Ma Jistgħux Jegħlbuna; Ma Nistgħux Nikkrollaw

Fl-aħħar konferenza ġenerali li kellna, l-għażiż profeta tagħna, il-President Russell M. Nelson, qal: “Waqt dawn iż-żminijiet perikolużi li dwarhom kien bassar l-Appostlu Pawlu, Satana lanqas għadu biss jipprova jaħbi l-attakki tiegħu fuq il-pjan ta’ Alla. Il-ħażen sar xi ħaġa li ssir fil-miftuħ. Għalhekk, l-uniku mod kif nistgħu nsalvaw spiritwalment hi li nkunu determinati li nħallu lil Alla jiddomina f’ħajjitna, li nitgħallmu nisimgħu leħnu, u li nużaw l-enerġija tagħna biex ngħinu fil-ġabra ta’ Iżrael.”¹

Hekk kif nikkunsidraw l-istedina tal-profeta li nitgħallmu nisimgħu leħen Alla, qalbna tinsab determinata jew imwebbsa? Ejjew niftakru fil-parir li ngħatajna f’ Jacob 6:6: “Iva, illum, jekk tisimgħu leħnu, twebbsux qalbkom; għax għalfejn intom tmutu?” Ejjew inkunu determinati li nħallu lil Alla jiddomina f’ħajjitna.

Kif nistgħu nħallu lil Alla jiddomina f’ħajjitna u mhux lill-avversarju? Fid- Duttrina u Patti 6:34 naqraw, “Għalhekk, tibżgħux, merħla ċkejkna; ħallu lid-dinja u l-infern jingħaqdu t-tnejn kontrikom, għaliex jekk intom tkunu mibnija fuq il-blata tiegħi, huma ma jegħlbukomx.” Din hi wegħda sinifikanti. Minkejja li d-dinja u l-infern jistgħu jingħaqdu kontrina, huma ma jistgħux jiddominawna jekk nagħżlu li nħallu lil Alla jiddominana billi nibnu ħajjitna fuq il-blata tiegħu.

Meta kien qed ikellem lid-dixxipli tiegħu, Ġesù Kristu għallimhom dwar raġel għaref u raġel iblah, kif hemm miktub f’ Mattew kapitlu 7 tat-Testment il-Ġdid. Ħafna minnkom smajtu l-għanja tal-Primarja “L-Għaref u l-Iblah.”² Jekk tiflu sew l-erba’ versi li hemm fl-għanja, issibu li vers 1 u 2 jixbhu ħafna lil vers 3 u 4. Kemm ir-raġel għaref kif ukoll ir-raġel iblah kienu qed jibnu dar. Huma riedu jipprovdu lill-familja tagħhom dar sigura u komda. Huma xtaqu jgħixu kuntenti flimkien għal dejjem bħala familja, bħalkom u bħali. Is-sitwazzjoni ta’ madwarhom kienet l-istess: “Ix- xita niżlet, u seħħew l-għargħar .” Inkantawha sitt darbiet kull meta nkantaw din l-għanja. L-unika differenza hi li r-raġel għaref bena daru fuq il-blat u d-dar baqgħet hemm, filwaqt li r-raġel iblah bena daru fuq ir-ramel u d-dar tiegħu nġarret mal-ilma. Għalhekk, hu importanti ferm fejn jinsab il-pedament tagħna, u dan iħalli effett deċiżiv fuq dak li jseħħ f’din il-ħajja u fl-eternità.

Nittama u nitlob li aħna lkoll insibu u nibqgħu fuq pedament sod hekk kif nistabbilixxu l-ħajja futura tagħna. F’ Helaman 5:12 ġejna mfakkrin: “U issa, uliedi, ftakru, ftakru li intom għandkom tibnu l-pedament tagħkom fuq il-blata tal-Feddej tagħna, li hu Kristu, l-Iben ta’ Alla; ħalli meta x-xitan jibgħat l-irwiefen qawwija tiegħu, iva, meta jixħtilkom il-lanez tiegħu, iva, meta l-forza tas-silġ u tat-tempesta tiegħu tinżel fuqkom, dan kollu ma jkollu l-ebda qawwa biex lilkom jitfagħkom ’l isfel fl-abbiss tal-miżerja u l-inkwiet bla tmiem, minħabba l-blata li intom tinsabu mibnijin fuqha, li hija pedament fiż-żgur, pedament li jekk il-bnedmin jibnu fuqu ma jistgħux jikkrollaw.”

Din hi l-wegħda mingħand Alla! Jekk aħna nibnu l-pedament tagħna fuq Ġesù Kristu, ma nistgħux nikkrollaw! Hekk kif b’fedeltà nibqgħu nissaportu sal-aħħar, Alla jgħinna nistabbilixxu ħajjitna fuq il-blata tiegħu, u “il-kanċelli tal-infern ma jegħlbuniex” (Doctrine and Covenants 10:69). Jista’ jkun li aħna ma nkunux kapaċi nibdlu dak kollu li sejrin niffaċċjaw, iżda nistgħu nagħżlu kif nistgħu nitħejjew għal dak li ġej.

Xi wħud minna jafu jaħsbu, “L-evanġelju hu tajjeb, għalhekk jeħtieġ li, forsi darba fil-ġimgħa, nagħmluh parti minn ħajjitna.” Li darba fil-ġimgħa mmorru l-knisja mhux biżżejjed biex nibnu fuq il-blat. Ħajjitna kollha għandha tkun dominata mill-evanġelju ta’ Ġesù Kristu. L-evanġelju mhuwiex parti minn ħajjitna, iżda ħajjitna hi fil-fatt parti mill-evanġelju ta’ Ġesù Kristu. Aħsbu ftit dwar dan. Mhux veru? Il-ħajja mortali tagħna hija biss parti mill-pjan sħiħ tas-salvazzjoni u l-eżaltazzjoni.

Alla huwa Missierna fis-Smewwiet. Huwa jħobbna lkoll. Hu jaf x’inhu l-potenzjal tagħna aktar milli nafu aħna stess. Huwa mhux biss jaf id-dettalji ta’ ħajjitna. Alla jaf id-dettalji tad-dettalji tad-dettalji ta’ ħajjitna.

Jekk jogħġobkom imxu wara l-parir għaqli tal-profeta ħaj tagħna, il-President Nelson. Kif hemm miktub f’ Duttrina u Patti 21:5–6:

“Għax intom tirċievu l-kelma tiegħu, bħallikieku ħierġa minn fommi, bil-paċenzja kollha u l-fidi.

“Talli nagħmlu dan, il-kanċelli tal-infern mhux sa jegħlbukom; iva, u l-Mulej Alla se jkeċċi qawwiet id-dlam minn quddiemkom, u jġiegħel li jitriegħdu s-smewwiet minħabba fikom u minħabba l-glorja ta’ ismu.”

Għal dik ir-raġuni, huma ma jistgħux jegħlbuna, u aħna ma nistgħux nikkrollaw!

Jiena nixhed li Kristu se jerġa’ jiġi għat-tieni darba kif għamel l-ewwel darba, iżda din id-darba se jiġi fi glorja u majestà kbira. Nittama u nitlob li jien inkun lest biex nilqgħu, kemm jekk fuq din in-naħa tal-velu, kemm jekk fuq in-naħa l-oħra. Hekk kif niċċelebraw dan iż-żmien sabiħ tal-Għid, jien nittama, permezz tal-Espjazzjoni ta’ Ġesù Kristu u l-qawwa tal-qawmien tiegħu mill-Imwiet (ara Moroni 7:41), li nkun nista’ nitla’ ’l fuq u niltaqa’ mal-Ħallieq tiegħi u ngħidlu, “Grazzi.” F’isem Ġesù Kristu, amen.