai, ao kam na riki bwa aomata aika ^binaomata, ao a na akea ami tua bwa tii au tua ngkana I roko, bwa Ngai ami ^ctia anga tua, ao tera ae na kona n tuka baiu?

23 Ma, e koaua ae I tuangkami, ^areirei imarenami ni kaineti ma te nakoa are I a tia n rineingkami nako iai;

24 Ao aomata ni kabane e na ^aiangoa tarina n ai arona i bon irouna, ao ni karaoa ae ^braoiroi ao ae ^ctabu imatau.

25 Ao I a manga tuangkami, bwa a riai aomata ni kabane n iangoia tariia n ai arona i bon irouna.

26 Bwa antai te aomata i buakomi ae tengaun ma uoman natina, ao akea te inanonano ibukia, ao a beku irouna ma te ongeaba, ao e taku nakon temanna: Ko na kunnikaiaki ni kunikai aika tamaroa ao tekateka ikai; ao nakon are temanna: Ko na kunnikaiaki ni kunnikai aika mane ao tekateka ikekei—ao e taraia natina ao n taku I moti raoi?

27 Nooria, I anganingkami aio bwa ai aron te taetae ni kaikonaki, ao ai bon arou naba Ngai. I tuangkami, ^akatiteuanaaki; ao ngkana kam aki katiteuanaaki tiaki au bwai ngkami.

28 Ao I a manga tuangkami bwa a ukoukora ^amaiumi ami kairiribai ake a mena i nanon ruu aika raba.

29 Kam ongo taekan taian ^abuaka n aaba aika a raroa, ao ko taku bwa e nang boo te buaka ae korakora n aaba aika a raroa, ma kam aki ataa nanoia aomata n oin abami.

30 I tuangkami bwaai aikai ibukin ami tataro; ngaia are, ^akawakina te ^bwanawana inanomi, bwa mwiina a kaotaki bwaai aikai nakoimi man aia buakaka aomata, n te aro are e taetae i taningam ma te bwanaa ae takarua riki nakon anne are e na ioioa te aonaba; ma ngkana ko tauraoi ao ko na aki maaku.

31 Ao bwa kam aonga n totokoa mwaakan ami kairiribai, ao ni ikoikotaki nakoiu n aroia aomata aika raoiroi, n akea ^abarekami ao kabuakakakimi—

32 Mangaia are, ibukin aio I anganingkami te tua bwa kam na nako ^aOhio; ao ikekei N na anganingkami au ^btua; ao ikekei kam na ^canganaki te mwaaka mai eta;

33 Ao mai ikanne, ane I kantaningaia bwa e na ^anako buakoia botanaomata ni kabane, a na bon tuangaki bwa tera ae a na karaoia; bwa iai au mwakuri ae korakora ae e a tia ni kaikoaki, bwa e na ^bkamaiuaki Iteraera, ao N na kairiia nakon are I taku, ao akea te mwaaka ae na kona n ^ctuka baiu.

34 Ao ngkai, I anga te tua nakon te ekaretia n te mwakoro aei, bwa a rineaki tabeman mwaane mai i buakoia, ao a na rineaki man ^abwanaan te ekaretia;

35 Ao a na tararuaia naake akea aia bwai ma kainnano, ao ni karaoa te ibuobuoki ibukin ^akabebeteaia bwa aonga n aki kainnano; ao ni kanakoia nakon taabo ake I a tia n tuangiia;

36 Ao aio aia mwakuri, bwa a na bairea aron ana bwai te ekaretia aio.

37 Ao naake iai aia nne ni man ao n aroka ae e aki kona ni kabooaki nako, a na katukui ke ni kaboaki kabonganana n aron noran raoiroina.

38 Taraia bwa a na kawakinaki bwaai ni kabane; ao ngkana a ^aanganki mwaane te mwaaka mai i eta ao ni kanakoaki, a na ikotaki bwai ni kabane aikai nako nanon te ekaretia.

39 Ao ngkana kam ukoukora te ^akaubwai are ana kantaninga te Tama bwa E na anganingkami, kam na riki ni kaubwai nakoia aomata ni kabane, bwa kam na karekei kaubwai ae akea tokiia; ao e riai bwa au bwai n anga ^bkaubwain te aonaba; ma tarataraingkami man te ^ckamoamoa, bwa kam kaawa n riki n aroia ^dNibwaite ake ngkoa.

40 Ao I a manga tuangkami, I anganingkami te tua, bwa mwaane ni kabane, te unimwaane, te ibonga, te tia reirei, ao kaain naba te ekaretia, a na nako ma korakoraia, ma mwakurin ^abaia, ni katauraoa ao ni kakoroa bukin bwaai ake I a tia n tuangiia.

41 Ao e na riki ^atataetaemi n tatabeman nako bwa te bwanaa ni ^bkauring, ae beebete ao e nimamannei nakoia kaain rarikim.

42 Ao ^anaako mai i buakoia ake a buakaka. Kamaiuingkami. Kam na itiaki ngkami aika kam uouoti ana bwai ni mwakuri te Uea. Eng. Amen.