Me Ra Kakua ni Vakayacoka, Me Da Kakua ni Lutu

A kaya na noda parofita lomani, o Peresitedi Russell M. Nelson, ena noda koniferedi raraba sa oti: “Donuya na veigauna drakidrakita oqo a parofisaitaka taumada na Apositolo o Paula, sa sega ni qai vunitaka tale o Setani na nona ivadi ena ituvatuva ni Kalou. Sa yaco tu oqo na cakacala doudou. Ia, na sala duadua ga me da bula kina vakayalo sa ikoya na kena navuci me vakayacoka na Kalou ki na noda bula, me da vulica na rogoci ni Domona, ka me da guta me da veivuke ena nodra vakasokumuni na Isireli.”¹

Ni vakasamataki tu na veisureti ni parofita me da vulica me da rogoca na domo ni Kalou, e sa gumatua tu beka na yaloda se yalo kaukauwa tu? Me da nanuma mada na ivakasala ka a soli ena Jekope 6:6Ia, ena siga oqo, kevaka dou na rogoca na domona, dou kakua ni vakaukauwataka na lomamudou; se cava mo dou mate kina?” Me da sa navuca me vakayacoka na Kalou ki na noda bula.

Eda na cakava vakacava me vakayacoka na Kalou ki na noda bula ka sega ni o koya na vunica? Eda wilika ena Vunau kei na Veiyalayalati 6:34 “O koya, ni kakua ni rere, na qele ni sipi lalai; caka vinaka; laivi vuravura kei eli me rau cokovata ka saqati iko, ni kevaka ko sa tarai cake ena noqu uluvatu, ena sega sara ni rawa ni ra qaqa.” E sa yalayala vakasakiti oqo. Ke cokovata mada ga o vuravura kei eli me saqati keda, rau na sega ni qaqa kevaka eda digitaka me vakayacoka na Kalou ena kena yavutaki na noda bula ena Nona uluvatu.

Ni vosa tu vei ira na Nona tisaipeli, a vakatavuvulitaka o Jisu Karisito me baleta e dua na tamata vuku kei na dua na tamata lialia, ka volai tu ena Maciu wase 7 ena Veiyalayalati Vou. E vuqa vei kemuni o ni sa na rogoca na sere ni Lalai “The Wise Man and the Foolish Man.”² Kevaka o sa vakayagataki gauna mo veidutaitaka na va na tikina ena sere, o na raica ni tautauvata tiko na tikina e 1 kei na 2 ki na tikina e 3 kei na 4. Rau a taravale ruarua na tamata vuku kei na tamata lialia. Rau a via vakarautaka e dua na itikotiko qaqaco ka totoka.me baleta na nodrau matavuvale. Rau sa gadreva na bula marau vakamatavuvale, vakataki iko ga kei au. A tautauvata tu na ituvaki wavolivolita—“A tau mai na uca, ka tubucake na waluvu .” Eda lagata vakaono ni da lagata tiko na sere o ya. Na kena duidui ga ni a tara na tamata vuku na nona vale ena dela ni vatu ka sa tudei na vale, ia na tamata lialia a tara na nona vale ena dela ni nuku ka sa qeavu na nona vale. O koya gona oya, na vanua eda yavutaki kina e sa ka bibi sara, ka na lak‘i vakavotukana oqo ena kena icavacava vakaoti ka tawamudu.

Au sa nuitaka ka masulaka ni da na raica ka tiko ena yavu dei o ya ni da tauyavutaka na noda bula me na muri mai. Eda sa vakananumi ena Ilamani 5:12: “Ia oqo, oi kemudrau na luvequ, mo drau nanuma mo drau nanuma mo drau tara na nomudrau yavu ena uluvatu ni noda Dauveivueti, o koya na Karisito na Luve ni Kalou; ia ni sa vakaliwava mai na tevoro na nona cagi kaukauwa, io, kei na nona moto ena covulaca, io, ni sa liwavi kemudrau na nona uca cevata kecega kei na nona cava kaukauwa, ena sega ni rawai kemudrau me dreti kemudrau sobu ki na ikeli ni rarawa kei na yaluma tawacava rawa, ni sa dei sara na uluvatu drau sa tara kina, ka sai koya na yavudei ia kevaka sa tara cake na tamata ena yavu oqo, ena sega sara ni bale rawa.“

Oqori na yalayala mai vua na Kalou! Kevaka eda tara na noda uluvatu kivei Jisu Karisito, eda na sega ni bale! Ni da vosota vakayalodina tu me yacova na ivakataotioti, ena vukei keda na Kalou me yavutaka na noda bula ena Nona uluvatu, ka na sega ni rawati keda na matamata ki eli (Vunau kei na Veiyalayalati 10:69). Eda na rairai sega ni veisautaka rawa na ka kece e sa lako tiko mai, ia eda sa rawa ni digitaka na iwalewale ni noda vakavakarau ki na ka e sa lako tiko mai.

Eso vei keda e rairai nanuma, “Sa vinaka na kosipeli, ka sa dodonu me da bulataka, vakamacawa beka.” Na gole ki lotu vakamacawa ena sega ni rawa ni taraicake kina vakarauta na uluvatu. Sa dodonu me vakatawani tu na noda bula taucoko ena kosipeli i Jisu Karisito. Na kosipeli e sa sega ni tiki ni noda bula, ia na noda bula e sa tiki vakaidina ni kosipeli i Jisu Karisito. Vakasamataka mada. E sega li ni dina o ya?” Na noda bula eke e sa tiki walega ni ituvatuva vakataucoko ni veivakabulai kei na veivakacerecerei.

Na Kalou sa Tamada Vakalomalagi. Sa lomani keda taucoko o Koya. Sa kila vakavinaka tu o Koya na vu ni noda kaukauwa mai na noda kilai keda vakaikeda. E sega ni kila walega o Koya na matailalai ni noda bula. Sa kila na Kalou na matailalai ni matailalai ni matailalai ni noda bula.

Yalovinaka vakamuria na ivakasala vuku ni noda parofita bula tiko, o Peresitedi Nelson. Me vaka e volai tu ena Vunau kei na Veiyalayalati 21:5–6:

“Ia mo dou vakabauta ka muria na ka sa tukuna, me vaka ga au sa tukuna vei kemudou.

“Ni kena vakayacori na veika oqo, ena sega kina ni rawai kemudou na matamata mai eli; ia na Turaga na Kalou ena vakatalabusesetaka na kaukauwa ni butobuto e matamudou; ka na vakavuna me yavavala ko lomalagi ena vukumudou, me vakalagilagi kina na yacana.”

O ya na vuna, era sega ni rawa ni qaqa kina, ka sega ni rawa ni da bale!

Au vakadinadinataka vei kemuni ni na lako vakarua mai o Karisito me vaka ga na kenai matai, ia na gauna oqo ena lagilagi kei na ukucavu levu sara. Au nuitaka ka masulaka ni‘u na vakarau tu me‘u ciqomi Koya, ena yasa ni lati oqo se ena yasa kadua. Ni da marautaka tu na gauna totoka ni Siganimate oqo, au nuitaka, ena vuku ni Veisorovaki i Jisu Karisito kei na qaqa ni Nona Tucaketale (raica na Moronai 7:41ni‘u na rawa ni gole cake ka sota vata kei na noqu Dauveibuli ka kaya, “Vinaka vakalevu” Ena yaca i Jisu Karisito, emeni.