Savali Tomua

O’u tuafafine pele, a o tatou amatalia ai lenei sauniga mo tamaitai e le masani ai o le konafesi aoao, ou te fiafia lava e tuuina atu lenei savali tomua mai le Au Peresitene Sili.

O a tatou sauniga i Aso Toonai e i ai se talafaasolopito o faamoemoega eseese ma ni aofia eseese. O lenei afiafi tatou te faaopoopo atu i lena talafaasolopito a o tatou amataina se faamoemoega fou ma se faagasologa mo le lumanai ua muai vaaia. E le suia le talalelei a Iesu Keriso. E le suia aoaoga faavae o le talalelei. E le suia a tatou feagaiga faaletagata lava ia. Ae i le aluga o tausaga, o sauniga tatou te faia e fesootai atu ai a matou savali e sui ma e foliga mai o le a faaauau pea ona suia i le gasologa o tausaga.

Mo le taimi nei, o lenei sauniga o le afiafi o le Aso Toonai o se sauniga o le konafesi aoao, e le o se sauniga a soo se faalapotopotoga. E pei o sauniga uma o le konafesi aoao, o le fuafuaina, o failauga, ma musika e tofia e le Au Peresitene Sili.

Ua matou talosagaina Peresitene Jean B. Bingham, o le Peresitene Aoao o le Aualofa, na te taitaia lenei sauniga. O sauniga o le afiafi o le Aso Toonai i le lumanai e mafai ona taitaia e se tasi o isi Taitai Aoao o le Ekalesia, e pei o sui o Au Peresitene Aoao o le Aualofa, Tamaitai Talavou, ma le Peraimeri, e tofia e le Au Peresitene Sili.

O le po nei, o lenei sauniga o le afiafi o le Aso Toonai o le konafesi aoao o le a taulai atu i atugaluga o tamaitai o le Au Paia o Aso e Gata Ai. O le a aofia ai le aoaoga faavae O Le Ekalesia a Iesu Keriso o le Au Paia o Aso e Gata Ai, o aiaiga faavae o le Ekalesia e fesootai patino ma tamaitai, atoa ai ma tiutetauave aoao ma le galuega a faalapotopotoga o loo aofia ai tamaitai ma teineiti o le Ekalesia. E ui ua faamoemoeina le faasalalauga i se aofia i le lalolagi atoa e pei o sauniga uma o le konafesi aoao, ae o le aofia na valaaulia ia auai i le Nofoaga Autu mo Konafesi mo lenei sauniga, o tamaitai ma teineiti o le vaitausaga 12 ma matutua atu. Ua matou faaaofia ai ma nisi o taitai perisitua o e o loo pulefaamalumalu i faalapotopotoga o loo auai.

O le mea ua matou amataina iinei o se tali atu lea i punaoa o fesootaiga o loo maua i le taimi nei mo au taitai ma tagata o le Ekalesia a le Alii i le lalolagi atoa. O le aoaoga faavae o le talalelei a Iesu Keriso e mo tagata uma lava, o lo tatou faamoemoega autu la lena atoa ai ma le faamoemoega ia faasalalau atu lenei savali i tagata uma. Tatou te faamamaluina afafine o le Atua i lenei sauniga faapitoa e ala i le gauai atu i o latou atugaluga ma atugaluga o a latou faalapotopotoga.

Matou te faafetai i faasalalauga faatekinolosi ua maua ai nei e taitai o le Ekalesia le gafatia e faatautaia ai aoaoga anoa e ala i le talanoa atu i aofia patino o loo maimoa mai nofoaga maotua. Matou te talisapaia foi le mea moni faapea ua faateleina avanoa mo femalagaaiga i le taimi nei. Ua mafai ai ona faatagaina i matou e auina atu taitai o le Ekalesia e faatautaia ia aoaoga masani faaleautaitai faafesagai ua manaomia mo nofoaga maotua.

O le galuega lenei a le Alii o Iesu Keriso. O i tatou o Ana auauna, e taitaia e Lona Agaga Paia. Matou te talosagaina faamanuiaga a lo tatou Alii i luga o taitai o nei faalapotopotoga ma luga o tamaitai ma teineiti ​​faamaoni o e auauna atu i le Alii i nei faalapotopotoga ma i o latou olaga taitoatasi. I le suafa o Iesu Keriso, amene.