Na Nona iLakolako e Dua na Luve ni Kalou
Ni da gone ni veiyalayalati na Kalou, eda lomana, rokova, susuga, taqomaka, ka kidavaki ira na yalo oqori era lako mai na vuravura ni bula taumada.
Sa tarai keda yadua na revurevu ni matetaka ka sa roboti vuravura tu, ni ra sa takali yani ena bula oqo na lewe ni noda matavuvale kei ira na itokani. Meu vakaraitaka mada e lewe tolu keitou sa dau vakananumi ira vakalevu sara, ka matataki ira keitou lomana vakalevu sara.
Oqo o Brother Philippe kei Sister Germaine Nsondi. E veiqaravi tiko vaka peteriaki o Brother Philippe Nsondi, ena iteki na Brazzaville Congo ena gauna a mai takali kina. E dua na vuniwai ka a dau wasea ena lomasoli na nona taledi vei ira na tani.1
Qo o Sister Clara Elisa Ruano de Villareal mai Tulcán, Ecuador. A ciqoma o koya na kosipeli vakalesui mai ni yabaki 34 ka dua na iliuliu lomani. Eratou a vakamoce na nona matavuvale ena nodratou lagata na nona sere ni lotu taleitaki, “Au sa Kila ni Bula Tu.”2
Oqo o Brother Ray Tuineau mai Utah, kei na nona matavuvale totoka. E kaya na watina o Juliet, “Au vinakata me ratou nanuma na [noqu gonetagane] ni o tamadratou e dau vinakata me vakaliuca na Kalou.”3
E kaya na iVakabula, “Mo dou duavata ka veilomani, mo dou tagicaki ira era sa mate.”4
Ni da tagi tiko, eda reki talega ena nona Tucaketale lagilagi na noda iVakabula. Ena Vukuna, era na tomana tale na noda daulomani kei na itokani na nodra ilakolako tawamudu. Me vaka e vakamacalataka o Peresitedi Joseph F. Smith: “Eda na sega ni rawa ni guilecavi ira, ena sega ni rawa ni mudu na noda lomani ira. … Era sa toso; eda sa toso tiko; eda sa tubu me vaka ni ra sa tubu.” 5 E kaya o Peresitedi Russell M. Nelson, “Na wai ni matada ni rarawa … sa vuki me wai ni mata ni vakanuinui.”6
Keimami sa Kila tu na Bula ni se bera na Sucu
Na noda rai tawamudu e sega walega ni vakalevutaka na noda kilaka me baleti ira era sa tomana tiko na nodra ilakolako ni oti na bula oqo ia sa dolava talega na noda kilaka baleti ira era se qai tekivuna na nodra ilakolako ka ra se qai curuma mai na bula oqo.
Na tamata yadua e lako mai ki vuravura e luvena tagane se luvena yalewa duatani na Kalou.7 Na noda dui lakolako yadua a sega ni qai tekivu ena sucu. Ni se bera ni da sucu, eda a tiko vata ena dua na vuravura ni vakavakarau na vanua eda a “ciqoma kina na imatai ni [noda lesoni] ena vuravura ni yalo.”8 A tukuna vei Jeremaia ko Jiova, “Niu a bera ni buli iko ena kete, kau sa kilai iko; ia ni ko a bera ni sucu mai, kau sa vakatabui iko.”9
Eso beka era na taroga kevaka e tekivu na bula ena kena sa tekivu me buli e dua na tamata, ni sa tekivu me tatuki e dua na uto, se ena gauna sa rawa ni bula kina e dua na gone ena taudaku ni ketei tinana, ia vei keda, e sega ni vakabekataki ni ra sa dui tekivuna na luvena yalewa kei na tagane na Kalou na nodra lako mai ki vuravura me ra mai ciqoma e dua na yago ka mai bula ena bula oqo.
Ni da gone ni veiyalayalati na Kalou, eda lomana, rokova, susuga, taqomaka, ka kidavaki ira na yalo oqori era lako mai na vuravura ni bula taumada.
Nodra Cau Uasivi na Marama
Vua e dua na marama na vakaluveni e rawa ni dua na solibula vakayago, vakayalo, vakakina vakailavo levu vua. Eda lomani ira ka dokai ira na marama vakasakiti ni Lotu oqo. Ena kila yalo matua kei na vuku, ko sa colata talega na nodra icolacola na nomuni matavuvale. O ni loloma. O ni veiqaravi. O ni solibula. O ni vaqaqacotaka na vakabauta, veiqaravi vei ira era vakaleqai tu, ka, o ni cau vakalevu ki na kawatamata.
Na iTavi Vakatabui ni Taqomaki ni Bula
Ena vica na yabaki sa oti, ni kauwai vakalevu tiko ena levu ni vakalutu e vuravura, a vosa o Peresitedi Gordon B. Hinckley vei ira na marama ena Lotu ena veivakasalataki e veiganiti kina noda gauna nikua. E kaya o koya “O kemuni na yalewa vakawati ka tina o ni itakele ni matavuvale. O ni vakasucumi ira mai na gone. Sa dua na itavi vakaitamera ka bibi sara oya. … Na cava sa yaco tiko ki na noda doka na bibi ni bula vakatamata? Na vakalutu e dua na ivalavala vakatevoro, laurai levu e ka dina ka votivoti, ni sa roboti vuravura tu. Au sa vakatakekere kina vei kemuni na marama ena Lotu oqo mo ni levea, mo ni uabaleta, mo ni lako tani mai na ituvaki eso e dau veibacani kina. Ena tiko beka eso na ituvaki, ena rawa ni vakatarai me yaco, ia e lailai wale sara.10 … O kemuni na tinadra na luvena tagane kei na luvena yalewa na Kalou, ka rui ka tabu sara na nodra bula. Na nodra taqomaki e itavi soli mai vakalou ka sega ni rawa ni taviraki vakatikitiki.”11
A wasea vei au o Elder Marcus B. Nash na kena italanoa e dua na marama yabaki 84, ka a vakadinadinataka ena nona vakatarogi e, “dua na vakalutu ena dua na gauna [makawa sara].” Ena luluvu dina mai vuniyalona, a kaya: “Au sa colata tu mai oqo na icolacola ni vakalutu gone ena veisiga ni noqu bula ena vasagavulu ka ono na yabaki. … E sega ni dua na ka au cakava me kauta laivi na mosi kei na kilaiyaloqu. Sa sega ni tu na noqu inuinui me yacova na gauna sa mai vakavulici kina vei au na kosipeli dina i Jisu Karisito. Au a vulica na veivutuni … ka vakasauri au sa vakasinaiti ena inuinui. Sa qai yaco meu kila ni rawa meu vosoti kevaka au veivutunitaka dina na noqu ivalavala ca.”12
Eda sa vakavinavinaka vakalevu ena isolisoli vakalou ni veivutuni kei na veivosoti.
Na Cava E Rawa Ni Da Cakava?
Na cava na noda itavi vakatisaipeli yalomalua i Jisu Karisito? Me da bulataka na ivakaro ni Kalou, vakavulica vei ira na luveda, ka wasea vei ira na tani era sa tuvakarau me ra vakarorogo.13 Me da wasea na noda nanuma titobu me baleta na bibi ni bula vata kei ira era dau vakatau lewa ena veitikotiko. Era na sega beka ni taleitaka sara na veika eda vakabauta, ia eda masuta ni ra na kila vakataucoko na vuna, vei keda, era uabaleta kina na veilewa oqo na veika sara ga e vinakata e dua na tamata me baleta na nona bula.
Kevaka sa buketetaki tiko e dua na gone sega ni namaki, me da dolele yani ena loloma, veivakayaloqaqataki, ka, kevaka e gadrevi, veivuke vakailavo, vakauqeta na tina me vakatara me sucu mai na luvena ka mai tomana nona ilakolako ena bula oqo.14
Na Totoka ni Yalo Savasava
Ena neitou matavuvale, keitou a vakalougatataki vakalevu sara ena ruasagavulu na yabaki sa oti, ena nona qai kila e dua na yabaki 16 ni sa bukete tiko. Erau sega ni vakawati kei na tamanigone, ka rau sega ni raica ni rau na rawa ni toso vata. E vakabauta na goneyalewa ni kabula e tiko e ketena sa ka talei sara. A vakasucuma e dua na goneyalewa ka qai solia ki na dua na matavuvale buladodonu me ratou vakubeca me nodratou. Vei rau o Bryce kei Jolinne, sa isau ni nodrau masu o koya. Erau vakayacani koya o Emily ka vakavulica me dau vakararavi vei Tamada Vakalomalagi kei na Luvena o Jisu Karisito.
A tubu cake o Emily. Keirau vakavinavinaka ni rau a veidomoni o Emily kei na makubui keirau tagane o Christian, ka rau vakamau ena vale ni Turaga. Ena gauna oqo sa dua na luvedrau goneyalewa lailai o Emily kei Christian.
A vola vaqo o Emily ena dua na gauna walega oqo: “Ena loma ni ciwa na vula oqo ni noqu bukete voli, a solia vei au e dua na gauna meu railesuva na veika a yaco ena noqu bula. Au nanuma na tinaqu a vakasucumi au, ka se qai yabaki 16 ga. Niu sotava na mosi kei na veisau e kauta mai na bukete, au sega ni rawa ni levea au mani vakasamataka na kena dredre vua e dua e yabaki 16. … Se drodro ga na wainimata ena gauna mada ga oqo niu vakasamataka na tinaqu a vakasucumi au mai, ni kila ni na sega ni rawa ni solia vei au na bula [a gadreva me baleti au ka soli au yani] meu vakubeci. Au sega ni vakasamataka rawa na veika a sotava ena loma ni ciwa na vula oya—ni wadravi toka ena mata ni vakalelewa ni veisau na yagona, na veitiki ni bula vakaitabagone a calata, e kila voli ni sa oti na rarawa ni loloma vakatina oqo, me na biuta na luvena e ligana e dua tale. Au vakavinavinakataka vakalevu na nona digidigi sega ni nanumi koya ga, ni a sega ni digitaka me vakayagataka nona galala ena dua na ivakarau me kauta tani kina na noqu.” A tinia o Emily, “Au vakavinavinaka vakalevu ena ituvatuva vakalou ni Tamada Vakalomalagi, vei rau na noqu itubutubu talei ka rau a [lomani au ka qaravi au], kei na valetabu na vanua e rawa ni da laki vauci kina vakamatavuvale me tawamudu.”15
Na iVakabula “A sa kauta e dua na gone lailai, ka vakatura ena kedra maliwa: ia ni sa keveta, sa kaya vei ira, O koya yadua ena vinakata e dua na gonelailai vakaoqo ena vuku ni yacaqu, sa vinakati au”16
Sega ni Se Kilai na vei Gagadre Yalododonu
Au cavuta na noqu loloma ena vukudra na veiwatini yalododonu era vakawati ka sega ni rawa ni vakaluveni me vaka era a namaka vakakina, o ira na marama kei na turaga ka sega ni donumaki ira na madigi me ra vakawati me vaka na lawa ni Kalou. E dredre ni ciqomi na tatadra tawakilai ni bula kevaka e laurai tikoga mai na ivakarau ni rai ni bula oqo. Me vaka niu italai ni Turaga, au yalataka vei kemuni ni ena gauna ko ni na yalodina kina vei Jisu Karisito kei na nomu veiyalayalati, ko na ciqoma na veivakalougatataki me kena isau ena bula oqo kei na nomu gagadre dodonu ena gauna tawamudu ni Turaga.17 E rawa ni yaco na marau ena ilakolako ni bula oqo kevaka sara mada ga se sega ni vakavotukana na noda vakanuinui dodonu.18
Ni ra sa sucu mai, era na gadreva tikoga na gone na noda veivuke. Eso era gadreva sara vakalevu. E veiyabaki, ena nodra veikawaitaki na bisopi kei na nomuni cau lomasoli ena isolisoli ni lolo kei na ilavo ni veivuke raraba, sa vakalougatataki kina na nodra bula e milioni vakamilioni na gonelalai. Eratou se qai kacivaka walega na Mataveiliutaki Taumada e 20 na millioni na dola me vukea na UNICEF ena nodratou sasaga ni vuravura taucoko me soli kina e rua na bilioni na icula ni tatarovi.19 E lomani ira na gonelalai na Kalou.
Na Vakatulewa Dodonu mo Vaka Luveni
E lomaleqataki ni so mada ga na vanua vutuniyau e vuravura, e lailai ga na gone era sucu mai.20 Na ivakaro ni Kalou vei ira na Luvena me ra vakatubukawa, ka vakatawai vuravura e se dei tiko ga.”21 Na gauna me ra sucu mai kina na gone kei na kedra iwiliwili erau na vakatulewa ga kina vakai rau na veiwatini kei na Turaga. Ena vakabauta kei na masumasu, na vakatulewa bibi oqo e rawa ni dua na gauna totoka ni ivakatakila.22
Au wasea mada na italanoa ni matavuvale na Laing mai na Ceva kei California. E vola vaoqo o Sister Rebecca Laing:
“Ena vulaikatakata ni 2011, a vaka me uasivi sara tu na bula ni neitou matavuvale. Keirau bula marau vakaveiwatini ka va na luvei keirau—yabaki 9, 7, 5, kei na 3. …
“A leqataki sara vakalevu na noqu bukete kei na noqu vakasucugone … [ka] keirau nanuma ni keirau sa vakalougatataki vakalevu sara me va na luvei keirau, ka [nanuma] ni sa taucoko na neirau matavuvale. Ena Okotova ni keirau vakarorogo tiko ki na koniferedi raraba, a yaco mai e dua na vakanananu sega ni vakacalai rawa, me dua tale na luvei keirau. Ni keirau vakanananu vakatitobu ka masumasu kei LeGrand, … keirau kila ni duatani na ituvatuva ni Kalou vei keirau mai na neirau.
“Ni oti e dua tale na gauna dredre ni bukete kei na vakasucu, keirau a vakalougatataki ena dua na goneyalewa totoka. Keirau a vakayacani koya o Brielle. E dua na cakacaka mana o koya. Ni oti e dua na gauna lekaleka mai na nona sucu, ni se tiko ga ena rumu ni vakasucu, au a rogoca na domo sega ni vakacalai rawa ni Yalo: ‘Se vo tale e dua.’
“Ni oti e tolu na yabaki, dua tale na cakamana, o Mia. Sa dua na ka rekitaki ena neitou matavuvale o Brielle kei Mia.” A qai tinia, “Ni da tadolavi keda ki na nona veidusimaki na Turaga ka muria na Nona ituvatuva ena kauta mai na marau cecere cake mai na noda … vakararavi ki na noda kilaka.”23
E lomana ka vakamareqeta na iVakabula na gone yadua.
“Sa qai tauri ira yadudua na nodra gonelalai, ka vakalougatataki ira. …
“Ia ni ra sa raici ira yani era sa rai cake sara, ka … ra sa siro sobu mai kina na agilosi ka sa vaka e nodra sala sobu mai na yameyame ni bukawaqa; era sa mai vakavolivoliti ira na gone lalai, … ka qaravi ira.”24
Au vakadinadinataka ni a sega ni tekivu na nomu ilakolako vakaluve ni Kalou ena gauna e curuma kina na nomu yatevuso na imatai ni cagi o ceguva ka na sega ni mai tini ena iotioti ni nomu icegu ena bula oqo.
Me da dau nanuma tiko ni luvena vakayalo yadua na Kalou era lako mai ki vuravura ena nodra dui lakolako yadudua.25 Me da kidavaki ira, taqomaki ira, ka dau lomani ira tikoga. Ni o ciqomi ira na gone vakamareqeti oqo ena yacana na iVakabula ka vukei ira ena nodra ilakolako tawamudu, au yalataka vei iko ni na vakalougatataki iko na Turaga ka na vakamiraka mai na Nona loloma kei na veivakadonui vei iko. Ena yaca i Jisu Karisito, emeni.