Veitalanoa Bibi Me Vakayacori

Ko sa bau vakasamataka li na vuna e vakatokai kina na Lalai me “Lalai”? E dina ga ni yaca oqo e vakamacalataka na nodra vuli vakayalo na gone mai na nodra se lalai sara, ia e vakananuma talega vei au e dua na dina kaukauwa. Vua na Tamada Vakalomalagi, o ira na gone era sega vakadua ni mai karua—era na dau bibi tuga.”¹

E niutaki keda o Koya me ra vakabibitaki, rokovi, ka taqomaki o ira na luve ni Kalou. Kena ibalebale oya me da kakua ni vakararawataki ira vakayago, vakavosa, se vakayalo ke mani vakacava sara na levu ni cudru se nuiqawaqawa. Sa ikoya me da vakabibitaki ira kina na gone ka saga ena noda igu taucoko me valuti na vereca ni veivakararawataki. Na nodra taqomaki me isutu vei keda, me vaka ga ni isutu vei Koya²

E dua na tina gone kei na tama a dabe voli ena teveli ni valenikuro ka rau railesuva tiko na siga oya. Mai na loma ni olo, rau a rogoca e dua na vadugu. Taro sara o tina, “Na cava oya?”

Rau qai rogoca e dua na domo ni tagi lailai lako tiko mai ena rumu ni moce nei gone yabaki va. Rau kusa sobu sara ki na olo. Sa tu okoya, davo koto ena fuloa ena yasa ni loga. Keveti luvena cake o tina ka taroga na gonetagane na cava a yaco.

Sauma o gone, “Au a lutu mai na loga.”

Taroga o Tinana, “Na cava o lutu kina mai na loga?”

E sauma, “Au sega ni kila. Au vakabauta ni‘u a sega ni tiko vakarauta e loma,”

O koya oqo na “tiko vakarauta e loma” au via vosa kina ena mataka nikua. E noda na madigi kei na itavi me da vukei ira na gone me ra “tiko vakarauta e loma” ena kosipeli i Jisu Karisito. Na kena gauna totolo taudua na kena vinaka.

E dua na gauna vakasakiti ena nodra bula na gone oya na nodra taqomaki mai na veivakauqeti nei Setani. Oqo e dua na gauna ni nodra bula savasava ka tawa-cala.³ E dua na gauna vakatabui vei rau na itubutubu kei na gone. Era vakavulici na gone, ena vosa kei na ivakaraitaki, ni bera ni ra “yacova na yabaki ni saumi taro vua na Kalou.”⁴

Vakavulica o Peresitedi Eyring: “Sa noda na madigi bibi vata kei ira na gone. Na gauna vinaka ni veivakavulici sa ikoya na gauna ni gone, ni ra sa sega ni rawai ena veitemaki ni meca ni bula oqo, ka ra sa yawa sara mai na gauna me na dredre kina na nodra rogoca na vosa ni veika dina ena loma ni veivakaogai ni dredre vakayadua.”⁵ Na vakavuvuli vakaoqo ena vukea na nodra kila deivaki na nodra ivakatakilakila vakalou, na inaki ni nodra bula, kei na veivakalougatataki cecere e vakarautaka vei ira na veiyalayalati tabu ni ra ciqoma na nodra cakacaka vakalotu ena salatu ni veiyalayalati.

Eda sega ni rawa ni waraka me yaco vakataki koya na saumaki vei ira na luveda. Na saumaki e dau tubukoso e sega ni ivakavuvuli ni kosipeli i Jisu Karisito. Na noda na vakataka na iVakabula e sega ni mai yaco wale tu ga. Na noda gumatua ena loloma, veivakavulici, kei na vakadinadina tiko ena vukea na nodra tekivu na gone ena yabaki ni lalai me ra vakila na veivakauqeti ni Yalo Tabu. Na Yalo Tabu e bibi ena nodra ivakadinadina kei na nodra saumaki na luveda vei Jisu Karisito; e da gadreva me “ra dau nanumi Koya, ka me tiko ga kei ira na Yalona.”⁶

Vakasamataka na yaga ni veitalanoa vakavuvale me baleta na kosipeli i Jisu Karisito, ka na rawa ni veitalanoa bibi me sureti kina na Yalo. Ni dau yaco na veitalanoa vakaoqo vata kei ira na luveda, eda sa vukei ira me ra taracake na nodra yavu, “ia sa ikoya na yavu dei, ia kevaka sa taracake na tamata na yavu oqo, ena sega sara ni bale rawa”⁷ Ni da vaqaqaco taka e dua na gone, e da vaqaqacotaka e dua na matavuvale.

Na veitalanoa bibi vakaoqo e rawa ni muataki ira na gone me ra:

• Kila vakavinaka na ivunau ni veivutuni.

• Vakabauti Karisito, na Luve ni Kalou bula.

• Digitaka na papitaiso kei na isolisoli ni Yalo Tabu ni sa yacova na yabaki walu.⁸

• Ka vakavulici ira me ra dau masu, ka caka dodonu ena mata ni Turaga.”⁹

E vakadreta na iVakabula, “O koya au sa solia kina vei kemudou e dua na ivakaro, mo dou vakatavulica raraba yani vei ira na nomudou kawa.”¹⁰ Na cava e vinakata o Koya me da vakatavulica raraba yani?

1. Na Lutu Nei Atama

2. Na Veisorovaki i Jisu Karisito

3. Na bibi ni noda sucu tale¹¹

Tukuna o Elder Christofferson, “E sa marau vakaidina na vunica ni ra vakawalena na itubutubu me ra vakatavulici ka tuberi ira na luvedra me ra vakabauti Karisito ka sucu vakayalo tale.”¹²

Na kena veibasai, na iVakabula ena vukea na noda vukei ira na gone “mo vakararavi ki na Yalo ka na veiliutaki ki na caka dodonu.¹³ Me caka vakakina, e rawa ni da vukei ira na gone me ra vakila ni sa tiko volekati ira voli na Yalo kei na kena siqemi na ivakarau e vakavuna me biuti keda na Yalo. Era na vulica kina na ivakarau ni veivutuni kei na lesu tale ki na rarama mai na nona Veisorovaki o Jisu Karisito Oqo ena vukea na vakauqeti ni kaukauwa vakayalo.

E rawa ni da marautaka vata kei ira na luveda na nodra taracake ena yabaki cava ga na nodra kaukauwa vakayalo. E sega ni dodonu me dredre se taura vakalevu na gauna. E rawarawa sara, na veitalanoa ena kauwai ena rawa ni muataki ira na gone me ra kua walega ni kila na cava era vakabauta, ia na ka bibi duadua, na vuna era vakabauta kina. Na veitalanoa ena kauwai, me yaco ena kena gauna donu ka vakawasoma, e rawa ni veimuataki ki na kilaka vaka matata cake kei na isau ni taro. Me da kakua ni vakatara na iyaya vaka livaliva me vesuki keda tiko mai na noda veivakavulici kei na noda rogoci ira na noda gone kei na noda raica na yaloka ni matadra.

E so tale na madigi ni veitalanoa bibi me vakayacori e rawa ni yaco ena noda dau vakatakarakarataka. O iratou na lewe ni matavuvale e rawa ni ratou matanataka e dua na ivakatasuasua me vaka beka ni ratou temaki tiko se vakaukauwa taki tiko me ratou vakayacora e dua na idigidigi e sega ni vinaka. Na ivakarau oqo e rawa ni vakaqaqacotaki ira na gone me ra vakavakarau ena gauna ni nuiqawaqawa. Dua na ivakaraitaki, e rawa ni da matanataka ka oti me da qai veitalanoataka ka tarogi ira na gone ena veika era na cakava:

• Kevaka era na temaki me ra voroka na Vosa ni Vuku.

• Se kevaka e vakaraitaki vei ira na iyaloyalo tawakilikili

• Se me ra temaki me ra lasu, butako se lawaki.

• Se kevaka era rogoca mai vei ira na nodra itokani se qasenivuli e koronivuli e dua na ka e sega ni sala vata kei nodra ivarau kei na vakabauta.

Ni ra sa matanataka ka veitalanoataka, era sa na vakarautaki ira tu de ra na mani sotava e dua na veitemaki mai vei ira na nodra itokani vaka ilawalawa, ka ra na vauci tu “me isasabai na vakabauta mo dou na bokoca rawa kina na nodra gasau vidi waqa kecega na dau caka ca.”¹⁴

E dua na itokani voleka e a vulica sara vakatotolo na lesoni bibi oqo ni se yabaki 18. A curu ena mataivalu ni Amerika ena gauna a veivaluti kina o America kei Vietnam, A lesi sara me laki terenitaki ena iwase ni mataivalu era dau valu ena yava ka vakaiyaragi lalai. A vakamacalataka o koya na dredre ni tereni oya. E vakamacalataka na nona dauveituberi me tamata ca ka sega ni dauveinanumi.

E na dua na siga, e ratou a vakaisulu tu na nona ilawalawa ena isulu taucoko ni ivalu, ka taubale voli ena draki cawa katakata. A kaila cake mai vakasauri o dau ni veiterenitaki me ra lutu ki na qele ka kakua ni yavavala. A vakaraica vakavinaka o daunitereni me kakua ni dua na yavavala lailai sara. Ke dua na yavavala lailai ena vakavuna na totogi kaukauwa ni oti na tereni. Era a sotava na ilawalawa na veivakasaurarataki me sivia e rua na aua ena cawa ni katakata ka sa tekivu me tubu na cudru kei na nodra sevaka na nodra iliuliu.

Ni oti yani e vica na vula, o noqu itokani oqo sa lesi sara me liutaka e dua na ilawalawa ena loma ni veikau kei Vietnam. Sa kena kadina saraga qo, sega tale ni vaka na tereni. Sa tekivu me rogo mai na vanavana ni dakai mai na veivunikau vakavolivolita. Na ilawalawa mataivalu taucoko era a lutu ki na qele.

Na cava era vakasaqara tiko na meca? Na yavavala. E dua na yavavala lailai ena tekivuna na vanavana. A tukuna o noqu itokani ni gauna e a davo bunobuno tu kina ena qele ni veikau oqo, ka sega ni rawa ni yavavala me vica vata na aua balabalavu ena loma ni bogi, e a lesu tale mai vua na nona vakananuma na nona gauna ni tereni. E a vakananuma sara mai na nona a sevaka vakaukauwa sara na nona qasenivuli ni veiterenitaki. Ia oqo, sa tubu sara na nona vakavinavinaka—ena veika e a vakavulica me vakavakarautaki koya ki na gauna bibi vakaoqo. Na qasenivuli ni tereni e vakaiyaragitaki i noqu itokani kei iratou na nona ilawalawa me ratou rawa ni kila na cava me ratou cakava ni sa tubu kaukauwa na ivalu. Sa o koya dina ga, e a vakabulai noqu itokani.

E rawa vakacava ni da vakayacora vakakina vakayalo vei ira na luveda? Ni bera na nodra curu ena buturara ni valu ni bula, e rawa vakacava ni da saga vakaidina na noda vakavulica, vakaqaqacotaka ka vakarautaki ira?¹⁵ E rawa vakacava me da sureti ira me ra “tiko vakarauta e loma”? E da vinakata li me ra “buno” ena tataqomaki ni vuli ena loma ni vale mai na kena vakadavei na nodra dra ena buturara ni valu ni bula

Ni‘u railesu, ena so na gauna o keirau vaka veiwatini e keirau dau vaka na qasenivuli ni veiterenitaki ena neirau sasaga me keirau vukei ira na luvei keirau me ra bulataka na kosipeli i Jisu Karisito. Na parofita o Jekope, e a vakaraitaka na veika vata oqo ena nona tukuna, “Au sa vosa tale oqo vei kemudou; ni’u sa gadreva na tiko vinaka ni yalomudou. Io, sa ka levu na noqu lomaleqa ena vukumudou; ka dou sa kila ni sa vaka tu mai kina.”¹⁶

Ni ra vuli na gone ka tubu cake, ena vakatovolei na nodra kila ka. Ia ni ra vakaiyaragitaki donu, era na tubucake ena vakabauta, yaloqaqa, kei na lomadei, se mani vakacava na kaukauwa ni meca.

Vakatavulica o Alama me da “Vakarautaka na nodra vakasama na luve ni tamata.”¹⁷ Eda sa vakarautaki ira tiko na itabagone era tubucake tiko mai me ra tutaka na dina, ka kilamatata tiko “Mo dou nanuma ni dou sa galala mo dou sa lewa ga vakai kemudou na ka mo dou cakava—mo dou digitaka na sala ni mate tawavakaiyalayala se na sala ni bula tawamudu.”¹⁸ E dodonu me ra kila na gone na dina bibi oqo: na bula tawamudu e dua na ka mo kua sara ni cala kina.

Na noda veitalanoa bibi ka matata kei na luveda e na vukei ira me ra na “marautaka na vosa ni bula tawamudu” ena vuravura oqo, ka me ra na marautaka “na bula tawamudu ena vuravura sa bera mai, io na lagilagi tawa mate rawa.”¹⁹

Ni da susugi ka vakarautaki ira na luveda, eda sa vakatara kina na nodra digidigi donu, eda lomani ira ena noda igu taucoko, eda vakavulica vei ira na ivakaro ni Kalou kei na Nona isolisoli ni veivutuni, ka da na sega vakadua, ni soro ena vukudra. Sa o koya dina li oqo na nona ivakarau na Kalou vei keda?

Sa kilikili me da toso ki liu ka tudei vei Karisito, ka kila tiko ni rawa ni “taucoko na nomudou vakanuinui”²⁰ vua na iVakabula lomani.

Au vakadinadinataka ni o Koya sa isau ni ka kece. Ena yaca tabu i Jisu Karisito, emeni.