“Ona Ou Faia Lea o Mea Vaivai ia Avea ma Mea Malolosi”

E ui e moni e lelei le faamaoni, e ao ona tatou faamaoni i o tatou faasinomaga moni, o ni atalii ma ni afafine o le Atua ua i ai se natura paia ma se taunuuga e avea e faapei o Ia.² Afai o la tatou sini o le faamaoni i lena natura ma le taunuuga paia, o lona uiga la e manaomia ona tatou suia uma. O le upu faatusitusiga paia mo le suia o le salamo. “Ua toatele naua tagata,” ua aoao mai ai Peresitene Russell M. Nelson, “e mafaufau i le salamo o se faasalaga—o se mea e ao ona aloese ai vagana ai tulaga sili ona matuiā. … Pe a fetalai mai Iesu ia te oe ma a’u ia ‘salamo,’ o loo Ia valaauliaina i tatou ia sui,”³

E faaaoga e le au gaosi polokalama o komepiuta ni faamatalaga faatuutuuga e ta’u atu ai i komepiuta le mea e fai. O nisi taimi e faasino i ai o faamatalaga afai-ona. E pei o lea, afai e sa’o le x , ona fai lea o le y.

E galue foi le Alii e ala i tuutuuga: tuutuuga o le faatuatua, tuutuuga o le amiotonu, tuutuuga o le salamo. E tele faataitaiga o faamatalaga faaletuutuuga mai le Atua e pei o:

“Afai e te tausia aʼu poloaiga ma tumau e oo i le iuga, [ona] o le a e maua le ola e faavavau, le meaalofa silisili lea o meaalofa uma a le Atua.”⁴

Po o le “afai tou ole atu ma le loto faamaoni, ma le manatu moni i ai, ma le faatuatua ia Keriso [ona] o le a ia faaali mai le moni o ia mea ia te outou, i le mana o le Agaga Paia.”⁵

E oo foi i le alofa o le Atua, e ui ina e le i’u ma e atoatoa, e fua foi i tuutuuga.⁶ Mo se faataitaiga:

“Afai tou te tausia a’u poloaiga, [ona] tumau lea o outou i lo’u alofa; pei ona ou tausia poloaiga a lo’u Tama, ma ou tumau i lona alofa.”⁷

Na faamalamalama atili e Elder D. Todd Christofferson lenei upumoni o le talalelei ina ua ia aoao mai: “E fai mai soo a nisi, ‘E alofa le Faaola ia te a’u i le tulaga lea ou te i ai,’ ma e moni lelei lava lena mea. Ae e le mafai e Ia ona aveina se tasi o i tatou i Lona malo i le tulaga o tatou i ai nei, ‘aua e leai se mea eleelea e mafai ona nofo ai iina, pe nofo ai i lona afioaga’ [Mose 6:57]. E tatau ona foia muamua a tatou agasala.”⁸

O le faamanuiaga o le mauaina o le mana o le Atua e fesoasoani tatou te suia ai, e faaletuutuuga foi. Na aoao mai le Faaola, a o fetalai e ala mai i le perofeta o Moronae i le Tusi a Mamona: “Afai e o mai tagata ia te au o le a ou faaali atu ia te i latou o latou vaivaiga. Ou te avatu i tagata ia vaivaiga ina ia faalotomaualalalo ai i latou; ma ua lava lou alofa tunoa mo tagata uma o e e latou te faalotomaualalaloina i latou lava i ou luma; aua afai latou te faalotomaualalaloina i latou lava i ou luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou.”⁹

O le vaavaai atu ma le faaeteete i mea o loo aoao mai e le Alii i i, o loo Ia muai fetalai mai faapea Na te avatu i alii ma tamaitai ia vaivaiga, e taitasi, o se vaega o lo tatou aafiaga faaleolaga nei o ni tagata pauu pe faaletino. Ua avea i tatou ma alii ma tamaitai natura ona o le Pau o Atamu. Ae o le Togiola a Iesu Keriso, e mafai ai ona tatou faatoilaloina o tatou vaivaiga, ma o tatou natura pau.

Ona Ia fetalai mai lea e faapea ua lava Lona alofatunoa ma afai tatou te faalotomaualaloina i tatou lava ma faatuatua ia te Ia, ona o le a Ia “faia mea [plural] vaivai ma mea malolosi ia i [tatou]” I se isi faaupuga, a tatou suia muamua o tatou natura pa’ū, o tatou vaivaiga, ona mafai lea ona tatou suia a tatou amioga, ma o tatou vaivaiga.

Se’i o tatou iloiloina tulaga manaomia e suia ai e tusa ma le mamanu a le Alii.

Muamua, e tatau ona tatou faamaualaloina i tatou lava. O le tuutuuga a le Alii mo le suia o le lotomaualalo. “Afai latou te faamaualaloina i latou lava i o’u luma,”¹⁰ na Ia fetalai ai. O le faafeagai o le lotomaulalo o le faamaualuga. E i ai le faamaualuga pe a tatou manatu ua sili atu lo tatou iloa—pe afai o mea ua tatou manatu pe lagona e faamuamua i lo le mea e finagalo ai le Atua .

Na aoao mai e le Tupu o Peniamina e faapea “o le tagata natura o se fili i le Atua, … ma o le a faapea lava, e faavavau faavavau lava, vagana ai ua … tuu ese le tagata natura ma avea ma tagata paia e ala i le togiola a Keriso le Alii, ma avea e pei o se tamaitiiti, e usiusitai, agamalu, [ma] lotomaualalo.”¹¹

Ina ia mafai ona sui, e manaomia ona tatou tuu ese le tagata natura ma ia lotomaualalo ma usiusitai. E tatau ona lava lo tatou lotomaualalo e mulimuli ai i se perofeta soifua. Ia lava le lotomaualalo e osia ai ma tausi feagaiga o le malumalu. Ia lava le lotomaualalo e salamo ai i aso taitasi. E tatau ona lava lo tatou lotomaualalo e mananao ai ia suia, e “tuu atu o tatou loto i le Atua.”¹²

Lona lua, e tatau ona tatou faatuatua ia Iesu Keriso. E toe fai atu foi, afioga a le Faaola, “Afai latou te faalotomaualalaloina i latou lava i ou luma, ma faatuatua mai ia te au,,”¹³ o le a Ia tuu mai ia i tatou le mana e faatoilalo ai o tatou vaivaiga. O le lotomaualalo, faatasi ai ma le faatuatua ia Iesu Keriso, o le a mafai ai ona tatou maua le mana e mafai ai o Lona alofatunoa ma le atoaga o faamanuiaga ua maua ona o Lana Togiola.

Na aoao mai Peresitene Nelson e faapea “o le salamo moni e amata i le faatuatua o loo ia Iesu Keriso le mana e faamamā, faamalolo, ma faamalosia ai i tatou. … O lo tatou faatuatua e tatala mai ai le mana o le Atua i o tatou olaga.”¹⁴

Lona tolu, e ala mai i Lona alofatunoa e mafai ai ona Ia faia mea vaivai ia avea ma mea malolosi. Afai tatou faamaulalo i tatou lava ma faatuatua ia Iesu Keriso, ona mafai lea e Lona alofatunoa ona suia i tatou. I se isi faaupuga, o le a Ia faamanaina i tatou ia sui. Ua mafai lea mea aua, pei ona Ia fetalai, “Ua lava lo’u alofa tunoa mo tagata uma.”¹⁵ O Lona alofatunoa e mafai ai ona tatou maua le mana e faatoilalo ai mea faalavefau uma , luitau uma ma vaivaiga uma a o tatou saili ina ia sui.

E mafai ona avea o tatou vaivaiga aupito sili ma o tatou malosiaga silisili. E mafai ona suia i tatou ma “avea ma tagata fou.”¹⁶ O mea vaivai e mafai moni ona “avea ma mea malolosi [ia i tatou].”¹⁷

Na galueaiina e le Faaola Lana Togiola e le i’u ma faavavau ina ia mafai moni ai e i tatou ona sui, salamo, ma avea ma tagata sili atu. E mafai moni lava ona toe fanaua i tatou. E mafai ona tatou faatoilalo amio masani, mausa, e oo lava “i le le toe manao e fai mea leaga.”¹⁸ I le avea ai o atalii ma afafine o se Tama i le Lagi alofa, ua ia i tatou le mana i totonu e suia ai.

Ua tumu tusitusiga paia i faataitaiga o alii ma tamaitai o e na suia.

O Saulo, o se Faresaio ma sē na matuai faasaua i le ekalesia Kerisiano anamua,¹⁹ na avea ma Paulo, o se Aposetolo a le Alii o Iesu Keriso.

O Alema sa avea ma faitaulaga a le Tupu amioleaga o Noa. Na faalogo o ia i upu a Apinati, sa salamo atoa, ma avea o se tasi o faifeautalai sili o le Tusi a Mamona.

Sa faaalu e lona atalii o Alema lona talavou e faaumatia le Ekalesia. O ia o se tasi o “tagata agasala e sili ona leaga”²⁰ seia ina ia maua se suiga o le loto ma avea ai o se faifeautalai mamana i ana lava taumafaiga.

Sa vaetamaina Mose i le aiga o Farao ma sa tausia ma faamanuiaina o se aloalii Aikupito. Peitai ina ua ia malamalama i lona faasinomaga moni ma iloa lona taunuuga paia, sa suia o ia ma avea ma perofeta faitulafono maoae o le Feagaiga Tuai.²¹

O le tamamatua o lo’u toalua, o James B. Keysor, sa ou maofa ai pea i le suiga tele o lona lava loto.²² Na fanau mai i paionia faatuatua o le Au Paia o Aso e Gata Ai i le vanu o Sate Leki i le 1906, na maliu lona tina a o talavou ma sa tauivi ai lava i lona talavou atoa. O tausaga o lona talavou ma lona talavou matua, sa faaalu i fafo atu o le Ekalesia, lea na ia maua mai ai ni mau uiga masani leaga. Ae ui o lea, sa feiloai o ia ma faaipoipo i se tamaitai faamaoni, ma sa la tausia faatasi ai se fanau e toalima.

I le 1943, ina ua mavae tausaga faigata o le Pau Tele o le Tamaoaiga ma i le taimi o le Taua Lona Lua a le Lalolagi, sa tuua ai e Bud, e pei ona sa vaalaau ai e uo ma le aiga, ia Iuta ae malaga atu i Los Angeles, Kalefonia, e sue galuega. I le taimi lea na tuua ai le aiga, sa nofo i lona tuafafine ma lona toalua, o le sa avea ma epikopo i la latou uarota.

O le alofa ma le tosinaga a lona tuafafine ma lona uso faaletulafono, sa amata ai ona ia toe faaolaola lona fiafia i le Lotu ma amata ona faitau le Tusi a Mamona i po taitasi a o lei moe.

I se tasi po, a o ia faitauina le Alema mataupu 34, sa tuia lona loto ao ia faitaua upu nei:

“Ioe, ou te manao ia outou o mai ma aua le toe faamaaaina o outou loto. …

“Aua faauta, o le olaga lenei o le taimi lea mo tagata e saunia ai e feiloai ma le Atua; ioe, faauta o le aso o le olaga lenei o le aso lea mo tagata e fai ai a latou galuega.”²³

A o ia faitauina nei fuaiupu, sa oo ane ia te ia se lagona mamana ma sa ia iloa ai ua tatau ona suia o ia, ia salamo, ma sa ia iloa ai le mea e tatau ona ia faia. Sa tu a’e o ia mai lona moega ma tootuli ma amata ona tatalo, ma augani atu i le Alii e faamagalo o ia ma avatu ia te ia le malosi sa ia manaomia e faia ai suiga i lona olaga. Sa tali mai lana tatalo, ma mai lava i lena taimi, e lei toe tepa o ia i tua. Sa galue auauna Bud i le Ekalesia ma tumau o se Au Paia o Aso e Gata Ai faamaoni, ma tuuto e oo i le iuga o lona ola. Sa suia o ia i itu uma. O lona mafaufau, lona loto, o ana taga, ma lona tagata na suia.

Uso e ma tuafafine, o lo tatou taunuuga ma le faamoemoega paia, o le avea e faapei o lo tatou Tama Faalelagi ma le Faaola, o Iesu Keriso. Tatou te faia lenei mea a o tatou suia pe salamo. Tatou te “maua foliga [o le Faaola] i [o tatou] mata.”²⁴ E oo ina tatou fou, mama, ese, ma na o le faaauau lava ona tatou galulue i ai i aso taitasi. O nisi taimi e ono faalogoina e pei e lua laa i luma ma le laa e tasi i tua, ae ia faaauau pea ona tatou agai ma le lotomaualalo i luma i le faatuatua.

Ma a tatou faamaulalo i tatou lava ma faatino le faatuatua ia Iesu Keriso, ona mafai lea e le alofatunoa o Keriso ma Lana taulaga togiola le i’u ona suia.

Ou te molimau atu ma tautino atu e moni lava o Iesu Keriso o lo tatou Faaola ma le Togiola. Ua lava ma totoe Lona alofa tunoa. Ou te tautino atu o Ia “o le ala, ma le upumoni, ma le ola.”²⁵ I le suafa o Iesu Keriso, amene.