Na Kaukauwa ni iVola i Momani ena Saumaki

Ni dikevi oti na ripote mai na macala ni veiqaravi ni bula vakayago walega oqo, au vulica ni sa gadrevi meu cakava eso na veisau ni tovonibula. Me vukei au, a dusimaka na noqu vuniwai e dua na ituvatuva ni kakana kei na vakaukauwa yago, ka keu na vakamuria, ena veisautaki au ki na dua na tamata bulabula cake.

Kevaka eda lako curuma yadua e dua na vakadidike vakayalo, na cava eda rawa ni vulica me baleti keda? Na veisau cava soti ena dusimaka na noda vuniwai vakayalo? Me rawa ni yaco meda vakataki koya eda gadreva tu, esa ganiti me kilai na ka meda cakava ka cakava na ka eda kila.

Sai Jisu Karisito na Vuniwai Vakavuvuli.¹ Ena vuku ni Nona veisorovaki, sa vauca o Koya na noda vue, sa colata o Koya na noda rarawa, ka vakabula na ramusu ni yaloda.² Ena vuku ni Nona loloma soliwale, sa rawa ni vakaukauwataki na noda malumalumu.³ Sa veisureti tu meda muri Koya⁴ ena vuli mai Vua, rogoci ni Nona vosa, ka lako voli ena yalomalua ni Yalona.⁵ Sa yalataka o Koya me vukei keda⁶ ena ivalavala kece ni saumaki ena bula oqo, ka sa veisautaki keda ka kauta mai na reki tawamudu.⁷

Sa solia vei keda na iVakabula na iVola i Momani me dua nai yaragi kaukauwa me veivuke ena saumaki. Sa vakarautaka na iVola i Momani na kakana vakayalo, dusimaka e dua na ituvatuva ni cakacaka, ka semati keda ki na Yalo Tabu. Ni volai tu me baleti keda,⁸ sa tiko kina na vosa ni Kalou⁹ ena kena matata kece10ka sa tukuna na keda ivakatakilakila, inaki, kei na icavacava.¹⁰ Vata kei na iVola Tabu, na iVola i Momani sa vakadinadinataki Jisu Karisito¹¹ ka vakavulica na sala eda rawa ni kila kina na dina ka yaco me vakataki Koya.

iVakatakilakila

Brother Saw Polo

A sa yabaki 58 o Baraca Saw Polo ena gauna a vakatakilai kina vua na kosipeli vakalesui mai i Jisu Karisito. Niu sotavi koya, a veiqaravi tu vaka peresitedi ni tabana me vica na tabaki, ia au vulica ni a sega tu ni wilika o koya na iVola i Momani baleta ni a se bera tu ni vakadewataki ena nona vosa vaka-Burma. Niu tarogi koya se kila vakacava ni sa dina na ivola ni se bera mada ni wilika, a sauma o koya ni sa vulica ena veisiga na ivola ni yaloyalo ni Talanoa Eso ni iVola i Momani ena saravi ni kedra ituvaki, vakayagataki ni dua na ivolavosa me vakadewataki na vosa vaka-Valagi, kei na volai ni veika eso esa vulica rawa. A vakamacalataka, “Ena veigauna au vuli kina, au na masulaka na ka au sa vulica, kau na vakila na vakacegu kei na reki, ena matata na noqu vakasama, kau na yalomalumalumu tu. Au vakila ni sa vakadinadinataka vei au na Yalo Tabu na kena dina. Au kila ni sa vosa ni Kalou na iVola i Momani.”

Me vakataki Brother Saw Polo, e rawa vei keda yadua meda vuli mai na iVola i Momani me vaka e vakatara na noda dui ituvaki. Ni da gadreva meda vakabauta ka vakasamataka vakatitobu na ivakavuvuli e lomada, sa rawa ni da kerea vua na Kalou ena vakabauta kevaka e dina na ivakavuvuli.¹² Kevaka e lako dina mai yaloda na noda gagadre meda kila ka lomada dina meda cakacakataka, ena sauma ko Koya e lomada mai vua na Yalo Tabu. Ia na kaukauwa ni Yalo Tabu ena vakatakila vei kemudou na dina ni veika kecega.¹³ Ena gauna eda ciqoma kina na ivakadinadina vakalomalagi ni iVola i Momani, eda na kila talega ena kaukauwa vata ga ni o Jisu Karisito na iVakabula ni vuravura, ka Nona parofita o Josefa Simici, ka Nona Lotu vakalesui mai Na Lotu i Jisu Karisito ni Yalododonu Edaidai.¹⁴

Vaka na gonetagane ka tekivuna tiko na noqu veiqaravi va-kaulotu, au a vodoka e dua na waqavuka ki Ositerelia. Ena yalo galili, lomaleqa, kei na veilecayaki ia yalodei tu ki na veiqaravi, au sa gadreva sara vakabibi na veivakadeitaki ni sa dina na ka au vakabauta tu. Au masu ka wilika vagumatua na noqu ivolanikalou, ia ni toso tiko na vuka, sa tubu tikoga na noqu vakatitiqa ka torosobu na ituvaki ni yagoqu. Ni oti noqu sotavi dredre voli me vica na aua, a gole mai e dua na dauniveiqaravi ka duri tikiva tu na noqu idabedabe. A taura o koya na iVola i Momani au a wilika tiko mai na ligaqu. A raica o koya na dagona ka kaya, “Oqori e dua na ivola vinaka!” qai solia lesu tale vei au na ivola ka gole yani. Au a sega ni raici koya tale.

Ni voqa tu na nona vosa ki daligaqu, au a rogoca ka vakila rawa ki lomaqu, “O au oqo, kau sa kila na vanua o tiko kina. Kitaka ga na nomu vinaka taucoko, ena qai noqu na kena vo.” Ena waqavuka oya ena dela ni Wasa Pasifika, au a ciqoma e dua na noqu vakadinadina mai na vulici ni iVola i Momani kei na veivakadeitaki ni Yalo Tabu ni sa kilai au tu na noqu iVakabula ka sa dina na kosipeli.

A vakavulica o Elder David A. Bednar: “Ni kilai ni dina na kosipeli sa ikoya na isaluwaki ni ivakadinadina. Na yalodina tikoga ki na kosipeli sa isaluwaki ni saumaki.”¹⁵ Na saumaki sa gadreva meda “muria na vosa, ka kakua ni rogoca walega.”¹⁶ Na ituvatuva ni cakacaka ni Turaga me baleti keda—na ivunau i Karisito—esa vakavulici vakamatata sara ena iVola i Momani.¹⁷ E oka kina:

• Matai, cakacakataki ni vakabauta vei Jisu Karisito ena vakararavi Vua, muri ni Nona ivunau, kei na kena kilai ni na vukei keda o Koya.¹⁸

• Karua, veivutunitaki e veisiga ni noda malumalumu ka kune reki tu kei na vakacegu ni sa vosoti keda o Koya.¹⁹ Na veivutuni sa gadreva meda vosoti ira na tani²⁰ ka vukea na noda toso ki liu. Sa yalataka tu na iVakabula me vosoti keda ena gauna kecega eda veivutuni kina.²¹

• Katolu, na caka kei na muri tu ni veiyalayalati kei na Kalou ena cakacaka vakalotu eso vaka na papitaiso. Oqo ena tauri keda toka ena salatu ni veiyalayalti e veimuataki ki Vua.²²

• Kava, ciqomi ni solisoli ni Yalo Tabu. Na isolisoli oqo e vakatara vei keda na veitokani tudei ni dua e dau vakatabui, vakacegui, ka tuberi keda.²³

• Kalima, vosota tu me yacova na ivakataotioti ena toso dei ki liu ni kana magiti voli e veisiga ena vosa i Karisito.²⁴ Ena kana magiti mai na iVola i Momani kei na tauri matua ni kena ivakavuvuli, sa rawa ni da ulabaleta kina na veitemaki eso ka ciqoma na veituberi kei na veitaqomaki ena noda bula taucoko.²⁵

Ena kena vakayagataki dei tu na ivunau i Karisito ki na noda bula, eda na ulabaleta na vakawelewele e vakaleqa na veisau kei na rere e tarova na cakacaka. Eda na ciqoma na noda ivakatakila, baleta na Yalo Tabu “ena vakaraitaka vei kemudou na veika kece mo dou kitaka,”²⁶ kei “na vosa i Karisito sa tukuna vei kemudou na veika kece mo dou kitaka.”²⁷

Ena 20 na yabaki, nona sasaga dredre toka o Baraca Huang Juncong ena alakaolo, tavako, kei na veimau ilavo veirawai. Ni sa veivakilaitaki vei Jisu Karisito kei na Nona kosipeli vakalesui mai, sa gadreva o Baraca Huang me veisau ena vuku ni nona matavuvale gone. Na nona bolebole levu duadua na vakatavako. E dua na dauvakatavako tomani, a tawayaga na nona sasaga me biuta ena vuqa na gauna. Dua na siga, a tao ki na nona vakasama na veivosa oqo mai na iVola i Momani: “ena yalodina, ena lomamudou taucoko.”²⁸ Dina ga ni a cala na veisasaga e liu, a vakila o koya ni sa rawa vua me veisau ena veivuke ni Tamada Vakalomalagi kei Jisu Karisito.

Rau a semata na nodrau vakabauta na daukaulotu tudei vata kei koya ka vakarautaka e dua na ituvatuva ni cakacaka ni tatarovi veiganiti, salavata kei na ivakarau levu ni masumasu kei na vulici ni vosa ni Kalou. Ena lomavinaka kei na yalodina, a cakacaka ena vakabauta sasagataki o Baraca Huang ka raica na levu ga ni nona dikeva na ivakarau vou e gadreva tu me vakatorocaketaka, vaka na vulici ni iVola i Momani, a dikeva vakalailai o koya na ivakarau eso e vinakata me vakanadakuya.

Ni nanuma lesu na ka e sotava ena 15 na yabaki sa oti, kaya o koya, “Au sega ni nanuma na gauna donu au a biuta kina na tavako, ia niu saga dredre tu e veisiga meu cakava na veika au kila sa gadrevi me caka me sureta na Yalo ni Turaga ki na noqu bula ka tomana tiko ni cakava, sa sega ni qai rawai au tale na tavako ka sega tu me yacova oqo.” Mai na tutaki ni ivakavuvuli ni iVola i Momani, na bula nei Baraca Huang esa veisau, ka sa yaco me dua na turaga vakawati ka tama vinaka cake.

iVakatakilakila

Huang Juncong kei nona vuvale

Sa yalataka o Peresitedi Russell M. Nelson: “Ena nomuni vulica ena masumasu na iVola i Momani e veisiga, o ni na dau vakatauca na lewa vinaka cake—e veisiga. Au yalataka ena nomuni vakasamataka vakatitobu na veika o ni vulica, ena tadolavi na katubaleka ni lomalagi, ka o na ciqoma na isau ni nomu taro kei na idusidusi ena nomu bula. Au yalataka ena nomu dromuci iko ena iVola i Momani e veisiga, sa rawa ni o cula ena itatarovi ni veika ca ni siga oya, okati kina na mate veitauvi sa veivesuki tu ni yaloyalo vakasisila kei na so tale na itovo veirawai ni vakanunu-vakasama.”²⁹

Kemuni na veitokani lomani, sa vosa ni Kalou na iVola i Momani, ka da na toso volekati Koya sara kevaka eda vulica.³⁰ Ni da vakatovotovotaka na kena vosa,eda na rawata e dua na vakadinadina ni kena dina vakataucoko.³¹ Ni da bula deivaki tu ena kena ivakavuvuli, sa “sega tale ni tu vei keda na gagadre meda vakayacora na ca.”³² Na lomada, irairai, kei na itovo ni bula ena veisautaki meda yaco ni vakataka cake na iVakabula.³³ Au wasea na noqu ivakadinadina dei ni sa Karisito o Jisu, na noda iVakabula, Dauveivueti, ka iTokani. Ena yacai Jisu Karisito, emeni.