Ā Tatou Mea Uma Mai Le Loto

I ni nai aso a o lei tuuina mai e Ia Lona soifua mo i tatou, sa i ai Iesu Keriso i le malumalu i Ierusalema, ma vaavaai atu i tagata o faia foai i le faleteuoloa o le malumalu. “O le toatele o i latou o e mauoa ua lafo tele,” ae, na oo mai se fafine mativa ua oti lana tane, “ma sa ia lafo i tupe iti e lua.” O se aofaiga laitiiti tele, e faaleai sona taua e faamaumau ai.

Ata

O se fafine ua oti lana tane o loo ofoina atu ni tupe iti se lua

Ae o lenei foai e foliga mai e le taua na tosina atu i ai le gauai o le Faaola. O le mea moni, na matua faagaeetia o Ia Iea na “valaau atu [ai o ia i ona soo, ua fetalai atu ia te i latou, E moni, ou te fai atu ia te outou, o mea a lena fafine mativa ua oti lana tane, ua lafo i le mea e teu ai tupe, ua sili ia i a latou uma na lafo i ai:

“Aua … ua latou lafo nisi mea mai a latou mea ua tele; ao ia ua mativa ua ia lafo ana mea uma sa ia te ia, o ana mea uma e ola ai.”¹

Faatasi ai ma lenei matauga faigofie, na aoao ai i tatou e le Faaola i le ala e fuaina ai taulaga i Lona malo—ma e fai lava si ese mai le ala e masani ona tatou fuaina ai mea. I le Alii, o le taua o le foai sa le fuaina i le aafiaga o le foai i le mea e teu ai tupe ae e ala i le aafiaga o le foai i le loto o le tagata foai.

I le viia ai o lenei fafine faamaoni ua oti lana tane, na tuuina mai ai e le Faaola ia i tatou se tulaga faatonuina e fuatia ai lo tatou avea ma soo i le tele o ona faaupuga uma. Na aoao mai Iesu o la tatou taulaga atonu e telē pe itiiti foi, ae po o le a lava le ala, e tatau ona avea ma a tatou mea uma mai le loto.

O loo ta‘ua lenei mataupu faavae i le aioiga a le perofeta o le Tusi a Mamona o Amaleki: “O mai ia Keriso, o lē o le Paia e Toatasi o Isaraelu, ma taumamafa i lana olataga, ma le mana o lana togiola. Ioe, o mai ia te ia, ma tuu atu o outou agaga atoa e fai ma taulaga ia te ia.”²

Ae e mafai faapefea lenei mea? I le toatele o i tatou, o sea tulaga faatonuina o le tuuto atu ma le loto atoa e foliga mai e le mafai ona ausia. Ua matua anoanoai manaoga o loo manaomia lo tatou gauai atu i ai. E mafai faapefea ona tatou faapaleniina le tele o manaoga o le olaga ma o tatou manaoga e tuu atu o tatou agaga atoa i le Alii?

Atonu o lo tatou luitau o lo tatou manatu faapea o le paleni o lona uiga o le vaevae o o tatou taimi ia tutusa lelei i mea faatautavā tatou te fiafia i ai. O le vaai atu i ai i lenei auala, o lo tatou tuuto ia Iesu Keriso o se tasi lea o le tele o mea e manaomia ona tatou faaofiina i totonu o a tatou fuafuaga pisi. Ae atonu o loo i ai se isi auala e vaai i ai.

Ma te fiafia ma lo‘u toalua o Harriet e o e tietite uila faatasi. O se auala matagofie e maua ai sina faamalositino a o faaaluina faatasi ai foi le taimi. A o ma tietie, ma ou te le o sela tele foi ma tau manava, ma te olioli lava i le lalolagi matagofie o loo siomia ai i tatou ma auai foi i se talanoaga fiafia. E seasea lava ona ma gauai tele atu i le tausisia o le ma paleni i luga o a ma uila vilivae. Ua leva ona ma tietie lea ma te le mafaufau ai i lena mea—ua avea ma se mea masani ma meafua ia i ma‘ua.

Ae soo se taimi lava ou te matamata ai i se tasi o aoao e tietie i se uila mo le taimi muamua, e faamanatu mai ia te au e le faigofie ona faapaleniina oe lava i luga o na uili mimiti e lua. E manaomia ai le taimi. E manaomia ai le faataitai. E manaomia ai le onosai. E manaomia ai foi le pa’ū i lalo faatasi pe faalua foi.

O le mea sili o mea uma, o i latou o e faamanuiaina i le faapaleniina i luga o se uila vilivae e aoaoina nei motugaafa taua:

Aua le tilotilo i ou vae.

Vaai i luma.

Ia taulai atu ou mata i le auala i ou luma. Taulai atu i lou taunuuga. Ma vili pea le uila. O le tumau o le paleni e faatatau uma lava i le agai i luma.

E faapena foi mataupu faavae e faaaoga pe a oo i le sailia o le paleni i o tatou olaga i le avea ai o ni soo o Iesu Keriso. O le auala e tufatufa atu ai lou taimi ma le malosi i le tele o au galuega taua o le a eseese mai lea tagata i lea tagata ma mai lea vaitau i lea vaitau o le olaga. Ae o lo tatou faamoemoega masani atoa, o le mulimuli lea i le Ala a lo tatou Matai, o Iesu Keriso, ma toe foi atu i le afioaga o lo tatou Tama pele o i le Lagi. O lenei faamoemoega e tatau ona tumau ma faifai pea, po o ai lava i tatou ma po o a lava isi mea o tutupu i o tatou olaga.³

Ia, mo i latou o e o ni tagata tietie uila vilivae naunautai, o le faatusatusaina o le avea ma soo i le tietie i se uila atonu o se talafaatusa aoga. Mo i latou e le tietie uila, ia aua le popole. E i ai se isi a’u talafaatusa ou te mautinoa, o le a mafai e alii, tamaitai, ma tamaiti uma ona fesootai i ai.

O le avea ma soo, e pei o le tele o mea i le olaga, e mafai foi ona faatusatusa i le lele o se vaalele.

Pe ua e tu ea ma mafaufau i le ofoofogia o le mafai e se vaalele la’u pasese lapo’a ona aluese moni mai le eleele ma lele ai? O le a le mea e faatumauina le felelei o nei masini saoasaoa ma faafiafiaina i le lagi, ma sopoia ai vasa ma konetineta?

I se faaupuga faigofie, e faato’a lele se vaalele pe a fesiiolo le ea i luga o ona apaau. O lena gaoioiga e fatuina ai ni eseesega i le malosiaga o le ea lea e măsani ai i luga le vaalele. Ma e faapefea ona lava le ea e pasi i luga o apa’au e mafai ai ona măsani i luga? O le tali o le masau i luma.

E lē măsani i luga le vaalele i le tūtū i luga o le auala vaalele. E oo lava i se aso savili, e le lava le masii i luga sei vagana ua minoi i luma le vaalele, ma lava le masau e tetee atu ai i malosiaga o loo taofia le vaalele i tua.

E pei lava ona faatumauina le paleni ma le sa‘o o le agai i luma o se uila, o le agai i luma e fesoasoani i se vaalele e faatoilalo ai le toso o le kalave ma le malosiaga faatautee.

O le a le uiga o lenei mea mo i tatou o ni soo o Iesu Keriso? O lona uiga afai tatou te mananao e maua le paleni i le olaga, ma afai tatou te mananao i le Faaola e siitia i tatou agai i le lagi, e le mafai la ona faasamasamanoa pe faavaitaimi lo tatou tuuto atu ia te Ia ma Lana talalelei. E pei o le fafine ua oti lana tane i Ierusalema, e tatau ona tatou ofoina atu ia te Ia o tatou agaga atoa. Atonu e itiiti la tatou taulaga, ae e tatau ona sau mai i o tatou loto ma agaga.

O le avea ai ma se soo o Iesu Keriso e le na o se tasi o le tele o mea tatou te faia. O le Faaola o le mana faaosofia i tua atu o mea uma tatou te faia. E le o Ia o se nofoaga e toma i ai i la tatou malaga. E le o ia o se mataaga po o se faailo fanua iloga. O Ia o “le ala, ma le upu moni, ma le ola: e le alu atu lava se tasi i le Tama, pe a le ui mai ia [Iesu Keriso].”⁴ O le Auala lena ma o lo tatou taunuuga mulimuli.

O le paleni ma le masii po o le măsani i luga e oo mai pe a tatou “fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma.”⁵

Ae faapefea le tele o galuega ma tiutetauave ua matua pisi ai o tatou olaga? O le faaaluina o le taimi ma ē pele, alu i le a’oga po o le saunia mo se galuega, faigaluega mo mea e ola ai, tausiga o aiga, auauna atu i le alalafaga—o fea e ofi uma i ai nei mau mea? Ua faamautinoa mai e le Faaola ia i tatou:

“Ua silafia e lo outou Tamā o i le lagi e aoga ia mea uma ia te outou.

“A ia outou muai saili le malo o le Atua ma lana amiotonu, ona faaopoopoina atu lea o ia mea uma ia te outou.”⁶

Ae e le faapea ai la e faigofie lena mea.⁷ E manaomia ai uma le ositaulaga ma le faapaiaga.

E manaomia ai le lafoai ese o nisi mea ae tuu atu le avanoa i isi mea ia tuputupu ae.

O le ositaulaga ma le faapaiaga o ni tulafono faalelagi se lua ua tatou osifeagaiga e usitaia i totonu o le malumalu sa. O nei tulafono e lua e talitutusa ae e le masaga. O le ositaulaga o lona uiga o le lafoai o se mea ina ia faasaoina ai se isi mea e sili atu ona taua. I aso anamua, sa ositaulaga ai e le nuu o le Atua ulumatua o a latou lafu e faamamalu ai le afio mai o le Mesia. I le talafaasolopito atoa, ua ositaulagaina e le Au Paia faamaoni manaoga patino faaletagata, tulaga mafanafana, e oo lava i o latou ola mo le Faaola.

E tofu uma i tatou ma ni mea, tetele ma iti, e manaomia ona tatou ositaulagaina ina ia mulimuli ai ma le atoatoa ia Iesu Keriso.⁸ O a tatou osigataulaga e faaalia ai mea tatou te faatauaina moni lava. O osigataulaga e paia ma faamamaluina e le Alii.⁹

O lefaapaiaga e ese mai le ositaulaga i se auala taua se tasi. Pe a tatou faapaiaina se mea, tatou te le tuua ina ia faaumatiaina i luga o le fatafaitaulaga. Ae, tatou te faaaogaina i le galuega a le Alii. Tatou te faapaiaina ia te Ia mo Ona faamoemoega paia.¹⁰ Tatou te maua taleni ua tuuina mai e le Alii ia i tatou ma tinoū e faateleina, ia lasi, ina ia aoga atili i le fausiaina o le malo o le Alii.¹¹

E toalaiti lava i tatou o le a talosagaina e ositaulaga o tatou ola mo le Faaola. Ae ua valaaulia i tatou uma ina ia faapaiaina o tatou olaga ia te Ia.

Pe a tatou saili e faamama o tatou olaga ma vaai atu ia Keriso i mafaufauga uma,¹² o le a amata ona ogatusa isi mea uma. E le toe lagonaina e le olaga e pei o se lisi umi o ni taumafaiga tuueseese na taofia e le paleni vaivai/lē mautu.

I le aluga o taimi, e avea uma lava ma se galuega e tasi.

Olioli e tasi.

Faamoemoega paia e tasi.

O le galuega o le alofa atu ma le auauna atu i le Atua. O le alofa atu ma le auauna atu lea i fanau a le Atua.¹³

Pe a tatou vaai i o tatou olaga ma vaai i le selau o mea e fai, tatou te lagonaina le lofituina. Pe a tatou vaai i se mea se tasi—alofa ma auauna atu i le Atua ma Ana fanau, i ni auala eseese se selau—ona mafai lea ona tatou galulue i na mea ma le olioli.

O le auala lenei tatou te tuu atu ai o tatou agaga atoa—e ala i le ositaulagaina o soo se mea o loo taofiofia i tatou i tua ma faapaiaina isi mea uma o totoe i le Alii ma Ona faamoemoega.

O‘u uso e ma tuafafine pele ma a’u uo pele, o le a i ai taimi e te moomoo ai maimau pe ana mafai ona outou faia nisi mea se tele atu. E silafia e lou Tama o i le Lagi alofa lou loto. Na te silafia e le mafai ona e faia mea uma e manao lou loto e fai. Ae e mafai ona e alofa ma auauna atu i le Atua. E mafai ona e faia le mea sili e tausi ai Ana poloaiga. E mafai ona e alofa ma auauna atu i Ana fanau. Ma o au taumafaiga o loo faamamaina ai lou loto ma saunia ai oe mo se lumanai mamalu.

O le mea lea na foliga mai na malamalama i ai le fafine ua oti lana tane i le mea e teu ai tupe i le malumalu. Sa ia iloa moni lava o lana taulaga o le a le suia ai le tamaoaiga o Isaraelu, ae e mafai ona suia ai o ia—aua, e ui e laitiiti, ae o mea uma ia sa ia te ia.

O lea, a‘u uo pele ma soo pele o Iesu Keriso, ’aua ne’i o tatou “faavaivai i le faia o mea lelei,” aua o loo [tatou] faataatiaina le faavae o se galuega tele.” Ma o mea iti tatou te faia o le a tutupu mai ai “mea tetele.”¹⁴

Ou te molimau atu e moni lenei mea, e pei fou ona ou molimau atu o Iesu Keriso o lo tatou Matai, o lo tatou Togiola, ma e na o le pau lea o lo tatou Ala e tasi e toe foi atu ai i lo tatou Tama pele o i le Lagi. I le suafa paia o Iesu Keriso, amene.