Na Veitikotiko Totoka Vakaoti

Au a raica wale toka ga oqo e dua na yaloyalokabi e Salt Lake City. E vakamacalataka e dua na kabani ni ta iyaya kei na ukutaki vale e loma. E tukuna tiko, “Qarava Tu na Veitikotiko Totoka Vakaoti e Salt Lake City.”

A veirawai na itukutuku—na cava na “itikotiko totoka vakaoti”? A vakavure vakasama sara vei au na taro oya, vakabibi ena vukudra na gone au a susuga kei Kathy na watiqu, kei na gone era sa susuga tiko nikua. Vakataki ira na itubutubu ena veivanua, keirau a lomaleqataka ka masulaka na neirau matavuvale. Keirau se vakayacora tikoga. Keirau vinakata saraga na ka vinaka taucoko me baleti ira. E rawa vakacava ni ra tiko ena veitikotiko totoka vakaoti kei na luvedra? Au sa vakananuma na itikotiko ni lewe ni Lotu eso au a sikova rawa vata kei Kathy. Keirau a sureti ki na itikotiko eso e Korea kei Kenya, ena Yatu Filipaini kei Peru, e Laos kei Latvia. Meu wasea mada e va na vakadidike me baleta na veitikotiko vinaka.

Matai, mai na rai ni Turaga, na tauyavutaki ni veitikotiko totoka vakaoti sa dodonu me ukucavutaki tu ena nodra ituvaki ni bula na tamata ka tiko kina. Na veitikotiko oqo era sega ni vakavinakataki ena sala bibi se kena dede mai na kedra iyaya ni vale se mai na isau se nodra kilai tani na tamata ka taukena. Na ivakarau ni bula totoka vakaoti ena dua na itikotiko oya na ivakaraitaki ni vakatakilakila i Karisito ena nodra itikotiko na lewena. Na ka e vakabetena vakalevu oya na ukutaki e loma ni yalodra na lewena, sega ni yaya vakataki koya.

Na ivalavala va-Karisito eso oqo sa rawati ni “sa toso na gauna”¹ mai na rawaka nakiti ena salatu ni veiyalayalati. Na ivalavala va-Karisito eso sa curuma tu na nodra bula ka sasagataka voli na tiko vinaka. Era vakatawana na itikotiko ena rarama ni kosipeli, se qele tu na fuloa se mapolo. Ke o iko duadua mada ga ena nomu vuvale e muria na ivakaro mo “vaqara tu na veika oqo,”² sa rawa ni o cau ki na veiyaya vakayalo ni nomu itikotiko vakamatavuvale.

Eda muria na ivakasala ni Turaga meda “cokonaki [keda]; vakarautaka na veika sa yaga; ka tauyavutaka e dua na vale” ena cokonaki, vakarautaki, kei na tauyavutaki ni noda bula vakayalo, sega ni noda vanua tudei. Ni da muria malua tu na salatu ni veiyalayalati ni iVakabula, sa yaco na noda itikotiko me “vale ni lagilagi, vale vakaivakarau, [ka] vale ni Kalou.”³

Karua, o ira na lewe ni tikotiko totoka vakaoti sa solia na nodra gauna ni vulica ena veisiga na ivolanikalou kei na nodra vosa na parofita bula. Sa sureti keda tu o Peresitedi Russell M. Nelson meda “veisautaka” ka “moica” na noda itikotiko ena vulici ni kosipeli.⁴ Sa vakila tu na Nona veisureti ni vakavaletaka na veitikotiko totoka vakaoti na cakacaka malumu ka bibi ni tubu vakayago kei na moici ni noda malumalumu eso. Na veivutuni e veisiga sa dua nai yaragi ni veisau e vakavuna meda yalovinaka cake vakalailai, dau loloma, ka kilaka vakalevu cake. Na vulici ni ivolanikalou sa kauti keda vakavoleka kivua na iVakabula, ka sa yaco me vukei keda na nona loloma kei na loloma soliwale ena noda tubu.

Sa tukuna na italanoa ni matavuvale na iVola Tabu kei na iVola i Momani, ka sega ni veivakurabuitaki ni ra sa ivoladusidusi tawavakatauvatani na ivola vakalou oqo ena tarai ni veitikotiko totoka vakaoti. Era volaitukutukutaka na lomaleqa ni itubutubu, na rerevaki ni veitemaki, na qaqa ni bula dodonu, na bolebole ni lauqa kei na vuabale, na sotavi ni mate kei na rarawa, kei na domobula ni valu kei nai cocovi ni sautu. Sa dau vakaraitaka tu vei keda na ivolanikalou na sala era rawaka kina na matavuvale ena bula dodonu kei na sala era lutu kina ena muri ni salatu eso.

Katolu, na veitikotiko totoka e salamuria na ituvatuva e cakava na Turaga me baleta na Nona itikotiko totoka vakaoti, na valetabu. Na tara ni valetabu e tekivu ena veikalawa matau—vagalalataki ni veikau kei na vakatautauvatataki ni vanua. Na veisasaga taumada oya me vakarautaki na buturara sa rawa ni vakatauvatani ki na muri ni vunau matau eso. Nai vunau eso sa yavu era taracake kina na bula vakatisaipeli. Na bula vakatisaipeli doudou sa vakavuna meda dei, tudei sara, ka tawayavalati rawa,⁵ vaka na ibulibuli sitila ni dua na valetabu. Na ibulibuli doudou oqo sa vakatara na Turaga me tala mai na Yalona me veisautaka na yaloda.⁶ Na sotavi ni dua na veisau levu ni yalo esa vaka na vakuri ni veika totoka ki na loma ni valetabu.

Ni da tomana tiko ena vakabauta, sa veisautaki keda vakamalua na Turaga. Eda ucui Koya ena keda irairai ka tekivu vakatakila na loloma kei na totoka ni Nona ituvaki ni bula.⁷ Ni da sa yaco ni vakataki Koya, eda na vakataukeitaki keda ena Nona vale, ka na vakataukeitaki Koya ena noda vale.

Sa rawa ni da tomana na semati voleka ni noda itikotiko ki na Nona itikotiko ena rawati kei na vakayagataki wasoma ni volatara ni valetabu ena gauna e rawa kina. Ni da cakava vakakina, na rokovi ni vale ni Turaga ena tiko talega ena noda vale.

Na Valetabu totoka e Salt Lake e toka voleka ga. Ni ra tara tu na ivuvu ena yaya ni cakacaka rawarawa eso, veiyaya vakaitaukei, kei na cakacaka kaukauwa tawayalani, a tara na valetabu ena 1853 ki na 1893. Na nodra vinaka ni dodoliga na isevu ni lewe ni Lotu ena cakacaka vakaidinia, droini ni vale, kei na ukutaki vale e loma esa vakavurea e dua na isausau era sa vakila tu e milioni vakacaca na tamata.

Voleka ni 130 na yabaki sa sivi mai na gauna a vakatabui kina na valetabu. Me vaka a raica o Elder Gary E. Stevenson ena noa na ivakavuvuli vakaidinia a vakayagataki me yavutaki kina na valetabu esa sosomitaki ena veituvatuva vou ka taqomaki. Na tawavakatorocaketaki ni malumalumu eso ni veigacagaca vakaidinia kei na vakavinakataki ni valetabu ena cakitaka na nodra yalodei na ivuvu, ka sa cakava na ka kece era rawata ka qai vakatautaka na maroroi ni valetabu ki na kawatamata muri mai.

E sa tekivuna na Lotu e dua na qaravi tavi ni veivakavoutaki me va na yabaki me vakavinakataka na kaukauwa ni gacagaca eso ni valetabu.⁸ Ena vaqaqacotaki na yavu, fuloa, kei na lalaga eso. Na kilaka vakaidinia vinaka duadua sa tiko nikua ena vakavoutaka saraga na ituvaki ni valetabu. Eda na sega ni raica rawa na veisau eso ni kena ituvaki, ia ena ka vakaidina ka bibi sara na kena revurevu. Ena cakacaka kece oqo, na veika ni kena ukutaki totoka na valetabu e loma ena tiko ga.

Sa dodonu meda muria na ivakaraitaki e dusimaka na Valetabu e Salt Lake oya me da taura eso na gauna me da dikeva na noda bula vakayalo ka vakaidniataki yadua ka kilai deivaki ni sotava nai itagede ni tuvaki e gadrevi na siga nikua. Na vagauna ni noda vakadidike, ka mua vata ni tarogi vua na Turaga, “Na cava sa vo vei au?”⁹ e rawa ni vukei keda yadua ena kena vukei ka tarai cake e dua na itikotiko vinaka.

Ka va, era sa ivakaruru ni veitikotiko totoka mai na cava eso ni bula. Sa yalataka tu na Turaga ni ko ira e muria na ivunau ena “tiko sautu ena vanua.”¹⁰ Na qaqa ni Kalou sai koya na kaukauwa ni toso ki liu veitalia na leqa eso ni bula.

Au a vulica ena 2002 e dua na lesoni bibi me baleta na leqa eso. Niu tiko e Asunción, Paraguay, au a sotavi ira na peresitedi ni iteki ena vanua oya. Ena gauna oya, a sotavi Paraguay tu na leqa bibi vakailavo, ka sotavi dredre voli e vuqa na lewe ni Lotu ka sega ni vakacegu rawa. Au a sega ni se taleva na Ceva kei America mai na noqu gauna ni kaulotu ka sega ni talevi Paraguay. Au a veiqaravi walega ena Mataveiliutaki ni Wasewase oya me vica na macawa. Ena nuiqawaqawa baleta na noqu yalolailai ni veituberi vei ira na peresitedi ni iteki oya, au a tarogi ira mera tukuna vei au na ka sa lako vinaka tiko ena nodra iteki. A tukuna vei au na matai ni peresitedi ni iteki na veika sa lako vinaka tiko. Koya e tarava a tukuna na veika sa lako vinaka tiko kei na so na leqa. Ni gauna keitou sa yaco kina vua na iotioti ni peresitedi ni iteki, a vakaraitaka ga o koya e vica na bolebole drakidrakita. Ni ra vakamacalataka na peresitedi ni iteki na bibi ni veituvaki, au a kauwai sara vakalevu, viavia doudou, ena ka meu kaya.

“Elder Clayton, taroga vei ira na taro oqo: ‘Kemuni na vei peresitedi, ena lewe ni nomuni iteki ka sauma vakataucoko na ikatini, sauma vakadodonu na isolisoli ni lolo, vakalevutaka na nodra veikacivi ena Lotu, sikova tu na nodra matavuvale vaka dauveisiko se siko vuvale¹¹ ena veivula, vakayaco lotu vakamatavuvale, vulica na ivolanikalou, ka masu vakamatavuvale ena veisiga, e vica vei ira e leqa tu ka sega ni walia rawa vakai ira me sega ni vakaitavi kina na Lotu me walia vei ira na nodra leqa?’”

Niu lomadei tu ki na vakasama au a ciqoma, au tarogi ira sara na peresitedi ni iteki ena taro oya.

Era vakaraici au ena vagagalu kurabui ka qai kaya, “Pues, ninguno,” a kena ibalebale, “Ia, e sega ni dua.” Era qai tukuna vei au ni sega ni dua vei ira na lewenilotu ka kitaka na ka taucoko oya e sotava na leqa eso era a sega ni rawa ni walia vakai ira. Cava na vuna? Baleta ni ra tiko ena veitikotiko totoka vakaoti. Na nodra bula vakabauta sa vakarautaka vei ira na kaukauwa, raivotu, kei na veivuke vakalomalagi era gadreva tu mera vosota ka bula curuma kina na dredre vakailavo ena nodra vanua vakaitaukei.

E sega ni kena ibalebale oqo ni ra na sega ni baca na yalododonu, sotava na vakacalaka, na leqa vakabisinisi, se donuya e vuqa tale na ka dredre ni bula. Na bula oqo sa dau vakavu bolebole, ia au sa raica ena veigauna ni o ira ka saga me muria na ivunau sa vakalougatataki mera raica na nodra sala ki liu ena vakacegu kei na nuinui. Sa tiko na veivakalougatataki oya ki vei ira na tamata kece ena veivanua.¹²

A cauraka o Tevita, “Kevaka sa sega ni tara na vale ko Jiova, era sa oca wale ko ira era sa tara.”¹³ Ena vanua cava ga o tiko kina, se vakacava tu na irairai ni nomu vale, ka vakacava tu na iwiliwili ni nomu matavuvale, sa rawa ni o tara na itikotiko totoka vakaoti me baleta na nomu matavuvale. Sa vakarautaka na kosipeli vakalesui mai i Karisito na ituvatuva ni itikotiko oqori. Na iVakabula sa idinia uasivi, dautara vale, ka dauukutaki vale e loma. Sa Nona cakacaka na vakamarautaki vinaka sara ka tawamudu ni yaloda. Ena Nona veivuke lomani, na yalomu sa rawa ni ka taucoko e vinakata o Koya me vakakina ka sa rawa ni o ivakaraitaki vinaka sara vakai iko— e dua na itikotiko totoka vakaoti.

Au vakadinadinataka ena vakavinavinaka ni sa bula na Kalou na Tamada taucoko. Na Luvena, ko Jisu Karisito, sa iVakabula ka Dauveivueti ki na kawa tamata kecega. Rau sa lomani keda vakavinaka sara. Na Lotu i Jisu Karisito ni Yalododonu Edaidai sa matanitu ni Turaga e vuravura. Sa liutaka tu nikua o ira na parofita kei na iapositolo bula. Sa dina na iVola i Momani. Na kosipeli vakalesuimai i Jisu Karisito sai koya na ituvatuva uasivi duadua ni kena tauyavutaki na veivale uasivi. Ena yacai Jisu Karisito, emeni.