Na Veivakalougatataki ni iVakatakila Tomani Tiko vei ira na Parofita kei na iVakatakila Yadua me Dusimaka Noda Bula
E sa ciqomi rawa ka sa ciqomi tiko ga na ivakatakila tomani ena sala eso sa tauyavutaka na Turaga.
Edaidai au na vosa ena ivakatakila tomani tiko vei ira na parofita kei na ivakatakila yadua tomani tiko me dusimaka noda bula.
Ena so na gauna eda ciqoma na ivakatakila ni da sega tu mada ga ni kila na inaki eso ni Turaga. Ni bera vakalailai nona a kacivi o Elder Jeffrey R. Holland me dua na iApositolo ena June ni 1994, e a dua na noqu ivakatakila sotavi totoka ni na kacivi o koya. Au a mata ni wasewase voli ka’u sega ni raica rawa na vuna me soli kina vei au na kilaka oya. Ia keirau a veitokani vaka daukaulotu gone e Igiladi ena itekivu ni 1960 vakacaca, ka’u a daulomani koya vakalevu sara. Au a okata na ka sotavi oya me dua na loloma cecere mareqeti me baleti au. Ena veiyabaki wale tikoga qo, au a vakataroga se a vakarautaki au tiko na Turaga meu itokani gone ena Le Tinikarua vua e dua na itokani daukaulotu vakasakiti ka a noqu itokani gone ni keirau a se daukaulotu voli.1 Ena so na gauna au dau vakasalataki ira na daukaulotu gone mera dau lomani ira nodra itokani gone baleta era sega ni kila ni ra na rawa ni yaco me nodra itokani qase.
E tiko na noqu ivakadinadina dei ni Lotu vakalesui mai oqo e sa liutaki mai vua na noda iVakabula, o Jisu Karisito. E kila o Koya o cei me kaciva vaka Nona iApositolo kei na ituvatuva me kacivi ira kina. E kila talega oKoya na sala me vakarautaka kina Nona iApositolo qase me parofita ka Peresitedi ni Lotu.
Eda sa vakalougatataki ena mataka nikua ni da rogoca noda parofita lomani, o Peresitedi Russell M. Nelson, ni kacivaka e dua na ivakaro vakayabaki‑ruanadrau bibi ki vuravura me baleta na Vakalesui mai ni taucoko ni kosipeli i Jisu Karisito.2 Na itukutuku bibi oqo mai vei Peresitedi Nelson sa vakamatatataka ni sa vu ni kena itekitekivu, na kena bula tu oqo, kei na kena na muataki e veigauna mai muri na Lotu i Jisu Karisito sa ikoya na ivakavuvuli ni ivakatakila tomani tiko. Na ivakaro vou e matataka e dua na sala ni veitaratara ni Tamada dauloloma vei ira na Luvena.
Ena dua na siga eliu, e a vakaraitaka kina o Peresitedi Spencer W. Kimball na veika a vakila me vakai au nikua. A kaya o koya: “Ena veika kece sara, e dodonu me da vakavinavinaka kina vakalevu … sai koya ni sa dola vakaidina tu na lomalagi ka vakakina ni sa tauyavutaki na lotu i Jisu Karisito ena vatu ni ivakatakila. Na ivakatakila e vakaikuritaki sai koya na dra bula ni nona kosipeli na Turaga bula ka iVakabula, ko Jisu Karisito.”3
Na parofita o Inoke a raica taumada na veisiga eda bula kina. Na Turaga a tukuna vei Inoke na caka ca lelevu ena yaco ka parofisaitaka na “veivakararawataki levu” ena yaco mai. Ia, na Turaga a yalataka, “au na taqomaki ira ga era sa noqu.”4 “Kau na tala sobu mai lomalagi na ka dodonu; ka tala yani mai vuravura na dina, me vakadinadinataki koya na noqu Le Duabau ga.”5
A vakatavulica o Peresitedi Ezra Taft Benson ena kaukauwa cecere ni iVola i Momani, na vatu ivakadei ni noda lotu, a tadu cake tani mai ena qele ena kena vakayacori na ka a vakarogoya na Turaga vei Inoke. Na Tamada kei na Luvena kei ira na agilosi kei na parofita ka ra a rairai vua na Parofita o Josefa Simici era a “dusimaki mai lomalagi me vakalesuya na kaukauwa e gadrevi ki na matanitu.”6
A ciqoma na Parofita o Josefa Simici na ivakatakila ena ivakatakila. Eso era sa vunautaki ena koniferedi oqo. E vuqa na ivakatakila ka a ciqoma na Parofita o Josefa era sa maroroi tu me baleti keda ena Vunau kei na Veiyalayalati. Na ivolanikalou kece ni Lotu sa tu kina na nanuma kei na loma ni Turaga me baleti keda ena iotioti ni tabagauna oqo.7
Me ikuri ni ivolanikalou yavutaki cecere oqo, eda sa vakalougatataki ena ivakatakila tomani tiko kivei ira na parofita bula. O ira na parofita era sa “vakailesilesi lumuti ni Turaga, era sa vakadonui mera vosa ena Vukuna.”8
Eso na ivakatakila era sa bibi vaka ivakananumi, ka so tale era vakalevutaka noda kila na dina vakalou bibi eso ka vakarautaka na veidusimaki me baleta na noda siga oqo.9
Eda sa vakavinavinaka ena kurabui ena vuku ni ivakatakila kivei Peresitedi Spencer W. Kimball ka soli yani kina na matabete kei na veivakalougatataki ni valetabu vei ira kece na lewenilotu tagane bula kilikili enai ka 8 ni June, 1978.10
Au sa veiqaravi kei vuqa vei ira na Le Tinikarua era a tiko ka vakaitavi ena gauna a ciqomi kina na ivakatakila talei oya. O ira yadua, ena veitalanoa vakai ira, a vakadinata na veidusimaki kaukauwa ka veivakaduavatataki vakayalo a sotava o Peresitedi Kimball ka vakakina o ira. E levu era kaya ni a dua na ivakatakila kaukauwa duadua era sa bau ciqoma eliu se oti na gauna oya.11
O keimami na veiqaravi tiko ena gauna oqo ena Kuoramu ni iApositolo Le Tinikarua sa vakalougatataki ena noda siga nikua ni sa lako mai na ivakatakila vakaibalebale eso mai vei ira na parofita ni veigauna oqo.12 O Peresitedi Russell M. Nelson a sa dua na itini lesi ni Turaga vakabibi ena vuku ni ivakatakila eso me vukea na veimatavuvale mera taracake na nodra itikotiko me veivanua tabu ni vakabauta, vakasoqoni Isireli sa veiseyaki ena yasa ruarua ni ilati, ka vakalougatataki ira na lewenilotu vakaedaumeni ena cakacaka vakalotu ni valetabu eso.
Ni a kacivaki na veiveisau bibi me vakalougatataka na noda veivuvale ena koniferedi raraba ni Okotova 2018, au a vakadinadinataka ni “ena nodra veisoli vakasama na Matabose ni Mataveiliutaki Taumada kei na Kuoramu ni iApositolo Le Tinikarua ena valetabu, … ni oti nona vakatakekere vua na Turaga na noda parofita lomani me baleta na ivakatakila … , a ciqomi e dua na veivakadeitaki kaukauwa vei keimami kece.”13
Ena gauna oya, a sa ciqomi eso tale na ivakatakila ka semati tiko ki na cakacaka vakalotu ni valetabu ia era a sega ni kacivaki se vakayacori.14 Na veidusimaki oqo a vakatekivutaki ena ivakatakila vakaparofita vakatabakidua kivei Peresitedi Russell M. Nelson kei na veivakadeitaki taumalua ka kaukauwa kivei ira era vakaitavi kina. O Peresitedi Nelson a vakaogai ira vakabibi na marama vakatulewa ena iSoqosoqo ni Veivukei, na Gone Yalewa, kei na Lalai. Na iotioti ni veidusimaki, ena valetabu, kivei iratou na Mataveiliutaki Taumada kei na Kuoramu ni iApositolo Le Tinikarua e a vakayalo ka kaukauwa sara. Keimami a kila yadua ni keimami sa ciqoma na nanuma, na loma, kei na domo ni Turaga.15
Au vakaraitaka ena yalo dokai sara ni sa ciqomi rawa ka sa ciqomi tiko na ivakatakila tomani ena sala eso sa tauyavutaka na Turaga. Au vakadinadinataka ni ivakaro vou sa solia o Peresitedi Nelson ena mataka nikua e sa dua na ivakatakila me vakalougatataka na tamata kecega.
Keimami Dulaka Yani na Veisureti vei Keda Kece meda Kanamagiti ena Tepeli ni Turaga
Keimami vakaraitaka talega na neimami gagadre titobu me vakaduavatataki tale kei ira era sasaga dredre tiko kei na nodra ivakadinadina, sega ni daulotu wasoma, se sa bokoci na yacadra mai na volaitukutuku ni Lotu. Keimami gadreva me kanamagiti kei iko, “ena vosa i Karisito,” ena tepeli ni Turaga, me vulica kina na veika e dodonu meda cakava kece.16 Keimami gadrevi iko! Na Lotu e gadrevi iko! Na Turaga e gadrevi iko! Sa neimami masu mai lomai keimami ni o na mai duavata kei keimami ena sokalou vua na iVakabula kei vuravura. Keimami kila ni so vei kemuni e rairai sotava beka na veivakacudrui, tawa veilomani, se na ivalavala tale eso ka sega ni Vakarisito. Keimami kila talega ni so era sotava na bolebole eso ki na nodra vakabauta ka sega beka ni ciqomi vakataucoko, kilai vinaka, se wali rawa.
Eso vei ira na noda lewenilotu qaqa ka yalodina sara era a sotava na bolebole ki na nodra vakabauta ena dua na gauna. Au taleitaka na itukutuku dina kei W. W. Phelps, o koya ka a biuta na Lotu ka beitaki Josefa Simici ena dua na valeniveilewai e Misuri. Ni veivutuni oti, a vola o koya vei Josefa, “Au sa kila na noqu ituvaki, ko sa kila, ka sa kila na Kalou, ka’u vinakata meu vakabulai kevaka era na vukei au na noqu itokani.”17 A vosoti koya o Josefa, a biuti koya tale ki na cakacaka, ka vola ena loloma, “Na veitokani e liu sa veitokani tale e muri.”18
Kemuni na taciqu kei na ganequ, veitalia ga na nomu ituvaki, yalovinaka ka kila ni Lotu kei ira na lewena ena ciqomi iko tale!
Na iVakatakila Yadua me Dusimaka Noda Bula
E sa tu rawa na ivakatakila yadua vei ira kece era vakasaqara ena yalomalumalumu na veidusimaki mai vua na Turaga. E sa bibi sara me vaka ga na ivakatakila vakaparofita. Na ivakatakila yadua, vakayalo mai vua na Yalo Tabu sa rawa kina vei ira na milioni mera rawata na ivakadinadina e bibi mera papitaiso ka vakadeitaki kina mera lewe ni Lotu i Jisu Karisito ni Yalododonu Edaidai.
Na ivakatakila yadua e sa veivakalougatataki uasivi sara ka ciqomi ni oti na papitaiso ni da sa “vakatabui kina ena veiciqomi ni Yalo Tabu.”19 Au rawa ni nanuma e dua na ivakatakila vakayalo uasivi ni’u a sa yabaki 15 kina. Na tuakaqu taleitaki a vakasaqara voli na veidusimaki mai vua na Turaga ena sala me raici tamai keirau lomani kina, o koya a sega ni vinakata me veiqaravi ena kaulotu na tuakaqu. Au a masu talega ena yalodina ka ciqoma na ivakatakila kivei au baleta na dina ni kosipeli.
Na iTavi ni Yalo Tabu
Na ivakatakila yadua e yavutaki ena vei dina vakayalo e ciqomi mai vua na Yalo Tabu.20 Na Yalo Tabu e sa dauvakatakila ka dauvakadinadina ni ka dina kecega, vakabibi me baleta na iVakabula. Kevaka e sega na Yalo Tabu, ena sega dina ni rawa ni da kila ni ko Jisu na Karisito. Sa nona itavi bibi me wasea na ivakadinadina me baleta na Tamada kei na Luvena kei na Nodrau itutu kei na Nodrau lagilagi.
Na Yalo Tabu e rawa ni vakayarayarataka na tamata kecega ena dua na sala kaukauwa.21 Ia na veivakayarayarataki oqo ena sega ni tudei vakavo ke dua sa papitaiso ka ciqoma na isolisoli ni Yalo Tabu. Na Yalo Tabu e veiqaravi talega vaka itini ni veivakasavasavataki ena ivakarau ni veivutuni kei na veivosoti.
Na Yalotabu e dau veitaratara ena veisala veivakurabuitaki. E vakayagataka na ivakamacala totoka oqo na Turaga:
“Raica ena vakatakila vei iko na Yalo Tabu, io ena lako yani vei iko ko koya ka tukutuku sara ki lomamu.
Ia oqo, raica, sai koya oqo na yalo ni ivakatakila.”22
Dina ga ni rawa ni kaukauwa sara na kena vakilai, e vakavuqa e dau taumalua mai me vaka e dua na domo lailai, malumu.23 E robota na ivolanikalou e vuqa na ivakaraitaki ni sala e vakayarayarataka kina na Yalotabu na noda vakasama, oka kina na vakacegui ni noda vakasama,24 vakaosoosotaki ni noda vakasama,25 vakararamataki ni noda vakasama,26 kei na dua sara mada ga na domo ki na noda vakasama.27
Eso na ivakavuvuli ena vakarautaki keda me ciqoma na ivakatakila e oka kina na:
-
Masuta tiko na veidusimaki vakayalo. Ena vakarokoroko kei na yalomalua e gadrevi meda vakasaqara ka kerea28 ka dauvosota ka talairawarawa.29
-
Vakavakarau tiko baleta na veivakauqeti. Oqo e gadrevi kina meda duavata kei na ivakavuvuli ni Turaga ka vakamuria Nona ivakaro.
-
Vakayagataka tiko ena bula kilikili na sakaramede. Ni da cakava oqo, eda vakadinadinataka ka veiyalayalati vata kei na Kalou ni da sa taura kivei keda na yaca ni Luvena Tabu ka daunanumi Koya ka muria Nona ivakaro.
Na ivakavuvuli eso oqo e vakarautaki keda me ciqoma, vakila, ka muria na veivakauqeti kei na veidusimaki ni Yalo Tabu. Oqo e oka kina na “veika … veivakacegui … ena kauta mai na reki [kei na] … bula tawamudu.”30
Na noda vakavakarau vakayalo e vakatorocaketaki vakalevu sara ni da vulica wasoma na ivolanikalou kei na dina eso ni kosipeli ka tugana ena noda vakasama na veidusimaki eda vakasaqara. Ia nanuma mo dauvosota ka vakararavi ena gauna ni Turaga. Na veidusimaki e soli mai vua na Turaga ena gauna e “digitaka vakatabakidua kina me vakavulici keda.”o Koya.31
Na iVakatakila ena Noda Veikacivi kei na iLesilesi
Na Yalo Tabu ena vakarautaka talega na ivakatakila ena noda veikacivi kei na ilesilesi. Ena noqu bula, na veidusimaki bibi vakayalo e vakavuqa dau yaco mai ni da tovolea tiko me vakalougatataki ira na tani ni da qarava tiko na noda itavi.
Au nanuma rawa ni’u a se dua na bisopi gone ni’u a ciqoma e dua na kaci ni leqa mai na dua na veiwatini ena dua na gauna lekaleka ni bera ni’u toboka na waqavuka ena dua na ogaoga vakabisinisi. Au a vakamasuta na Turaga ni bera nodrau yaco mai meu kila na sala meu rawa ni vakalougatataki rau kina. A vakatakilaitaki vei au na ituvaki ni leqa kei na kena iwali e dodonu meu solia. Na veidusimaki vakaivakatakila oya a vakatara meu vakayacora na itavi tabu ni noqu veikacivi vaka bisopi dina ga ni sa lailai sara na gauna. Na vei bisopi e vuravura taucoko era wasea vata kei au na mataqali veika sotavi vaka oqo. Vaka dua na peresitedi ni iteki, au sega walega ni ciqoma na ivakatakila bibi ia vaka talega kina na veivakadodonutaki yadua ka a yaga me vakayacori kina na inaki ni Turaga.
Au vakadeitaka vei iko ni veidusimaki vakaivakatakila e rawa ni da ciqoma yadua ni da cakacaka ena yalomalua ena were ni vaini ni Turaga. E vuqa na noda veidusimaki e lako mai vua na Yalo Tabu. Ena so na gauna ka ena so na inaki, e dau lako vakadodonu mai vua na Turaga. Au vakadinadinataka vakai au ni dina na ka oqo. Na veidusimaki baleta na Lotu, vaka raraba, e dau lako ga mai vua na Peresitedi ka parofita ni Lotu.
O keimami, vaka iApositolo ni gauna oqo, sa kalougata ni keimami cakacaka ka veilakoyaki vata kei na noda parofita edaidai, o Peresitedi Nelson. Au cavuta na ka a kaya o Wilford Woodruff me baleta na Parofita o Josefa Simici; ni sa dina vakakina vei Peresitedi Nelson. Au sa raica “na cakacaka ni Yalo ni Kalou vata kei koya, kei na ivakatakila i Jisu Karisito ki vua kei na kena vakayacori na ivakatakila oqori.”32
Sa noqu vakamamasu malumalumu edaidai ni o keda yadua eda na vakasaqara na ivakatakila tomani tiko me dusimaka noda bula ka muria na Yalotabu ni da qarava na Kalou na Tamada ena yaca ni noda iVakabula, o Jisu Karisito, oKoya au sa vakadinadinataka ena yaca i Jisu Karisito, emeni.