Niddefendu l-Kostituzzjoni Tagħna, Ispirata Divinament
It-twemmin tagħna fl-ispirazzjoni divina jagħti lill-Qaddisin tal-Aħħar Żmien responsabbiltà unika li nħarsu u niddefendu l-Kostituzzjoni tal-Istati Uniti u l-prinċipji tal-kostituzzjonalità.
F’dan iż-żmien ta’ nkwiet, ħassejt li għandi nitkellem dwar il-Kostituzzjoni ispirata tal-Istati Uniti. Din il-Kostituzzjoni hija ta’ importanza speċjali għall-membri tagħna fl-Istati Uniti, iżda hija wkoll wirt komuni ta’ kostituzzjonijiet madwar id-dinja.
I.
Kostituzzjoni hija l-pedament ta’ gvern. Tipprovdi struttura u limiti għall-eżerċizzju tal-poteri tal-gvern. Il-Kostituzzjoni tal-Istati Uniti hija l-eqdem kostituzzjoni miktuba li għadha fis-seħħ sal-lum. Għalkemm oriġinarjament kienet adottata minn numru żgħir biss ta’ kolonji, ma damitx ma saret mudell għad-dinja kollha. Illum, kull nazzjon, ħlief tlieta, adottaw kostituzzjonijiet bil-miktub.1
F’dawn ir-rimarki mhux se nitkellem dwar xi partit politiku jew xi grupp ieħor. Se nitkellem dwar il-Kostituzzjoni tal-Istati Uniti, li jien studjajt għal aktar minn 60 sena. Se nitkellem mill-esperjenza tiegħi bħala skrivan tal-liġi mal-prim imħallef tal-Qorti Suprema tal-Istati Uniti. Se nitkellem mill-esperjenza ta’ 15-il sena bħala professur tal-liġi, u t-3 snin u nofs bħala mħallef fil-Qorti Suprema ta’ Utah. U fuq kollox, se nitkellem wara esperjenza ta’ 37 sena bħala Appostlu ta’ Ġesù Kristu, responsabbli li nistudja t-tifsira tal-Kostituzzjoni ispirata divinament tal-Istati Uniti għall-ħidma tal-Knisja rrestawrata tiegħu.
Il-Kostituzzjoni tal-Istati Uniti hija unika għax Alla żvela li Hu “stabbilixxa” l-kostituzzjoni “għad-drittijiet u l-protezzjoni tal-bnedmin kollha” (Doctrine and Covenants 101:77; ara wkoll vers 80). Huwa għalhekk li din il-kostituzzjoni hija ta’ interess speċjali għall-Knisja ta’ Ġesù Kristu tal-Qaddisin tal-Aħħar Żmien madwar id-dinja. Jekk il-prinċipji tagħha għandhomx jiġu applikati f’nazzjonijiet oħra tad-dinja, u kif f’dak il-każ għandhom jiġu applikati, f’idejhom.
X’kien l-għan ta’ Alla li jistabbilixxi l-Kostituzzjoni tal-Istati Uniti? Nistgħu naraw dan fid-duttrina tal-volontà morali. Fl-ewwel għaxar snin tal-Knisja rrestawrata, il-membri tagħha mal-fruntiera tal-punent kienu qed isofru persekuzzjoni kemm privata kif ukoll pubblika. Waħda mir-raġunijiet għal dan kienet minħabba l-oppożizzjoni tagħhom għall-iskjavitù umana li kienet teżisti fl-Istati Uniti f’dawk iż-żminijiet. F’dawn iċ-ċirkostanzi sfortunati, Alla żvela permezz tal-Profeta Joseph Smith veritajiet eterni dwar id-duttrina tiegħu.
Alla ta lil uliedu l-volontà morali—il-qawwa li jiddeċiedu u jaġixxu. L-aktar kundizzjoni mixtieqa għall-eżerċizzju ta’ dik il-volontà hija l-libertà massima għall-irġiel u n-nisa biex jaġixxu skont l-għażliet individwali tagħhom. Imbagħad, kif tispjega r-rivelazzjoni, “kull bniedem ikun responsabbli għall-istess dnubiet tiegħu fil-jum tal-ġudizzju” (Doctrine and Covenants 101:78). “Għalhekk,” żvela l-Mulej, “mhux sew li xi bniedem ikun ilsir ta’ bniedem ieħor” (Doctrine and Covenants 101:79). Dan ovvjament ifisser li l-iskjavitù umana hija ħażina. U skont l-istess prinċipju, huwa ħażin li ċ-ċittadini ma jkollhom l-ebda vuċi fl-għażla tal-mexxejja tagħhom jew fit-tfassil tal-liġijiet tagħhom.
II.
It-twemmin tagħna li l-Kostituzzjoni tal-Istati Uniti kienet ispirata divinament ma jfissirx li r-rivelazzjoni divina ddettat kull kelma u frażi, bħad-dispożizzjonijiet li jallokaw in-numru ta’ rappreżentanti minn kull stat jew l-età minima tagħhom.2 Il-Kostituzzjoni ma kenitx “dokument żviluppat għal kollox”, qal il-President J. Reuben Clark. “Għall-kuntrarju,” huwa spjega, “aħna nemmnu li teħtieġ li tikber u tiżviluppa biex tissodisfa l-ħtiġijiet dejjem jinbidlu ta’ dinja li qed tavvanza.”3 Per eżempju, ċerti emendi ispirati abolixxew l-iskjavitù u taw id-dritt tal-vot lin-nisa. Madankollu, aħna ma narawx l-ispirazzjoni f’kull deċiżjoni tal-Qorti Suprema li tinterpreta l-Kostituzzjoni.
Jien nemmen li l-Kostituzzjoni tal-Istati Uniti fiha mill-inqas ħames prinċipji li huma ispirati divinament.4
L-ewwel huwa l-prinċipju li s-sors tal-poter tal-gvern huwa n-nies. Fi żmien meta l-poter sovran kien universalment preżunt li ġej mid-dritt divin tar-rejiet jew mill-poter militari, kienet ħaġa rivoluzzjonarja li tattribwixxi l-poter sovran lill-poplu. Kien hemm xi filosofi li kienu rrakkomandaw dan, iżda l-Kostituzzjoni tal-Istati Uniti kienet l-ewwel li applikatha. Il-poter sovran f’idejn il-poplu ma jfissirx li xi marmalja jew xi gruppi oħra ta’ nies jistgħu jintervjenu biex jintimidaw jew iġiegħlu lill-gvern biex jaġixxi. Il-Kostituzzjoni stabbiliet repubblika demokratika kostituzzjonali, fejn il-poplu jeżerċita l-poter tiegħu permezz tar-rappreżentanti eletti tiegħu.
It-tieni prinċipju ispirat huwa d-diviżjoni tal-poter delegat bejn in-nazzjon u l-istati sussidjarji tiegħu. Fis-sistema federali tagħna, dan il-prinċipju bla preċedent xi drabi ġie mibdul b’emendi ispirati, bħal dawk li jabolixxu l-iskjavitù u jestendu d-drittijiet tal-vot għan-nisa, kif semmejt qabel. B’mod sinifikanti, il-Kostituzzjoni tal-Istati Uniti tillimita l-gvern nazzjonali għall-eżerċizzju ta’ poteri mogħtija espressament jew b’implikazzjoni, u tirriżerva l-poteri governattivi l-oħra kollha “lill-Istati rispettivi jew lill-poplu.”5
Prinċipju ispirat ieħor huwa s-separazzjoni tal-poteri. Aktar minn seklu qabel il-Konvenzjoni Kostituzzjonali tagħna tal-1787, il-Parlament Ingliż kien pijunier fis-separazzjoni tal-awtorità leġiżlattiva u eżekuttiva meta kien ħa ċerti poteri mingħand ir-re. L-ispirazzjoni fil-konvenzjoni Amerikana kienet li tiddelega poteri eżekuttivi, leġislattivi, u ġudizzjarji indipendenti sabiex dawn it-tliet fergħat ikunu jistgħu jeżerċitaw kontrolli fuq xulxin.
Ir-raba’ prinċipju ispirat jinsab fil-grupp ta’ garanziji mill-aktar importanti ta’ drittijiet individwali u limiti speċifiċi fuq l-awtorità tal-gvern fl-Abbozz tad-Drittijiet, adottat permezz ta’ emenda tliet snin biss wara li l-Kostituzzjoni daħlet fis-seħħ. Abbozz tad-Drittijiet ma kienx xi ħaġa ġdida. Hawnhekk, l-ispirazzjoni kienet fl-implimentazzjoni prattika ta’ prinċipji li kienu raw il-bidu tagħhom fl-Ingilterra permezz tal-Magna Carta. Il-kittieba tal-Kostituzzjoni kienu familjari magħhom minħabba li wħud mid-dokumenti kolonjali kellhom fihom garanziji bħal dawn.
Mingħajr Abbozz ta’ Drittijiet, l-Amerika ma setgħetx isservi bħala nazzjon ospitanti għar-Restawrazzjoni tal-evanġelju, li rat il-bidu tagħha tliet deċennji biss wara. Żgur li kien hemm ispirazzjoni divina fid-dispożizzjoni oriġinali li m’għandu jkun hemm l-ebda test reliġjuż għal kariga pubblika,6 iżda ż-żieda tal-libertà reliġjuża u l-garanziji antistabbiliment fl-Ewwel Emenda kienu mill-aktar importanti. Naraw ukoll ispirazzjoni divina fil-libertajiet tal-kelma u tal-istampa tal-Ewwel Emenda u fil-protezzjonijiet personali f’emendi oħra, bħal dik għal prosekuzzjonijiet kriminali.
Il-ħames u l-aħħar, jien nara ispirazzjoni divina fl-għan mill-aktar importanti tal-Kostituzzjoni kollha. Aħna għandna nitmexxew mill- liġi u mhux minn individwi, il-lealtà tagħna hija lejn il-Kostituzzjoni u l-prinċipji u l-proċessi tagħha, mhux lejn xi detentur ta’ kariga. B’dan il-mod, in-nies kollha għandhom ikunu ndaqs quddiem il-liġi. Dawn il-prinċipji jimblukkaw l-ambizzjonijiet awtokratiċi, li kkorrompew id-demokrazija f’ċerti pajjiżi. Dawn ifissru wkoll li l-ebda waħda mit-tliet fergħat tal-gvern m’għandha tkun dominanti fuq l-oħrajn jew tipprevjeni lill-oħrajn milli jwettqu l-funzjonijiet kostituzzjonali xierqa tagħhom biex jillimitaw lil xulxin.
III.
Minkejja l-prinċipji ispirati b’mod divin tal-Kostituzzjoni tal-Istati Uniti, meta jiġu eżerċitati minn nies imperfetti mhux dejjem tiġi mwettqa l-intenzjoni oriġinali tagħhom. Suġġetti importanti tat-tfassil tal-liġijiet, bħal xi liġijiet li jirregolaw ir-relazzjonijiet tal-familja, ittieħdu mill-istati mill-gvern federali. Il-garanzija tal-Ewwel Emenda tal-kelma ħielsa xi drabi ġiet dilwita bis-soppressjoni tal-kelma mhux popolari. Il-prinċipju tas-separazzjoni tal-poteri dejjem kien taħt pressjoni ħalli xi fergħa ta’ gvern tinfluwenza lil xi fergħa oħra bil-mod kif għandha teżerċita jew tinibixxi l-poteri delegati lilha.
Hemm ċertu theddid ieħor li jdgħajjef il-prinċipji ispirati tal-Kostituzzjoni tal-Istati Uniti. L-istatura tal-Kostituzzjoni tonqos bl-isforzi biex jiġu sostitwiti x-xejriet tas-soċjetà kurrenti bħala r-raġuni għat-twaqqif tagħha, minflok il-libertà u l-awtogovernanza. L-awtorità tal-Kostituzzjoni tiġi ttrattata qisha mhi xejn meta xi kandidati jew uffiċjali jinjoraw il-prinċipji tagħha. Id-dinjità u l-forza tal-Kostituzzjoni jiċċekknu minn dawk li jirreferu għaliha qisha xi test ta’ lealtà jew slogan politiku, minflok bl-istatus għoli tagħha bħala sors ta’ awtorizzazzjoni u limiti għall-awtorità tal-gvern.
IV.
It-twemmin tagħna fl-ispirazzjoni divina jagħti lill-Qaddisin tal-Aħħar Żmien responsabbiltà unika li nħarsu u niddefendu l-Kostituzzjoni tal-Istati Uniti u l-prinċipji tal-kostituzzjonalità kull fejn aħna ngħixu. Jeħtieġ li aħna nafdaw fil-Mulej u nkunu pożittivi dwar il-futur ta’ dan in-nazzjon.
X’għandhom jagħmlu aktar il-Qaddisin tal-Aħħar Żmien? Jeħtieġ li nitolbu biex il-Mulej jiggwida u jbierek lill-ġnus kollha u l-mexxejja tagħhom. Din hija parti mill-artiklu tal-fidi tagħna. Li nkunu suġġetti għal presidenti jew mexxejja7 naturalment m’għandu joħloq l-ebda ostaklu għall-oppożizzjoni tagħna lejn xi liġijiet jew polisis individwali. Dan jeħtieġ minna li neżerċitaw l-influwenza tagħna b’mod ċivili u paċifiku, fil-qafas tal-kostituzzjonijiet tagħna u l-liġijiet applikabbli. Dwar kwistjonijiet ikkontestati, għandna nfittxu l-moderazzjoni u l-għaqda.
Hemm dmirijiet oħra li huma parti miż-żamma tal-Kostituzzjoni ispirata. Għandna nitgħallmu u nirrakkomandaw il- prinċipji ispirati tal-Kostituzzjoni. Għandna nfittxu u nappoġġjaw persuni għaqlin u tajbin li jappoġġjaw dawk il-prinċipji fl-azzjonijiet pubbliċi tagħhom.8 Aħna għandna nkunu ċittadini infurmati li nkunu attivi sabiex l-influwenza tagħna tinħass fl-affarijiet ċiviċi.
Fl-Istati Uniti u f’demokraziji oħra, l-influwenza politika hija eżerċitata billi tkun kandidat għal xi kariga (ħaġa li nħeġġuha), billi tivvota, permezz ta’ sapport finanzjarju, permezz ta’ sħubija u servizz f’partiti politiċi, u b’komunikazzjonijiet kontinwi ma’ uffiċjali, partiti, u kandidati. Biex tiffunzjona tajjeb, demokrazija teħtieġ dawn kollha, iżda kull ċittadin kuxjenzjuż m’għandux għalfejn jipprovdihom kollha.
Hemm bosta kwistjonijiet politiċi, u l-ebda partit, pjattaforma, jew kandidat individwali ma jista’ jissodisfa l-preferenzi personali kollha. Kull ċittadin għandu għalhekk jiddeċiedi liema kwistjonijiet huma l-aktar importanti għalih. Imbagħad, il-membri għandhom ifittxu l-ispirazzjoni dwar kif jistgħu jeżerċitaw l-influwenza tagħhom skont il-prijoritajiet individwali tagħhom. Dan il-proċess mhux se jkun wieħed faċli. Dan jista’ jirrikjedi li wieħed jaqleb il-vot tiegħu minn partit għall-ieħor, jew minn kandidat għall-ieħor, anke minn elezzjoni għal elezzjoni.
Tali azzjonijiet indipendenti jistgħu xi drabi jkunu jeħtieġu li l-votanti jappoġġjaw kandidati jew partiti politiċi jew pjattaformi li l-pożizzjonijiet l-oħra tagħhom ma jaqblux magħhom.9 Din hi waħda mir-raġunijiet għalfejn inħeġġu lill-membri tagħna biex joqogħdu lura milli jiġġudikaw lil xulxin fuq kwistjonijiet politiċi. Qatt m’għandna nasserixxu li Qaddis fidil tal-aħħar Żmien ma jistax jappartjeni għal xi partit partikolari jew jivvota għal xi kandidat partikolari. Aħna ngħallmu prinċipji tajbin u nħallu lill-membri tagħna jagħżlu kif jipprijoritizzaw u japplikaw dawk il-prinċipji skont kwistjonijiet ippreżentati minn żmien għal żmien. Aħna ninsistu wkoll, u nitolbu lill-mexxejja lokali tagħna biex jinsistu huma wkoll, li l-għażliet u l-affiljazzjonijiet politiċi ma jkunux is-suġġett ta’ tagħlim jew propoganda f’xi waħda mil-laqgħat tal-Knisja tagħna.
Il-Knisja ta’ Ġesù Kristu tal-Qaddisin tal-Aħħar Żmien, naturalment, se teżerċita d-dritt tagħha li tapprova jew topponi proposti leġislattivi speċifiċi li nemmu li jista’ jkollhom impatt fuq l-eżerċizzju ħieles tar-reliġjon jew l-interessi essenzjali tal-organizzazzjonijiet tal-Knisja.
Jiena nixhed dwar il-Kostituzzjoni ispirata divinament tal-Istati Uniti u nitlob li aħna li nirrikonoxxu l-Esseru Divin li ispiraha dejjem inħarsu u niddefendu l-prinċipji kbar tagħha. F’isem Ġesù Kristu, amen.