Vakalougatataka ena Yacana

Kemuni na taciqu lomani, itokani dauveiqaravi ena matabete ni Kalou, sa ka dokai vei au me’u vosa vei kemuni ena bogi oqo. Sa dua na ka na titobu ni noqu rokovi kemuni ka vakavinavinaka vei kemuni. Ni’u vosa vei kemuni ka rogoca me baleta na nomuni vakabauta cecere, e sa noqu vakabauta ni sa tubucake tikoga na kaukauwa vakamatabete e vuravura, kei na kuoramu sa kaukauwa cake tikoga kei na lewe ni matabete yalodina sa qai levu cake tikoga.

Ena noqu gauna lekaleka vata kei kemuni ena bogi oqo, au na vosa vei kemuni o ni vinakata mo ni yaga vakalevu cake ena nomuni veiqaravi vakamatabete yadua. O ni sa kila me baleta na ilesilesi mo ni vakalevutaka na nomuni veikacivi mo ni veiqaravi.¹ Ia o ni na rairai vakataroga beka se cava na kena ibalebale vei kemuni na vakalevutaki ni nomuni veikacivi oya.

Au na tekivu vata kei ira na dikoni vou duadua baleta ni ra na rairai lecava vakalevu beka na ibalebale ni kena vakalevutaki na nodra veiqaravi vakamatabete. Era na via vakarorogo talega mai na italatala qase vakatikori vou. Na bisopi se qai tekivu tiko ena matai ni macawa ni nona veiqaravi ena via kila talega.

E sa ka ni vuli vei au me’u raica lesu na noqu veisiga vaka dikoni. Au diva me dua a tukuna vei au na veika au na vakatura yani oqo. Ena rawa ni a veivuke ena ilesilesi kece vakamatabete ka a yaco mai vei au mai na gauna oya—kei na kena sara mada ga au ciqoma ena veisiga oqo.

Au a tabaki me dua na dikoni ena dua na tabana rui lailai sara ka kena dikoni duadua ga kina o au ka ivakavuvuli duadua ga na tuakaqu o Ted. O keitou a dua na matavuvale duadua ga ena tabana oya. Na tabana taucoko oya dau soqoni ena neitou itikotiko. Na neirau iliuliu ni matabete kei tuakaqu a dua na lewenilotu vou ka sa qai ciqoma wale tale tikoga o koya na matabete. Au a vakabauta ni noqu itavi vakamatabete duadua ga oya me’u veivotayaka na sakaramede e loma ni neitou rumu ni kana.

Ena gauna a toki kina na noqu matavuvale ki Utah, au qai raica ni’u sa lai tu ena dua na tabanalevu sara ka vuqa na kena dikoni. Ena imatai ni noqu soqoni ni sakaramede e kea, au a vakaraici ira na dikoni—dua na mataivalu, vakaoya na kena irairai vei au—ni ra veitosoyaki vakamatau ni ra veivotayaka na sakaramede me vaka e dua na timi terenitaki.

Au rere vakalevu sara, na Sigatabu tarava au a lako totolo ki valenilotu me’u tiko vakataki au ni sega ni dua e rawa ni raici au. Au vakananuma ni Tabanalevu ni Yalecrest Salt Lake City, ka tiko e dua na vakatakarakara e rara. Au lako e dakuni ivakatakarakara, ka masulaka vagumatua me baleta na veivuke me’u kila na sala me’u kakua kina ni lutucala ni’u taura na noqu itutu ena veivotayaki ni sakaramede. A saumi mai na masu oya.

Ia au sa kila oqo ni tiko e dua na sala vinaka cake meda masu ka vakasama kina ni da tovolea meda tubucake ena noda veiqaravi vakamatabete. E sa yaco mai ena kena kilai matata vei au na vuna e soli kina na matabete ki na tamata yadua. Na inaki ni noda ciqoma na matabete sa ikoya me rawa ni da vakalougatataki ira kina na tamata ena vuku ni Turaga, ni da cakava tiko vakakina ena Yacana.²

Ni oti e vuqa na yabaki na noqu a se dikoni kina au qai vulica rawa na kena ibalebale. Me vakaoqo, e dua na bete levu, au a lesi me’u tiko ena soqoni ni sakaramede ni dua na itikotiko tudei ni veiqaravi. Au a kerei me’u veivotayaka na sakaramede. Au a rai tani mai na noqu dau vakasamataka tu na ituvatuva se na matata ni sala au dau veivotayaka kina na sakaramede, ka’u a raica yadua yani na matadra na tamata itabaqase. Au a raica e levu vei ira ni ra tagi. E dua na marama a qumia noqu bele ni sote, a rai cake mai, ka kaya vakamatata mai, “Isa, vinaka, vinaka.”

Na Turaga a vakalougatataka noqu veiqaravi e a soli ena Yacana. Na siga oya au a masuta me yaco mai e dua na cakamana vaka oya ka sega ni baleta na noqu rawa ni qarava vakavinaka na noqu itavi. Au a masulaka ni ra na vakila na tamata na loloma ni Turaga ena noqu veiqaravi loloma. Au a vulica ni oqo na idola ki na veiqaravi kei na nodra vakalougatataki na tani ena Yacana.

Au a rogoca e dua na ka sotavi wale tikoga qo ka a vakananuma vei au me baleta na loloma vaka oya. Ena gauna a sogo kina na soqoni kece ni Lotu ena vuku ni matedewa na COVID-19, e dua na turaga dauveiqaravi a ciqoma e dua na ilesilesi mai vei nona peresitedi ni kuoramu ni italatala qase me vakalougatataka ka wasea na sakaramede kivua e dua na marama ka dau veiqaravi kina o koya. Ena gauna a qiriti koya kina me kauta yani vua na sakaramede, a ciqoma mai o koya ena lomalomarua, ni cata me kauti koya tani mai na nona vale ena gauna rerevaki vaka oya ka ni vakabauta talega ni na lesu totolo tale na veika kece ki na kena ituvaki matau.

Ni yaco yani o koya ki na nona itikotiko na marama oya ena mataka ni Sigatabu, a kerekere mai o koya. E rawa beka ni rau taubale ki na vale tarava ka laki sakaramede vata kei na wekana yabaki 87? Ena veivakadonui nei bisopi, a makutu o koya.

Ena vuqa, vakavuqa na macawa, kei na kena qarauni vinaka na tiko veiyawaki kei na sala ni tataqomaki tale eso, na ilawalawa lailai ni Yalododonu oqo a soqoni vata ena vei Sigatabu yadua me baleta e dua na lotu ni sakaramede rawarawa. E vica walega na tiki ni idovi madrai kei na bilo wai—ia e vuqa na wainimata a turu me baleta na vinaka ni dua na Kalou dauloloma.

A qai yaco na gauna, e ratou a qai rawa ni lesu tale kina ki valenilotu na turaga dauveiqaravi oya, nona matavuvale, kei na sisita a dauqarava tiko o koya. Ia na marama dawai yabaki 87 oya, na itokani ka tiko tikivi koya, ena vuku ni taqotaqomaki, a gadrevi me tikoga e vale. Na turaga dauveiqaravi oya—e dau nanuma ni nona ilesilesi sa ikoya vua na kainona ia ka sega mada ga vua na marama qase sara oqo—me yacova mai nikua se dau lako tikoga mai ki na nona itikotiko ena vei Sigatabu yadua, vata kei na ivolanikalou kei na dua na tiki ni madrai lailai e ligana, me qarava na sakaramede ni Vakayakavi ni Turaga.

Na nona veiqaravi vakamatabete, me vaka na noqu ena siga oya ena itikotiko tudei ni veiqaravi oya, e soli yani mai na loloma. E dina sara, na turaga dauveiqaravi oya a taroga walega qo na nona bisopi kevaka e tiko eso tale ena tabanalevu ena rawa ni qarava o koya. Na nona gagadre me vakalevutaka na nona veiqaravi vakamatabete a tubucake ni veiqaravi o koya ena yaca ni Turaga kei na dua na sala e kila duadua ga o Koya. Au sega mada ni kila se a dau masu na turaga dauveiqaravi oya, me vakai au, me baleti ira a qarava o koya mera vakila na loloma ni Turaga, ia baleta ni a veiqaravi o koya ena yaca ni Turaga, a sa tautauvata ga na vuana.

E dau yaco mai na vuana totoka vata ga oya ni’u dau masulaka ni bera ni’u solia e dua na veivakalougatataki vakamatabete vua e dua e tauvimate se gadreva na veivuke. E yaco mada ena dua na gauna e valenibula ena nodra vakusati au eso na vuniwai—e sega walega ni ra vakusakusataki au, era —otataki au—meu vakatotolo ka toso tani mai me rawa ni ra vakayacora na nodra cakacaka, ka sega ni via solia vei au na madigi meu solia e dua na veivakalougatataki vaka matabete. Au tikoga, kau mani solia na veivakalougatataki. Na goneyalewa lailai kau vakalougatataka ena siga oya, ka ra nanuma na vuniwai ni na mate, qai bula. Au vakavinavinaka ena siga oya, au a sega ni vakatara me vakatatao na veika e yaco, ia au vakila ni a vinakata na Turaga me vakalougatataki na goneyalewa lailai oya. Kau kila na cava na veivakalougatataki: kau vakalougatataki koya me vakabulai. E dina sara o koya.

E sa yaco vakavuqa ni’u a solia e dua na veivakalougatataki vua e dua sa voleka sara tu ga ni mate, ni ra tu wavokita na idavodavo na lewe ni matavuvale, ka ra nuitaka tiko e dua na veivakalougatataki ni veivakabulai. Kevaka mada ga e tu vei au e dua na gauna lekaleka, au dau masulaka ga me’u kila na veivakalougatataki cava sa vakarautaka tu na Turaga ka na rawa ni’u solia ena Yacana. Ka’u dau kerea me’u kila na sala e vinakata o Koya me vakalougatataka kina na tamata oya ka sega ni ka au vinakata se o ira na tamata era duri voleka tu oya. Ena noqu kila oya ni kevaka sara mada ga e sega ni yaco me vaka na ka era gadreva na tani me baleti ira se nodra daulomani na veivakalougatataki oya, na Yalotabu e dau tara na yalodra mera vakila na veiciqomi kei na veivakacegui ka sega na lomabibi.

Na veivakauqeti vata ga oya e dau yaco ni ra lolo ka masulaka na veidusimaki na peteriaki mera solia na veivakalougatataki sa tu vua na Turaga me baleta e dua na tamata. E dua tale, au sa dau rogoca na veivakalougatataki a soli ka vakurabuitaki au kei koya talega na tamata e ciqoma tiko na veivakalougatataki oya. E matata, ni veivakalougatataki oya sa mai vua na Turaga—oya ruarua na veivakaroti e tu kina kei na yalayala e wasei ena Yacana. Na nodra masu kei na lolo na peteriaki a saumi mai vua na Turaga.

Vaka dua na bisopi, au a vulica ni’u vakayacora tiko e dua na veivakatarogi ni bula kilikili, me’u masulaka me laiva vei au na Turaga me’u vakila na ka e vinakata o Koya me baleta na tamata oya, ni taqomaka tiko na veivakauqeti cava ga ena vakarautaka o Koya me vakabuwawataki mai na noqu vakatulewa vakai au. E dredre oya kevaka na Turaga, ena loloma, ena vinakata beka me vakakalougatataka e dua ena veivakadodonutaki. E dau taura na sasaga me kilai na ka e vinakata na Turaga mai na ka o vinakata se na tamata tani oya.

Au vakabauta ni da rawa ni vakalevutaka noda veiqaravi vakamatabete ena noda bula taucoko ka lako yani. Ena vakatau ena noda gugumatua ena noda tovolea me kila na loma ni Turaga kei na noda sasaga me rogoca na Domona me rawa ni da kila vinaka cake na ka e vinakata o Koya me baleta na tamata eda qarava tiko ena Vukuna. Na veivakalevui oya ena yaco mai ena vei ikalawa lalai. Ena rairai yaco malua mai, ia ena yaco mai. Na Turaga e sa yalataka oqo vei keda:

“Ia ko ira sa yalodina ena kena rawati na ilesilesi matabete ruarua au sa tukuna tiko oqo, ka vakalevulevuya na itavi era kacivi kina, era na vakatabui ena Yalotabu ka na vakavoui na yagodra.

“A sa yaco me ra luvei Mosese ka luvei Eroni ka ra sa kawa i Eparama, kei na lotu kei na matanitu, ka ra sa digitaki ni Kalou.

“Ia ko ira kece era sa ciqoma na matabete era sa ciqomi au, sa kaya na Turaga.”³

E sa noqu ivakadinadina ni idola ni matabete a vakalesui mai vua na Parofita o Josefa Simici. O ira na dauveiqaravi ni Turaga era a rairai mai lomalagi me vakalesuya mai na matabete me baleta na veika cecere ka sa cereki mai ka sa koto e matada. Ena vakasoqoni o Isireli. Era na vakarautaki na tamata ni Turaga me baleta na Nona iKarua ni Lako Mai ena lagilagi. Ena toso tikoga na Veivakalesuimai. Ena vakatakila mai na Turaga e vuqa tale na Nona lewa kivei ira na Nona parofita kei ira na Nona talai.

Ko na rairai vakila ni o sa ka somidi mai na veitaviraki cecere ni veika ena cakava na Turaga. Kevaka e vakakina, au sureti iko mo taroga ena masumasu na sala e raici iko kina na Turaga. O Koya e kilai iko vakavoleka sara, o Koya a solia na matabete vei iko, kei na nomu tubu cake kei na vakalevulevuya na matabete e bibi Vua baleta e lomani iko o Koya ka nuitaki iko o Koya mo vakalougatataki ira na tamata ena Yacana.

Au sa vakalougatataki iko oqo mo rawa ni vakila Nona loloma kei na Nona yalodina ena yaca ni Turaga o Jisu Karisito, emeni.