Osana kei na Aleluya—O Jisu Karisito sa Bula Tiko: Na Uto ni Vakalesui Mai kei na Siga ni Mate

Kemuni na taciqu kei na ganequ lomani: ena osana kei na aleluya, eda sa marautaki Jisu Karisito sa bula tiko ena gauna oqo ni tomani tiko na Vakalesui Mai kei na Siga ni Mate. Ena loloma uasivi sara, sa vakadeitaka vei keda na iVakabula: “A veika oqo kau sa tukuna vei kemudou, mo dou rawata na vakacegu ena vukuqu. Dou na kunea e vuravura na rarawa: ia mo dou vakacegu; au sa vakamalumalumutaki vuravura.”¹

Ena vica na yabaki sa oti, keirau a sotava kei Sister Gong e dua na vuvale vinaka, ka taura ga mai vakamalua o Ivy na luvedrau goneyalewa na nona kato ni vaiolini. A, taura mai na bou ni vaiolini, vakadreta ka biuta na kena rosini. Oti sa qai biuta lesu vakavinaka na bou ena kena kato, matadredredre, vakarokoroko, ka dabe sobu. Ni se ka vou, se qai wasea oti ga na veika e kila baleta na vaiolini. Ia oqo, ni oti e vica na yabaki, sa vakatagitaka vinaka sara o Ivy na vaiolini.

iVakatakilakila

Ivy kei na nona vaiolini

Ena gauna ni bula oqo, eda sa vakataki Ivy toka vakalailai kei na nona vaiolini. Eda sa tekivu mai na kena itekivu. Ena vakatovotovo kei na igu tikoga, eda sa tubu ka torocake sara. Ni toso tiko na gauna, sa vukei keda na galala ni digidigi kei na veika eda sotava eke me yaco meda vakataka cake na noda iVakabula ni da cakacaka vata kei Koya ena Nona tabaniwere² ka muria na Nona salatu ni veiyalayalati.

Na marau ni ivakananumi eso, oka kina na yabaki 200 oqo, e kena usutu na iwalewale ni vakalesui mai.³ Ena kena marautaki na tomani tiko ni Vakalesui Mai ni kosipeli i Jisu Karisito, eda sa vakavakarau talega ki na Siga ni Mate. Ena kena ruarua oqo, eda sa rekitaka na lesu mai i Jisu Karisito E bula tiko o Koya—sega walega e liu, ia ena gauna oqo; sega ni baleta eso ga, ia na tamata kece. Vakaidina ka vakaibalebale, sa lako mai o Koya me vakabulai ira na yalo rarawa, sereki ira na bobula, dolava na matadra na mataboko, ka vueti ira era sa mavoa.⁴ Ya o keda yadua. Na Nona yalayala ni veivueti sa yaga, se cava sara na noda bula taumada, se nikua, se cava ga eda nanuma baleta na noda veisiga ni mataka.

iVakatakilakila

Na curu vakatui ni curu ki Jerusalemi

Mataka e Sigatabu ni Curu Vakatui. Na kena ivakarau na niu e ivakatakilakila tabu vakaraitaka kina na marau ni noda Turaga, me vaka curu vakatui o Karisito ki Jerusalemi, ka sa levu sara na tamata … era sa taura na veitabana qeteqete ni veikau, ka lako yani me veitata kei koya.”⁵ (O na taleitaka beka mo kila na imatai ni droini nei Harry Anderson e lili tiko ena valenivolavola nei Peresitedi Russell M. Nelson, ena daku ga ni nona desi.) Ena ivola ni iVakatakila, o ira era sa vakalagilagia na Kalou kei na Lami era sa “vakaisulu e nai sulu vulavula ka taura na niu e na ligadra.”⁶ Ena “icurucuru balavu ni buladodonu” kei na “isala vakatui ni lagilagi,” sa oka talega na niu ena masu ni kena vakatabui na Valetabu e Kirtland.⁷

E dina sara, na inaki bibi ni Siga Tabu ni Curu Vakatui e uabaleta yani na nona a kidavaki o Jisu ena drau ni niu. Ena Siga Tabu ni Curu Vakatui, a curu qaqa o Jisu ki Jerusalemi ena sala era kila o ira na yalodina ni sa yaco na ka a parofisaitaki tu mai. Me vaka na parofisai vakaparofita nei Sakaraia⁸ kei Daunisame, a curu na noda Turaga ki Jerusalemi ni sa vodoka e dua na asa ka ra kacivaka ena domolevu na lewevuqa ni ra sa kila tu “Osana kicake sara.”⁹ Na ibalebale ni osana “mo ni ia sara na veivakabulai.”¹⁰ E liu, ena gauna oqo, eda sa reki, “Sa kalougata ko koya sa lako mai ena yaca i Jiova.”¹¹

Na macawa e tarava na Siga Tabu ni Curu Vakatui sa Siga Tabu ni Siga ni Mate. E vakavulica o Peresitedi Russell M. Nelson ni o Jisu Karisito “a lako mai me mai sauma na dinau a sega ni nona, baleta ni da sa sega ni sauma rawa na noda dinau.”¹² Sa dina sara, ena Veisorovaki i Karisito, o ira kece na luve ni Kalou “ena rawa ni vakabulai, ena talairawarawa ki na lawa kei na cakacaka vakalotu ni Kosipeli.”¹³ Ena Siga ni Mate, eda na laga aleluya. Na aleluya e kena ibalebale “me vakacaucautaki na Turaga o Jiova.”¹⁴ Na Korosi ni Aleluya maivei Handel ena Messiah sa dua na itukutuku raraba ni Siga ni Mate ni o Koya na “nodra Tui na Tui, ka nodra Turaga na Turaga.”¹⁵

Na veisoqo tabu ena tadrua ni Siga Tabu ni Curu Vakatui kei na Siga Tabu ni Siga ni Mate era sa italanoa ni osana kei na aleluya. Na osana sa noda vakamamasu vua na Kalou me veivakabulai. Na aleluya sa vakaraitaka tiko noda vakacaucau kei na vakavinavinaka vua na Turaga ena inuinui ni da sa vakabulai ka bula vakacerecerei. Ena osana kei na aleluya eda sa kila kina ni Jisu Karisito sa bula tiko sa uto ni Siga ni Mate kei na vakalesui mai ni siga edaidai.

Na Vakalesui Mai ni siga edaidai e tekivu ena rairai mai vakalou—na nodrau rairai dina mai na Kalou na Tamana kei na Luvena, o Jisu Karisito, kivei parofita cauravou o Josefa Simici. A kaya o Parofita Josefa, “E rawa mo rai yani ki lomalagi me lima na miniti, o na kila vakalevu cake mai na nomu wilika na veika kece sa volai tu me baleta na ka oqo.”¹⁶ Ena vuku ga ni sa dola tale tu ko lomalagi, eda sa kila ka “vakabauta na Kalou, na Tamada Tawamudu, kei na Luvena, ko Jisu Karisito kei na Yalo Tabu”¹⁷—na Lewe Tolu Vakalou tabu.

Ena Siga Tabu ni Siga ni Mate, 3 ni Epereli, 1836, ni se qai tekivu walega na Vakalesui Mai, a rairai o Jisu Karisito sa bula tiko ena gauna a vakatabui tiko kina na Valetabu e Katiladi. O ira era a raici Koya era a vakadinadinataki Koya ena ituvaki totoka duidui ni bukawaqa kei na wai: “A sa vaka na yameyame ni bukawaqa; na yaloka ni matana, sa vulavula sara na drau ni uluna me vaka na uca cevata; ia na iserau ni kena irairai sa uasivi cake mai na rarama ni matanisiga; a rorogo ni domona sa vaka na vadugu ni wailevu, io na domo i Jiova.”¹⁸

E kea, a kaya na noda iVakabula, “Koi au na kena ivakatekivu kei na kena ivakataotioti; sai Au sa bula, sai Au talega sa vakamatei; Au na nomudou dautataro vei Tamada.”¹⁹ Vakadua tale, na duidui vinaka—na ivakatekivu kei na ivakataotioti, sa bula tiko ka sa vakamatei. Sai koya na Alifa kei na Omeka, na ivakatekivu kei na ivakataotioti,²⁰ sa tekivuna ka sauma talega na noda vakabauta.²¹

Ni oti na nona rairai mai o Jisu Karisito, e ratou a tadu talega mai o Mosese, Iliesa, kei Ilaija. Ena veidusimaki vakalou, e ratou a vakalesua mai na parofita cecere oqo na idola kei na lewa ni matabete Sa yaco kina, me “soli kina na idola ni itabagauna”²² ena loma ni Nona Lotu sa vakalesui mai me vakalougatataki ira na luve ni Kalou.

Na tadu mai nei Ilaija ena Valetabu e Kirtland sa yaco kina na ka a parofisaitaka o Malakai ena Veiyalayalati Makawa ni na lesu mai o Ilaija “ena qai lako mai emuri na siga i Jiova e levu ka rerevaki.”²³ Ni sa yaco oqo, sa veidonui kina na tadu mai nei Ilaija, sega ni vakacala-ka kei na gauna ni Lakosivia ni Jiu ena kena ivakarau e rokovi kina na lesu mai nei Ilaija.

E vuqa na vuvale vaka-Jiu yalodina era vakarautaka tu na tikina me nei Ilaija ena nodra teveli ni Lakosivia. E vuqa era dau vakasinaita e dua na bilo me sureti ka kidavaki kina o koya. Ka so, ena gauna ni nodra Soqo ni Lakosivia, mera tala e dua na gone ki na katuba, ka vakalaqa toka ena so na gauna, me raica ke sa wawa tu e tuba o Ilaija me sureti mai.²⁴

Ena kena yaco na ka sa parofisaitaki tu me tiki ni vakalesuimai ni ka kecega sa yalataki tu,²⁵ a yaco dina mai o Ilaija me vaka sa yalataki tu, ena Siga ni Mate ena gauna ni Lakosivia. A kauta tiko mai na lewa ni veivauci mera vauci na matavuvale e vuravura vakakina mai lomalagi. Me vaka a vakavulica o Moronai vei Parofita Josefa, o Ilaija ena “tea ko koya e lomadra na gone na yalayala a caka vei ira na qase, ka na gole na lomadra na gone vei ira na nodra qase. Kevaka e sega ni vakakina,” a tomana o Moronai, “sa na vakarusai sara na vuravura taucoko ena nona lako mai [na Turaga].”²⁶ Na yalo i Ilaija, sa ivakaraitaki mai ni Yalo Tabu, sa vagolei keda vei ira na noda itabatamata—e liu, ena gauna oqo, kei na veisiga ni mataka—ena noda veiqaravi ni tuva kawa, itukutuku makawa, kei na valetabu.

Meda sa vakananuma talega eke vakalailai na ibalebale ni Lakosivia. Na Lakosivia e vakananumi kina na nodra a sereki na luvei Isireli mai na 400 na yabaki ni tiko bobula. Na ivola ni Lako Yani e tukuna na kena a yaco rawa na veisereki oqo ni oti na veika ca mai na boto, kutu, lago, mate ni manumanu, bo, vuvuce, uca-cevata kei na bukawaqa, vodre, kei na butobuto vavaku. Na iotioti ni mate ca a rerevaki sara ena nodra mate na ulumatua tagane ena vanua, ia a sega ni yaco vei ira na vuvale i Isireli—kevaka era boroya na vuvale yadua na dra ni lami ulumatua sega ni ca ena nodra ulu ni katuba.²⁷

A lakosivita na agilosi veivakamatei na veivale a boroi tu ena dra ivakatakilakila ni lami.²⁸ Na lakosivita o ya, se lakosivia, sa matataka tiko na nona na qaqa o Jisu Karisito mai na mate. Sa dina sara, na dra ni veisorovaki ni Lami ni Kalou sa solia vua na noda iVakatawa Vinaka na kaukauwa me soqoni ira na Nona tamata ena veivanua kecega mera tiko taqomaki ena Nona loqi ena yasa ruarua ni ilati.

Sa ka bibi sara, ena kena vakamacalataki ena iVola i Momani “na kaukauwa kei na tucaketale i Karisito”²⁹—na usutu ni Siga ni Mate—ena rua na vakalesui mai.

iMatai, na tucaketale e oka kina na vakalesui mai vei keda “ituvaki vinaka”; “na isema kece,” “ka na sega mada ga ni yali e dua na drau ni ulu.”³⁰ Na yalayala oqo sa solia na inuinui vei ira sa yali na ligadra kei na yavadra, o ira sa sega tu ni rai rawa,ni rai rogo, se lako, se o ira era yali ena vukuni tauvimate dredre, tauvimate ni vakasama se na yali mai ki na veivakaocai rawa ni veivakalailaitaki. Sa kunei keda o Koya. Sa vakataucokotaki keda.

Na karua ni yalayala ni Siga ni Mate kei na Veisorovaki ni noda Turaga o ya ni na “vakalesui tale kina na veika kece ki na kena itutu dina.”³¹ Na veivakalesuimai vakayalo oqo e vakaraitaka na noda cakacaka kei na gagadre. Me vaka na madrai e wai,³² e vakalesuya “mai na veika vinaka,” “dodonu,” “dina,” kei na “yalololoma.”³³ E sega ni kurabuitaki nona vakayagataka o parofita Alama na vosa vakalesui vaka 22 na gauna³⁴ ena nona kerei keda meda “caka dodonu, vakatulewa vakadodonu, io mo daucaka vinaka tiko ga.”³⁵

Ena vuku ga ni “mai sorovaka kina na Kalou vakataki koya na ivalavala ca ni kai vuravura,”³⁶ na Veisorovaki ni Turaga sa rawa me vakalesua mai sega walega na ka sa yaco, ia na veika ga e rawa. Baleta ni kila o koya na noda mosi, na veivakararawataki, na tauvimate, na noda “veitemaki ena veika kece e rawata,”³⁷ ena loloma cecere, ena vukei keda me vaka na noda malumalumu.³⁸ Ena vuku ga ni Kalou “ni Kalou e vinaka sara, e Kalou dodonu, e Kalou dauloloma talega,” na ituvatuva ni loloma vakalou ena “rogoci kina na tagi ni lewa dodonu.”³⁹ Eda sa veivutuni ka cakava na veika kece eda rawata. Ena loloma soliwale kei na loloma veivueti tawamudu, sa ovici keda tawamudu tu “ena liga ni nona loloma.”⁴⁰

Nikua eda sa marautaka tiko na vakalesui mai kei na tucaketale. Au rekitaka ka vakadinadinataka vata kei iko ka tomani tiko ni Vakalesui Mai ni taucoko ni kosipeli i Jisu Karisito. Ena kena tekivu ena rua na drau na yabaki sa oti ena vula itubutubu oqo, sa tomani tiko ga mai na rarama kei na ivakatakila mai vua na parofita ni Turaga kei na Nona Lotu sa vakatokai ena Yacana—Na Lotu i Jisu Karisito ni Yalododonu Edaidai—kei na ivakatakila ki na tamata yadua kei na veivakauqeti mai na isolisoli cecere ni Yalo Tabu.

Vata kei kemuni, ena gauna ni Siganimate oqo, au vakadinadinataka na Kalou, na Tamada Tawamudu, kei na Luvena lomani, o Jisu Karisito sa bula tiko. O ira na tamata vakayago era a rube mate vakaloloma ia era a qai tucaketale. Ia o Jisu Karisito ga sa bula tiko ena kena ituvaki uasivi ni tucaketale se tu ga vua na mawe ni rube e kauveilatai e ligana, yavana, kei na sarisarina. O Koya e rawa ni kaya, “Raica kau sa ceuti iko e na qeteqete ni ligaqu.⁴¹ O Koya e rawa ni kaya: “Raica sai au ga sa laveti cake. Ko i Au ko Jisu ka a lauvako ki na kauveilatai. Raica sai au na Luve ni Kalou.”⁴²

Me vakataki Ivy kei na nona vaiolini, oi keda eda se tekivu tiko ga. E dina sara, “sa sega na mata sa kunea, se na daliga sa rogoca, ka sa sega ni curu ki na loma ni tamata, na veika sa vakarautaka na Kalou me nodra sa lomani Koya.”⁴³ Ena veigauna oqo, eda rawa ni vulica kina e vuqa na veika vinaka ni Kalou kei na noda rawata vakalou me baleta na loloma ni Kalou me tubu vei keda ni da vakasaqarai Koya ka dolele yani ki liu. Sa dua na kalougata levu eda rawa ni cakava ka yacova, vosa ena vosa, yalololoma ena yalololoma, vaka tamata yadua kei na cokovata.

Kemuni na taciqu kei na ganequ ena veivanua, ni da mai sota kau vuli mai vei kemuni, au sa vakasinaiti ena yalo ni ilakolako ni kosipeli kei na vakavinavinaka. Na nomuni ivakadinadina kei na ilakolako ni kosipeli sa vakabulabulataka na noqu ivakadinadina kei na noqu ilakolako ni kosipeli. Na nomuni kauwai kei na reki, na nomuni lomana na noda itikotiko raraba ni Yalododonu kei na vuvale ni Kalou, kei na nomuni kila bulataki ni dina kei na rarama vakalesui mai sa vakalevutaka na taucoko ni noqu kosipeli vakalesui mai, vata kei Jisu Karisito sa bula tiko sa kena usutu. Eda sa vakararavi vata, “cere na nomu kei na rarama, Turaga, ni tiko ga kei au.”⁴⁴ Duavata eda kila, ena loma ni noda icolacola kei na kauwai, sa rawa ni da wilika na noda veivakalougatataki e vuqa.⁴⁵ Ena veisiga kei na veika lalai ka rawarawa, eda rawa ni raica na veika lelevu ena yaco mai ena noda bula.⁴⁶

“Ka na qai yaco ni ra na vakasoqoni tani mai na veimatanitu kecega o ira na buladodonu, ka ra na lako mai ki Saioni, ka lagata voli na sere ni reki tawavakaiyalayala.”⁴⁷ Ena gauna oqo ni osana kei na aleluya, lagata na aleluya—ni na veiliutaki o Koya me tawamudu ka tawayalani! Kailavaka na osana, ki vua na Kalou kei na Lami! Ena yaca tabu savasava i Jisu Karisito, emeni.