Titobu Sara e Yaloda

Na imatai ni ivakavuvuli na veimaliwai. Ena vuku ga ni ra sa tiki tudei ni Lotu i Jisu Karisito, ena so na gauna eda dau guilecava na bibi ni veimaliwai ena noda ilakolako tiko vei Karisito. E sega ni namaki meda vakasaqara se lako duadua ena salatu ni veiyalayalati. Eda gadreva na loloma kei na veitokoni ni itubutubu, lewe eso ni vuvale, itokani, kei na iliuliu era sa lako talega ena salatu.

Na mataqali veimaliwai vakaoqo e taura na gauna. Gauna meda tiko vata kina. Gauna meda dredre, qito, vuli, ka veiqaravi vata kina. Gauna meda taleitaka vata kina na veika eda malele kina kei na ibolebole. Gauna meda veikilai yalo ka dina vata tiko ni da saga vata meda vinaka cake. Na veimaliwai oqo sa dua na inaki ni soqoni vata ni vuvale, kuoramu, kalasi, kei na ivavakoso. Era sa yavu ni veiqaravi e mana. ⁵

Sa solia vei keda o Elder Dale G. Renlund e dua na idola ni tuberi cake na veimaliwai vakaoqo ni a kaya: “Ena Lotu, me mana nodra qaravi eso e dodonu meda raici ira … ena matana na Tamada Vakalomalagi. Sa qai rawa meda kila vinaka kina na bibi dina ni yalo ni tamata. Sa qai rawa kina meda vakila na loloma nei Tamada Vakalomalagi vei ira kece na Luvena.” ⁶

Ni da raici ira na tamata me vakataka na Kalou sa dua na isolisoli. Au sureti keda yadua meda vakasaqara na isolisoli oqo. Ni sa tadola na matada meda rai rawa, ⁷ eda sa rawa meda vukea eso mera raici ira me vakataka na Kalou. ⁸ A vakamatatataka o Peresitedi Henry B. Eyring na kaukauwa oqo ena nona kaya: “Na ka ga ena bibi sara o ya na veika era sa vulica [eso] mai vei [iko] ni o cei dina o ira kei na ituvaki cava era na rawa ni vakataka. Au kila kasamataka ni ra sega ni vulica mai na veivakatavulici vakalevu. Era na taura mai na nodra vakila se ocei dina o iko, na nomu nanuma se ocei o ira, kei na nomu nanuma se ocei beka o ira.” ⁹ Noda vukei ira eso mera kila vinaka o cei dina o ira kei na inaki sa dua na isolisoli cecere eda rawa ni solia. ¹⁰ Meda raici ira eso kei keda ni Kalou sa semata vata na yaloda ena “duavata kei na veilomani.” ¹¹

Ena kena sa levu tiko na kaukauwa vakavuravura sa dreti keda tiko, eda sa gadreva na kaukauwa e vure mai na veimaliwai ena loloma. Ni da qai tuva na itaviqaravi, bose, kei na soqoni tale eso, meda nanuma tiko na kedra inaki bibi na soqoni vata oqo o ya me tarai cake na veimaliwai ni loloma e vakaduavatataki keda meda vukea me titobu sara na kosipeli i Jisu Karisito e yaloda. ¹²

E dina sara, e sega ni rauta meda se vauci vata tu ga. E vuqa na ilawalawa kei na mataisoqosoqo era sa rawata mera duavata ena vica na inaki. Ia na duavata eda vakasaqara tiko o ya meda sa duabau ga vei Karisito, me da semati yani ki Vua. ¹⁴ Me rawa ni sema kei lomalagi na yaloda, eda na gadreva na veika e sotavi vakayalo, me vaka e vosa ki na vakamatata vei keda o Elder Andersen. ¹⁵ Na kena sotavi oqo ena kauta mai na Yalo Tabu na vosa kei na loloma ni Kalou ki na noda vakasama kei na yaloda. ¹⁶

Ena yaco mai na ivakatakila oqo mai na ivolanikalou, vakabibi mai na iVola i Momani; mai na nodra vosa veivakauqeti na parofita bula kei ira na tisaipeli yalodina eso, vakakina mai na domo lailai rogo malua. ¹⁷ Na vosa oqo sa sega walega ni iqi ena pepa, rorogo e voqa e daligada, se nanuma ena noda vakasama, se veika eda vakila e yaloda. Na vosa ni Kalou sa kaukauwa vakayalo. ¹⁸ Sai koya na dina kei na rarama. ¹⁹ Sai koya na sala eda rogoci Koya kina! Na vosa e tekivuna ka vakalevutaka noda vakabauta na Karisito ka vakatataki kina na lomada meda gadreva meda vakataka cake na iVakabula—o ya, meda veivutuni ka lako voli ena salatu ni veiyalayalati. ²⁰

Ena Epereli sa oti, a vukei keda o Peresitedi Russell M. Nelson meda kila vinaka na uto ni inaki ni veivutuni ena ilakolako vakaivakatakila oqo. ²¹ A kaya: “Ni da sa digitaka meda veivutuni, eda sa digitaka meda veisau! Eda sa vakatara na iVakabula me vakavoutaki keda ki na keda ituvaki vinaka duadua. … Eda sa digitaka meda vakataki Jisu Karisito cake!” ²² Na cakacaka ni veisau, vakatataki ena vosa ni Kalou, sai koya na sala meda sema kina ki lomalagi.

Ena yavu ni veisureti nei Peresitedi Nelson meda veivutuni sai koya na ivakavuvuli ni galala ni digidigi. E dodonu meda digitaka na veivutuni me baleti keda. Na kosipeli ena sega ni vakasaurarataki ki yaloda. E kaya o Elder Renlund, “Na lalawa vakaitubutubu nei Tamada Vakalomalagi e sega ni nodra cakava na Luvena na ka e dodonu; ia mera digitaka na ka e dodonu mera cakava.” ²³

Ena parokaramu sa sosomitaki mai na parokaramu ni Gone kei na iTabagone, e a sivia e 500 na veika duidui a gadrevi me vakacavari me rawa ni tauri kina na icocovi eso. ²⁴ Nikua, sa gadrevi ga e dua. Sa ikoya na veisureti meda digitaka meda sa vakataka cake na iVakabula. Eda cakava oqo ena noda ciqoma na vosa ni Kalou mai vua na Yalo Tabu ka vakatara na Karisito me veisautaki keda ki na keda ituvaki uasivi duadua.

Oqo e sega walega ni noda cakacakataka noda lalawa se vakatorocaketaki keda yadua. Na lalawa era sa iyaya ni cakacaka ga me vukea noda sema ki lomalagi ena ivakatakila, galala ni digidigi, kei na veivutuni—me da lako vei Karisito ka ciqoma vakatitobu e yaloda na Nona kosipeli.23

Kena iotioti, me tauri na kosipeli i Jisu Karisito me titobu sara e yaloda ena gadrevi meda sa umanaki kina—meda solia noda gauna kei na taledi, ka solibula kina. ²⁶ Eda vinakata kece meda bula voli vakainaki, ka dina sara oqo vei ira na itabatamata sa tubu cake tiko mai. Era gadreva e dua na inaki.

Na kosipeli i Jisu Karisito sa cakacaka cecere duadua e vuravura. A kaya o Peresitedi Ezra Taft Benson: “Sa vakaroti keda na Kalou meda kauta na kosipeli oqo ki vuravura taucoko. Oqo na cakacaka me na vakaduavatataki keda nikua. Na kosipeli duadua ga ena vakabula na vuravura mai na veika vakadomobula ni kena vakarusai vakaikoya. Na kosipeli duadua ga ena vakaduavatataka na tagane [kei na yalewa] duikaikai taucoko kei na veimatanitu ena vakacegu. Na kosipeli duadua ga ena kauta mai na reki, marau, kei na veivakabulai ki na matavuvale ni kawatamata.” ²⁷

A yalataka o Elder David A. Bednar, “Ni da vakaukauwataki ira na itabagone ena noda veisureti ka vakatara mera cakacakataka, na Lotu ena toso ki liu ena sala e mana sara.” ²⁸ Sa vakavuqa eda sega ni sureta ka vakatara na itabagone mera solibula ki na cakacaka cecere oqo i Karisito. A vakaraitaka o Elder Neal A. Maxwell, “Kevaka era sega ni maqusataki na [noda] itabagone [ena cakacaka ni Kalou] era na rairai maqusataki ki vuravura.” ²⁹

Na parokaramu vou ni Gone kei na iTabagone e vakanamata ki na nodra vakaukauwataki na itabagone. Era na digitaka ga na nodra dui lalawa. O ira na mataveiliutaki ni kuoramu kei na kalasi era na biu ena nodra ilesilesi dodonu. Na matabose ni itabagone ni tabanalevu, me vaka ga na matabose ni tabanalevu, e vakanamata ki na cakacaka ni veivakabulai kei na bula vakacerecerei. ³⁰ Ka tekivu na nodra bose na kalasi kei na kuoramu ena nodra veivakasalataki baleta na sala ni kena caka na cakacaka ni Kalou sa soli vei ira. ³¹

A kaya o Peresitedi Nelson vei ira na itabagone ena Lotu: “Kevaka o sa digitaka, ke o sa vinakata … sa rawa mo tiki cecere ni dua na ka levu, e vakaitamera, e qaqa! … Sai kemuni na isakisaki ni Turaga se qai bau talai mai vuravura. Sa tu vei kemuni na kila kei na vuku kei na igu mo rawai vuravura kina ni vakatauvatani kei na itabatamata taumada!” ³² Ena dua tale na gauna, a kaya o Peresitedi Nelson vei ira na itabagone: “Au sa nuitaki kemuni e yaloqu taucoko. Au lomani kemuni, ka vakakina na Turaga. Eda sa Nona tamata, ka vakaitavi vata ena Nona cakacaka tabu.” ³³ Ra itabagone, e rawa beka mo vakila ni nuitaki kemuni tiko o Peresitedi Nelson ka ko ni sa bibi ki na cakacaka oqo?

Kemuni na itubutubu kei na iliuliu matua, au sureti kemuni mo ni raici ira na itabagone me vaka e cakava o Peresitedi Nelson. Ni ra vakila na itabagone na nomu loloma kei na veivakabauti, ka vakayaloqaqataka ka vakavulici ira mera veiliutaki—mo qai vakatikitiki mai—era na vakurabuitaki iko ena nodra raititobu, gugumatua, kei na yalodina ki na kosipeli. ³⁴ Era na vakila na reki ni ra digitaka mera umani ka solibula ki na cakacaka cecere i Karisito. Na Nona kosipeli ena yaco me titobu sara e yalodra, ka toso ki liu na cakacaka ena sala mana eso.

Au yalataka, ni da raimatua ki na ivakavuvuli oqo—veimaliwai, ivakatakila, galala ni digidigi, veivutuni, ka solibula—na kosipeli i Jisu Karisito ena titobu sara ki na yaloda kece. Eda na raica na Vakalesui Mai ni sa toso ki liu ki na kena ulu ni inaki, na vueti ni Isireli kei na tauyavu o Saioni, ³⁵ ena vanua ena vakatulewa kina o Karisito ni sa Tui ni Tui.

Au vakadinadinataka ni Kalou sa cakava tiko ga na veika kece e gadrevi mera vakarautaki na Nona tamata ki na siga o ya. Meda sa qai raica na Ligana ena cakacaka oqo ni da gumatua kece meda “lako mai vei Karisito, ka mo dou vakataucokotaki vua.” ³⁶ Ena yacai Jisu Karisito, emeni.