O Le Liua o La Tatou Sini Lea

Mafaufau i le faamatalaga loloto lenei mai le faatomuaga i le Sau, Mulimuli Mai ia te A‘u:

“O faamoemoega uma o le aoao mai ma le aoao atu o le talalelei o le faalolotoina lea o lo tatou liua i le Tama Faalelagi ma Iesu Keriso. …

“… O le ituaiga aoaoina o le talalelei lea e faamalolosia ai lo tatou faatuatua ma taitai atu ai i le vavega o le liua e le tupu i se taimi e tasi. E oo atu i tua atu o se potua‘oga i totonu o o tatou loto ma aiga. E moomia ai le faifaipea e le aunoa, o taumafaiga i aso taitasi ia malamalama ma ola ai i le talalelei. O le aoaoina i le talalelei lea e oo atu ai i le liua moni e moomia ai le faatosinaga a le Agaga Paia.”¹

O le vavega lena tatou te sailia—pe a maua e se tagata e toatasi se aafiaga i tusitusiga paia,² ma o lena aafiaga e faamanuiaina e ala i le faatosinaga a le Agaga Paia. O ia aafiaga o ni maa faavae taua mo lo tatou liua i le Faaola. Ma e pei ona sa faamanatu mai ia i tatou talu ai nei e Peresitene Russell M. Nelson, e tatau ona faamalolosia i taimi uma ia faavae faaleagaga.³ O le liua umi e tumau o se faagasologa i le olaga atoa.⁴ O le liua o la tatou sini lea.

Ina ia sili atu ona aoga, e tatau ona avea ou aafiaga i tusitusiga paia ma ou lava aafiaga.⁵ O le faitau po o le faalogo e uiga i aafiaga ma malamalamaaga o se isi tagata e mafai ona aoga, ae o le a le aumaia e lena mea le mana lava e tasi e liua ai. E leai se mea e suitulaga mo le taimi e te faaaluina i tusitusiga paia, e faalogo ai i le Agaga Paia o fetalai sa‘o atu ia te oe.

O vaiaso taitasi pe a ou tatalaina la‘u tusi lesona o le Sau, Mulimuli Mai ia te A’u, ou te tusia ai le fesili lenei i le pito i luga o le itulau: “O le a le mea o loo aoao mai e le Agaga Paia ia te a‘u i lenei vaiaso a o ou faitauina nei mataupu?”

A o ou suesue i tusitusiga paia, ou te mafaufau loloto pea lava pea i lena fesili. Ma e aunoa ma le misi, e oo mai uunaiga faaleagaga, ma ou te tusitusia i la‘u tusi lesona.

O lenei, e faapefea ona ou iloa le taimi e aoao ai a’u e le Agaga Paia? Ia, e masani lava ona tupu i ni auala laiti ma faatauvaa. O nisi taimi o se fuaitau o se mau e foliga mai o le a oso ese mai le itulau i lo‘u mafaufau. I nisi taimi, ou te lagona e pei ua faapupulaina lo‘u mafaufau i se malamalama lautele atu o se mataupu faavae o le talalelei. Ou te lagonaina foi le uunaiga a le Agaga Paia pe a ma talanoa ma lo‘u toalua, o Anne Marie, e uiga i mea o loo ma faitauina. O ona manatu e valaaulia ai i taimi uma le Agaga.

O le tausaga lenei o loo tatou suesueina ai le Feagaiga Tuai—o tusitusiga paia e faatumulia ai o tatou agaga i le malamalama. A o faitauina le Feagaiga Tuai, ou te lagona le pei o loo ou faaaluina le taimi ma ni taiala faatuatuaina: o Atamu, Eva, Enoka, Noa, Aperaamo, ma le toatele o isi.

I lenei vaiaso, a o suesueina le Esoto mataupu e 7–13, ua tatou aoao ai i le ala na faasaoloto ai e le Alii le fanauga a Isaraelu mai seneturi o le faatagataotauaina i Aikupito. Tatou te faitau e uiga i mala e iva—faaaliga faagaeetia e iva o le mana o le Atua—lea na molimauina e Farao e aunoa ma le faamalūlūina o lona loto.

Ona ta‘u atu lea e le Alii i Lana perofeta, o Mose, e uiga i se mala lona sefulu—ma le ala e mafai ai e aiga taitasi o Isaraelu ona saunia i ai. O se vaega o se sauniga o le a latou ta‘ua o le Paseka, sa tatau ai i tagata Isaraelu ona ositaulagaina se tamai mamoe po’a, o se tasi e lē ponā. Ona latou faailogaina lea o faitotoa o o latou fale i le toto o le tamai mamoe. Na folafola mai e le Alii o fale uma na faailogaina i le toto o le a puipuia mai le mala matautia o le a oo mai.

Fai mai tusitusiga paia, “[Na faia e] le fanauga a Isaraelu, … e pei ona poloai Ieova ia Mose” (Esoto 12:28). O loo i ai se mea e sili ona mamana i lena faamatalaga faigofie o le usiusitai.

Ona sa mulimuli le fanauga a Isaraelu i le fautuaga a Mose ma galulue i le faatuatua, sa faasaoina i latou mai le mala ma, i se taimi, na faasaolotoina ai mai lo latou nofopologa.

O le a la le mea na aoao mai e le Agaga Paia ia te a’u i nei mataupu i lenei vaiaso?

O ni nai manatu nei sa tamau i lo‘u mafaufau:

• E galue le Alii e ala i Lana perofeta e puipui ma laveai Lona nuu.

• O le faatuatua ma le lotomaualalo e mulimuli ai i le perofeta na muamua atu i le vavega o le puipuiga ma le laveaiina.

• O le toto i luga o le faitotoa o se faailoga vaaia lea o le faatuatua i totonu ia Iesu Keriso, le Tamai Mamoe a le Atua.

Ua faagaeetia lava au i le ogatusa o le ala na faamanuiaina ai e le Alii Lona nuu i lenei tala o le Feagaiga Tuai ma le ala o loo Ia faamanuiaina ai foi Lona nuu i aso nei.

Ina ua folasia mai ia i tatou e le perofeta soifua a le Alii, o Peresitene Nelson, le Sau, Mulimuli Mai ia te A‘u o se auala e suesue ai tusitusiga paia, sa ia valaaulia i tatou e suia o tatou aiga e avea ma malutaga o le faatuatua ma nofoaga autu o le aoaoina o le talalelei.

Ona ia folafola mai lea o faamanuiaga patino e fa:

1. o le a avea ou aso Sapati o se aso fiafia,

2. o le a fiafia lau fanau e aoao ma ola i aoaoga a le Faaola,

3. o le a faaitiitia tosinaga a le fili i lou olaga ma i lou aiga, ma le

4. o le a iloga ma tumau nei suiga i lou aiga.⁶

Ia, e leai ni a tatou faamaumauga i api talaaga mai ia i latou na aafia i le Paseka faatasi ai ma Mose i Aikupito. Peitai, e tele a tatou molimau mai le Au Paia o e, ma le faatuatua tutusa, o loo mulimuli i le fautuaga a Peresitene Nelson i aso nei ma mauaina faamanuiaga folafolaina.

O ni nai molimau nei:

Fai mai se tina o se aiga talavou: “Matou te talanoa ia Keriso ma olioli ia Keriso i lo matou aiga. Ia te a’u o se faamanuiaga aupito sili lena—e mafai e la‘u fanau ona ola ae faatasi ma nei talanoaga o le talalelei i totonu o le aiga lea e aumaia faalatalata atili ai i latou i le Faaola.”⁷

Sa ta‘ua e se uso sinia lana suesuega o tusitusiga paia i le Sau, Mulimuli Mai ia te A’u “o se auala ua faatumulia i le malamalama faalelagi lea e fesoasoani tatou te vaai ai i aoaoga faavae o le talalelei lea e tatau ai mo lo tatou manuia faaleagaga.”⁸

Sa faamatala e se avā talavou ia faamanuiaga i lana faaipoipoga: “Ua mafai ona ou iloa atili le loto o lo‘u toalua, ma ua mafai ona ou tatalaina atili lo’u loto ia te ia a o ma suesue faatasi.”⁹

Sa matauina e se tina o se aiga toatele le ala na suia ai ana taumafaiga e aoao lona aiga. Sa ia ta‘ua: “O le toe tepa i tua, sa pei o loo ou taina le piano a o faia ni totigilima kiona. Sa ou faia ni tiga, ae sa lei sa’o lelei le musika. O lenei ua aveese totigilima, ma e ui e lē atoatoa pea la’u musika, a ua ou faalogo i le eseesega. Ua tuuina mai e le Sau, Mulimuli Mai ia te A‘u se vaaiga mamao, tomai, taulai, ma le faamoemoega.”¹⁰

Sa fai mai se tane talavou: “O a‘u faamuamua aupito taua i le fale ua sili atu ona manino talu ona ou faia le Sau, Mulimuli Mai ia te A’u o se vaega masani o o‘u taeao. O le suesue e taitai atu ai a‘u e mafaufau atili i mea e sili ona taua ia te a’u, e pei o le malumalu, o lo‘u sootaga ma lo’u toalua, ma lo‘u valaauga. Ou te faafetai o lo‘u fale o se malutaga lea e faamuamua ai le Atua.”¹¹

Sa faasoa mai e se tuafafine: “O o‘u aafiaga i aso taitasi i le Sau, Mulimuli Mai ia te A’u e seasea ona taua, ae i le aluga o taimi ua mafai ona ou iloa ai le ala ua suia ai a‘u i se suesuega faifai pea ma le taulai atu i tusitusiga paia. O lena ituaiga o suesuega e faalotomaualaloina ai a‘u, aoao ai a’u, ma suia teisi ai a‘u i lea taimi ma lea taimi.¹²

Sa lipoti mai e se faifeautalai ua maea le misiona: “O le polokalama o le Sau, Mulimuli Mai ia te A‘u ua ou latalata atili ai i le tulaga o le suesueina o tusitusiga paia sa ou faia i la’u misiona, ma ua mafai ai ona ou see ese mai se lisi o le mafaufau i le suesue i tusitusiga paia i sauniga e faamau’oa moni ai le iloaina o le Atua.”¹³

Sa fai mai se uso: “Ua ou lagona le taliaina atili o le Agaga Paia i lo’u olaga ma lagonaina le taitaiga faafaaaliga a le Atua i le faia o faaiuga. Ua tele atu a‘u talanoaga loloto e faatatau i le matagofie i le aoaoga faavae faigofie a Keriso ma Lana Togiola.”¹⁴

Sa faasoa mai e se tamaitiiti e fitu tausaga le matua: “Ua lata ona ou papatiso, ma o le Sau, Mulimuli Mai ia te A‘u o loo saunia a’u. Matou te talanoa ma lou aiga e uiga i le papatisoga, ma ou te le o lagona le popole e uiga i le papatisoina i le taimi nei. O leSau, Mulimuli Mai ia te A’u e fesoasoani i le Agaga Paia e oo mai i lo’u loto, ma ou te lagona le mafanafana pe a ou faitau i tusitusiga paia.¹⁵

Ma le mea mulimuli, mai se tina o ni nai fanau: “A o matou suesue i le afioga a le Atua, ua Ia fesoasoani i lo matou aiga e o ese mai le popole i le malosi; mai tofotofoga ma luitau i le laveaiina; mai finauga ma faitioga i le alofa ma le filemu; ma mai faatosinaga a le fili i faatosinaga a le Atua.”¹⁶

O i latou nei ma le toatele o isi soo faamaoni o Keriso ua tuuina faafaatusa le toto o le Tamai Mamoe a le Atua i luga o le faitotoa o o latou fale. O loo latou faatinoina la latou tautinoga i totonu e mulimuli i le Faaola. E muamua atu lo latou faatuatua i le vavega. O se vavega o se tagata e toatasi ua i ai se aafiaga i tusitusiga paia ma o lena aafiaga ua faamanuiaina e ala i le faatosinaga a le Agaga Paia.

A tatou suesue i tusitusiga paia, e leai se oge faaleagaga i le laueleele. E pei ona fai mai Nifae, “Ma ai se e faalogo i le afioga a le Atua; ma pipiimau i ai, e lē fano lava i latou; pe mafai foi e faaosoosoga ma ufanafana mu a le fili ona faatoilaloina i latou i le faatauasoina, e taitai ese atu ai i latou i le faafanoga” (1 Nifae 15:24).

I aso anamua, a o mulimuli le fanauga a Isaraelu i le taitaiga a le Alii na tuuina mai e ala mai i le perofeta o Mose, sa faamanuiaina i latou i le saogalemu ma le saolotoga. I aso nei, a o tatou mulimuli i le taitaiga a le Alii ua tuuina mai e ala mai i lo tatou perofeta soifua, o Peresitene Nelson, e faapena foi ona faamanuiaina i tatou i le liuaina i o tatou loto ma le puipuiga i o tatou aiga.

Ou te molimau atu o loo soifua Iesu Keriso. O Lana Ekalesia lenei, ua toefuatai mai i le lalolagi e ala mai i le Perofeta o Iosefa Samita. O Peresitene Russell M. Nelson o le perofeta a le Alii i aso nei. Ou te alofa ia te ia ma lagolagoina o ia. I le suafa o Iesu Keriso, amene.