Cavuikalawa Ki Liu ena Vakabauta

Kemuni na taciqu kei na ganequ lomani, ni da sa yacova oqo na icavacava ni koniferedi vakairogorogo oqo, eda sa vakavinavinaka kina vua na Turaga. A totoka sara na sereivakatagi, kei na itukutuku e veivakauqeti.

Ena koniferedi oqo, eda sa vakila kina e vuqa na veivakararamataki. Ni vakananumi e rua na drau na yabaki, keitou sa vakaraitaka yani e dua na ivakaro ki vuravura ka cauraka na dina ni Vakalesui mai na taucoko ni kosipeli i Jisu Karisito.

Eda sa vakananuma kina na Vakalesui Mai vata kei na Kaila ni Osana.

Eda sa cereka kina e dua na ivakatakilakila vou ni noda vakabauta na Turaga o Jisu Karisito kei na raica ena doka na itukutuku kei na veivola ni Lotu.

Eda sa kaciva oqo e dua na siga ni lolo kei na masumasu e vuravura mena tarovi na mate veitauvi raraba oqo, taqomaki na dauveiqaravi, qaqaco na bula vakailavo, ka vakalesui na bula. Na lolo oqo ena vakayacori ena Vakaraubuka Siga ni Mate, 10 ni Epereli. Sa na dua dina na Vakaraubuka cecere!

Na Siga Tabu mai oqo e Siga ni Mate, eda na vakananuma tale kina na Veisorovaki kei na Tucake tale ni noda Turaga o Jisu Karisito. Ena vuku ni Nona Veisorovaki, na Nona isolisoli ni tucake tale ena yaco vei ira kece a bula voli. Kei na Nona isolisoli ni bula tawamudu ena yaco vei ira kece sa dinata na cakacaka vakalotu kei na veiyalayalati a caka ena Nona valetabu.

Na vuqa na gacagaca veiuqeti ni koniferedi raraba ni Epereli 2020 oqo—kei na macawa tabu eda sa tekivuna oqo—e rawa ni kena usutu e rua na vosa ivakaro vakalou: “Mo Rogoci Koya.”¹ Sa neitou masu ni raicimatua na Tamada Vakalomalagi, a kaya na vosa oqori, baleta na Luvena Lomani, o Jisu Karisito, ena cokonaki vakalevu ena nomuni vakanananu ni ka kece sa yaco. Sa neitou masu mo ni tekivuna vou vakaidina mo rogoca, vakatudaliga, ka muria na vosa ni iVakabula.² Au sa yalataka ni na vakalailaitaki na rere ka na vakalevutaki na vakabauta.

Vinaka vakalevu na gadreva me yaco na nomuni itikotiko me vanua tabu ni vakabauta, mena tiko kina na Yalo ni Turaga. Na noda lewenivuli ni vuli kosipeli, Lako Mai, Mo Muri Au, ena vakalougatataka tiko ga na nomuni bula. Na nomuni sasaga tiko ena cakacaka oqo—ena gauna mada ga vakaoqori o a vakila beka o sega ni rawata sara e dua na ka—ena veisautaka nomu bula, nomu vuvale, kei na vuravura. Eda na vaqaqacotaki ni da yaco meda tisaipeli qaqa cake ni Turaga, ena noda tutaka ka tukuni Koya tiko, ena vanua ga eda tu kina.

Ia, meda sa veivosakitaka mada na valetabu. Sa tu vei keda e 168 na valetabu vakatabui oti e vuravura raraba. Eso tale era se qai tuvanaki tiko ka tara tiko eso. Ni kacivaki yani na ituvatuva me tara e dua na valetabu vou, sa tiki ni noda itukutuku tabu.

E rairai ka vou me kacivaki e dua na valetabu vou ni ra se sogo kece tu vakawawa na noda valetabu.

Ena senitiuri vakacaca sa oti, a raica oti tu mai o Peresitedi Wilford Woodruff na noda bula oqo, a tukuni tiko ena nona masu ni veivakatabui ni Valetabu e Salt Lake, ena 1893. Eso vei kemuni o ni sa raica beka na qaqani nona masu totoka oqo ena itukutuku raraba.

“Ni yaco o ira na Nomuni tamata mera sega ni curuma rawa na nomuni vale tabu oqo … ka ra sa tabakisobu ka tiko leqa, voliti ena veika dredre … ka yaco me rai yani na matadra ki na Nomuni vale tabu oqo ka kerei Kemuni mera vueti, vukei, ena Nomuni kaukauwa sa soli ena vukudra, keimami kerei Kemuni, mo ni rai mai ena Nomuni itikotiko tabu ena loloma veivueti … ka rogoca nodra tagi. Se ira na luvedra na Nomuni tamata, ni veiyabaki mai oqo, era na tawasei, ena vuna cava ga, mai na vanua oqo, … ka ra na tagi yani vei Kemuni mai na uto ni nodra rarawa kei na vutugu mo ni vakacegui ka sereki ira, keimami sa masuti Kemuni mo ni … vakatudaliga ki na nodra tagi, ka solia vei ira na veivakalougatataki era sa kerea.”³

Taciqu kei na ganequ, ena noda dau tiko lomaleqa ka ra sa sogo tiko na valetabu, se rawa tikoga mo ni taura na kaukauwa ni nomu veiyalayalati ni valetabu kei na edaumeni ni ko rokova tiko na nomu veiyalayalati. Yalovinaka vakayagataka na gauna oqo ni sogo tiko na valetabu mo bula kilikili tikoga vaka-valetabu, se mo na kilikili kaya vaka-valetabu.

Veivosakitaka na valetabu kei na nomu vuvale kei na itokani. Baleta ga ni o Jisu Karisito sa usutu ni ka kece eda cakava e valetabu, ni ko vakasamataka vakalevu na valetabu o na vakasamataki Koya vakalevu cake. Vuli ka masu mo vulica vakalevu na kaukauwa kei na kila-ka o sa vakaedaumenitaki oti kina—se na veika mo qai vakaedaumenitaki kina.

Nikua sa kani marau vei keitou me kacivaka yani na ituvatuva me tara e walu na valetabu vovou ena veivanua oqo: Bahía Blanca, Argentina; Tallahassee, Florida; Lubumbashi, Democratic Republic of the Congo; Pittsburgh, Pennsylvania; Benin City, Nigeria; Syracuse, Utah; Dubai, United Arab Emirates; kei Shanghai, China.

Era na cakacaka vata kei ira na vakailesilesi ni walu na vanua oqori, na kena dau ena Lotu me rawa ni duavata ka ikuri totoka ni veivanua yadua oqori.

Na ituvatuva me dua na valetabu e Dubai isau ni dua na veisureti talei, ka keitou sa vakavinavinaka kina vakalevu.

Na ituvaki ni ituvatuva e Shanghai e bibi sara. Sa sivia e rua sagavulu vakacaca na yabaki, era sa gole tiko na lewenilotu kilikili vakavaletabu ki Jaina me ra tiko ena Valetabu e Hong Kong China. Ia ena Julai ni 2019, e mai sogo na valetabu oya ena vuku ni gagadre e tiko me vakavinakataki.

E Shanghai, e dua na valenisoqoni levu na kena inaki ena vakarautaka na sala mera rawa ni vakaitavi na lewenilotu e Jaina ena cakacaka vakalotu ni valetabu—ena matanitu o Jaina—me baleti ira kei na nodra qase eliu.⁴

Ena veimatanitu, e vakavuvulitaka na Lotu vei ira na lewena mera rokova, vakamuria, ka tokona na lawa.⁵ Keimami vakavuvulitaka na bibi ni matavuvale, na itubutubu vinaka ka lewenivanua vinaka sara. Baleta ni da rokova na lawa kei na ivakaro ni Matanitu ko Jaina, e sega ni lesia na Lotu na daukaulotu ki kea; ka na sega tale gani yaco ena gauna oqo.

Na vakailesilesi ni veimatanitu eso kei ira na ivavakoso e Jaina era na sega ni soqoni vata. Na ituvaki vakalewa e kea ni Lotu e sega ni veisau. Ena vakavakayagataki taumada ni curu me vakayagataki ena rawa ga ena kerekere taumada. Na vale ni Turaga e Shanghai ena sega ni dua na vanua me baleti ira na saravanua mai na veimatanitu tale eso.

Na walu na valetabu vou oqo ena vakalougatataka e vuqa na tamata ena yasa ruarua ni ilati ni mate. Na valetabu era sa tiki cecere ni Vakalesui Mai ni taucoko ni kosipeli i Jisu Karisito. Ena vinaka kei na yalololoma ni Kalou, sa kauta mai o Koya vakavoleka na veivakalougatataki ni valetabu vei ira na Luvena ena veivanua kecega.

Ni toso tiko na Vakalesui Mai, au kila ni na vakatakila tikoga mai na Kalou e vuqa na veika cecere ka bibi baleta na Nona matanitu eke e vuravura.⁶ Na matanitu o ya sa Lotu i Jisu Karisito ni Yalododonu Edaidai.

Taciqu kei na ganequ lomani, au sa lomani kemuni. Ena gauna veisaqasaqa kei na veilecayaki oqo, niu mai taura na lewa sa tu vei au, au sa vakatikora vei kemuni e dua na veivakalougatataki vaka-iapositolo.

Au sa vakalougatataki kemuni ena vakacegu ka vakalevutaki nomuni vakabauta na Turaga.⁷

Au sa vakalougatataki kemuni mo gadreva na veivutuni ka mo ni vakataki Koya cake ena veisiga yadua.⁸

Au sa vakalougatataki kemuni mo ni kila na Parofita o Josefa Simici sa parofita ni Vakalesui Mai ni kosipeli i Jisu Karisito ena kena taucoko.

Ke o ni tauvimate tiko beka se so nomuni lomani, au sa laiva na veivakalougatataki ni veivakabulai, sa salavata kei na lewa ni Turaga.

Au sa vakalougatataki kemuni, meu tomana tale kina vakadua niu sa lomani kemuni yadua, ena yaca tabu i Jisu Karisito, emeni.