O Se Liua Tele o le Loto:

I le Aso Faraile, 28 Oketopa, 1588, o le gau ai o le foeuli, ma ua toe ai o foe e taualo ai, sa feto’ai ai le vaa o le La Girona, e anaina e le great Spanish Armada, ma ni papa o le Tolotolo o Lacada i Aialani i Matu.¹

Na sa’e le vaa. O se tasi o le au faaopeopea na tauivi ia ola, sa fai sana mama auro na avatu ia te ia i ni nai masina na muamua atu, e lona toalua o loo vane ai se faaupuga, “E leai se isi mea o totoe ou te avatu ia te oe.”²

“E leai se isi mea o totoe ou te avatu ia te oe”—o se fasifuaitau ma se mama o i ai le mamanu o se lima o umia se fatu, o se faailoaga o le alofa mai se ava i lana tane.

Ina ua ou faitaua lenei tala, sa faia ai se uunaiga loloto ia te a’u, ma sa ou mafaufau ai i le talosaga na faia e le Faaola: “Ma ia outou osi mai mo se taulaga ia te au le loto momomo ma le agaga salamo.”³

Sa ou mafaufau foi i le tali atu a tagata i upu a le Tupu o Peniamina: “Ioe, ua matou talitonu i upu uma na e saunoa mai ai ia te i matou …, lea ua ia faia se liuga tele i totonu o i matou, po o i totonu o o matou loto, ua lē toe i ai so matou manao e fai mea leaga, ae ia faia mea lelei e lē aunoa.”⁴

Sei ou faasoa atu ia te outou se aafiaga na ou oo i ai ina ua 12 ou tausaga, o le aafiaga e oo mai i lenei aso.

Sa fai mai lo‘u tina, “Eduardo, topetope. Ua tatou tuai mo sauniga Lotu.”

“Mama, o le a ma nonofo ma tamā i le asō,” sa ou tali atu ai.

“E te mo’i? E tatau ona e alu i le sauniga a lau korama perisitua,” sa ia fai mai ai.

Sa ou tali atu, “Talofa e ia Tamā! O le a tuua na o ia. O le a ma nonofo nei.”

O tamā e le o se tagata o Le Ekalesia a Iesu Keriso o le Au Paia o Aso e Gata Ai.

Sa o lo’u tina ma o’u tuafafine i sauniga o le Aso Sa. O lea, sa ou alu ai e feiloai ma Tamā i lona falefaigaluega, lea e fiafia e i ai i Aso Sa, ma e pei ona sa ou ta’u atu i lo’u tina, sa ou nofo ai mo sina taimi, o lona uiga, o ni nai minute ma ia, ona ou fesili lea, “Tamā, o lelei mea uma?”

Sa faaauau pea le mea sa fiafia i ai o le faaleleia o leitio ma uati, ma sa na ona ia ataata mai ia te a’u.

Ona ou fai atu lea i ai, “O le a ou alu e taaalo ma a’u uo.”

Sa fai mai Tamā e aunoa ma le tilotilo mai ia te a’u, “O le asō o le Aso Sa. Pe le’i tatau ona e alu i le lotu?”

“Ioe, o le asō na ou fai ai ia Tina, o le a ou le alu,” sa ou tali atu ai. Sa punouai pea Tamā i lana galuega, ma ia te a’u, o se faatagaga lena ou te alu.

O le taeao lena, sa i ai se taaloga soka taua, ma sa fai mai a’u uo ia te a’u, e le tatau ona ou misia, ma e tatau ona matou malo i lena taaloga.

O la’u lu’i o le pasi atu lea i luma o le falesa ina ia ou o’o ai i le malae soka.

I le naunauta’i ai, sa ou faataalise agai atu i le malae soka ma tu a o lei oo i le maagao tele, le falesa. Sa ou tamoe i le alasavali i le isi itu, sa i ai ni nai laau tetele, ma sa tonu ia te a’u ou te tamoe i le va, ina ia aua nei iloa mai a’u e se tasi ona o le taimi lea e taunuu ai tagata o le au paia i sauniga.

Sa ou taunuu i le taimi tonu lava mo le amataga o le taaloga. Sa mafai ona ou taalo ma alu i le fale ae lei taunuu lo‘u tina i le fale.

Sa gasolo lelei mea uma; na manumalo le matou ‘au, ma sa ou matua fiafia lava. Ae o lena tamo’e na lelei ona fuafua i le malae, e le’i misi i le vaai a le fautua o le korama a tiakono.

Sa iloa mai a’u e Uso Félix Espinoza o o’u tamoe vave mai lea laau i lea laau, i le taumafai ai ia ‘aua nei iloa mai.

I le amataga o le vaiaso, sa sau ai Uso Espinoza i lo’u fale ma talosaga ma te talanoa. E leai sana tala e uiga i le mea sa ia vaaia i le Aso Sa, e le’i fesili mai foi pe aisea na ou misia ai le lotu.

Sa na o lona tuuina mai ia te au o se tusi lesona ma fai mai, “Ou te manao e te faiaoga i le vasega perisitua i le Aso Sa. Ua uma ona ou makaina le lesona mo oe. E le faigata tele. Ou te manao e te faitauina, ma o le a ou sau i le isi lua aso e fesoasoani ia te oe i le tapenaga o le lesona. Ina ua uma ona fai mai i lea mea, sa ia tuuina mai le tusi lesona ma alu loa.

Ou te lei manao e faiaoga i le vasega, ae sa le mafai foi ona ou ta’u atu ia te ia e leai. Sa ou fuafua mo lena Aso Sa, e ma te toe nonofo ma lo’u tamā—o lona uiga, sa i ai se isi taaloga soka taua.

O Uso Espinoza o se tagata sa faamemelo i ai tagata talavou.⁵ Sa ia mauaina le talalelei toefuataiina ma suia ai lona olaga pe, i se isi faaupuga, o lona loto.

Ina ua oo mai le aoauli o le Aso Toonai, sa ou mafaufau, “Ia, atonu o taeao o le a ou ala mai ai ua ou ma’i, ma o le a ou lē alu ai i le lotu.” Ua ou le o toe popole i le taaloga soka; ae o le vasega sa tatau ona ou faiaoga ai, aemaise o se lesona e uiga i le aso Sapati.

Na oo mai le Aso Sa, ma sa ou ala a’e ua sili atu lo’u malosi nai lo se isi taimi. Sa leai so’u ‘alofaga—leai se mea e sola i ai.

O le taimi muamua lea o le a ou aoao atu ai se lesona, ae sa i ai Uso Espinoza iina i o’u autafa, ma o le aso lena o se suiga tele o le loto mo a’u.

Mai lava i lena taimi, sa amata ona ou tausia le paia o le aso Sapati, ma e tele taimi, i upu a Peresitene Nelson, na avea ai le aso Sapati o se fiafiaga.⁶

“Le Alii e, ua ou avatu ia te Oe mea uma; e leai se isi mea o totoe ou te avatu ia te Oe.”

E faapefea ona tatou maua lena suiga tele o le loto? E amatalia ma e i’u lava ina tupu

1. pe a tatou suesue i tusitusiga paia ia maua le malamalama lea o le a faamalolosia ai lo tatou faatuatua ia Iesu Keriso, lea o le a amatalia ai se manao e suia.⁷

2. pe a tatou atia’e lena manao e ala i le tatalo ma le anapogi.⁸

3. pe a tatou faatinoina, e tusa ai ma le upu na suesueina pe mauaina, ma tatou osia se feagaiga e tuuina atu o tatou loto ia te Ia, e faapei lava o le nuu o le Tupu o Peniamina.⁹

E faapefea ona tatou iloa ua suia o tatou loto?¹⁰

1. Pe a tatou mananao e faamalie le Atua i mea uma.¹¹

2. Pe a tatou taulimaina isi ma le alofa, faaaloalo, ma faitaulia.¹²

3. Pe a tatou vaaia ua avea uiga paia o Keriso o se vaega o o tatou tagata.¹³

4. Pe a tatou lagonaina pea lava pea le taitaiga a le Agaga Paia.¹⁴

5. Pe a tatou tausia se poloaiga sa faigata ona tatou usita’ia, ona faaauau ai lea ona ola ai.¹⁵

Pe a tatou faalogo ma le toto’a i fautuaga a o tatou ta’ita’i ma filifili ma le fiafia e mulimuli ai, pe ua tatou le iloa ai ea se suiga tele o le loto?

“Le Alii e, ua ou avatu ia te Oe mea uma; e leai se isi mea o totoe ou te avatu ia te Oe.”

E faapefea ona tatou tausisia le suiga tele?

1. Pe a tatou aai ai ma feinu i le faamanatuga i vaiaso taitasi ma faafou le feagaiga o le tauaveina i o tatou luga le suafa o Keriso, ia manatua pea o Ia, ma tausi i Ana poloaiga.¹⁶

2. Pe a tatou liliu atu o tatou olaga agai i le malumalu.¹⁷ O le auai e le aunoa i le malumalu o le a fesoasoani tatou te tausisia ai se loto fou ma toe faafou a o tatou auai i le faatinoina o sauniga.

3. Pe a tatou alolofa ma auauna atu i o tatou tuaoi e ala i gaoioiga o auaunaga ma le galuega faafaifeautalai.¹⁸

Ona oo mai lea lo tatou olioli sili, lena suiga i totonu ua faamalosia ma faasalalauina seia i’u ina faula’i galuega lelei.¹⁹

O lea suiga tele o le loto tatou te maua ai le lagona o le saolotoga, faatuatuaina, ma le filemu.²⁰

O lea suiga o le loto e le o se mea e tupu; e manaomia ai le faatuatua, salamo, ma galuega faaleagaga faifai pea ia tupu. E amata pe a tatou mananao e tuuina atu o tatou loto i le Alii, ma e tupu le suiga o le loto pe a tatou ulu atu i feagaiga ma Ia ma tausia.

O lena faatinoga e tasi ua i ai se aafiaga lelei ia i tatou ma tagata o siomia ai i tatou.

I upu a Peresitene Russell M. Nelson, “O le a vave ona fo’ia fetaua’iga faatauma’oi i le lalolagi atoa—ma feteenaiga i o tatou olaga patino—pe afai tatou te filifili uma e mulimuli ia Iesu Keriso ma gaua’i atu i Ana a’oa’oga.”²¹ O lenei faatinoga o le mulimuli i aoaoga a le Faaola e taitai atu ai i se suiga tele o le loto.

Uso e ma tuafafine pele, le autalavou, ma fanau, a o tatou auai i le konafesi i le faaiuga o lenei vaiaso, ia faaulufale i o tatou loto ia upu a o tatou perofeta, ia o le a aumai mai le Alii, ia tatou iloa ai se suiga tele.

Mo i latou e lei auai lava i le Ekalesia toefuataiina a le Alii, ou te valaaulia outou ia faafofoga i faifeautalai ma se loto naunau moni ia iloa ai le mea o faamoemoeina e le Atua mai ia te oe, ma ia iloa ai lena suiga i totonu.²²

O le aso lenei e filifili ai e mulimuli i le Alii o Iesu Keriso. “Le Alii e, ua ou avatu ia te Oe lo’u loto; e leai se isi mea o totoe ou te avatu ia te Oe.”

E pei lava ona toe maua mai le mama mai lena vaa na masofa, pe a tatou tuu atu o tatou loto i le Atua, e laveaiina i tatou mai ogasami matamataita o lenei olaga, ma i le faagasologa, e faaatoatoaina ma faamamaina i tatou e ala i le Togiola a Keriso ma avea ai o “fanau a Keriso” ua “fanauina [faaleagaga] ia te Ia.”²³ Ou te molimau atu ai i nei mea, i le suafa o Iesu Keriso, amene.