Kau sa Ciciva na Cere

Niu wilika na Cakacaka kei na ivola nei Paula, au qoroya na nona dau veiqaravi veivakavulici ka vakadinadinataki Jisu Karisito tu o Paula ena dela ni loloma kei na vakavinavinaka. E rawa vakacava me dua na tamata vakataki koya e veiqaravi tu, ena mataqali loloma kei na vakavinavinaka vakaoya, vakauasivi ena veivakararawataki a sotava? Na cava a vakauqeti Paula me veiqaravi? “Kau sa ciciva na cere, meu tauca na cere sa kacivi au kina mai cake na Kalou ena vukui Karisito Jisu.”¹

Me da ciciva na cere sai koya me da tikoga ena yalodina ena “sala qiqo ka rabailailai ka na kauti keda ki na bula tawamudu”² kei rau na noda iVakabula kei na Tamada mai Lomalagi. E raica o Paula na nona vakararawataki me “vaka sa sega ni yaga me rau vakatauvatani na ka ca sa vosoti ena bula oqo kei na kalougata ena vakaraitaka vei keda e muuri.”³ Na ivola nei Paula a vola vei ira mai Filipai ena gauna e tu kina e valeniveivesu e ivola ni marau vuabale kei na reki, ka veivakayaloqaqataki vei keda kece, vakauasivi ena gauna dredre oqo ni veilecayaki. Eda gadreva taucoko me da rawata na qaqa mai vei Paula: “Niu sa qai vakayalitaka vakadua vei au na ka kecega ni sa uasivi cake kina na veikilai kei Karisito Jisu na noqu Turaga: o koya kau sa vosota kina me yali vei au na ka kecega, ia kau sa vakasama ni sa de ni manumanu walega, meu rawai Karisito kina me noqu.”⁴

Ni da raica na veiqaravi nei Paula, eda sa vakauqeti ka laveti cake ena noda “Paula” ni gauna oqo, era a veiqaravi, veivakavulici, ka vakadinadina talega ena loloma kei na vakavinavinaka ena loma ni veika dredre era sota kaya ena nodra bula kei na nodra bula na nodra daulomani. E dua na ka au a sotava ena ciwa na yabaki sa oti a vukei au meu kila na bibi ni ciciva na cere.

Ena 2012, niu curu yani ena imatai ni gauna ki na soqoni ni veiliutaki ni koniferedi raraba, au sega ni kinoca rawa noqu luvuci kei na noqu sega ni veiganiti kaya. E dua na domo e voqa tikoga ena noqu vakasama ka kaya tiko, “E sega na nomu tikina eke! E dua na cala levu a vakayacori!” Niu vaqara tiko e dua na vanua meu dabe kina, a raici au mai o Elder Jeffrey R. Holland. A lako mai vei au ka kaya, “Edward, totoka dina nomu yaco mai ike,” ka mai vakayagoya yani vakamalua na babaqu. Au vaka e dua na gonelailai! Na nona loloma kei na imoko a ragiti au ka vukei au meu vakila na yalo ni veivakaitaukeitaki, na yalo ni veitacini. Ena siga ka tarava, au baci sarava tale nona cakava o Elder Holland na ka vata a cakava vei au ena nanoa, nona tavitavia vakamalumu toka na babai Elder Dallin H. Oaks, o koya e liu vua!

Ena gauna oya au vakila na loloma ni Turaga mai vei ira na turaga oqo eda tokona ni ra parofita, daurairai, ka dauvakatakila. A vukei au o Elder Holland, ena nona yalovinaka, nona ivalavala ni bula vakatamata, meu ulabaleta noqu dau nanumi au ga kei na yalodruka. A vukei au meu vakanamata ena cakacaka tabu ka rekitaki au sa kacivi kina—meu kauta mai na yalo vei Karisito. Me vakataki Paula ena gauna makawa, a dusimaki o koya meu ciciva na cere.

E taleitaki, ni uqeti keda tiko o Paula me da toso ki liu, ena gauna vata e kacivi keda tiko kina me da guilecava na veika sa sivi—na noda rere sa sivi, na noda vakanamata sa sivi, na noda druka sa sivi, kei na noda yalorarawa ni veigauna sa sivi. Sa sureti keda tiko o koya, me vaka ga na noda parofita lomani, o Peresitedi Russell M. Nelson, “ki na dua na sala vou ka vakalou cake.”⁵ E dina na nona yalayala na iVakabula: “Ia ko koya yadua sa via maroroya na nona bula, ena vakayalia: ia ko koya yadua ena vakayalia na nona bula ena vukuqu, ena maroroya.”⁶

Ena imatai ni noqu vosa ni koniferedi, au a wasea kina na nona a vakavulici au o tinaqu meu cakacaka ena iteitei. “Kakua ni rai ki muri,” e kaya o koya. “Rai ki liu ki na veika se vo me daru cakava!”⁷

Ena mua ni nona gauna ni bula, ni rau veisaqasaqa voli kei kenisa, a mai tiko vata kei keirau kei Naume. Ena dua na bogi au rogoca ni mamakeukeu tiko ena nona rumunimoce. E kaukauwa na nona mosi, ni se qai oti ga e rua na auwa nona gunuma na iotioti ni vakarau mofini ni siga oya.

Au curu yani ki na nona rumu ka tagi vata kei koya. Au masu vakadomoilevu me vakacegui totolo mai na nona mosi. Oti qai cakava na veika vata a dau cakava ena iteitei ena vicavata na yabaki sa oti: a cegu ka vakavulica vei au e dua na lesoni. Au na sega vakadua ni guilecava na irairai ni matana ena gauna oya: salulu, rairai tauvimate, ka sinai ena mosi, ka vakaraica tu mai ena loloma na luvena tagane yalorarawa. A matadredre mai ena mata tonawanawa, raica mai vakadodonu na mataqu, ka kaya, “E sega ni vakatau vei iko se vua e dua tale, ia sa vakatau vua na Kalou na lako tani ni mosi oqo se sega.”

Au a duri cake vakamalua. A dabe tale toka ga vakamalua o koya. Se makare vinaka toka ga ena noqu vakasama na ka a yaco oya. Ena bogi oya, mai vei tinaqu, a vakavulica kina vei au na Turaga e dua na lesoni ka na tu ga vei au me tawamudu. Ni vakaraitaka o tinaqu na nona sa ciqoma na lewa ni Kalou, au qai nanuma na vuna a vakararawataki kina ena Were mai Kecisemani kei na kauveilatai mai Kolikoca o Jisu Karisito. “Raica au sa solia vei kemudou na noqu kosipeli, ia oqo na kosipeli au sa solia vei kemudoui—niu a lako mai ki vuravura meu kitaka na lomai Tamaqu, ni a talai au mai ko Tamaqu.”⁸

iVakatakilakila

Na Karisito e Kecisemani

Niu vakananuma na nona taro vakaparofita na noda parofita lomani o Peresitedi Nelson ena koniferedi raraba sa oti. A taroga o Peresitedi Nelsonn: “O sa tuvakarau beka mo laiva me qaqa tikoga na Kalou ena nomu bula? O sa tuvakarau beka mo laiva na Kalou me dau veivakayarayarataki bibi duadua ena nomu bula? Ko na vakatara beka na Domona me liu duadua mai na veisasaga kecega? O sa tuvakarau beka mo laiva me sa duavata ga na lomamu kei na Lomana?⁹ Ena sauma beka o tinaqu ena dua na “io” ena yaloluluvu ia e dei vakakina o ira na vo ni lewenilotu yalodina e vuravura taucoko era na sauma talega ena dua na “io” ena yaloluluvu ia e dei. Presitedi Nelson, vinaka vakalevu nomuni vakauqeti keimami ena taro vakaparofita eso oqo.

Ena dua na gauna se qai oti wale toka, au a veivosaki kei Pretoria, Sauca Aferika, kei na dua na Bisopi ka a buluti rau na watina kei na dua na luvena yalewa uabula ena dua ga na siga. A kauta na nodrau bula na matetaka oqo na koronavarasi. Au taroga se sa vakacava tiko. Na kena isau mai vei Bisopi Teddy Thabete sa vaqaqacotaka na noqu yalayala meu muria na nodra ivakasala na nona parofita, daurairai ka dauvakatakila na Turaga. A sauma o Bisopi Thabete ni sa tu na vakanuinui kei na vakacegu ena noda kila ni sa colata na iVakabula na nodra mosi na Nona tamata, me rawa ni kila kina na ivakarau me tokoni keda ka vukei keda kina.¹⁰ Ena vakabauta titobu a vakadinadinataka kina o koya, “Au vakavinavinakata na ituvatuva ni veivakabulai, na ituvatuva ni marau.” A qai taroga vei au e dua na taro, “E sega beka ni o koya oqo na ka e vinakata tiko na parofita me vakavuvulitaka vei keda ena koniferedi sa oti oqo?”

Na bolebole ni bula oqo ena yaco ga mai vei keda, me da vakanamata ena takete ni “ciciva na cere,” sai koya na “meu tauca na cere sa kacivi au kina mai cake na Kalou.”¹¹

Na noqu veisureti malumalumu vei keda kece sara me da kakua ni soro! Eda sa kacivi me da “biuta laivi tu na ka bibi kece kei na ivalavala ca eda sa tao rawarawa kina ka me da ciciva tikoga na cere sa tu e matada, ka me da vakaraici Jisu o koya sa vakatekivuna ena sauma talega na noda vakabauta.”¹²

E sega soti ni baleta na veika eda lako curuma tiko ena bula, ia na veika eda sa yaco tiko me vaka. E tu na reki ena cicivi ni cere. Au vakadinadinataka ni o Koya sa vakadruka na ka kecega ena vukei keda ni da rai cake Vua. Ena yaca i Jisu Karisito, emeni.