Veivakavulici ena iVakarau ni iVakabula

Ena vica na vula sa oti a vakatura e dua keirau kalasi vata e liu mai na noqu koro o Overton e Nevada, me keirau solia e dua na iloloma ni Kirisimasi vua na neirau qasenivuli lomani ni murivuli ka se qai marautaka wale toka ga na ika 98 ni yabaki ni nona bula. A vakavulica me keirau dau yalovinaka, na bibi ni moce vakavinaka, na rekitaki ni sucu kei na bisikete, kei na dauveilomani. Vinaka vakalevu Sister Davis, oni sa rui qasenivuli vakasakiti.

iVakatakilakila

Sister Davis

A dua tale na noqu qasenivuli uasivi niu vuli voli e Ricks College ena vuqa na yabaki sa oti. Au a vakavakarau tiko meu lako ikaulotu kau nanuma ni na veivuke kevaka au lakova mada e dua na kalasi ni vakavakarau ni kaulotu. Na veika au sotava e veisautaka na noqu bula.

Mai na imatai ni siga ni kalasi au qai kila niu nona gonevuli tiko e dua na qasenivuli levu. Na qasenvuli oya o Brother F. Melvin Hammond. Au kila ni o Brother Hammond e lomana na Kalou ka lomani au. Au rawa ni raica e matana ka rogoca e domona. Ni veivakavulici o koya, e vakararamataka na noqu vakasama na Yalo. E vakavuvulitaka na ivunau, ka sureti au talega meu vulica ga vakai au. A vukei au na veisureti oya meu raica vakavinaka na noqu itavi meu vulica vakataki au na ivunau ni Turaga. Na ka o ya e veisautaki au sara ga vakadua. Vinaka vakalevu, Brother Hammond, na veivakatavulici ena ivakarau ni iVakabula.

Kemuni na taciqu kei na ganequ, na tamata kece e ganiti koya me sotava na ivakarau ni vuli oqo e vale vakakina ena lotu.

Na ivakamacala ni Lako Mai, Mo Muri Au e solia e dua na raivotu ena veika e rawa ni rawati mai na veivakavulici Vakarisito. “Na inaki taucoko ni vuli kosipeli kei na veivakatavulici,” oya, “me vakatitobutaka na noda saumaki kivei Jisu Karisito ka vukei keda me da vakataki Koya vakalevu cake. … Na mataqali vuli kosipeli e vaqaqacotaka noda vakabauta ka vakavuna na saumaki mai e veivakurabuitaki, e sega ni yaco kecega ena dua na gauna. E tete yani ki taudaku [ni] valenivuli ki yalona kei na nona vale na tamata yadua.”¹

E tukuna na ivolanikalou ni a talekatoa ka rabailevu na nona veiqaravi na iVakabula e Amerika makawa “era sa saumaki vua na Turaga na tamata kecega ena dela ni vanua taucoko, ko ira na Nifaiti kei ira na Leimanaiti, ka sa sega na veicacati kei na veileti ena kedra maliwa, ka ra sa caka dodonu vei ira na tamata kecega.”²

Ena tautauvata vakacava na kena revurevu vei ira na wavoliti keda tu na noda veivakavulici? E rawa beka vakacava ni da veivakavulici vakalevu cake vakataka na iVakabula ka vukei ira na tani me yaco me ra saumaki vakatitobu cake? Kerea meu na vakatura mada e vica na ka.

Taumada ka bibi duadua, raica mo vulica na veika kece o rawa ni vulica me baleta na Qasenivuli Levu Vakataki Koya. A vakaraitaka vakacava na loloma vei ira na tani? Na cava era a vakila ni veivakavulici o Koya? Na cava a vakavulica o Koya? Na cava a namaka o Koya vei ira e vakavulica? Ni oti nomu vakadeuca na veitaro vakaoqo, vakadikeva ka moica na nomu ivakarau ni veivakavulici me vakataki Koya vakalevu cake.

Sa vakarautaka na Lotu e vuqa na ivurevure ni veivakavulici ena Gospel Library app vakakina ena ChurchofJesusChrist.org. E dua vei ira na ivurevure oqori e yacana na Veivakavulici ena iVakarau ni iVakabula. Au sa veisureti mo ni wilika ka vulica na kena veimalanivosa kece sara. Na kena ivakavuvuli ena vukei iko ena nomu sasaga me Vakarisito vakalevu cake na nomu veivakavulici.

Na vakatutu e tarava e rawa ni vakaraitaki ena dua na ka au a sotava ena vica na vula sa oti ena noqu a kele meu sikova e dua na itokani lomani. Au rawa ni rogoci watina ni vosa tiko vua e dua na tamata, au mani vakatikitiki yani me rawa ni lesu tale o koya vei iratou nona matavuvale.

Rauta ni oti e dua na auwa au ciqoma na itukutuku nei watina ena talevoni: “Brother Newman, vinaka vakalevu na gade mai. A dodonu me keitou sureti iko mai loma, ia au vinakata meu wasea vei iko na ka keitou a cakava tiko. Tekivu mai na gauna ni matetaka levu keitou dau veivosakitaka tiko na Lako Mai, Mo Muri Au vata kei ira na luvei keirau qase cake ena vei-Sigatabu taucoko ena Zoom. Sa vakayaco cakacaka mana tiko. Au vakabauta sa qai imatai ni gauna oqo me wilika kina vakataki koya na luvei keirau yalewa na iVola i Momani. Nikua na iotioti ni lesoni ena iVola i Momani ka keitou se qai vakarau vakaotia sara toka ga ena gauna o lako mai kina. … Au nanuma ni o na taleitaka mo rogoca ena gauna oqo na ivakarau e vakarautaka kina na Lako Mai, Mo Muri Auna Zoom, kei na dua na matetaka na madigi ena gauna donu me veisautaki e dua na yalo. … E vakavuna noqu vakataroga se vica mada na caka mana lalai sa dau yaco tiko ena veigauna lalai vakaoya.”

E kena irogorogo vei au ni oqo na kena vakayacori na yalayala a cavuta o Peresitedi Russell M. Nelson ena Okotova 2018. E kaya o koya ni vuli kosipeli e vale ka tokona na Lotu “sa tiko kina na kaukauwa me sereka na mana ni matavuvale, ni ra taumuria vakamatau ena yalodina me veisautaka na nodra veivale me dua na ivakaruru ni vakabauta. Au yalataka ni ko cakacaka vagumatua mo veisautaka na nomu itikotiko me vale ni vuli kosipeli, ena yaco na nomuni Siga ni Vakacecegu me ka rekitaki vakaidina. O ira na luvemu era na taleitaka me ra vulica ka bulataka na nona ivakavuvuli na iVakabula. Na veisau ena nomu matavuvale ena vakilai levu ka veitokoni.”³ Sa dua na yalayala lagilagi!

Me veisautaka vakaidina na bula, sa dodonu me okati ena saumaki vei Jisu Karisito na yaloda taucoko ka kuruseta na veiyasa ni noda bula kece. Oqori na vuna me na vakanamatataki kina ena itakele ni noda bula—na noda matavuvale kei na itikotiko.

Na iotioti ni noqu vakatutu sai koya me nanumi tiko ni saumaki e dodonu me lako mai loma. Me vaka e vakaraitaki ena italanoa vakaibalebale ni tini na goneyalewa, e sega ni rawa ni da solia vua e dua tale na waiwai ni noda saumaki mai, ke mani vakacava sara na noda vinakata. Me vaka e vakavuvulitaka o Elder David A. Bednar: “Na waiwai vakamareqeti oqo e rawati mai ena dua na turu dua na gauna … vakamalua ka ia tikoga. E sega na kena gaunisala lekaleka; sega ni qai kusati ni sa voleka na kena gauna.”⁴

NaLako Mai, Mo Muri Au e yavutaki ena dina oya. Au vakatauvatana vua na agilosiI ka a vukei Nifai me vulica na veika baleti Jisu Karisito ena nona kaya, “Raica!”⁵ Me vaka na agilosi oya, na Lako Mai, Mo Muri Au e sureti keda me da raica na ivolanikalou kei na nodra vosa na parofita ni gauna oqo me rawa kina ni da raica na iVakabula ka rogoci Koya. Me vakataki Nifai, ena vakavulici keda na Yalo ni da wilika ka vakananuma vakatitobu na vosa ni Kalou. NaLako Mai, Mo Muri Au sai koya na papa sivirigi ka na rawa kina me da dokoulu yani vakatitobu ki na wai bula ni ivunau i Karisito

E vuqa sara na sala e tautauvata kina kei na itavi vakaitubutubu. E vuqa na ka e dau dewavi ira yani na gone mai vei ira na itubutubu, ia e sega ni vakakina na ivakadinadina. Eda na sega ni rawa ni solia vei ira na luveda e dua na ivakadinadina me vaka ga ni da sega ni rawa ni cakava me kadre mai e dua na sorenitei. Ia e rawa ni da vakarautaka e dua na vanua bulabula, ena qele vinaka, sega kina na wa vakavotona ka na rawa ni “kidomoka na vosa.” E rawa ni da segata me da bulia na ituvaki donu me rawa kina vei ira na luveda—kei ira tale eso eda lomana—me ra kunea na vanua me tubu kina na sorenitei, “[rogoca] na vosa, ka [kila na kena ibalebale]”⁶ ka kila vakataki ira “ni sa vinaka na sorenikau.”⁷

iVakatakilakila

Brother Newman kei luvena o Jack

Ena vica na yabaki sa oti, a rawa kina vei keirau kei na luvequ tagane o Jack me keirau laki qito ena Rara Makawa mai St. Andrews e Sikoteladi, na vanua a tekivu kina na qito golf. E vakasakiti dina! Niu lesu mai au a tovolea meu vakadewataka vei ira tale eso na talei ni gauna oya. Ia a sega ni rawa. A takiveiyaga na itaba, vidio kei na noqu ivakamacala vinaka duadua. Au sa qai kila ni sala duadua ga me kila kina e dua na lagilagi kei St. Andrews sai koya me laki qito kina—me raica na vanua ni tekivu tavi, ceguva na cagi, vakila na cagi ni roba mai na matana, ka tavia cala na polo me lutu yani ki na vanua lolovira ka lolobo se veidabibi.

Sa vakakina na vosa ni Kalou. E rawa ni da vakavulica, e rawa ni da vunautaka, e rawa ni da vakamacalataka. E rawa ni da veivosakitaka, e rawa ni da vakamacalataka, e rawa sara mada ga ni da vakadinadinataka. Ia me yacova na nona vakila e dua na tamata ni sa vakavoui na yalona ena vosa tabu ni Kalou me vaka na tegu mai lomalagi ena kaukauwa ni Yalo,⁸ ena vaka walega na tirova tiko e dua na iyaloyalo se itaba ni gade. Mo lako sara ga ki kea. Na saumaki mai e ilakolako ni tamata yadua—na ilakolako ni vakasosolo.

Na tamata kece e dau veivakavulici mai vale vakakina ena lotu e rawa ni solia vei ira na tani na madigi me ra sotava sara ga na nodra dui veigauna vakayalo. Mai na veigauna vakaoqori, ena yaco kina me ra “kila na dina ni veika kecega.”⁹ E vakavuvulitaka o Peresitedi Nelson, “Kevaka e tu na nomu taro savasava me baleta na kosipeli se na Lotu, ni o digitaka me qaqa tiko na Kalou, o na liutaki mo kunea ka kila na veidina taucoko e tawamudu ka na liutaka na nomu bula ka vukei iko mo tudei ena salatu ni veiyalayalati.”¹⁰

Au sureti kemuni na veiliutaki kei na qasenivuli ena veisoqosoqo kece sara ni Lotu mo ni veitalanoa kei ira na itubutubu kei na itabagone ena veitagede kece sara—ena iteki, ena tabanalevu, kei na vuvale. Ena rawati ni vakavuvulitaki na ivunau ka sureti na veivosaki vakasinaiti ena Yalo me baleta na dina eso sa vakavulica vei keda na Yalo Tabu ena noda veigauna vakadigagalu ni vuli yadua.

Kemuni na itokani lomani ena vukui Karisito, sa koto kina e usouso ni domoda yadua me da vakadadamuria na Qasenivuli Levu ka veivakavulici me vakataki Koya. Na Nona sala e sala dina! Ni da muri Koya “ia ni sa rairai mai ko koya, eda na tautauvata kaya, ni da na raica na matana dina; me da na rawata na inuinui oqo ka vakasavasavataki me vaka sa savasava ko koya.”¹³ Ena yacana o Koya sa tucake tale, na Qasenivuli Levu oKoya, Jisu Karisito, emeni.