O Lo Tatou Sootaga ma le Atua

E faapei o Iopu i le Feagaiga Tuai, i se taimi o puapuaga atonu na manatu nisi ua tuulafoaiina i latou e le Atua. Talu ai ua tatou iloa ua i le Atua le mana e puipuia ai pe aveesea soo se faigata, e ono faaosoosoina i tatou e muimui pe afai Na Te le faia, atonu e tuufesili, “Afai e le aumaia e le Atua le fesoasoani ou te tatalo ai, e mafai la faapefea ona ou faatuatua ia te Ia?” I se tasi taimi i ona tofotofoga o’oo’o, na fai mai ai Iopu amiotonu:

“Ia outou iloa lava o le Atua ua faaliliuina au, ua na siomia foi a’u i lona upega.

“E ui ina ou alaga atu, ‘ua faaleaogaina a’u!” A ua le faafofogaina a’u; ou te uio atu lava, a e leai se faamasinoga.”¹

I Lana tali ia Iopu, na fetalai atu le Atua, “E te faaleaogaina ea la’u lava faatonuga, ina ia e amiotonu?”² Pe i se isi faaupuga, “Pe e te ta’useseina ea a’u? E te ta’usalaina ea au ina ia tonu ai lau faamasinoga?”³ Na faamanatu faamalosi atu e Ieova ia Iopu le i ai ia te Ia o le mana uma ma Lona silafia o mea uma, ma na ta’utino atu ma le lotomaualalo loloto e Iopu e augapiu ma sana mea, e oo lava i sina iloa, mana, ma le amiotonu o le Atua ma e le mafai ona ia tu atu i le faamasinoga a le Silisiliese:

“Ua ou iloa e te mafaia mea uma,” na ia fai atu ai, “ma e le mafai foi ona vaoia se mea e te finagalo i ai.

“… Ua ou tautala atu sa ou le malamalama; o mea ua sili ona faigata ia te au, na ou le iloa lava. …

“O le mea lea ua ou ‘ino’ino ai ia te au, ua ou salamo foi i le efuefu ma le lefulefu.”⁴

I le faaiuga, sa faamanuiaina Iopu e vaai i le Atua, ma “ua sili foi ona faamanuia e Ieova o le gataaga o Iopu i lona amataga.”⁵

O se faavalevalea moni lava mo i tatou i si o tatou malamalama papa’u i la le tino e manatu ai e faamasino le Atua, e mafaufau ai, mo se faataitaiga, “Ua ou le fiafia, o lona uiga atonu e i ai se mea sese ua faia e le Atua.” Ia i tatou, o Ana fanau i le tino i se lalolagi pa’u, ua matua itiiti so tatou iloa i le tuanai, taimi nei, ma le lumanai, ua Ia fetalai, “Ua i ai mea uma i o’u luma, ona ua Ou iloa i latou uma.”⁶ Ua lapatai mai ma le poto ia Iakopo: “Aua tou te saili e fautuaina le Alii, a ia outou talia fautuaga mai lona aao. Aua faauta, ua outou iloa lava ua fautua mai o ia i le poto, ma le faamasinotonu, ma le alofa mutimutivale tele, i luga o ana galuega uma.”⁷

E malamalama sese nisi i folafolaga a le Atua faapea o le usiusitai ia te Ia e fua mai ai ni taunuuga patino i se taimi patino. Latou te ono mafaufau, “Afai ou te auauna atu ma le filiga i se misiona tala’i, o le a faamanuiaina au e le Atua i se faaipoipoga fiafia ma ni fanau” po o le “Afai ou te le faia a’u meaaoga i le Sapati, o le a faamanuiaina au e le Atua i ni togi lelei,” po o le “Afai ou te totogia sefuluai, o le a faamanuiaina au e le Atua i le galuega lea sa ou manao ai.” Afai e le tupu tonu i le ala lea pe tusa ai ma se taimi na faamoemoeina, latou te ono lagonaina le faalataina e le Atua. Ae e le tutupu fua ni mea i auala faalelagi. E le tatau ona tatou mafaufau i le fuafuaga a le Atua o se masini faifaatau faalevateatea tatou te (1) filifili ai se faamanuiaga moomia, (2) tuu i totonu se aofaiga o galuega lelei, ma (3) vave ai loa ona tiliva mai le oka.⁸

O le a faamamaluina lava e le Atua Ana feagaiga ma folafolaga ia i tatou taitoatasi. Tatou te le tau popole i lena mea.⁹ O le mana togiola a Iesu Keriso—o le na afio ifo i lalo o mea uma ona toe afio a’e ai lea i le mea maualuga¹⁰ ma ua umia mana uma i le lagi ma i le lalolagi¹¹—ua faamautinoa mai ai e mafai e le Atua ma o le a faataunuuina Ana folafolaga. O le mea e tatau ai o tatou faamamalu ma usitaia Ana tulafono, ae e le o faamanuiaga uma na muai folafola mai i luga o le usiusitai i le tulafono¹² ua fatuina, mamanu, ma faatulagaina taimi e tusa ai ma o tatou faamoemoega. Tatou te faia le mea sili ae e tatau ona tuu atu ia te Ia le pulega o faamanuiaga, i le faaletino ma le faaleagaga.

Sa faamalamalama mai e Peresitene Polika Iaga e faapea, sa lei fauina lona faatuatua i luga o ni taunuuga po o ni faamanuiaga patino, ae o luga o lana molimau ia Iesu Keriso ma la la’ua sootaga. Fai mai a ia: “E le o tuuina lo’u faatuatua i luga o le galuega a le Alii i motu o le moana, i luga o lona aumaia o tagata iinei, … po o luga o le alofa ua ia faaee atu i luga o lenei nuu po o luga o lena nuu, po o luga foi o lo tatou faamanuiaina po o le le faamanuiaina, ae ua tuu lo’u faatuatua i luga o le Alii o Iesu Keriso, ma lo’u malamalama na ou maua mai ia te ia.”¹³

O lo tatou salamo ma le usiusitai, o a tatou taulaga, ma a tatou galuega lelei e taua. Tatou te mananao e i ai faatasi ma i latou na faamatalaina e Eteru “e faatumulia pea i galuega lelei.”¹⁴ Ae e le faapea ona o faitauga o loo tausia i tusi faamaumau faaselesitila. E taua nei mea ona e faaaofia ai i tatou i le galuega a le Atua, ma o auala foi ia tatou te galulue faatasi ai ma Ia i lo tatou lava faaliliuga mai le tagata natura i le tagata paia.¹⁵ O le mea ua ofo mai e lo tatou Tama Faalelagi ia i tatou o Ia lava ma Lona Alo, o se sootaga vavalalata ma tumau ma i La’ua e ala i le alofatunoa ma le puluvaga a Lona Alo, o Iesu Keriso, lo tatou Togiola.

O i tatou o fanau a le Atua, ua vaetofia mo le tino ola pea ma le ola e faavavau. O lo tatou taunuuga o le avea lea ma Ona suli, “suli-moni faatasi ma Keriso.”¹⁶ E naunau lo tatou Tama e taiala i tatou taitoatasi i luga o Lana ala o feagaiga ua i ai laasaga ua mamanuina e tusa ma o tatou manaoga taitoatasi, ma ua fua faatatau i Lana fuafuaga mo lo tatou fiafia taualuga ma Ia. E mafai ona tatou faatalitali i se talitonuga ma se faatuatuaga faatupulaia i le Tama ma le Alo, se lagona faateleina o lo La’ua alofa, ma le mafanafana ma le taiala faifaipea a le Agaga Paia.

Ae tusa lava, e le mafai lava ona faigofie lenei ala mo se tasi o i tatou. E matua tele naua le faagasologa o le faaleleia e manaomia ina ia faigofie ai. Sa fetalai mai Iesu:

“O au o le vine moni, ma o lo’u Tama o le galue vine ia.

“O la uma lava o ia te au e le fua, e aveeseina e ia; a o la uma e fua, e teuteu e ia, ina ia fua mai ai atili.”¹⁷

O le faagasologa o le finagalo faatonutonu ma le faaleleia o le Atua, o le tulaga e tatau ai, e i ai tulaga faafuasei e le manuia ma tiga i nisi taimi. I le toe tomanatu ai i le tala a Paulo, o i tatou “o suli faatasi ma Keriso; pe afai tatou te tiga faatasi ma iaina ia faamanuiaina foi i tatou faatasi ma ia.”¹⁸

O le mea lea, i le lotolotoi o le afi a le tunu auro, nai le ita i le Atua, ia faalatalata atu i le Atua. Valaau atu i le Tama i le suafa o le Alo. Savavali faatasi ma i La’ua i le Agaga, i lea aso ma lea aso. Tuu atu ia i La’ua pe a mavae se taimi e faaali mai lo La’ua faamaoni ia te oe. Sau ma le faamaoni ia iloa i La’ua ma ia e iloa moni oe lava.¹⁹ Ia Faamuamua le Atua.²⁰ Ua faamautinoa mai i tatou e le Faaola:

“Faalogo ia ia te ia o lē o le fautua i le Tamā, o lē o loo fautuaina la outou tagi i ona luma—

“Ua fetalai atu: Le Tamā e, faauta i mafatiaga ma le oti o lē na lē faia e ia se agasala, o lē na e fiafia tele i ai; faauta i le toto o lou Atalii na faamaligiina, le toto o ia o lē na e tuu atu ina ia faamamaluina oe;

“O le mea lea, le Tamā e, ia faasaoina i latou nei o o’u uso [ma tuafafine] o e ua talitonu i lo’u igoa, ina ia mafai ona latou o mai ia te a’u ma maua le ola tumau-faavavau.”²¹

Mafaufau i ni nai faataitaiga o alii ma tamaitai faamaoni o e sa faalagolago i le Atua, talitonu mautinoa o le a i ai Ana faamanuiaga folafolaina i o latou luga i lenei olaga po o le oti. Sa le’i faavaea lo latou faatuatua i mea sa faia e le Atua pe le’i faia i se tulaga faapitoa po o se taimi, ae i luga o le iloaina o Ia o lo latou Tama agaalofa ma Iesu Keriso o lo latou Togiola faamaoni.

I le taimi na toetoe ai ina fasiotia Aperaamo e osi a’i le taulaga e faitaulaga Aikupito a Elekana, sa ia tagi atu i le Atua ina ia faasaoina o ia, ma sa faia lava e le Atua.²² Na soifua Aperaamo e avea ma tama o le au faatuatua lea e ala mai i ana fanau o le a faamanuiaina ai aiga uma i le laueleele.²³ I se taimi na muamua atu, i le fatafaitaulaga lava lea, na osi atu ai e lena lava faitaulaga a Elekana ia taupou e toatolu o e “ona o lo latou amiomama … sa latou le fia ifo i lalo e tapuai atu i atua laau po o maa.”²⁴ Sa maliliu ai i latou iina o ni maturo.

O Iosefa anamua, na faatauina atu e fai ma pologa a o talavou e ona uso, na liliu atu i le Atua i lona lotomafatia. Na i’u, ina tulai mai o ia i se tulaga lauiloa i le fale o lona matai i Aikupito peitai na i’u ina autala ese ona tulaga alualu i luma ona o tuua’iga pepelo a le ava a Potifara. Sa ono mafai ona manatu Iosefa, “O lona uiga la o le falepuipui o le mea lea ou te maua i le tausiga o le tulafono o le ola mama.” Ae nai lo lena sa faaauau ona ia liliu atu i le Atua ma sa faamanuiaina lava foi i le falepuipui. Sa toe pagatia foi Iosefa i se isi lē fiafia ina ua galo o ia i le pagota sa ia faauo i ai, e ui i lana folafolaga ia Iosefa, ina ua uma ona toefaatula’i o ia i se tulaga o le faatuatuaina i le maota o Farao. Ae mulimuli ane, pei ona outou silafia, sa faasalavei le Alii ina ia tuu Iosefa i le tulaga aupito maualuga o le faatuatuaina ma le paoa e sosoo ma Farao, ia mafai ai e Iosefa ona laveai le aiga o Isaraelu. E moni sa mafai ona tautino atu e Iosefa faapea “e galulue … mea uma lava mo le lelei ia i latou o e ua alolofa i le Atua.”²⁵

Sa naunau faamaoni Apinati e faataunuuina lana matafaioi paia. “Ou te faauma atu laʼu savali, na ia fai atu ai, ma ona lē afaina ai lea [poo le a le mea e tupu ia te a’u] pe afai e faapea e faaolaina aʼu.²⁶ Sa fasiotia faamaturo o ia, ae mautinoa lava sa faasaoina o ia i le malo o le Atua, ma o lana tagata e toatasi pele na liliu mai, o Alema, na suia le kosi o le talafaasolopito o sa Nifae na tau atu i le afio mai o Keriso.

Na faasaoina Alema ma Amoleka mai le falepuipui i Amonaea o le tali atu i la la’ua aioiga, ma sa fasiotia i latou na sauaina i la’ua.²⁷ Peitai, i luma atu, sa lafoina ai e tagata saua lava nei ia fafine ma tamaiti i se afi musaesae. Sa molimauina ma le mafatia e Alema le vaaiga matautia, ae sa taofia e le Agaga ia aua nei ona faaaogaina le mana o le Atua “e faasaoina ai i latou mai le afi musaesae”²⁸ ina ia aveina a’e i latou e le Alii i le mamalu.²⁹

Na gaseā le Perofeta o Iosefa Samita i le falepuipui i Liperate, i Misuri, ua leai se malosiaga e fesoasoani ai i le Au Paia a o tagatavaleina ma tutuliese mai o latou fale i le matuitui o le taumalulu. “Le Atua e, o fea o i ai oe?” Na alaga ai Iosefa. “O le a le umi e taofi ai lou aao?”³⁰ I le tali mai, na folafola mai ai e le Alii: “O lou tiga ma ou puapuaga o le a nao sina minute laitiiti; ma ona oo lea, a fai e te talitalia lelei, o le a faaeaina oe e le Atua i lugā. … E lei avea lava oe e pei o Iopu.”³¹

I le iuga, na mafai e Iosefa ona tautino faatasi atu ma Iopu, “E ui lava ina fasiotia a’u [e le Atua] ae ou te faamoemoe pea ia te Ia.”³²

Sa faamatala e Elder Brook P. Hales le tala ia Sister Patricia Parkinson, o le sa fanau mai ma se vaaiga masani, ae oo atu i le 11 o ona tausaga ua tauaso.

Sa ta’ua e Elder Hales: “Sa ou iloa Pat mo le tele o tausaga ma sa ta’u atu ia te ia talu ai nei ou te faamemelo i le mea moni faapea, e lelei ma fiafia o ia i taimi uma lava. Sa ia tali mai, “Ia, e te le’i i ai i le fale faatasi ma a’u, a ea? E i ai a’u lava taimi faapitoa. Na ou matua tauivi ma faanoanoaga, sa tele na ou tagi.” Peitai, sa ia faaopoopo mai, ‘Mai le taimi na amata ai ona ou le iloa se mea, sa ‘ese lava, ae sa ou iloa sa faatasi mai le Tama Faalelagi ma le Faaola i lo’u aiga ma a’u. Ia i latou o ē fesili mai pe ou te ita ona ua ou tauaso, ou te tali atu: “O ai ou te ita i ai? O loo i ai le Tama Faalelagi faatasi ma a’u i lenei malaga; e lē o tuua na o a’u. O loo faatasi o Ia ma a’u i taimi uma.’”³³

I le faaiuga, o le faamanuiaga o se sootaga vavalalata ma le mausali ma le Tama ma le Alo tatou te sailia. E faia ai le eseesega uma, ma e taua e faavavau le tau. O le a tatou molimau atu faatasi ma Paulo “e faapea o mafatiaga o lenei taimi [i le olaga nei] e le agavaa ona faatusaina i le mamalu o le a faaalia mai ia te i tatou.”³⁴ Ou te tuu atu la’u molimau po o a lava mea e ono aofia ai i o tatou aafiaga faaleolaga nei, e mafai lava ona tatou faalagolago i le Atua ma maua ai le olioli ia te Ia.

“Ia e faatuatua i le Alii ma lou loto atoa; ae aua le faalagolago i lou lava atamai.

“Ia e manatua o ia i ou ala uma, ona faatonuina ai lea e ia lava ou ala.”³⁵

I le suafa o Iesu Keriso, amene.