O Le Taimi Lenei
O le taimi nei o le taimi lea tatou te aoao ai. O le taimi nei o le taimi lea tatou te salamo ai. O le taimi nei o le taimi lea tatou te salamo ai.
O’u uso e ma tuafafine pele, o lenei konafesi ua logologoā i le tele o auala. Ua faamanuia lava i tatou i tatalo, savali, ma musika. Ua musuia i tatou e auauna a le Alii.
Ua tatou maua le taitaiga taua mo le lumanai. O la’u tatalo ia fetalai tuusao atu le Agaga ia te oe e uiga i mea e finagalo le Alii e te faia.
E le mautinoa i taimi uma le lumanai. E suia le tau. O taamilosaga faaletamaoaiga e taumatemate. O mala, faalavelave faafuasei, ma faama’i e mafai ona suia vave ai le olaga. O nei gaoioiga e matua le mafai ona tatou puleaina. Ae e i ai nisi mea e mafai ona tatou puleaina, e aofia ai le auala tatou te faaalu ai o tatou taimi i aso taitasi.
Ou te fiafia i le solo lenei a Henry Van Dyke, sa tuu i luga o se faailotaimi (sundial) i le Kolisi o Wells i Niu Ioka. E faitauina:
O le atalafoia o lo’u tamailima
Ua vaeluaina ai le lumanai mai le tuanai:
O luma atu, o loo moe ai le itula e le’i oo mai
I le pogisa, o lou malosi e le oo i ai:
I tua atu o lana laina lafoia,
O le itula ua mou atu, e te le toe gafatia:
Tasi lava le itula ua i ai i ou lima,—
O le TAIMI NEI lea ua tu ai le atalafoia.1
Ioe, e tatau ona aoao mai le tuanai, ma ioe, e tatau ona saunia mo le lumanai. Ae ua na o le taimi nei e mafai ona tatou faia. O le taimi nei o le taimi lea tatou te aoao ai. O le taimi nei o le taimi lea tatou te salamo ai. O le taimi nei o le taimi lea tatou te faamanuia atu ai i isi ma “sii i luga lima o tautau i lalo.”2 E pei ona apoapoai atu Mamona i lona atalii o Moronae, “Ia [tatou] galulue pea ma le filiga; … ona ua i ai sa [tatou] galuega e fai a o … i ai i lenei fale apitaga omea, ina ia [tatou] faatoilaloina le fili o le amiotonu uma, ma malolo ai o [tatou] agaga i le malo o le Atua.”3
E le moe lava le fili. O le a i ai pea le faafeagai o le upumoni. Ou te toe ta’u atu la’u auganiga mai lenei taeao ia faia mea na o le a faateleina ai lou malosiaga lelei faaleagaga, lena masii lea na talanoa i ai Elder Dieter F. Uchtdorf, lea o le a faatumauina ai lou agai i luma i soo se luitau ma avanoa e oo mai.
E faateleina le malosiaga lelei faaleagaga pe a tatou tapuai i totonu o le malumalu ma tuputupu ae i lo tatou malamalamaaga o le lautele ma le loloto ofoofogia o faamanuiaga tatou te maua iina. Ou te augani atu ia te outou ia faatoilaloina ala faalelalolagi e ala i le taulai atu i faamanuiaga e faavavau o le malumalu. O lou taimi iina e aumaia ai faamanuiaga mo le faavavau.
A o tuputupu a‘e le Ekalesia, tatou te taumafai e o gatasi i le fausia o le tele o malumalu. E fasefulu-fa malumalu fou o loo fausiaina nei. E tele isi o loo faafouina. Ou te tatalo mo tagata atamamai o loo galulue i na galuega faatino i le salafa o le lalolagi.
I le agaga o le lotofaafetai ma le agaga tatalo, ou te fiafia lava e faasilasila atu a matou fuafuaga e fausia se malumalu fou i nofoaga taitasi nei: Ueligitone, Niu Sila; Brazzaville, Ripapelika o Congo; Barcelona, Sepania; Birmingham, United Kingdom; Cusco, Peru; Maceió, Pasila; Santos, Pasila; San Lui Potosí, Mekisiko; Aai o Mekisiko Benemérito, Mekisiko; Tampa, Florida; Knoxville, Tennessee; Cleveland, Ohaio; Wichita, Kansas; Austin, Texas; Missoula, Monatana; Montpelier, Idaho; ma Modesto, Kalefonia.
O nei malumalu e 17 o le a faamanuiaina ai olaga e le mafaitaulia i itu uma e lua o le veli. Ou te alofa ia te outou, o’u uso e ma tuafafine pele. O le mea e sili ona taua, e alofa le Alii ia te oe. O Ia o lou Faaola ma lou Togiola. O loo Ia taitaia ma taialaina Lana Ekalesia. Tau ina ia avea i tatou ma se nuu e agavaa mo le Alii, o le na fetalai mai “E fai foi outou mo’u nuu, e fai foi a’u mo outou Atua.”4
Ou te tatalo ai i nei mea, i le suafa paia o Iesu Keriso, amene.