Mausali i Taimi Faigata

O’u uso e ma tuafafine pele, ua faamanuiaina i tatou i lenei aso e faalogologo i auauna musuia a le Atua o tuuina mai fautuaga ma faamalosiauga. O i tatou taitoatasi, po o fea lava o tatou i ai, ua iloaina ua tatou ola i taimi ua faateteleina le faigata. O la’u tatalo ia mafai ona ou fesoasoani ia te oe e tu mausali ai i taimi faigata ua tatou feagai ai, ma se loto filemu.¹

O le nofoaga e amata ai o le manatuaina lea o i tatou taitoatasi o se atalii ma se afafine faapelepele o le Atua ma e i ai Ana auauna musuia. O na auauna a le Atua ua muai vaaia taimi ua tatou ola ai nei. Sa tusi atu le Aposetolo o Paulo ia Timoteo, “A e ia e iloa e oe lenei mea, o ona aso e gata ai e oo mai ai aso faigata.”²

Soo se tasi o i ai mata e vaai ai i faailoga o taimi ma taliga e faalogo ai i upu a perofeta e iloaina e moni lena mea. O mea lamatia silisili ona matautia ua oo mai ia i tatou mai malosiaga o le amioleaga. O na malosiaga o loo faateteleina. Ma o lea o le a faasolo faigata atili, e le faigofie, le faamamaluina o feagaiga e tatau ona tatou osia ma tausia ia ola i le talalelei a Iesu Keriso.

Mo i tatou o loo popole mo i tatou lava ma mo i latou tatou te alolofa i ai, o loo i ai se faamoemoe i le folafolaga na faia e le Atua e uiga i se nofoaga o le saogalemu i taimi faigata o loo i luma atu.

O se ata lenei o faaupuga o lena nofoaga. Ua faamatalaina soo e perofeta soifua. Mo se faataitaiga, e pei ona tusia i le Tusi a Mamona, sa ta’u atu e se tama musuia ma alofa i ona atalii le ala e faamalosia ai i latou lava e tutu mausali i afa o i latou luma: “Ma o lenei, ou atalii e, ia manatua, ia manatua o luga lava o le papa o lo tatou Togiola, o le o Keriso lea, le Alo o le Atua, e ao ina oulua atinae ai lo oulua faavae; ina ia pe a auina mai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua ana uatoa uma ma lana afa malosi, o le a leai sona mana i luga o oulua e tofo ifo ai oulua i lalo i le to o le pagatia ma le malaia e le gata, ona o le papa lea ua oulua atinae ai i luga, o le faavae mautinoa lea, o se faavae lea afai e atiae ai tagata e le mafai lava ona pauu i latou.”³

O le pagatia ma le malaia e le gata sa ia saunoa ai, o aafiaga matautia ia o le agasala pe afai tatou te lē salamo atoatoa mai ai. O matagi faatupulaia, o faaosoosoga ia ma osofaiga faateteleina a Satani. E leai lava se isi taimi ua sili ona taua ai le malamalama i le auala e atiae ai i luga o lena faavae mautinoa nai lo le taimi nei. Mo a’u, e leai se isi nofoaga sili atu e saili i ai nai lo le lauga mulimuli a le Tupu o Peniamina, o loo tusia foi i le Tusi a Mamona.

O upu faaperofeta a le Tupu o Peniamina ua faatatau foi ia i tatou i o tatou aso. Sa ia iloa mai i ona lava aafiaga le faataumaoi o taua. Sa ia puipuia lona nuu i fetauaiga, e faalagolago i le mana o le Atua. Sa ia vaai ma le manino i mana matautia o Lusifelo e faaosooso, e taumafai e faatoilalo, ma ia faalotovaivai fanau a le Atua.

Sa ia valaaulia lona nuu ma i tatou ia atiae i luga o le papa mautinoa e tasi o le saogalemu, o le Faaola lea. Sa ia faamanino mai e faapea tatou te saoloto e filifili i le va o le sa’o ma le sese ma e le mafai ona tatou alofia taunuuga o a tatou filifiliga. Sa ia saunoa tuusao mai ma ma’oti ona sa ia iloa le faanoanoa o le a oo mai ia i latou o ē le faalogo ma usitai i ana lapataiga.

O le auala lenei sa ia faamatalaina ai taunuuga e mulimuli mai i a tatou filifiliga pe mulimuli i uunaiga a le Agaga pe mulimuli i savali faatiapolo e sau mai ia Satani, o lona faamoemoega o le faaosooso lea ma faaumatia i tatou.

“Aua faauta, e i ai se mala ua folafola i luga o ia o lē e filifili e usiusitai i lena agaga [leaga]; ona afai e filifili o ia e usiusitai ia te ia, ma tumau ai ma oti i ana agasala, o ia lava lea e inu i le malaia o lona lava agaga ona e maua e ia mo ona taui se faasalaga e faavavau, ona sa soli e ia le tulafono a le Atua e lē tusa ai ma lona lava malamalama. …

“O lea afai e lē salamo lena tagata, ae tumau ma oti o se fili i le Atua, o le a fagua e manaoga o le faamasinotonu paia lona agaga ola pea i se lagona olaola o lona lava sala, lea o le a maʼeʼe ai o ia mai luma o le Alii, ma tumu ai lona fatafata i le lagona o ana sese, ma le tiga, ma le mafatia, lea ua pei o se afi lē matineia, o lona apeafi mumū e alu aʼe pea i luga e faavavau ma faavavau lava.”

Sa faaauau le saunoaga a le Tupu o Peniamina: “E, outou e toeaina matutua uma, ma outou foi alii talavou, ma outou fanau laiti o e ua mafai ona malamalama i aʼu upu, ona ua ou tautala manino atu ia te outou ina ia mafai ona outou malamalama, ou te tatalo ia outou ala mai i le manatuaina o le tulaga leaga tele o i latou o e e pauu atu i le solitulafono.”⁴

Mo a’u, o le mana o lena lapataiga ia salamo ua fatu ai i lo’u mafaufau se ata o le taimi mautinoa pe a e tu ma ou tu ai i luma o le Faaola pe a mavae lenei olaga. Tatou te mananao faatasi ma o tatou loto atoa ia le faamimigi ae ia tepa a’e i luga ia te Ia, vaaia Lona ataata mai, ma faalogo atu o Ia fetalai mai, “Le auauna lelei e, ma le faamaoni: … ulufale [maia].”⁵

Ua faamanino mai e le Tupu o Peniamina le auala e mafai ona tatou maua ai le faamoemoe e faalogo atu ai i na upu pe afai tatou te maua le ala i lenei olaga e suia ai o tatou natura e ala i le Togiola a Iesu Keriso. Ua na o le pau lena o le ala e mafai ai ona tatou atiae i luga o le faavae mautinoa ma ia tu mausali ai i taimi o afa o faaosoosoga ma tofotofoga o loo i luma atu. Ua faamatala e le Tupu o Peniamina lena suiga i o tatou natura faatasi i se talafaatusa matagofie ua ootia ai pea lo’u loto. Sa faaaogaina e perofeta mo le fia afe tausaga faapea ai ma le Alii lava Ia. O lenei: e tatau ona tatou avea faapei o se tamaitiiti—tamaitiiti lava.

Mo nisi, o le a le faigofie ona taliaina. O le toatele o i tatou e fia malolosi. Atonu tatou te vaai lelei atu o le avea faapei o se tamaitiiti o le vaivai lea. O le toatele o matua e faatalitali mo le aso o le a faaitiitia ai le amio faatamaitiiti o latou fanau. Ae sa malamalama le Tupu o Peniamina faapea ai ma soo se tagata soifua lava i le uiga o le avea ma se tagata o le malosiaga ma le lototele, ma faamanino mai e faapea o le avea faapei o se tamaitiiti e le o le faatamaitiiti lea. O le avea lea faapei o le Faaola, o le sa tatalo i Lona Tama mo le malosi ia mafai ai ona faia le finagalo o Lona Tama ma togiola mo agasala a fanau uma a Lona Tama ona faia ai lea. E tatau ona suia o tatou natura ia avea ai faapei o se tamaitiiti e maua ai le malosi e tatau ona tatou maua e tu mausali ai ma i le filemu i taimi o faigata.

O le faamatalaga faaosofia lenei a le Tupu o Peniamina e uiga i le auala e oo mai ai lena suiga: “Ona o le tagata natura o se fili i le Atua, ma sa faapea lava mai le paʼū o Atamu, ma o le a faapea lava, e faavavau faavavau lava, vagana ai ua gauaʼi atu o ia i uunaiga a le Agaga Paia, ma tuu ese le tagata natura ma avea ma tagata paia e ala i le togiola a Keriso le Alii, ma avea e pei o se tamaitiiti, e usiusitai, agamalu, lotomaualalo, onosai, ma tumu i le alofa, loto ina usitai uma ua silafia e le Alii e tatau ona faaoo mai i ona luga, e pei ona usitai atu se tamaitiiti i lona tamā.”⁶

Tatou te mauaina lena suiga pe a tatou osia ma faafouina feagaiga ma le Atua. E aumaia e lena mea le mana o le Togiola a Keriso e faatagaina ai le suiga i o tatou loto. E mafai ona tatou lagonaina i taimi uma tatou te aai ma feinu ai i le faamanatuga, faatino se sauniga o le malumalu mo se tuaa ua maliu, tautino atu e avea ma se molimau a le Faaola, pe tausia se tasi o mafatia i le avea ai ma se soo o Keriso.

I na aafiaga, tatou te avea ai i le gasologa o le taimi ma se tamaitiiti i lo tatou gafatia e alofa ma usitai ai. Tatou te omai ai e tutu i luga o le faavae mautinoa. O lo tatou faatuatua ia Iesu Keriso e aumaia ai i tatou i le salamo ma le tausiga o Ana poloaiga. Tatou te usiusitai, ma tatou maua le mana e tetee atu ai i faaosoosoga, ma tatou maua le mafutaga folafolaina a le Agaga Paia.

E suia o tatou natura ia avea ai faapei o se tamaitiiti, e usitai i le Atua ma alofa atili. O lena suiga o le a tatou agavaa ai e olioli i meaalofa e auala mai i le Agaga Paia. O le mauaina o le mafutaga a le Agaga o le a faamafanafana, taiala, ma faamalosia ai i tatou.

Ua ou iloa nisi o uiga o le saunoaga a le Tupu o Peniamina ina ua ia saunoa e mafai ona avea i tatou e faapei o se tamaitiiti i luma o le Atua. Ua ou aoaoina mai aafiaga e tele faapea e fetalai soo mai le Agaga Paia i se leo filemu, tele ina faigofie ona lagonaina pe a agamalu ma usiusitai le loto o se tasi, e pei o se tamaitiiti. O le mea moni, o le tatalo e aoga o le “Ou te manao i na o mea E Te finagalo i ai. Tau ina tau mai ia te au po o le a lena mea. O le a ou faia.”

Pe a oo mai matagi o le olaga, e mafai ona e mausali ona o loo e tu i luga o le papa o lou faatuatua ia Iesu Keriso. O lena faatuatua o le a taitai atu ai oe i le salamo i aso taitasi ma le tausiga faifai pea o feagaiga. Ona e manatua ai lea o Ia e le aunoa. Ma e ui i matagi o le feitagai ma le amioleaga, o le a e lagona lava le mausali ma le faamoemoe.

E sili atu i lo lena, o le a e mauaina oe lava o aapa atu e siitia isi i le saogalemu i luga o le papa faatasi ma oe. O le faatuatua ia Iesu Keriso e taitai atu e le aunoa i le faamoemoe sili atu ma i lagona o le alofa mama i isi, o lona uiga o le alofa moni o Keriso.

Ou te tuuina atu ia te outou la’u molimau paia ua tuuina atu e le Alii o Iesu Keriso ia te outou le valaaulia “O mai ia te au.”⁷ Ua Ia valaaulia outou, ona o le alofa mo outou ma mo i latou tou te alolofa i ai, ia o mai ia te Ia mo le filemu i lenei olaga ma le ola e faavavau i le lalolagi a sau. Ua Ia silafia atoatoa matagi o loo e feagai ai i ou tofotofoga o se vaega o le fuafuaga o le fiafia.

Ou te augani atu ia te outou ia talia le valaaulia a le Faaola. E pei o se tamaitiiti agamalu ma alofa, talia Lana fesoasoani. Osia ma tausia feagaiga ua Ia ofo maia i Le Ekalesia a Iesu Keriso o le Au Paia o Aso e Gata Ai. O le a latou faamalosia ai oe. Ua silafia e le Faaola matagi ma nofoaga o le saogalemu i luga o le ala e foi atu ai i le aiga ia te Ia ma i lo tatou Tama Faalelagi. Na te silafia le ala. O Ia o le Ala. O lea ou te molimau atu ai i le suafa paia o Iesu Keriso, amene.