Na Sala e Veivakalougatataki kina na Matabete vei ira na iTabagone

Kemuni na taciqu kei na ganequ, au sa vakavinavinaka dina ni rawa me’u vosa vei kemuni ena bogi vakairogorogo oqo me baleta na isolisoli tabu ni matabete kei na kaukauwa veivakurabuitaki ka tiko kina me vakalougatataki ira na itabagone ena itabagauna oqo. Au masuta ni na vukei au na Yalotabu ena vakavulici ni dina, veitalia na noqu malumalumu eso.

Na Mataveiliutaki Taumada e sa vakananumi ira na Matabete i Eroni ni “ko ni bula donumaka na gauna ni veimadigi kei na bolebole cecere—na gauna sa vakalesui mai kina na matabete. Sa tu vei kemuni na dodonu mo ni qarava na veicakacaka vakalotu ni Matabete i Eroni. Ni ko ni vakayagataka na dodonu oqori ena yalo masumasu kei na bula kilikili o ni na vakalougatataka vakalevu na nodra bula o ira era vakavolivoliti kemuni.” ¹ Ni da sa cauravou lewe ni Lotu, eda sa vakananumi talega ni da sa “[luvena tagane] daulomani na Kalou, ka sa vakarautaka o Koya e dua na cakacaka vei [keda] meda cakava,” ² ka da sa veivuke ena Nona cakacaka “meu vakavuna na tawa mate rawa kei na bula tawamudu ni tamata” (Mosese 1:39).

Na matabete sa ikoya na lewa me qaravi kina na cakacaka tabu vakalotu kei na veiyalayalati ni kosipeli ni iVakabula kivei ira era sa bula kilikili mera na ciqoma. Ena cakacaka vakalotu ni matabete kei na veiyalayalati tabu oqo sa lako mai kina na veivakalougatataki taucoko ni Veisorovaki ni iVakabula ka vukei keda meda rawata noda icavacava vakalou.

O Josefa Simici a dua na cauravou ka a kacivi mai vua na Kalou me vakalesuya mai na kosipeli i Jisu Karisito ka, ena inaki oya, a soli kina vua na matabete ka a vakayagataka okoya me vakalougatataka na itabatamata kecega. EnaVunau kei na Veiyalayalati 135e veivakararamataki kina me baleta na veivakalougatataki e vuqa e sa solia o Josefa kivei ira na itabagone ni itabagauna oqo. Eda wilika ni: “O Josefa Simici … sa cakava e levu cake na ka mai vei ira kecega na tamata era sa bula oti e vuravura, ka vakavo ga kina ko Jisu, me baleta na nodra vakabulai na tamata e vuravura. … Sa rawata kina vei keda na iVola i Momani … ; ka sa vakauta yani na taucoko ni kosipeli tawamudu … ki na yasai vuravura e va; sa ciqoma ka solia mai na ivakatakila kei na ivakaro ka lewena tu [na] Vunau kei na Veiyalayalati … ; a soqoni ira vata e vica na udolu na Yalododonu Edaidai, … ka biuta koto mai e dua na irogorogo kei na yaca ka na sega ni vakamatei rawa” (Vunau kei na Veiyalayalati 135:3).

Me rawa ni da veiqaravi vakavinaka me vaka a cakava o Josefa, e dodonu meda rawata na bula kilikili meda vakayagataka kina na kaukauwa ni matabete ni Turaga. Ni rau a vakadewataka tiko na iVola i Momani, a vinakata o Josefa kei Oliva Kauderi me rau papitaiso, ia a sega vei rau na lewa dodonu. E nai ka 15 ni Me, 1829, erau a tekiduru ena masu ka rau a sikovi mai vei Joni na Dauniveipapitaiso, ka a solia vei rau na idola kei na lewa ni Matabete vaka Eron ka kaya, “Vei kemudrau na noqu itokani dauveiqaravi, ena yaca ni Mesaia au sa solia na Matabete i Eroni, sa koto kina na idola ni nodra veiqaravi na agilosi, kei na kosipeli ni veivutuni, kei na papitaiso ena tabadromuci me bokoci kina na ivalavala ca” (Vunau kei na Veiyalayalati 13:1).

E sa soli vei keda na madigi meda veiqaravi vakataki ira na agilosi, meda vunautaka na kosipeli ena veivanua kece e vuravura, ka vukea na yalo kecega me lako mai vei Karisito. Na veiqaravi oqo e umani keda vata ena cakacaka kei Joni na Dauniveipapitaiso, Moronai, Josefa Simici, Peresitedi Nelson, kei ira na dauveiqaravi gugumatua tale eso ni Turaga.

Na noda veiqaravi vata e loma ni Nona matabete e kauti ira vata mai o ira era sa yalodina ni muria ka bulataka vakadodonu sara na ivakavuvuli ni Turaga, ka’u kila vakai au ni rawa ni dredre, baleta ni da sotava tiko na vei ibolebole eso ni itabagone. Ia na noda duavata tiko vata kei ira na itokani dauveiqaravi oqo ni Turaga ena kena vakayacori tiko na Nona cakacaka ena vukea me vakaukauwataki keda meda vorata na veitemaki kei na veiveretaki ni vunica. O sa rawa ni dua na bikini ni rarama kivei ira kece era sa tawa yalodei vakai ira. Ena ramase sara na rarama ni lomamu ka ra na lai vakalougatataki kina o ira kece o veimaliwai vata ena nodra tu vata wale tu mada ga kei iko. Ena rairai dredre beka ena so na gauna meda ciqoma na nodra maliwai keda tiko na noda itokani vakayalo, ia au vakavinavinaka ni’u kila ni’u sa dua na lewe ni kuoramu ni matabete yalodina, o koya au rawa ni cakacaka vata kei ira meu toro voleka kina vei Karisito.

Ni wili vata kei ira na noda itokani kei na matavuvale, na Yalo Tabu e dua na noda itokani dina ka nuitaki. Ia, me sureti rawa na Nona veitokani, e dodonu meda biuti keda ena ituvaki kei na vanua ena tiko kina ko Koya. Oqo e rawa ni tekivu sara ga ena noda vei vuvale, ena noda cakava me dua na vanua tabu oya ena noda vakaitavi ena noda vuli ivolanikalou e veisiga ka masu vaka matavuvale ka, bibi cake sara, vakayadudua ena noda vulica na ivolanikalou ka masu.

Ena i tekivu ni yabaki oqo, e a soli vei au e dua na madigi taleitaki ia ka veivakayalomaluataki meu vukea na ganequ lailai, o Oceane, me cavuikalawa ena salatu ni veiyalayalati ena nona ciqoma na veisureti me papitaiso ka vakayacora e dua vei ira na veika e gadrevi ka sa lesi oti tu meda curu kina ki na matanitu vakasilesitieli. A vakadaroya okoya na nona papitaiso me dua na vula, me yacova ni’u sa tabaki meu dua na bete, me solia vei au na dodonu meu vakayacora na cakacaka vakalotu ni a soli talega na dodonu vei rau e rua tale na ganequ ena ruku ni ilesilesi vaka matabete me rau tu vaka ivakadinadina. Ni keirau duri veibasai tu ena loma ni tobu ka vakavakarau me butu yani ki wai, au vakila ni veidonui na nona marau kei na veika au vakila. Kau duavata kei koya, niu raica ni sa vakayacora o koya na digidigi dodonu. Na madigi oqo meu cakacakataka na matabete a gadrevi kina meu qaqarauni vakalevu cake ka vakalailai sobu na vakawelewele ena noqu bulataka tiko na kosipeli. Me rawa kina ni’u vakavakarau, au a lako ki na valetabu e veisiga ena macawa oya, ka tokoni mai vei tinaqu, buqu, kei ganequ, meu veipapitaisotaki me baleti ira na mate.

Na ka oqo a vakavulica vei au e levu na ka baleta na matabete kei na sala au na rawa ni cakacakataka kina ena kilikili. Au kila ni ra na rawa ni vakila na lewe ni matabete kece na veika vata ga au a vakila kevaka eda muria na ivakaraitaki i Nifai meda “lako ka kitaka.” (raica 1 Nifai 3:7). Eda sega ni rawa ni dabe ena wele ka namaka na Turaga me vakayagataki keda ena Nona cakacaka cecere. Meda kakua ni waraki ira era gadreva na noda veivuke mera vakasaqarai keda mai; e sa noda itavi vaka lewe ni matabete meda ivakaraitaki ka tu vaka ivakadinadina ni Kalou. Kevaka eda cakava tiko na vakatulewa eso ka tarovi keda mai na noda torocake tawamudu, e dodonu meda veisau sara ga oqo. E na tovolea o Setani ena nona igu taucoko meda tiko ga ena noda ituvaki ni wele ka vakasaqarai na veivakamarautaki vovodea. Ia au kila ni kevaka eda solia na igu, meda vakaqarai ira era na tokoni keda, ka veivutuni e veisiga yadua, na kena veivakalougatataki ena veivakurabuitaki ka na veisautaka tawamudu na noda bula ni da toso ki liu ena salatu ni veiyalayalati.

Au kila ni oqo na Lotu dina ni Jisu Karisito, koya noda ivakabula ka solia na idola ni matabete kivei ira Nona iApositolo, era vakayagataka me dusimaki keda, vakabibi ena gauna dredre qo, ka vakarautaka na vuravura me baleta na Nona lesu mai.

Au kila ni o Josefa Simici e a parofita ni Veivakalesui mai ka sa noda parofita bula tiko edaidai o Peresitedi Russell M. Nelson. Au sureti keda kece sara meda vulica vagumatua na nodrau bula na lewe ni matabete cecere oqo ka vakasaqara meda vakatorocaketaki keda e veisiga me rawa kina ni da tu vakarau meda sotava na noda Dauveibuli. Ena yaca i Jisu Karisito, emeni.