O Lesona mai le Vaieli

Saunia e Susan H. Porter

Fesoasoani Muamua i le Au Peresitene Aoao o le Peraimeri

E mafai ona tatou liliu atu i le Faaola mo le malosi ma le faamalologa lea o le a mafai ai ona tatou faia mea uma na auina mai i tatou iinei e fai.

E maeu le olioli i le potopoto faatasi ma outou taitoatasi i lenei sauniga a tamaitai o le konafesi aoao!

Sa ou ola ae i Niu Ioka i sisifo ma auai i se paranesi laitiiti o le Ekalesia pe tusa ma le 20 maila (32 - km) mai lo matou fale. A o ou nofo i le vasega o le Aoga Sa i le fogafale i lalo o le matou falesa tuai mautotogi ma la‘u uo o Patti Jo, sa le mafai lava ona ou mafaufauina le avea ai o se vaega o se usoga a tamaitai i le lalolagi atoa ua faitau miliona o tamaitai.

I le lima tausaga talu ai, sa ma‘i tigaina lo’u toalua o Bruce, a o ma auauna atu i le Au Paia ua faapaiaina i le Eria o Europa Sasae. Sa ma toe foi i le fale ma na maliu o ia i ni nai vaiaso mulimuli ane. Na suia faafuasei lo’u olaga. Sa ou faavauvau ma lagona le vaivai ma le lē atoatoa. Sa ou aioi atu i le Alii e faatonufolau lo‘u ala: “O le a se mea E Te finagalo ou te faia?”

I ni nai vaiaso mulimuli ane, a’o ou siakiina la‘u meli sa tosina atu lau vaai i se ata laitiiti i se lisi o oloa. A o ou tilotilo latalata atu i ai, sa ou iloaina ai o se faatufugaga a se tusiata o le fafine Samaria faatasi ma Iesu i le vaieli. I lena taimi, sa talanoa manino mai le Agaga ia te a’u; “O le mea lena e tatau ona e faia.” Na valaaulia a‘u e se Tama Faalelagi alofa e sau i le Faaola ma aoaoina ai.

Ou te fia faasoa atu ia te outou ni lesona se tolu o loo ou aoaoina a o faaauau pea ona ou inu mai Lana vaieli o le “vai ola.”¹

Muamua: O o Tatou Tulaga ua Tuanai ma le Taimi Nei E Le Filima’otia ai lo Tatou Lumanai

Uso e, ou te iloa o le toatele o outou e lagonaina e pei ona sa ou lagonaina, le lē mautinoa pe faapefea ona feagai ma luitau faigata ma le leiloa—leiloa ona ua le ogatusa lou olaga ma le ala sa outou faamoemoe i ai, tatalo ai, ma fuafua i ai

Po o a lava o tatou tulaga, e paia o tatou olaga ma e i ai uiga ma faamoemoega. O i tatou taitoatasi o se afafine faapelepele o le Atua, na fananau mai ma le gafatia paia i o tatou agaga.

O lo tatou Faaola o Iesu Keriso, e ala i Lana taulaga togiola, ua mafai ai e i tatou ona faamamaina ma faamaloloina, ma mafai ai e i tatou ona faataunuu lo tatou faamoemoega i le lalolagi tusa lava po o a faaiuga a tagata o le aiga, lo tatou tulaga faalefaaipoipoga, soifua maloloina faaletino pe faalemafaufau, po o se isi lava tulaga.

Mafaufau i le fafine i le vaieli. Na faape‘ī lona olaga? Na silafia e Iesu e toalima ana tane ma e lei faaipoipo i le taimi nei i le tamaloa o loo la nonofo. Ae peitai, e ui lava i faigata o lona olaga, o le uluai tautinoga lautele a le Faaola faapea o Ia o le Mesia, na tuu atu ia te ia. Na Ia fetalai atu, “O a’u lava lenei, o lē tautala atu ia te oe.”²

Sa avea o ia ma molimau mamana, ma folafola atu ia i latou i lona aai o Iesu o le Keriso. “E toatele le au Samaria i lea aai na faatuatua ia te ia, ona o le upu a le fafine na ia fai atu.”³

O ona tulaga ua tuanai ma le taimi nei sa lei filima’otia ai lona lumanai. E pei o ia, e mafai ona tatou filifili e liliu atu i le Faaola i aso nei mo le malosi ma le faamalologa lea o le a mafai ai ona tatou faataunuuina mea uma na auina mai i tatou iinei e fai.

Lua: Ua i Totonu ia te i [Tatou] le Mana

I se fuaiupu faapea o i le Mataupu Faavae ma Feagaiga, o loo fautuaina ai e le Alii tamaitai ma alii ina ia “auai ma le naunautai i se faamoemoega lelei, ma fai mea e tele i lo latou lava loto malie, ma aumai le amiotonu tele, aua ua ia i latou le mana,”⁴

Uso e, ua i totonu ia i tatou le mana e aumai ai le amiotonu tele!

Na molimau mai Peresitene Russell M. Nelson, “O tamaitai uma ma alii uma e osia ni feagaiga ma le Atua ma tausia na feagaiga, ma o e auai ma le agavaa i sauniga o le perisitua, e mauaina le avanoa tuusao i le mana o le Atua.”⁵

Ua ou iloa a o tatou tauivi e faamamalu feagaiga paia na osia i le papatisoga ma i malumalu paia, o le a faamanuiaina i tatou e le Alii “i Lona mana faamalolo ma faamalosiau” ma “ni malamalamaaga ma ni fagua faaleagaga [tatou] te le’i mauaina muamua lava.”⁶

Tolu: “O Mea Iti e Tutupu Mai ai Mea Tetele”⁷

I le Lauga i luga o le Mauga, sa aoao atu ai e Iesu Ona soo, “O outou o le masima o le lalolagi”⁸ ma le “O outou o le malamalama o le lalolagi.”⁹ Mulimuli ane sa Ia faatusaina le tuputupu ae o le malo o le lagi i le mea faafefete, “ua ave e le fafine ma tuu i totonu o le falaoa e tolu tumu, ua oo ina faafefeteina uma ai.”¹⁰

Masima
Mea Faafefete
Malamalama

E oo lava i nai aofaiga iti, e aafia uma ai mea o siomia ai i latou. Ua valaaulia i tatou e le Faaola e faaaoga Lona mana e avea ai o se masima, mea faafefete, ma malamalama.

Masima

E maofa i le tele o se eseesega o le tofo i mea tatou te aai ai i le na o se lulu o sina masima. Ae peitai, o le masima o se tasi o mea e sili ona taugofie ma sili ona faatauvaa.

I le tusi o le 2 Tupu, tatou te faitau ai e uiga i “le teine itiiti,”¹¹ lea na pueina e le au Suria ma sa avea o se auauna i le avā a Naamanu, le ta’ita’i’au o le autau a Suria. Sa pei o ia o le masima; sa laitiiti o ia, e leai se taua faalelalolagi, ma o lona olaga o se pologa i se atunuu ese sa manino lava e le o le mea lea sa ia faamoemoe i ai.

Peitai, sa tautala o ia ma le mana o le Atua i ni fuaiupu se lua, e molimau atu ai i le ava a Naamanu: “Ana i ai le Atua lo’u alii i le perofeta o i Samaria, po ua faateaina e ia lona lepela.”¹²

Na ta’u atu ana upu o le faatuatua ia Naamanu, o lē na faatinoa ana upu, ma mafai ai ona faamaloloina o ia i le faaletino ma le faaleagaga.

E masani ona tatou taulai atu i auauna o e na uunaia Naamanu e ta’ele i le vaitafe o Ioritana, e pei ona faatonuina ai e le perofeta o Elisaia, ae semanu e le oo lava Naamanu i le faitotoa o Elisaia pe ana leai “le teine itiiti.”

Atonu e te laitiiti pe lagonaina le leai o se taua, ae e mafai ona avea oe o se masima i lou aiga, i le aoga, ma i lou nuu.

Mea Faafefete

Na e taumafa ea i se falaoa e leai se fefete? E faapefea ona e faamatalaina? Mafiafia? Mamafa? Malō? I le na o sina vaega itiiti o le mea faafefete, e fefete ai le falaoa, ma faateleina ai ina ia māmā ma vaivai.

Pe a tatou valaauliaina le mana o le Atua i o tatou olaga, e mafai ona tatou suia le “loto faavaivai”¹³ i vaaiga musuia e siitia ai isi ma maua ai se avanoa mo loto ina ia faamaloloina ai.

Talu ai nei, sa taoto ai sa‘u uo i le moega i le taeao o le Kerisimasi, ua lofituina i le faanoanoa. Sa aioi atu lana fanau ia te ia e tu i luga; peitai, sa faatumulia o ia i le tiga o le tatalaina o lana faaipoipoga o loo faatalitali. A o tagi masusu ai i lona moega, sa ia sasaa atu lona agaga i le tatalo i lona Tama Faalelagi, ma ta‘u atu ia te Ia lona faanoanoa.

A o faaiuina lana tatalo, sa musumusu atu le Agaga ia te ia e silafia e le Atua ona tiga. Sa faatumulia o ia i Lona agaalofa mo ia. O lenei aafiaga paia na faamaonia ai ona lagona ma avatu ai ia te ia le faamoemoe e le o faanoanoa na o ia. Sa ia tu i luga, alu i fafo, ma fau se tagata mai le kiona faatasi ma lana fanau, ma suia ai le mamafatu o le taeao i le taliē ma le olioli.

Malamalama

O le a le telē o le malamalama e ati ai i le pogisa i totonu o se potu? O se ave laitiiti e tasi. Ma o lena ave o le malamalama i se nofoaga pogisa e mafai ona sau mai le mana o le Atua ia te oe.

E ui lava atonu e te lagonaina le tuuatoatasi a o pesi mai afa o le olaga, e mafai ona e faasusulu atu se malamalama i le pogisa o le lē malamalama, fenumiai, ma le lē talitonu. O lou malamalama o le faatuatua ia Keriso e mafai ona mausali ma mautinoa, ma taitai atu ai i latou o siomia oe i le saogalemu ma le filemu.

Uso e, e mafai ona suia loto ma faamanuiaina olaga a o tatou ofoina atu sina masima, se sipuniti o mea faafefete, ma se ave o le malamalama.

Ou te molimau atu o le Faaola o le masima i o tatou olaga, o loo valaauliaina i tatou e tofo i Lona olioli ma le alofa.¹⁴ O Ia lava o le mea faafefete pe a faigata o tatou olaga, e aumaia ia i tatou le faamoemoe¹⁵ ma siitia ese ai a tatou avega¹⁶ e ala i Lona mana le mafaatusalia ma le alofa togiola.¹⁷ O Ia o lo tatou malamalama,¹⁸ o loo faamalamalamaina ai lo tatou ala i le toe foi atu i le aiga.

Ou te tatalo ia mafai ona tatou o mai i le Faaola, e pei o le fafine i le vaieli, ma inu i Lana vai ola. Faatasi ai ma tagata o Samaria, ua mafai ona matou tautino atu, “Ua matou faatuatua ai nei, … ua matou faalogologo, ua matou iloa foi, e moni lava, o le Faaola lenei o le lalolagi, o le Keriso lava.”¹⁹ I le suafa o Iesu Keriso, amene.